ཙོབོ་ ཡི་ཤུའི་ ཨ་ཧོ་ལ་ ཡ་ཏོ་ ཛེད་རྡེ་ནོག་།
2
ངེ་ ཤེ་སྤ་ ཕྲུ་རྒུ་རྒུན་, ཁྱི་ཞ་རྒུ་ནི་ རྡིག་པ་ མི་ཅོ་ཤེ་ཕི་ ངེ་ འི་ སྤེ་ར་རྒུན་ འབྲི་འིན་། འིན་ན་ ཀལ་ཏེ་ སུ་ཞིག་རྒེ་ རྡིག་པ་ ཅོ་ནི་, ཀོན་འཇོག་ ཡབ་རྦེ་ ཧུ་འདུན་ལ་ ཨ་ཧོ་རྒུ་ནི་ཕི་ ཞུ་ཝ་ ཞུའི་རྡེ་ ཆེད་པེ་ཀ་ནི་ རྐྱོབ་རྦེ་ ཛེད་ཀན་ཞིག་ ཡོད་ཏེ་ ནོག་, ཁོང་ནི་ ཡི་ཤུ་ མ་ཤི་ཀ་ ཀྲང་པོ་ ཞུ་རྡེ་ འིན་། 2 ཁོང་ནི་, ཏེ་རྒ་རྦོ་ ཞུ་རྡེ་ འིན་, ཀ་རྦེ་ ཨ་ཧོ་རྒུ་ནི་ རྡིག་པ་རྒུན་ སེལ་ལེ་ ཛེད་ཅེ་ཕི་ ཁོ་རང་ངེ་ སྲོག་པོ་ སྲོག་ཆོད་ སལ་ལེ་ ཛེད་, ཡང་ ཨ་ཧོ་ ཅིག་པེ་ཕི་ མག་, འཇིག་རྟེན་པ་ ཚང་མེ་ རྡིག་པ་རྒུ་ནི་ཕི་ལ་།3 ཏ་ ཀལ་ཏེ་ ཨ་ཧོ་རྒུ་ནི་ ཀོན་འཇོག་རྒེ་ ཀཱ་རྒྱ་རྒུན་ ཁ་ཉེན་ནི་, ཏེ་ནི་ ཨ་ཧོ་རྒུན་ལ་ ཁོང་ ཤེ་ཧན་འབོ་ ནེན་ཏེན་ རྒྱུའི་ནོག་། 4 སུ་ཞིག་རྒེ་ “ང་ ཀོན་འཇོག་ ཤེ་རྡེ་ཡོད་” ཟེར་རྡེ་, ཁོང་ངེ་ ཀཱ་རྒུན་ལ་ ཁ་ཉེན་ནེ་ མེད་ནི་, ཁོ་ ཟུན་ཅེན་ ནོག་, ཡང་ ཏེ་ མི་རྦེ་ན་ ཀོན་འཇོག་རྒེ་ རྡེན་འབའ་ མེ་ཀག་། 5 འིན་ན་ སུ་ཞིག་རྒེ་ ཁོང་ངེ་ ཀའ་རྒུ་ནི་ཀ་ ལག་ལེན་ ཅོ་ནི་, ནེན་ཏེན་ ཏོ་རྒུ་ནི་ན་ ཀོན་འཇོག་རྒེ་ ཤེ་སྤ་ ཀང་འདེ་ ཡོ་ཀན་འབོ་ ཐོང་ངེ་ནོག་, ཏོ་རྦེ་ ཨ་ཧོ་རྒུན་ ཀོན་འཇོག་ ཉམ་པོ་ འབྲེལ་རྡེ་ ཡོ་ཀན་འབོ་ ཨ་ཧོ་རྒུན་ལ་ ཧ་ཀོ་ནོག་། 6 སུ་ཞིག་རྒེ་ “ང་, ཀོན་འཇོག་ ཉམ་པོ་ འབྲེལ་རྡེ་ འིན་” ཟེ་འིན་ནི་, ཏེ་ནི་ ཡི་ཤུའི་ མི་ཙེ་ པུད་རྡེ་ ཛེད་ཀན་ ཙོག་སེ་ མི་ཙེ་ཞིག་, ཁོང་རྒུ་ནི་ལ་ པུད་རྒོ་ཤེ་ ནོག་།
ཀཱ་རྒྱ་ སོ་མ་།
7 ཤེ་སྤ་ ཡ་ཏོ་རྒུན་, ངེ་ ཁྱི་ཞ་རྒུན་ལ་ འབྲི་ཀ་ནེ་ ཀཱ་རྒྱ་རྦོ་ སོ་མ་ མ་ནོག་ ཉིང་པ་ཞིག་ འིན་, ཀའོ་ ཁྱི་ཞ་རྒུན་ལ་ འགོ་མ་ནི་ཕ་ལ་ ཐོབ་ཏེ་ ནོག་། ཅིག་ ཏང་ ཅིག་ལ་ ཤེ་སྤ་ ཅོ་ཅེ་ ཏེ་ ཀཱ་རྒྱ་ ཉིང་པ་འབོ་, ཁྱི་ཞ་རྒུ་ནི་ ངུལ་ལ་ ཚོར་རྡེ་ ནོག་། 8 འིན་ན་ ཏེ་ ཀཱ་རྒྱ་འབོ་ སོ་མ་ཞིག་ལ་ ནོག་། ཡི་ཤུའི་ ཁོ་རང་ངེ་ མི་ཙེ་རྦོ་ ཏེ་རྒ་ ཀཱ་རྒྱ་ འདྲན་འདྲ་ པུད་རྡེ་ ཛེད་, ཡང་ ཁྱི་ཞ་རྒུ་ནི་ལ་ པུད་ཏུག་, ཅེ་ཟེར་ནི་ ཁྱི་ཞི་ན་ མུན་ཀྲག་པོ་ མེ་ཀན་ ཆེན་ སོང་འདེ་ ཀོན་འཇོག་རྒེ་ རྡེན་འབེ་ འོད་རྡེ་ འདྃ་རྦོ་ ཁྱབ་རྦེན་ ཆ་རུག་།
9 ཡང་ སུ་ཞིག་རྒེ་ “ང་ འོད་རྡེ་ན་ འིན་” ཟེ་རེན་, འིན་ན་ རང་ངེ་ སྤུན་ ཉམ་པོ་ སོག་པོ་ ཅོ་ནི་, ཏོ་རྒུན་ ཏ་རུང་ང་ མུན་ཀྲག་རྒེ་ན་ འདེད་ཏེ་ ནོག་། 10 ཡང་ སུ་ཞིག་རྒེ་ རང་ངེ་ སྤུན་ ཉམ་པོ་ ཤེ་སྤ་ པོ་རེ་ཡོད་ནི་, ཁོ་ འོད་རྡེ་ན་ ལུའི་རྡེ་ནོག་, ཁོའེ་ན་, ཁོ་ རྡིག་པེ་ན་ འགྱེལ་ཤུག་ཀན་ ཅང་ མེད་ཏེ་ ནོག་། 11 འིན་ན་ སུ་ཞིག་རྒེ་ རང་ངེ་ སྤུན་ཞིག་ལ་ སོག་པོ་ ཅོ་ནི་, ཁོ་ མུན་ཀྲག་རྒེ་ན་ ལུའི་རྡེ་ ཏེ་ན་ འགྲུ་ལེན་ ནོག་། ཁོ་ ཀ་རུ་ ཆེན་ ཁོ་ རྒྱུའི་ མེ་ཀག་, ཅེ་ཟེར་ནི་ མུན་ཀྲག་རྒེ་ ཁོ་ ཞ་ར་ འགྱུར་ཤུག་ཏེ་ ནོག་།
12 ངེ་ ཤེ་སྤ་ ཕྲུ་རྒུ་རྒུན་, ངེ་ ཁྱི་ཞ་ འབྲི་འིན་, ཅེ་ཟེར་ནི་ ཙོབོ་ ཡི་ཤུ་ རྒྱུད་ཏེ་ ཁྱི་ཞི་ རྡིག་པ་རྒུན་ལ་ ཤག་སྤ་ སལ་ལེ་ ཛེད་ཏེ་ འིན་། 13 ཏེཏ་པེ་ན་ ལྡན་ཀན་རྒུན་ ཁྱི་ཞ་ ངེ་ འབྲི་འིན་, ཅེ་ཟེར་ནི་ འགོ་ཟུག་ནི་ཕ་ལ་ ཞུ་རྡེ་ ཡོ་ཀ་ནེ་ མ་ཤི་ཀ་ ཁྱི་ཞི་ ཤེ་རྡེ་ འིན་། ཏེཏ་པེ་ན་ ཁྱོག་ཏོང་རྒུན་ ངེ་ ཁྱི་ཞ་ འབྲི་འིན་, ཅེ་ཟེར་ནི་ ངན་པ་ རྡུད་རྡེ་ཀ་ ཁྱི་ཞ་ རྒྱལ་ཁ་ ཐོབ་ཏེ་ འིན་།
14 ཏེཏ་པེ་ན་ ཕྲུ་རྒུ་རྒུན་, ཁྱི་ཞ་ འབྲི་འིན་, ཅེ་ཟེར་ནི་ ཁྱི་ཞི་, ཀོན་འཇོག་ ཡབ་ ཤེ་རྡེ་ འིན་། ཏེཏ་པེ་ན་ ལྡན་ཀན་རྒུན་ ངེ་ ཁྱི་ཞ་ འབྲི་འིན་, ཅེ་ཟེར་ནི་ ཁྱི་ཞི་ འགོ་ཟུག་ནི་ཕ་ལ་ ཞུ་རྡེ་ ཡོ་ཀ་ནེ་ མ་ཤི་ཀ་ ཤེ་རྡེ་ འིན་། ཏེཏ་པེ་ན་ ཁྱོག་ཏོང་རྒུན་, ངེ་ ཁྱི་ཞ་ འབྲི་འིན་, ཅེ་ཟེར་ནི་ ཁྱི་ཞི་ མ་ཤི་ཀེ་ན་ ཏེཏ་པ་རྦོ་ རྟེམ་པོ་, ཡང་ ཀོན་འཇོག་རྒེ་ ཀའ་ ཁྱི་ཞི་ ཉིང་རྒུ་ནི་ན་ ལུའི་རྡེ་ ཁྱི་ཞ་ ངན་པ་ རྡུད་རྡེ་ཀ་ རྒྱལ་ཁ་ ཐོབ་ཏེ་ འིན་།
འཇིག་རྟེན་ནེ་ཕི་ འདོད་པ་ མ་ཅོ་ཧེ་།
15 འཇིག་རྟེན་ འདང་ འཇིག་རྟེན་ནེ་ན་ ཡོ་ཀན་རྒུ་ནི་ཀ་ སེམ་ མ་ཆ་ཧེ་། ཀལ་ཏེ་ མི་ཞིག་ འཇིག་རྟེན་ འདང་, ཏེ་ན་ ཡོ་ཀན་རྒུན་ལ་ ཆག་ནི་, ཁོའེ་ན་ ཡབ་ ཀོན་འཇོག་རྒེ་ཕི་ ཤེ་སྤ་ མེ་ཀག་། 16 ཅེ་ཟེར་ནི་ འཇིག་རྟེན་ནེ་ ལེ་ཧ་ ཚང་མེ་ན་, རྡིག་པེ་ འདོད་པ་, མིག་ནི་ ཐོང་ཀན་ ཚང་མེ་ འདོད་པ་ རྡང་, རང་ལ་ ཡོ་ཀན་ འདང་ ཅོ་ཀན་རྒུ་ནི་ཀ་ ཕོ་སོ་ ཡོང་ངེ་ནོག་། ཏོ་རྒུན་ ཡབ་ ཀོན་འཇོག་རྒེ་ ཆོག་ནི་ མག་, འཇིག་རྟེན་ནེ་ ཆོག་ནི་ ནོག་། 17 འཇིག་རྟེན་ འདང་ འཇིག་རྟེན་ནེ་ མི་རྒུ་ནི་ འདོད་པ་རྒུན་ མེ་ཀན་ ཆེན་, འིན་ན་ ཀོན་འཇོག་རྒེ་ ཐུག་ཐེད་ ནང་ཞིན་ འགྲུལ་ཧན་རྒུན་ ཏུའི་རྒྱུན་ སོན་པོ་ ལུའི་རྡེན་།
མ་ཤི་ཀེ་ འགྲ་ཝོ་ ཡོང་ཅེ་ ཧོར་།
18 ཤེ་སྤ་ ཕྲུ་རྒུ་རྒུན་, འདང་ཏི་རིང་ ཐ་མེ་ ཏུའི་ ནོག་། མ་ཤི་ཀེ་ འགྲ་ཝོ་ ཡོང་ཅེའོ་ ཁྱི་ཞ་རྒུ་ནི་ ཚོར་རྡེ་ ནོག་, ཡང་ ཏག་ས་ལ་ མ་ཤི་ཀེ་ འགྲ་ཝོ་ མང་པོ་ཞིག་ ཡོྃ་ ཚར་རྡེ་ ནོག་། ཏོ་རྦེ་ཀ་ནི་ ཏུའི་ ཐ་མ་ ལེབ་ཏེ་ འིན་ཀན་འབོ་ ཨ་ཧོའེ་ ཤེ་རྡུག་། 19 ཏོ་རྒུན་ ཨ་ཧོ་རྒུ་ནི་ ཕྲོ་ནི་ འབིང་འདེ་ སོང་, འིན་ན་ རྡེན་འབའ་ ཁོང་རྒུན་ ཨ་ཧོའེ་ སྤུན་ མན་འབེན་, ཀལ་ཏེ་ འིན་འབེན་ནི་, ཨ་ཧོ་རྒུན་ ཉམ་པོ་ འདེད་ཏེ་ ཡོད་ཁྲོ་། ཏ་ ཁོང་རྒུན་ ཨ་ཧོ་རྒུ་ནི་ ཕྲོ་ནི་ འབིང་འདེ་ ཆ་ཅེ་ཀ་ནི་, ཁོང་རྒུན་ ཨ་ཧོ་རྒུ་ནི་ སྤུན་ མན་ཀན་འབོ་ རྟེམ་པོ་ འགྱུར་རྡེ་ ནོག་།
20 འིན་ན་ ཁྱི་ཞ་རྒུན་ལ་ ཀོན་འཇོག་རྒེ་ ཏམ་པེ་ ཐུག་ཡིད་ སལ་ལེ་ ཛེད་པེ་, ཁྱི་ཞ་ ཚང་མ་ རྡེན་འབོ་ ཧ་ཀོ་ནོག་། 21 ངེ་ ཁྱི་ཞ་རྒུན་ལ་ རྡེན་འབའ་ རྒྱུའི་ མེ་ཀག་ སམ་འདེ་ མན་, ཁྱི་ཞ་རྒུན་ལ་ ནེན་ཏེན་ ཤེ་རྡེ་ ཡང་ ཟུན་འབོ་ རྡེན་འབེ་ ཆོག་ནི་ མི་ཡོང་ཅེའོ་ རྒྱུའི་ཡོད་ཅེ་ཀ་ནི་ འབྲི་རྡེ་ འིན་། 22 ཏེ་ནི་ ཟུན་ཅེན་ སུ་ ནོག་? “ཡི་ཤུ་རྦོ་ མ་ཤི་ཀ་a མག་” ཟེར་ཧན་འབོ་ མ་ཤི་ཀེ་ འགྲ་ཝོ་ ནོག་, ཁོའེ་, ཡབ་ ཏང་ སྲེ་ ཉ་ཧ་ ཁོ་རང་ངེ་ ཙོབོ་ མ་སི་རྒེ་ ནོག་། 23 སུ་ཞིག་རྒེ་ ཡི་ཤུ་, ཀོན་འཇོག་རྒེ་ སྲེ་ འིན་ཀན་འབོ་ ཐེའེ་མེད་ནི་, ཏེ་ མི་རྦེ་ ཡབ་ ཉམ་པོ་ལ་ འབྲེལ་མེད་ཏེ་ ནོག་། ཡང་ སུ་ཞིག་རྒེ་ ཡི་ཤུ་ ཀོན་འཇོག་རྒེ་ སྲེ་ འིན་ཀན་འབེ་ སྤང་པོ་ ཏང་ནི་, ཁོའེ་ འབྲེལ་ ཡབ་ ཉམ་པོ་ལ་ ཡོད་ཏེ་ ནོག་།
24 འགོ་མ་ནི་ཕ་ལ་ ཚོར་ཧ་ནེ་ ཏེ་ ཁྲིན་ ཟང་པོ་ ཁྱི་ཞ་རྒུ་ནི་ ཉིང་ངེ་ན་ ལུའི་རྒོའེ་། ཀལ་ཏེ་ ཏོ་ ཁྱི་ཞ་རྒུ་ནི་ན་ ལུའི་ནི་, ཁྱི་ཞ་རྒུ་ནི་ འབྲེལ་རྦོ་ ཡབ་ ཏང་ སྲེ་ ཉམ་པོ་ལ་ ལུའི་རྡེན་། 25 ཏོ་རྦེ་ འབྲེ་རྦུ་ནི་, ཨ་ཧོ་རྒུན་ལ་ ཐ་མེད་པེ་ མི་ཙེ་ ཐོབ་ཅེ་ ཁོང་ངེ་ ཞལ་ཆེཏ་ ཛེད་ཀན་འབོ་ ནོག་།
26 ངེ་ ཏེ་ སྤེ་ར་རྒུན་, ཁྱི་ཞ་རྒུན་ འགོམ་ཧོར་རེ་ན་ ཁྱོང་ཅེ་ ཙོན་འགྲུའི་ ཅོ་ཀན་རྒུ་ནི་ ཧོར་ལ་ སྤང་པུད་ཅེ་ལ་ འབྲི་རྡེ་ འིན་། 27 འིན་ན་ ཀོན་འཇོག་རྒེ་ཀ་ནི་ ཐོབ་ཀ་ནེ་ ཏམ་པེ་ ཐུག་ཡིད་པོ་ ཁྱི་ཞི་ན་ ལུའི་ཤེ་ཀ་ནི་, ཁྱི་ཞ་རྒུན་ལ་ སུ་ཞིག་ལ་ ལབ་རྒོའེ་ མེ་ཀག་། ཐུག་ཡིད་ ཁོ་རང་ངེ་ ཁྱི་ཞ་རྒུན་ལ་ ཅི་ཚང་མ་ ལབ་རྦེ་ ཛེ་རྡེ་ནོག་། ཏེ་ ལབ་ཞ་རྒུན་ རྡེན་འབེ་ ནོག་, ཟུན་ མག་། ཏེ་ནི་ ཀ་ཟུག་ ཁོང་ངེ་ ལབ་རྦེ་ ཛེད་, ཁྱི་ཞ་རྒུན་ མ་ཤི་ཀ་ ཉམ་པོ་ འབྲེལ་རྡེ་ འདོད་ཧེ་།
ཀོན་འཇོག་རྒེ་ ཕྲུ་རྒུ་རྒུ་ནི་ ཚུལ་ལ་ འདེད་ཅེ་ ཧོར་།
28 ཏེ་རྒ་རྦེ་ཕི་ལ་ ཤེ་སྤ་ ཕྲུ་རྒུ་རྒུན་, མ་ཤི་ཀ་ ལོག་ཏེ་ རྐྱོད་ཟ་ནི་, ཁྲེལ་རྦ་ མ་ཆ་ ཡང་ ཨ་ཧོ་རྒུན་ འཇིའི་ མ་འཇིའི་རྡེ་, ཁོང་ངེ་ འདུན་ལ་ ལྃ་ཤེ་ཕི་ ཁོང་ངེ་ན་ འབྲེལ་རྦོ་ ཆད་མེད་ལ་ པོར་ཧེ་།
29 མ་ཤི་ཀ་ ཀྲང་པོ་ འིན་ཀན་འབོ་ ཁྱི་ཞ་རྒུན་ལ་ རྒྱུའི་ཡོད་ཅེ་ཀ་ནི་, ལེ་ཧ་ ཀྲང་པོ་ ཅོ་ཀན་རྒུན་ ཁོང་ནི་ རྐྱེ་རྡེ་ འིན་ཀན་འབོ་ལ་ རྒྱུའི་ནོག་།