མ་ཤི་ཀ་རྦོ་ ཨ་ཧོ་རྒུ་ནི་ ལ་མ་ ཆོན་མོ་ ཞུ་རྡེ་ནོག་།
8
ངེ་ ཟེར་ཤེ་ ཏོན་འབོ་, ཨ་ཧོ་རྒུན་ལ་ ལ་མ་ ཆོན་མོ་ཞིག་ ཡོད་ཏེ་ ནོག་། ཁོང་ནི་ རྡེ་བ་ཅན་ནེ་ན་ ཟི་ཞིད་ཅེན་ནེ་ ཀོན་འཇོག་རྒེ་ ཞུ་ཁྲིའི་ ཡོའེ་སྤ་ ཆོག་ལ་ སི་ཝ་ཅེན་ནེ་ མལ་ལེ་ཀ་ ཞུ་ཧན་འབོ་ འིན་། 2 ཡང་ རྡེ་བ་ཅན་ནེ་ ཀུར་, ངོའེ་སྤོ་ ཅོལ་སེ་ མལ་ལེ་ན་ ལ་མེ་ ཚུལ་ལ་ ཞབ་རྟོག་ ཞུ་ ཛེ་རྡེ་ནོག་, ཀའོ་ མི་ མ་ཅོ་ལ་ ཙོབོ་ ཀོན་འཇོག་རྒེ་ ཅོའོ་ ཛེད་ཏེ་ ནོག་།3 ལ་མ་ ཆོན་མོ་ ཚང་མ་, ཁྱོའེ་མ་ རྡང་ སྲོག་ཆོད་རྒུན་ པུལ་ཤེ་ལ་ ཧོ་ ཛེད་ཅེ་ཀ་ནི་, ཨ་ཧོ་རྒུ་ནི་ རྡེ་བ་ཅན་ནེ་ ལ་མ་ ཆེན་མོ་ལ་ པུལ་ཤེ་ལ་ ཆོད་པ་ཞིག་ ཡོང་རྒོའེ་། 4 ཀལ་ཏེ་ ཁོང་, འི་ འཇིག་རྟེན་ནེ་ཀ་ ཞུ་རྡེ་ ཡོད་པེ་ནི་ ཏེ་ནི་ ཁོང་ ལ་མ་ཞིག་ འིན་ ཁོ་རང་ མན་འགྲོ་, ཅེ་ཟེར་ནི་ འི་རུ་ ཁྲིམ་ ནང་ཞིན་ ཆོད་པ་ པུལ་ཧ་ནེ་ ལ་མ་རྒུན་ ཡོད་ཏེ་ ནོག་། 5 ལ་མ་རྒུན་ནེ་ ཞབ་རྟོག་ ཞུའིན་ ཅོལ་སེ་ མལ་རྦེ་ རྡེ་བ་ཅན་ནེ་ན་ ཡོད་ཀ་ནེ་ ངོའེ་མ་རྦེ་ ཀྲིབ་ཉག་ ཙོག་ཤིག་ ནོག་། ཏེ་རྒ་རྦེ་ཕི་ལ་ མོ་ཤེ་ ཀུར་ ཅོ་ཅེའོ་ འགོ་ཟུག་ ཅོ་ཟ་ནི་, ཀོན་འཇོག་རྒེ་ ཁོ་ སྤང་པུད་རྡེ་ ཛེད་ཏེ་ མོལ་, “ངེ་ ཁྱེ་རང་ལ་ རི་ཀ་ ཤེད་ཀན་ ནང་ཞིན་, ཏེ་ ཀུར་རྦོ་ ཅོ་ཅེ་ན་ ཚིར་ རྡང་ ཀུར་རེ་ རིང་ འདང་ ཞང་ ཚང་མ་ ནེན་ཏེན་ ཅོ་རྒོའེ་།”
6 འིན་ན་ ཏ་ ཀོན་འཇོག་རྒེ་ ཨ་ཧོའེ་ ལ་མ་ ཆོན་མོ་ ཡི་ཤུ་, ངུལ་མེ་ ལ་མ་རྒུ་ནི་སང་ མང་ངེ་ རྒྱེ་སྤ་ ཞབ་རྟོག་ ཞུ་ཅེ་ཞིག་ སལ་ལེ་ ཛེ་རྡེ་ནོག་། ཏེ་རྒ་ ཙོག་སེ་ ཁོང་ངེ་ ཀོན་འཇོག་ ཏང་ ཨ་ཧོ་རྒུ་ནི་ པར་ལ་ ཆེཏ་ཏོན་ སོ་མ་ ཛེད་ཀན་འབོ་ ངུལ་མེ་སང་ རྒྱེ་སྤ་ ནོག་། ཏོ་རྦེ་ན་ ཀོན་འཇོག་རྒེ་ཀ་ནི་ ཨ་ཧོ་ལ་ ཐོབ་ཅེ་ཅེན་ནི་ ཅིན་ལབ་རྒུན་, མང་ངེ་ རྒྱལ་ལ་ ཞལ་ཆེཏ་ཞིག་རྒེ་ཀ་ ལྟེན་རྡེ་ ནོག་།
7 ཀལ་ཏེ་ འགོ་མེ་ ཆེཏ་ཏོན་འབོ་ རྐྱོན་མེད་ཅིག་ ཡོད་པེ་ནི་, ཏེ་ནི་ ཏོ་རྦེ་ ཚབ་ལ་ ཆེཏ་ཏོན་ ཉི་སྤེ་ རྒོའེ་ཤེ་ མེད་ཁྲོ་། 8 འིན་ན་ ཀོན་འཇོག་རྒེ་ མི་རྒུ་ནི་ན་ རྐྱོན་ ཟིའི་རྡེ་ མོལ་,
“ཞག་པོ་ ལེབ་རྦེན་ ནོག་ ཙོབོ་ ཀོན་འཇོག་རྒེ་ མོལ་,
ངེ་ ཨིས་ར་ཡེལ་ རྡང་ ཡུ་འདཱ་པ་ མི་རྒུན་ ཉམ་པོ་ ཆེཏ་ཏོན་ སོ་མ་ཞིག་ ཅོའེན་།
9 འི་ ཆེཏ་ཏོན་འབོ་ ངེ་ ཁོང་རྒུ་ནི་ ཕ་མེ་པོ་རྒུན་ ཉམ་པོ་ ཅོ་ཀན་འབོ་ ཙོག་སེ་ མི་ཡོང་,
ཀའོ་ཟ་ནི་ ངེ་ ཁོང་རྒུན་ལ་ ལག་པ་ ཐམ་འདེ་ ཨི་འཇིབ་ནེ་ ཕི་ལོག་ལ་ ཁྲིད་ཏེ་ ཁྱེར་འབེན་།
ཁོང་རྒུན་ ངེ་ ཆེཏ་ཏོན་འབེ་ན་ ལོ་ཁྱེལ་ཅེན་ མ་ལུའི་རྦེ་,
ངེ་ ཁོང་རྒུན་ལ་ རྒྱབ་ འགྱུར་རྦེན་, ཙོབོ་རྡེ་ མོལ་།
10 འིན་ན་ ཏེ་ལྟིང་ནི་ འི་རྦོ་ ཨིས་ར་ཡེལ་པ་རྒུན་ ཉམ་པོ་
ཅོ་ཅེ་ཅེན་ནེ་ ཆེཏ་ཏོན་ སོ་མ་ཞིག་ འིན་, ཙོབོ་རྡེ་ མོལ་།
ངེ་ ང་རང་ངེ་ ཁྲིམ་རྒུན་ ཁོང་རྒུ་ནི་ སེམ་མེ་ན་ ཅུག་རྒེན་
ཡང་ ངེ་ ཁོང་རྒུ་ནི་ ཉིང་རྒུ་ནི་ན་ འབྲི་འིན་།
ང་ ཁོང་རྒུ་ནི་ ཀོན་འཇོག་, ཡང་ ཁོང་རྒུན་ ངེ་ མི་རྒུན་ འགྱུ་རེན་།
11 ཡང་ ཁོང་རྒུ་ནི་ ཁོ་རང་ངེ་ ཁྱིམ་ཙེ་པ་རྒུན་ མ་ཚེད་ ཉེན་རྒུན་ལ་
‘ཁྱི་ཞི་ ཙོབོ་ ཀོན་འཇོག་ ཤེ་རྒོའེ་’ ཟེར་རྡེ་ ལབ་རྒོའེ་ མི་ཡོང་།
ཅེ་ཟེར་ནི་ ཉམ་ཤུང་ནི་ ཀྲག་པོ་ཚུག་པ་, ཁོང་ ཚང་མེ་ ང་ ཤེའེ་རྡེན་།
12 ཡང་ ངེ་ ཁོང་རྒུ་ནི་ ངན་པ་རྒུན་ལ་ ཤག་སྤ་ ཏང་ངེན་
ཡང་ ངེ་ ཁོང་རྒུ་ནི་ རྡིག་པ་རྒུན་ མ་ནི་ འི་ཏུ་ མི་པོར་།”
13 ཀོན་འཇོག་རྒེ་ ཆེཏ་ཏོན་ “སོ་མེ་” ཞལ་ཏ་ སལ་ལེ་ ཛེད་ཟ་ནི་, ཁོང་ངེ་ ངུལ་མེ་ ཆེཏ་ཏོན་འབེ་ རྒོའེ་ཤེ་ མེ་ཀན་འབོ་ ལྟན་ནེ་ནོག་། ཡང་ ཉིང་པ་ རྡང་ ཕན་མི་ཐོག་རྒུན་ འགྱོ་སྤ་ མེ་ཀན་ ཆ་ནོག་།