ཨིབ་རི་པ་ 9

འཇིག་རྟེན་ནི་ ཅོལ་སེ་ མལ་ལ་།

ཀོན་འཇོག་རྒེ་ ཨིས་ར་ཡེལ་པ་རྒུན་ ཉམ་པོ་ ཛེད་ཀ་ནེ་ ཞལ་ཆེཏ་ ཏང་པོ་རྦོ་, ཅོལ་ཤེ་ ཁྲིམ་ འདང་, ཅོལ་སེ་ མལ་ལ་ ཡོད་ཏེ་ ནོག་། 2 ཏེ་ ཅོལ་ཤེ་ ཀུར་རྦེ་ན་ ནང་མི་ ཉི་ ཡོད་པེན་། ཅིག་པེ་ན་ འོད་རྟག་, ཅོག་ཙེ་ རྡང་, ཅོག་ཙེ་ཀ་ ཏམ་པེ་ ཏི་རྒིར་རྒུན་ ཡོད་པེན་, ཡང་ འི་ ནང་འབོ་ལ་ ཏམ་པེ་ མལ་ལ་ ཟེ་ཡོད་པེན་། 3 ཏུ་རུ་ ཡོ་ལ་ཞིག་ ཡོད་པེན་ ཡང་ ཡོ་ལེ་ རྒྱབ་ལོག་པོ་ལ་ ནང་མི་ ཉི་སྤ་རྦོ་ ཡོད་པེན་, ཀའོ་ལ་ ཚང་མེ་སང་ ཏམ་པ་ མལ་རྦོ་ ཟེ་ཡོད་པེན་། 4 ཏེ་ནི་ སེར་རེ་ སང་སྤོར་ རྡང་ ཆེཏ་ཏོན་ནེ་ རྒམ་ ཟེར་ཧ་ནེ་ ཤིང་ངེ་ རྒམ་, ཆོག་ ཚང་མ་ནི་ སེར་རེ་ ཏུམ་ཀན་འབོ་ ཡོད་པེན་། ཏེ་ རྒམ་མེ་ ནང་ཀུ་ལ་ མན་ན་ ཟེར་ཧ་ནེ་ ཏི་རྒིར་ རྒྱང་ཀ་ནེ་ སེར་རེ་ ནོད་, ཨ་རོན་ནི་ ཆག་རྦེར་ ལོ་མ་ རྐྱེ་ཀན་, ཡང་ ཆེཏ་ཏོན་ འབྲི་ཀ་ནེ་ རྡོ་ ལེབ་ལེབ་རྒུན་ ཡོད་པེན་། 5 རྒམ་མེ་ ཁ་ཏོཏ་པེ་ཀ་ ཟི་ཞིད་ཅེན་ ཆེ་ར་འབེམ་ ཉི་ ཟོ་ ཅོའེ་རྡེ་ ཡོད་པེན་, ཀའོ་རྒུ་ནི་ ཤོག་པེ་ ཀོན་འཇོག་རྒེ་ ཉིང་ཞེ་ ཐོབ་སེ་ མལ་རྦོ་ ཀབ་ཏེ་ ཡོད་པེན་། ཏག་ས་ ཏོ་རྒུ་ནི་ ཧོར་ལ་ ཞིབ་སལ་ ཅོའེ་རྡེ་ ཤེད་རྒོའེ་ མེ་ཀག་།

6 འི་ ཚང་མ་ རང་རང་ངེ་ མལ་ལེ་ཀ་ པོར་ཤེ་ ལེ་ཧ་རྦོ་ ཚར་རྡེ་ ལྟིང་ནི་, ལ་མ་རྒུན་ ཁོ་རང་རྒུ་ནི་ ཆོའེ་ ཁག་རྒུན་ ཅོ་ཅེ་ལ་ ཏེ་ ཏང་པོ་ ནང་འབེ་ན་ ཞག་ཏང་ ཆ་ཡོད་པེན་། 7 འིན་ན་ ཚང་མེ་སང་ མལ་ ཏམ་པ་རྦེན་ ལ་མ་ ཆོན་མོ་ མ་ནི་, སུ་ཞི་ལ་ ཆ་ཆོག་རྒེ་ མེད་པེན་, ཏེ་རྦོ་ལ་ ལོ་ ཅིག་རྒེ་ན་ ལེན་པོ་ ཅིག་། ཡང་ ཁོའེ་ ཁོ་རང་ འདང་ མི་རྒུ་ནི་ རྒྱུའི་མེད་རྡེ་ ཅོ་ཀ་ནེ་ རྡིག་པ་རྒུ་ནི་ཕི་, ཁྲག་རྒེ་ ཆོད་པ་ པུ་ལེ་ཡོད་པེན་། 8 འི་ ཁྲིམ་རྒུན་ ཅོ་ཅེ་རྦེ་, ཏེ་ ཚང་མེ་སང་ ཏམ་པེ་ མལ་, ཚང་མེ་ཕི་ མ་པེ་ འིན་ཀན་འབོ་ ཏམ་པེ་ ཐུག་ཡིད་རྡེ་ ངོན་ཅུག་རྒེ་ ཛེད་, ནམ་ཚུག་པ་ ཏེ་ ཅོལ་སེ་ ཀུར་རྦོ་ ལུའི་།

9 ཏེ་ ཅོལ་ཤེ་ ཚིར་ཧ་, ཡང་ནི་ ལ་མེ་ ཆོད་པ་ པུལ་ཧ་ནེ་ ཁྱོའེ་མ་ རྡང་ སྲོག་ཆོད་རྒུ་ནི་, ཅོལ་ཧན་རྒུ་ནི་ སེམ་རྒུན་ སང་མ་ ཅོ་ མ་ཉེན་ཀན་འབོ་ འི་ཏུའི་ སྤེ་ཞིག་ ནོག་། 10 ཏེ་ ཉིང་པ་ ཚིར་ཧ་རྦོ་ ཟ་ཅེ་, ཐུང་ཅེ་ རྡང་ སང་མ་ ཅོ་ཅེ་ ལུག་སྲོལ་རྒུན་ ཉམ་པོ་ འབྲེལ་རྡེ་ ནོག་, ཡུ་ཙོག་སེ་ ཟུག་སྤེ་ ཐོག་རྒེ་ ཚིར་ཧ་རྒུན་ ཏེ་ སོ་མ་ ཆེཏ་ཏོན་ འགོ་ཟུག་ ཆ་ཆ་ཚུག་པ་ ལུའི་རྡེན་།

མ་ཤི་ཀ་རྦོ་ ཕུན་སུམ་ཚོག་སྤེ་ སྲོག་ཆོད་པོ་ འིན་།

11 འིན་ན་ ཐོབ་ཀ་ནེ་ ཅིན་ལབ་ ཚང་མེ་, ལ་མ་ ཆོན་མོ་ འགྱུར་རྡེ་ ལྟིང་ནི་ མ་ཤི་ཀ་, རྡེ་བ་ཅན་ནི་ ཕུན་སུམ་ཚོག་སྤེ་ ཀུར་རེ་ ནང་ཀུ་ལ་ རྐྱོད་རྡེ་ ཛེད་, ཀའོ་ མི་ ལག་པ་ནི་ མ་ཅོ་ཀན་ ཡང་ ཛམ་ལིང་ངེ་ ཁག་ཅིག་ མག་། 12 ར་མ་ རྡང་ པེ་ཏོ་ ཁྲག་རྒུན་ མན་, མ་ཤི་ཀ་ ཁོ་རང་ངེ་ ཧུ་ཁྲག་ རྒྱུད་ཏེ་, ཏུའི་རྒྱུན་ནེ་ཕི་ ལན་ཅིག་ ཚང་མེ་སང་ མལ་ ཏམ་པ་རྦེ་ན་ རྐྱོད་རྡེ་ ཛེད་། ཏོ་རྦེ་ ཅོའེ་རྡེ་ ཁོང་ངེ་ ཨ་ཧོ་རྒུ་ནི་ རྡིག་པེ་ རིན་འབོ་ ཏུའི་རྒྱུན་ནི་ཕི་ ཤལ་ལེ་ ཛེད་།

13 ར་མ་ རྡང་ ལང་ཀྲོ་རྒུ་ནི་ ཁྲག་ ཡང་ པེ་ཏོ་ སྲག་ཀ་ནེ་ ཀོག་ཏལ་ ལུག་སྲོལ་ ནང་ཞིན་ ཀྲིཔ་ འགྱུར་ཧན་རྒུ་ནི་ཀ་ ཡོག་ཅེ་རྦེ་, ཁོང་རྒུན་ ཟུྃ་སྤེ་ ཐོག་ནི་ སང་མ་ འགྱུར་རེ་ནོག་། 14 ཏེ་ནི་ སམ་བ་ སལ་ཧེ་, སོན་ཏེ་ ཀོན་འཇོག་ལ་ ཅོལ་ཤེ་ལ་ མ་ཤི་ཀེ་ ཧུ་ཁྲག་པེ་, ཨ་ཧོའེ་ སེམ་འབོ་ ཏེ་ ངན་པེ་ ལེ་ཧ་རྒུ་ནི་ ཙམ་ཤིག་ སང་མ་ མི་ཛེད་? ཐ་མེད་པེ་ ཐུག་ཡིད་རྡེ་ ཤུག་ རྒྱུད་ཏེ་, ཨ་ཧོའེ་ རྡིག་པེ་ཕི་ མ་ཤི་ཀེ་ ཁོ་རང་ ཕུན་སུམ་ཚོག་པ་ སྲོག་རྒེ་ ཆོད་པེ་ ཚུལ་ལ་ ཀོན་འཇོག་ལ་ པུ་ལེ་ ཛེད་། 15 ཏེ་རྒ་རྦེ་ཕི་ལ་ མ་ཤི་ཀ་, ཀོན་འཇོག་ ཏང་ མི་རྒུ་ནི་ པར་ལ་ ཆེཏ་ཏོན་ སོ་མེ་ པར་མི་རྦོ་ ནོག་། ཏོ་ རྒྱུད་ཏེ་ ཀོན་འཇོག་རྒེ་ འདམ་མེ་ ཛེད་ཀན་ མི་རྒུན་ལ་, ཁོང་ངེ་ ཞལ་ཆེཏ་ ཛེད་ཀ་ནེ་ ཐ་མེད་པེ་ ནོར་ཧལ་རྒུན་ ཐོབ་ཉེན་ནེན་། ཀོན་འཇོག་རྒེ་ འདམ་མེ་ ཛེད་ཀ་ནེ་ མི་, ཀའོ་རྒུ་ནི་ ཆེཏ་ཏོན་ ཏང་པེ་ ཡོག་ལ་ རྡིག་པ་ ཅོའེ་, ཏོ་རྒུན་ལ་ ཆེད་པེ་ཀ་ནི་ ཐར་པ་ སལ་ཅེ་ལ་ མ་ཤི་ཀ་ ཀྲོང་ངེ་ ཛེད་།

16 ནོར་ཧལ་ལེ་ ཐོ་ འབྲི་ཀ་ནེ་ ཤུ་རྒུ་ལ་ ལྟ་ཅེ་ཕི་, ཏེ་ འབྲི་ཀ་ནེ་ མི་ ཤི་རྡེ་ འིན་ཀན་འབོ་ ནེན་ཏེན་ ཅོ་རྒོའེ་། 17 མིའུ་ ཤི་རྡེ་ ལྟིང་ནི་ མ་ནི་, ཏེ་ འབྲི་ཀན་འབོ་ ལག་ལེན་ནེ་ན་ ཡོང་ངེ་ མག་། ནོར་ཧལ་ འབྲི་ཀ་ནེ་ མིའུ་ སོན་པོ་ ཡོད་རྡེ་ ཏུའི་ལ་ ཏེ་ འབྲི་ཀན་འབོ་ ཀོལ་ཉེ་ནེ་ མག་།

18 ཏེ་རྒ་རྦེ་ཕི་ལ་ ཏང་པོ་ ཆེཏ་ཏོན་འབོ་ སེམ་ཅེན་ནེ་ ཁྲག་ རྒྱུད་ཏེ་ ལག་ལེན་ནེ་ན་ ཁྱོང་། 19 མོ་ཤེ་, མི་ཚང་མ་ལ་ ཀོན་འཇོག་རྒེ་ ཀཱ་རྒྱ་ ཚང་མ་ སིལ་རྡེ་ ལྟིང་ནི་, ཁོང་ངེ་ པེ་ཏོ་ རྡང་ ར་མ་རྒུ་ནི་ ཁྲག་ ཡང་ ཆུ་, མར་སྤོ་ པལ་ རྡང་ ཧི་སོབ་ ཟེར་ཧ་ནི་ ལྕང་མེ་ ཡ་ལག་རྒུན་ ཉམ་པོ་, ཁྲིམ་མེ་ སྤེ་ཆ་ རྡང་ མི་ཚང་མེ་ཀ་ ཡོག་རྒེ་ ཛེད་། 20 ཁོང་ངེ་ མོལ་, “འི་ ཁྲག་པེ་ ཀོན་འཇོག་རྒེ་ ཁྱི་ཞ་རྒུན་ལ་ ཁ་ཉོན་ མོལ་ཧ་ནེ་ ཆེཏ་ཏོན་འབོ་ རྟེམ་པོ་ ཅོ་ནོག་།” 21 ཏེ་རྒ་ ཙོག་སེ་ ཁོང་ངེ་ ཁྲག་པོ་, ཀུར་ རྡང་ ཅོལ་ཤེ་ལ་ ཀོལ་ཧ་ནེ་ ནོད་ ཚང་མེ་ཀ་ ཡོག་རྒེ་ ཛེད་། 22 འོ་ནེ་, མོ་ཤེ་ ཁྲིམ་ ནང་ཞིན་ ཧ་ལམ་ ཅི་ཚང་མ་ ཁྲག་ རྒྱུད་ཏེ་ སང་མ་ ཛེ་རྡེ་ཡོ་ཀག་, ཡང་ ཁྲག་ པོའེ་རྡེ་ མ་ནི་ རྡིག་པ་ ཤག་སྤ་ ཐོབ་རྦེ་ མག་།

23 ཏེ་རྒ་རྦེ་ཕི་ལ་ ཀུར་ རྡང་ ཏེ་ན་ ཡོ་ཀན་ ཚང་མ་, ཀའོ་རྒུན་ རྡེ་བ་ཅན་ནེ་ན་ ཡོ་ཀ་ནེ་ སྤེ་རྒུན་ འིན་, ཏོ་རྒུན་ སེམ་ཅེན་ནེ་ ཁྲག་ རྒྱུད་ཏེ་ སང་མ་ ཅོ་རྒོའེ་ཡོད་པེན་། འིན་ན་ རྡེ་བ་ཅན་ནེ་ན་ ཡོ་ཀ་ནེ་ ངོའེ་མ་རྒུན་ སང་མ་ ཅོ་ཅེ་ལ་ སེམ་ཅེན་ནེ་ ཁྲག་རྒེ་སང་ མང་ངེ་ ཀྲག་པོ་ སྲོག་ཆོད་རྡེ་ རྒོའེ་ཤེ་ ཡོད་ཏེ་ ནོག་། 24 མ་ཤི་ཀ་ མི་རྒུ་ནི་ ལག་པ་ནི་ ཅོ་ཀ་ནེ་ མལ་ ཏམ་པ་རྦེ་ན་ མ་རྐྱོད་, ཀའོ་ རྡེ་བ་ཅན་ནེ་ན་ ཡོ་ཀ་ནེ་ ངོའེ་མ་རྦེ་ ཀྲིབ་ཉག་ཅིག་ འིན་། ཀོན་འཇོག་རྒེ་ ཧུ་འདུན་ལ་ ཨ་ཧོ་རྒུ་ནི་ ཚབ་ ཅོའོ་ ཛེད་ཅེ་ཕི་, ཁོང་ རྡེ་བ་ཅན་ནེ་ན་ རྐྱོད་རྡེ་ ཛེད་། 25 ཁོང་ རྡེ་བ་ཅན་ནེ་ན་ ཡང་ནི་ ཡང་ ཁོ་རང་ ཆོད་པ་ པུལ་ཤེ་ལ་ མ་རྐྱོད་, ཀ་ཟུག་ འཇིག་རྟེན་ནེ་ ལ་མ་ ཆོན་མེ་ ཁོ་རང་ངེ་ ཁྲག་ མན་, སེམ་ཅེན་ནེ་ ཁྲག་ ཁུར་རྡེ་ ལོ་འདང་ ཚང་མེ་སང་ མལ་ ཏམ་པ་རྦེ་ན་ ཆ་ནོག་། 26 ཀལ་ཏེ་ ཏོ་ ཅོ་རྒོའེ་རྦེ་ནི་ ཏེ་ནི་ འཇིག་རྟེན་ ཚུག་རྦེ་ནི་ཕ་ལ་ མ་ཤི་ཀ་ ལེན་ མང་པོ་ ཀྲོང་རྒོའེ་ ཛེད་ཏེ་ ཡོད་ཁྲོ་། འིན་ན་ ཏ་, འི་ ལྟིང་འཇུག་རྒེ་ ཏུའི་ན་ ཁོང་ འཇལ་རྡེ་ ཏུའི་རྒྱུན་ནེ་ཕི་ ལན་ཅིག་, རྡིག་པ་ ཚང་མ་ མེ་ཀན་ ཛེད་ཅེ་ལ་ ཁོ་རང་ངེ་ སྲོག་པོ་ ཆོད་པ་ པུ་ལེ་ ཛེད་།

27 ཀ་ཟུག་རྒེ་ མི་ཚང་མ་ ལན་ཅིག་ ཀ་ན་མེད་ ཤི་རྒོའེ་རྡེ་ནོག་, ཡང་ ཏོ་རྦེ་ ལྟིང་ནི་ ཀོན་འཇོག་རྒེ་ ཁྲིམ་ཅེད་པོ་ ཉོང་རྒོའེ་། 28 ཏེ་རྒ་ ཙོག་སེ་ མ་ཤི་ཀ་ ལན་ཅིག་ མི་ མང་པེ་ རྡིག་པ་རྒུ་ནི་ ཆེད་པ་རྦོ་ ནམ་འདེ་ ཀྲོང་ངེ་ ཛེད་། ཨ་ཧོ་རྒུ་ནི་ རྡིག་པེ་ ཆེད་པ་ ནམ་ཅེ་ལ་ མ་ནོག་, ཁོང་ལ་ སྲུྃ་རྡེ་ ཡོ་ཀན་རྒུན་ རྐྱོབ་ཅེ་ལ་ ཁོང་ ཡང་ རྐྱོད་རྡེ་ ཛེ་རྡེན་།