ཨིབ་རི་པ་ 6

ཏོ་རྦེ་ཕི་ལ་ ཨ་ཧོ་རྒུན་ འགོ་ཟུག་རྒེ་ མ་ཤི་ཀེ་ ཧོར་ལ་ ལབ་ཞ་ ཐོབ་ཀན་རྒུ་ནི་ཀ་ ཡང་ ལོག་ཏེ་ མ་ཆ་, འིན་ན་ ལྡན་འདེ་ སམ་བ་ཅེན་ རིག་ འགྱུ་རེན་། རྡེན་འབའ་ ཨ་ཧོ་ལ་ ངན་པེ་ ལེ་ཧ་རྒུ་ནི་ཀ་ནི་ སེམ་འགྱུར་ཤེ་ ཡང་ ཀོན་འཇོག་རྒེ་ན་ ཏེཏ་པ་ ཅོ་ཅེ་ འགོ་མེ་ ལབ་ཞ་རྒུ་ནི་ ཡང་ འགོ་ཟུག་ ཅོ་རྒོའེ་ མེད་ཏེ་ ནོག་། 2 ཁྱི་ཞ་རྒུན་ལ་ ཁྲུའི་ནེན་ཅེ་, ཐུག་ཡིད་རྡེ་ ཁྱུད་རྒུན་ ཐོབ་ཅེ་ལ་ འགོའེ་ཀ་ ལག་པ་ པོར་ཤེ་, ཤི་ཀན་རྒུན་ སོན་པོ་ ལང་ཤེ་ རྡང་ ཐ་མེད་པེ་ ཁྲིམ་ཅེད་རྒུ་ནི་ ཧོར་ལ་ ཏ་རུང་ མང་ངེ་ ལབ་ཞ་ ནེན་རྒོའེ་ མེ་ཀག་། 3 ཡང་ ཀོན་འཇོག་རྒེ་ ཐུག་འདོད་ ཡོད་ན་ ཨ་ཧོ་རྒུན་ ལྡན་ཀ་ནེ་ ལབ་ཞེ་ན་ ཀྱེ་རྐྱ་ལ་ ཆེན་།

4 སེམ་ རྒྱུར་ཤེ་ ཕི་ འི་ མི་རྒུན་ ལོག་ཏེ་ མ་ནི་ ཁྱོང་ཉེན་ནེ་ མག་, ཀའོ་རྒུན་ལ་ མ་ཤི་ཀེ་ ཧོར་ལ་ ཁྲིན་འབོ་ སོན་ཏེ་ ཧ་ཀོ་ ཡོད་, ནམ་ཀེ་ ཅིན་ལབ་རྒུན་ནེ་ ཀྲོཏ་ ཉོང་, ཡང་ ཏམ་པེ་ ཐུག་ཡིད་རྡེ་ན་ འདྲེའེ་, 5 ཀོན་འཇོག་རྒེ་ ཀའ་ ཟང་པེ་ ཡང་ ཀོན་འཇོག་རྒེ་ རྒྱལ་སྲིད་ ཡོང་ཅེ་ཅེན་ནེ་ ཁྱུད་རྒུ་ནི་ ཐོང་ངོམ་ ཡོད་། 6 ཡང་ ལྟིང་ནི་ ཁོང་རྒུན་ ཀོན་འཇོག་ནི་ འགྱུར་རྡེ་ ཐག་རིང་ལ་ སོང་། ཡུ་ཙོག་སེ་ མི་རྒུན་ འགྱོད་སེམ་མེ་ན་ ལོག་ཏེ་ ཁྱོང་ཉེན་ནེ་ མག་། ཀོན་འཇོག་རྒེ་ སྲེ་ ཕང་ཅེ་རྦེ་, ཁོང་རྒུ་ནི་ མ་ཤི་ཀ་ ཡང་ རྐྱང་ཤིང་ངེ་ཀ་ རྐྱང་ཅེ་ ཡང་ མི་རྒུ་ནི་ འདུན་ལ་ ཁྲེལ་རྦ་ ལྟན་ཅེ་ ནོག་།

7 ས་ཀྱེད་རྡེ་ན་ ཆར་སྤ་ ཐིམ་འདེ་ ཞིང་འབད་པ་རྒུན་ལ་ ལྟོན་ཏོག་ རྒྱ་ལེ་ མིན་ཅེ་རྦེ་ཀ་ ཀོན་འཇོག་རྒེ་ ཅིན་ལབ་ ཡོད་ཏེ་ ནོག་། 8 འིན་ན་ ཚེར་མ་ རྡང་ ལྗང་ཙེར་ རྐྱེ་ཀ་ནེ་ ཞིང་, ཕན་མི་ཐོག་ཞིག་ ནོག་། ཏེ་ ཞིང་འབོ་ལ་ ངན་ ཕོག་ཏེ་ མེ་ཏུག་རྒེ་ ཛེ་རྡེ་ནོག་།

9 ཤེ་སྤ་ ཡ་ཏོ་རྒུན་ ཞེན་ ང་ཞི་ ཏོ་ཙོག་སེ་ སྤེ་ར་ ཏང་ནང་, ཁྱི་ཞ་རྒུ་ནི་ མི་ཙེ་ པུད་ཚུལ་རྦོ་ ཐར་པ་ ཐོབ་ཅེ་ཅན་རྒུན་ ཙོག་སེ་, ཡོད་ཅེ་ལ་ ང་ཞ་ ལོ་ཁྱེལ་ རག་། 10 ཀོན་འཇོག་ནི་ མི་འོའེ་སྤ་ ཛེད་ཀན་ཞིག་ ཞུ་རྡེ་ མག་། ཁྱི་ཞ་རྒུ་ནི་ ཁོང་ངེ་ ཏོན་ལ་ ཙམ་ཤིག་རྒེ་ ཙོན་འགྲུའི་ རྡང་ ཞེན་ཡང་ ཏེཏ་པ་ཅན་རྒུན་ལ་ ཡ་ཏོ་ ཅོའེ་, ཡང་ ཏ་རུང་ང་ ཅོ་ཅེ་རྦེ་ ཀོན་འཇོག་ལ་ ཤེ་སྤ་ ལྟན་ཀན་འབོ་, ཁོང་ངེ་ མ་ནི་ ཞེད་རྡེ་ མི་ཛེད་། 11 ཁྱི་ཞ་ སོན་པོ་ ཡོད་ཟ་ནི་, ཞེན་མ་རྒུན་ལ་ ཤེ་སྤ་ ཅོ་ཅེའོ་ ང་ཞི་ འདོད་པ་ ཆོན་མོ་ འིན་། ཏུ་ཟུག་ ཅོ་ཅེ་རྦེ་ ཁྱི་ཞ་རྒུ་ནི་ རེ་ཝ་ ཅོ་ཀན་འབོ་ འདྲན་འདྲ་ ཀྲུབ་ ཉེན་ནེན་། 12 ཁྱི་ཞ་རྒུན་ ལེ་མི་ལམ་ འགྱུར་ མི་རྒོའེ་། འིན་ན་ ཏེཏ་པ་ རྡང་ ཟོད་པ་ ཡོད་ཅེ་རྦེ་ ཅོའེ་རྡེ་, ཀོན་འཇོག་རྒེ་ ཞལ་ཆེཏ་ ཛེད་ཀན་ ནོར་ཧལ་ལ་, ཐོབ་ཀན་རྒུ་ནི་ སྤེ་ཀ་ འགྲུལ་ཤེ་རྦེ་ ང་ཞི་ འདོད་པ་ འིན་།

ཀོན་འཇོག་རྒེ་ ཞལ་ཆེཏ་ ལོ་ཁྱེལ་ཅེན་།

13 ཀོན་འཇོག་རྒེ་ ཨབ་ར་ཧམ་ལ་ ཞལ་ཆེཏ་ ཛེད་ཟ་ནི་, ནའ་ ཁུར་ཤེ་ལ་ ཞེན་སུ་ཞི་ལ་ ཁོང་ངེ་སང་ ཀྲ་རྒེ་ཞིག་ མེད་ཅེ་ཀ་ནི་, ཀོན་འཇོག་རྒེ་ ཁོ་རང་ངེ་ ཚན་ནེ་ཀ་ ནའ་ ཁུར་རེ་ ཛེད་ཏེ་ མོལ་,

14 “ངེ་ ནེན་ཏེན་ལ་ ཁྱེ་རང་ལ་ ཅིན་ལབ་ ཏྃ་རྡེ་

ཁྱེ་རང་ངེ་ ཕར་རྒྱུད་རྒུན་ མ་མང་པོ་ ཕེལ་ཅུག་རྒེན་།”

15 ཡང་ ཨབ་ར་ཧམ་མེ་ ཟོད་པ་ ཉམ་པོ་ སྲུྃ་རྦེ་, ཁོ་ ཀོན་འཇོག་རྒེ་ ཞལ་ཆེཏ་ ཛེད་ཀན་འབོ་ ཐོབ་།

16 ནའ་ ཁུར་ཟ་ནི་, མི་རྒུ་ནི་ ཁོ་རང་རྒུ་ནི་སང་ ཀྲག་རྒེ་ཞིག་རྒེ་ ནའ་ ཁུར་རེ་ནོག་, ཡང་ ནའ་ ཁུར་ཤེ་རྦེ་ ཁོང་རྒུ་ནི་ ཟེར་ཧན་འབོ་ རྟེམ་པོ་ ཅོའེ་རྡེ་ ཟེར་རྒྱུ་ མེ་ཀན་ ཅོ་ནོག་། 17 ཏེ་རྒ་ ཙོག་སེ་, ཞལ་ཆེཏ་ ཐོབ་ཀན་རྒུན་ལ་, ཀོན་འཇོག་ ཁོ་རང་ངེ་ ཐུག་ས་མེ་ན་ མ་ནི་ མི་འགྱུར་ཤི་ འིན་ཀན་འབོ་, ནེན་ཏེན་ སལ་སྤོ་ ཅོ་ཅེ་ཕི་ ཁོང་ངེ་ ནའ་ ཁུར་རེ་ ཛེད་། 18 ཏོ་རྦེ་ཕི་ལ་ ཀོན་འཇོག་རྒེ་ ཞལ་ཆེཏ་ ཛེད་ཀན་ འདང་ ནའ་ ཁུར་ཀན་ ཉ་ཧེ་ན་ འགྱུར་ཞ་ མི་ཛེད་, ཅེ་ཟེར་ནི་ ཁོང་ལ་ ཟུན་ སལ་ ཉེན་ཅེ་ མ་ནི་ མེ་ཀག་། ཏོ་རྦེ་ཕི་ ཨ་ཧོ་རྒུ་ནི་ ཐོབ་ཅེ་ཅེན་ནེ་ ཐར་སྤེ་ རེ་ཝ་རྦོ་ལ་ ཐམ་འདེ་, ཀོན་འཇོག་རྒེ་ ཆག་རྒེ་ ཡོག་ལ་ རྐྱོབ་རྦེ་ ཛེད་ཅེ་ལ་ ཁོང་ངེ་ ཆོག་ལ་ རྒྱུག་རྒེན་ ཨ་ཧོ་རྒུན་ལ་ ལོ་ཁྱེལ་ ཆོན་མོ་ པོར་ཉེན་ནེ་ནོག་། 19 འི་ རེ་ཝ་རྦེ་ ཨ་ཧོ་རྒུ་ནི་ སེམ་པོ་ རྟེམ་པོ་, མ་ནི་ རྒུལ་མི་ཉེན་ཤི་ ཀྲག་ ཏང་ཙོག་སེ་ ཅོ་ནོག་, ཡང་ ཨ་ཧོ་རྒུན་ ཡོ་ལེ་ རྒྱབ་ལ་, ཀོན་འཇོག་རྒེ་ ཚང་མེ་སང་ ཏམ་པེ་ མལ་རྦེ་ཀ་ ཁྲིད་ཏེ་ ཁྱེར་རེན་། 20 ཡི་ཤུ་ ཏུ་རུ་ ཨ་ཧོ་རྒུ་ནི་ ཏོན་ལ་ ངུལ་ལ་ རྐྱོད་ ཚར་རྡེ་, མེལ་ཀི་ཟེ་འདེག་ ཙོག་སེ་ ཁོང་ ཏུའི་རྒྱུན་ནེ་ཕི་ ཨ་ཧོ་རྒུ་ནི་ ལ་མ་ ཆོན་མོ་ འགྱུར་རེ་ ཛེད་ཏེ་ ནོག་།