ཨིབ་རི་པ་ 7

མེལ་ཀི་ཟེ་འདེག་ནི་ ཨབ་ར་ཧམ་མེ་སང་ ཀྲ་རྒེ་ འིན་།

མེལ་ཀི་ཟེ་འདེག་ནི་ ཤ་ལེམ་མེ་ རྒྱལ་སེ་ རྒྱ་སྤོ་ རྡང་ ཚང་མེ་སང་ ཀྲག་པོ་ ཀོན་འཇོག་རྒེ་ ལ་མ་ འིན་འབེན་། ཨབ་ར་ཧམ་མེ་ རྒྱ་སྤོ་རྒུ་ནི་ རྒྱཔ་འགལ་ལ་ མག་ ཏྃ་རྡེ་ རྒྱལ་ཁ་ ཐོབ་ཏེ་ ལོག་ཏེ་ ཡོང་ཟ་ནི་, མེལ་ཀི་ཟེ་འདེག་ལ་ ཁོང་ ཐུག་, ཡང་ ཁོང་ངེ་ ཨབ་ར་ཧམ་ལ་ ཅིན་ལབ་ སལ་། 2 ཏེ་ནི་ ཨབ་ར་ཧམ་མེ་ མག་རྒེ་ན་ ཐོབ་ཀན་ ནོར་ ཚང་མེ་ ནང་ནི་ ཅུའི་ཁག་ཅིག་, མེལ་ཀི་ཟེ་འདེག་ལ་ པུལ་། མེལ་ཀི་ཟེ་འདེག་ མིང་འབེ་ ཏོན་ ཏང་པོ་རྦོ་, “རྒྱ་སྤོ་ ཀྲང་པོ་” ཡང་ ཤ་ལེམ་མེ་ རྒྱ་སྤེ་ ཏོན་འབོ་, “ཞིའི་རྡེ་ རྒྱ་སྤོ་” ནོག་། 3 ཁོང་ངེ་ ཨ་རྦ་, ཨ་མ་ ཡང་ ཕ་མེ་པོ་ མ་ཚེད་, ཁོང་ རྐྱེ་ཅེ་ ཡང་ ཤི་ཅེ་ ཧོར་ལ་ ཅང་ ཤེད་རྒྱུ་ མེད་ཏེ་ ནོག་། ཀོན་འཇོག་རྒེ་ སྲེ་ ཙོག་སེ་ ཁོང་ ཏུའི་རྒྱུན་ ལ་མ་ཞིག་ ལུའི་།

4 སམ་བ་ ཏོང་ཤིག་རྒ་, མེལ་ཀི་ཟེ་འདེག་ ཙམ་ཤིག་རྒེ་ ཀྲག་པོ་ ཞུ་རྡེ་ མག་། ཨིས་ར་ཡེལ་ལེ་ ཕ་མེ་པོ་ མིང་ཅེན་ ཨབ་ར་ཧམ་མེ་ལ་ མག་རྒེ་ན་ ཐོབ་ཀན་ ཚང་མེ་ ནང་ནི་ ཅུའི་ཁག་ཅིག་ ཁོང་ལ་ པུལ་། 5 ཏ་ མོ་ཤེ་ ཁྲིམ་ ནང་ཞིན་ལ་, ལི་ཝི་ ཕར་རྒྱུད་ནི་ འིན་ཀ་ནེ་ ལ་མ་རྒུ་ནི་ ཨིས་ར་ཡེལ་པ་རྒུ་ནི་ཀ་ནི་ ཅུའི་ཁག་ཅིག་ རྡུ་ཆོག་རྒེ་ཡོད་པེན་, ཀའོ་རྒུན་ལ་ ཨབ་ར་ཧམ་མེ་ ཕར་རྒྱུད་ ནོག་། 6 འིན་ན་ ལི་ཝི་པེ་ ཕར་རྒྱུད་ནི་ མན་ཀ་ནེ་ མེལ་ཀི་ཟེ་འདེག་ལ་ ཨབ་ར་ཧམ་མེ་ཀ་ནི་ ཅུའི་ཁག་ཅིག་ ནེན་འདེ་ ཀོན་འཇོག་རྒེ་ ཞལ་ཆེཏ་ ཐོབ་ཀ་ནེ་ ཨབ་ར་ཧམ་ལ་ ཅིན་ལབ་ ཏྃ་། 7 ཡང་ ཐེ་ཚོམ་ མ་ནི་ མེད་པེ་, ཅིན་ལབ་ ཏང་ཀན་འབོ་ ཅིན་ལབ་ ནེན་ཀན་འབེ་སང་ ཆེ་ ནོག་།

8 ཅུའི་ཁག་ཅིག་ ནེན་ཀ་ནེ་ ལ་མ་རྒུན་, ཤི་ནོག་, འིན་ན་ མེལ་ཀི་ཟེ་འདེག་ ལ་མ་རྒུ་ནི་སང་ ཀྲ་རྒེ་ ནོག་, ཅེ་ཟེར་ནི་ སུང་རབ་རྦེ་ན་ ཁོང་ ཤི་ཀ་ནེ་ ཧོར་ལ་ འབྲི་རྡེ་ མེད་ཅེ་ཀ་ནི་, ཁོང་ ཏུའི་རྒྱུན་ སོན་པོ་ ལུའི་ཧན་ ཐེའེ་ནོག་། 9 འི་རྦོ་ལ་ ཟེར་ཉེན་ཅེ་ ནོག་, ཅུའི་ཁག་ཅིག་ ནེན་ཀ་ནེ་ ལི་ཝི་པ་རྒུ་ནི་ མེལ་ཀི་ཟེ་འདེག་ལ་ ཅུའི་ཁག་ཅིག་ ཏྃ་རྡེ་ ནོག་, ནམ་ ཁོང་རྒུ་ནི་ ཕ་མེ་པོ་ ཨབ་ར་ཧམ་མེ་ མེལ་ཀི་ཟེ་འདེག་ལ་ ཅུའི་ཁག་ཅིག་ པུལ་། 10 ཅེ་ཟེར་ནི་ མེལ་ཀི་ཟེ་འདེག་ ཨབ་ར་ཧམ་ལ་ ཐུག་ཟ་ནི་, ལི་ཝི་པ་རྒུན་ མ་རྐྱེ་ འིན་འབེན་, འིན་ན་ ཁོང་རྒུ་ནི་ ཕ་མེ་པོ་, ཨབ་ར་ཧམ་མེ་ ཁྲག་རྒེ་ན་ ཁོང་རྒུན་ ཡོད་ཏེ་ འིན་འབེན་།

11 ཀལ་ཏེ་ ཁྲིམ་མེ་ མག་རྡེན་ འིན་ཀ་ནེ་ ལི་ཝི་རྦེ་ ཕར་རྒྱུད་ ལ་མེ་ ལེ་ཧ་རྒུན་ རྒྱུད་ཏེ་, ཀོན་འཇོག་རྒེ་ འདུན་ལ་ ཁྲང་པོ་ འགྱུར་ཉེན་ནེ་ཡོད་པེ་ནི་, ཏེ་ནི་ ཅི་ཕི་ ཀོན་འཇོག་ལ་ ཡང་ སོ་སོ་ ལ་མེ་ རིག་ཞིག་ ཙུག་རྒེ་ ཛེད་རྒོའེ་, ཀ་ ལ་མ་འབོ་ ཨ་རོན་ནེ་ རྒྱུད་ནི་ མ་ནོག་ མེལ་ཀི་ཟེ་འདེག་ ཙོག་སེ་ འིན་འབེན་།

12 ཏ་ ནམ་ ལ་མེ་ རྒྱུད་པོ་ འགྱུར་ནི་ ཏེ་ནི་ ཁྲིམ་མེ་ ནང་ལ་ འགྱུར་ཞ་ ཡོང་རྒོའེ་། 13 ངེ་ སྤེ་ར་ ཏང་ཀ་ནེ་ ལ་མ་འབོ་ ལི་ཝི་ ཕར་རྒྱུད་ནི་ མ་ནོག་, ཞེན་ཡང་ ཕར་རྒྱུད་ཤིག་ནེ་ ནོག་, ཀའོ་རྒུ་ནི་ ཆོད་ཁྲི་ཀ་ མ་ནི་ ཞབ་རྟོག་ མ་ཞུ་ འིན་འབེན་། 14 ངེ་ ཟེར་ཤེ་ ཏོན་འབོ་, ཨ་ཧོ་རྒུ་ནི་ ཙོབོ་ ཡི་ཤུ་ ཡུ་འདཱེ་ ཕར་རྒྱུད་ནི་ རྐྱོད་རྡེ་ ཛེད་ཏེ་ ནོག་། ཡང་ མོ་ཤེ་, ཏེ་ ཕར་རྒྱུད་ནི་ ལ་མ་ རྐྱོད་ཀ་ནེ་ ཧོར་ལ་ མ་ནི་ མོལ་ལེ་ ཛེ་རྡེ་ མི་འདུག་།

ཡི་ཤུ་རྦོ་ མེལ་ཀི་ཟེ་འདེག་ ཙོག་སེ་ ནོག་།

15 མེལ་ཀི་ཟེ་འདེག་ ཙོག་སེ་ ལ་མ་ སོ་སོ་ཞིག་ ཆ་ཅེ་རྦེ་, འི་ འགྱུར་ཞའོ་ མ་ སལ་སྤོ་ སོང་འདེ་ ནོག་། 16 ཁྲིམ་ ནང་ཞིན་ ལི་ཝི་ ཕར་རྒྱུད་ནི་ འིན་ཅེ་རྦེ་, ཙོབོ་ ཡི་ཤུ་ ལ་མ་ འགྱུར་རེ་ མ་ཛེད་, འིན་ན་ མ་ནི་ ཤིག་ མི་ཉེན་ཅེ་ ཤུག་ཤེན་ མི་ཙེ་ ཅོའེ་རྡེ་, ཁོང་ ལ་མ་ འགྱུར་རེ་ ཛེད་། 17 ཏམ་པེ་ སུང་རབ་རྦེ་ན་ ཁོང་ངེ་ ཧོར་ལ་, “མེལ་ཀི་ཟེ་འདེག་ ཙོག་སེ་ ཉེ་རང་ ཏུའི་རྒྱུན་ནི་ཕི་ ལ་མ་ འིན་” མོལ་རྡེ་ ཡོད་ཏེ་ ནོག་།

18 འོ་ནེ་, ལ་མ་ འགྱུར་ཤེ་ལ་, ངུལ་མེ་ རྒོའེ་ཤེ་ཅན་རྒུན་ ཐེན་འདེ་ མེད་ཏེ་ ནོག་, ཅེ་ཟེར་ནི་ ཏོ་ འུ་ཐུག་ ཏང་ ཕན་མི་ཐོག་ ཡོད་པེན་། 19 ཁྲིམ་མེ་ ཅི་ཞིག་ལ་ ཕུན་སུམ་ཚོག་པ་ མ་ཉེན་། འིན་ན་ ཏ་ ཏག་ས་ ཨ་ཧོ་རྒུན་ལ་ ངུ་ལེ་སང་ རེ་ཝ་ མང་ངེ་ ཀྲག་པོ་ཞིག་ ཡོད་ཏེ་ ནོག་, ཀ་རྦེ་ ཨ་ཧོ་རྒུན་ ཀོན་འཇོག་ ཏང་ ཉེ་མོ་ལ་ ཁྱེ་རེ་ནོག་།

20 ཀོན་འཇོག་རྒེ་ ནའ་ ཁུར་རེ་ ཛེད་ཏེ་ འི་རྦོ་ རྟེམ་པོ་ ཛེད་། ཨ་རོན་ནེ་ ཕར་རྒྱུད་ ཏོ་ཙོག་སེ་ ནའ་ མ་ཁུར་རེ་ ལ་མ་ འགྱུར་རྡེ་ ནོག་། 21 འིན་ན་ ཡི་ཤུ་ ནའ་ ཉམ་པོ་ ལ་མ་ འགྱུར་རེ་ ཛེད་, ནམ་ ཁོང་ལ་ ཀོན་འཇོག་རྒེ་ མོལ་,

“ཙོབོ་ ཀོན་འཇོག་རྒེ་ ནའ་ ཁུར་རེ་ ཛེད་,

ཡང་ ཁོང་ངེ་ ཏོ་ ཅག་རྒེ་ མི་ཛེད་,

‘ཁྱེ་རང་ ཏུའི་རྒྱུན་ནི་ཕི་ ལ་མ་ འིན་།’”

22 ཏེ་ ནའ་རྦེ་ ཅོའེ་རྡེ་ ཀོན་འཇོག་རྒེ་ ཨ་ཧོ་རྒུན་ལ་ ཆེཏ་ཏོན་ མ་ རྒྱལ་ལེ་ཞིག་ ཛེད་ཀན་འབོ་, ཡི་ཤུའི་ ནེན་ཏེན་ ཅོའོ་ ཛེད་།

23 ངུལ་མེ་ ཚིར་ཧེ་ན་, ལ་མ་ མང་པོ་ཞིག་ ཡོད་ཏེ་ ནོག་, ཅེ་ཟེར་ནི་ ཤི་ཅེ་རྦེ་ ཁོང་རྒུན་ལ་ ལ་མེ་ ལེ་ཧ་རྦོ་ ཏུའི་རྒྱུན་ནི་ཕི་ ཅོ་ མ་ཉེན་། 24 འིན་ན་ ཡི་ཤུ་ ཏུའི་རྒྱུན་ སོན་པོ་ ལུའི་ཤེ་ཀ་ནི་, ཁོང་ངེ་ ལ་མེ་ ཆག་ལེ་རྦོ་ ཏུའི་རྒྱུན་ ལུའི་རྡེ་ ཛེད་རྡེན་། 25 ཏོ་རྦེ་ཕི་ ཁོང་ རྒྱུད་ཏེ་, ཀོན་འཇོག་རྒེ་ཀ་ ཡོང་ཀན་རྒུན་ ཁོང་ངེ་ ཏུའི་རྒྱུན་ནི་ཕི་ རྐྱོབ་ ཉེན་ནེན་། ཏེ་ མི་རྒུ་ནི་ཕི་ ཀོན་འཇོག་ལ་ ཞུ་ཝ་ པུལ་ཤེ་ལ་, ཁོང་ ཏུའི་རྒྱུན་ ཞུ་རྡེ་ ཛེད་རྡེ་ནོག་།

26 ཏོ་ཙོག་སེ་ ལ་མ་ ཆོན་མེ་ ཨ་ཧོའེ་ རྒོའེ་ཤེ་ཅན་རྒུན་ ཀྲུཔ་ཅུག་རྒེ་ནོག་། ཁོང་ནི་, ཏམ་པ་, རྐྱོན་མེད་, སང་མ་, རྡིག་ཅེན་རྒུ་ནི་ སོ་སོ་ པེ་ ཛེད་ཀན་ འདང་ རྡེ་བ་ཅན་ནེ་ན་ སི་ཝ་ ཆེ་ཤོག་ཅེན་ནེ་ ཀོ་ས་ ཐོབ་རྦེ་ ཛེད་ཀན་འབོ་ ཞུ་རྡེ་ནོག་། 27 ཞེན་ ལ་མ་ ཆོན་མོ་རྒུན་ ཙོག་སེ་ ཁོང་ལ་ འགོ་མ་ ཁོ་རང་ངེ་ རྡིག་པ་, ཡང་ ཏེ་ནི་ ཞེན་མི་རྒུ་ནི་ རྡིག་པེ་ཕི་, ཞག་ཏང་ སྲོག་ཆོད་པ་ པུལ་རྒོའེ་ མེ་ཀག་། ཅེ་ཟེར་ནི་ ཡི་ཤུའི་ ཁོ་རང་ ལན་ཅིག་ མི་ཚང་མེ་ཕི་ སྲོག་ཆོད་ལ་ པུ་ལེ་ ཛེད་། 28 ཁྲིམ་མེ་ འུ་ཐུག་ཅེན་ནེ་ ལ་མ་ ཆོན་མོ་རྒུན་ ཧོ་ནོག་། འིན་ན་ ཁྲིམ་མེ་ ལྟིང་ནི་ ཀོན་འཇོག་རྒེ་ ནའ་ ཉམ་པོ་ ཁོ་རང་ངེ་ སྲེ་ འདམ་མེ་ ཛེད་, ཡང་ ཁོང་ངེ་ སྲེ་པོ་ ཛོམ་འབོ་ ལ་མ་ ཆོན་མོ་ ཏུའི་རྒྱུན་ནི་ཕི་ ཅོའོ་ ཛེད་།