ཆོའེ་ཚོག་རྒེ་ ཐུན་འབྲེལ་།
4
ཏེ་རྒ་རྦེ་ཕི་ལ་ ཙོབོ་ ཡི་ཤུ་ལ་ ཞབ་རྟོག་ ཞུ་ཅེ་རྦེ་ ང་ ཙོན་ནེ་ན་ ཡོ་ཀ་ནེ་, འཇུ་འཇུ་ ཀོན་འཇོག་རྒེ་ འབོ་ ཛེད་ཀ་ནེ་ འོའེ་སྤེ་ མི་ཙེ་ཞིག་ པུད་ཅེ་ལ་ ཁྱི་ཞ་ ཞུ་ཝ་ པུ་ལེ་ཡོད་། 2 ཁྱི་ཞ་ ཏུའི་རྒྱུན་ པབ་མོ་ རྡང་ འཇམ་པོ་, ཟོད་པ་ཅེན་ ཡང་ ཤེ་སྤེ་ན་ ཅིག་ ཏང་ ཅིག་རྒེ་ རྐྱོན་རྒུན་ལ་ ཤག་སྤ་ ཏྃ་རྡེ་ ཡ་ཏོ་ ཅོའེ་ཧེ་། 3 ཞིའི་རྡེ་ ཉམ་པོ་ རྡམ་འདེ་ ཐུག་ཡིད་རྡེ་ན་ ཁྱི་ཞ་རྒུན་ ཅིག་འགྲིལ་ འདེད་ཅེ་ལ་ ཙོན་འགྲུའི་ ཅོའེ་ཧེ་། 4 ཨ་ཧོ་རྒུན་ལ་ ཟུྃ་སྤོ་ ཅིག་ཅིག་ ནང་ནི་ འིན་ ཏོ་ ཆོའེ་ཚོག་ འིན་ནོག་། ཨ་ཧོ་རྒུན་ལ་ ཏམ་པེ་ ཐུག་ཡིད་ ཅིག་ཅིག་ ཡོད་ཏེ་ ནོག་, ཁྱི་ཞ་རྒུན་ རེ་ཝ་ ཅིག་རྒེ་ཕི་ འབོ་ ཛེད་ཏེ་ འིན་། 5 ཨ་ཧོ་རྒུན་ལ་ ཙོབོ་ ཅིག་ཅིག་, རྡེན་ཆེ་ཤེ་ ཅིག་ཅིག་, ཁྲུའི་ནེན་ཅེ་ ཅིག་ཅིག་, 6 ཚང་མེ་ ཀོན་འཇོག་ ཏང་ ཡབ་ ཅིག་ཅིག་ ཞུ་རྡེ་ འིན་, ཁོང་ངེ་ ཨ་ཧོ་ ཚང་མེ་ཀ་ ཝང་སྲུལ་ཅེ་, ཨ་ཧོ་ ཚང་མ་ རྒྱུད་ཏེ་ ཆག་ལེ་ ཛེད་ཅེ་ རྡང་ ཁོང་ ཨ་ཧོ་ ཚང་མེ་ན་ ཞུ་རྡེ་ནོག་།7 མ་ཤི་ཀེ་ ཨ་ཧོ་ རེ་རེ་ ཁྱུད་ སོ་སོ་ རིག་ སལ་རྡེ་ ནོག་, འིན་ན་ ཏེ་ ཁྱུད་པོ་ ཀ་ཟུག་ཤིག་ ས་ལེན་ ཁོང་ངེ་ ཐག་ཅེད་རྡེ་ ཛེ་རྡེ་ནོག་། 8 ཏེ་རྒ་རྦེ་ཕི་ལ་ ཏམ་པེ་ སུང་རབ་རྦེ་ན་ མོལ་རྡེ་ འདུག་།
“ཁོང་ ཐོན་པོ་ལ་ རྐྱོད་ཟ་ནི་,
ཁོང་ངེ་ ཕམ་ཀལ་ཧན་ནེ་ ཙོན་པ་ མང་པོ་
ཁོ་རང་ ཉམ་པོ་ ཁྱེར་རེ་ ཛེད་།
ཡང་ ཁོ་རང་ངེ་ མི་རྒུན་ལ་ ཁྱོའེ་མ་རྒུན་ སལ་ལེ་ ཛེད་།”
9 སུང་རབ་རྦེ་ན་ “ཁོང་ ཐོན་པོ་ལ་ རྐྱོད་” མོལ་ཤེ་རྦེ་ ཨ་ཧོ་ལ་ ཧ་ཀོ་ནོག་, མ་ཤི་ཀ་ རྡེ་བ་ཅན་ནེ་ ཡོག་ལ་ པབ་ཏེ་ མ་མོ་ལ་ རྐྱོད་ ཡང་ནི་ འི་ འཇིག་རྟེན་ནེ་ཀ་། 10 ཡང་ ཏེ་རྒ་ ཡོག་ལ་ པབ་རྦེ་ ཛེད་ཀན་འབེ་ ཁོ་རང་ངེ་ ཝང་ ཛམ་ལིང་ སོན་ཏེ་ན་ སྲུལ་ལེ་ ཛེད་ཅེ་ལ་ ནམ་ཀ་ ཚང་མེ་སང་ ས་ཅ་ ཐོན་པོ་ལ་ རྐྱོད་རྡེ་ ཛེད་།
11 མ་ཤི་ཀེ་ ཁ་ཅིག་ ཧུ་ཚབ་, ཁ་ཅིག་ ལུང་རྟོན་པ་, ཁ་ཅིག་ ནེ་ཚུལ་ ཟང་པོ་ ཤེད་ཀན་, ཁ་ཅིག་ ཆོའེ་ཚོག་ལ་ ལྟ་ཏོག་ ཅོ་ཀན་ འདང་ ཁ་ཅིག་ལ་ ལོབ་རྦོན་ ཅོ་ཅེ་ ཁྱུད་རྒུན་ ཆོའེ་ཚོག་ལ་ སལ་ལེ་ ཛེད་། 12 ཁོང་རྒུ་ནི་ ཁག་པོ་ནི་, མ་ཤི་ཀེ་ ཧུ་ཟུག་ ཤེད་ཅེན་ འགྱུར་ཤེ་ཕི་ ཀོན་འཇོག་རྒེ་ མི་རྒུན་ ཁོང་ལ་ ཞབ་རྟོག་ ཞུ་ཅེ་ལ་, ཀྲལ་འགྲིག་ ཅོ་ཅེའོ་ ནོག་། 13 མ་ཤི་ཀེ་ ཏོ་ ཛེ་རྡེན་ ཞུ་རྡེན་, ནམ་ཚུག་པ་, ཨ་ཧོ་ ཚང་མ་ ཏེཏ་པ་ རྡང་ ཀོན་འཇོག་རྒེ་ སྲེ་ ཤེ་ཤེ་ན་ ཅིག་འགྲིལ་ མི་ཆ་། ཏེ་ནི་ ཨ་ཧོ་རྒུན་ ཏེཏ་པེ་ན་ ལྡན་འདེ་ མ་ཤི་ཀེ་ ཚད་ རྡང་ འདྲན་འདྲ་ ལེཔ་ ཉེན་ནེན་།
14 ཡང་ ཨ་ཧོ་ ཕྲུ་རྒུ་ ཆུང་ཙེ་རྒུན་ ཙོག་སེ་ མི་ལུའི་, ཀའོ་རྒུན་ ལབ་ཞ་ སོ་མེ་ ལུང་སྤོ་རྒུ་ནི་ འི་ངོ་ནེ་ འ་ངོ་ ཁྲིད་ཅེ་, ཡང་ མི་ རྐྱོན་འཇེན་རྒུ་ནི་ ཟུའི་མེ་ ཐབ་རྒུན་ རྒྱུད་ཏེ་ འགོམ་ཧོར་ ཉེན་ནེ་ནོག་། 15 འིན་ན་ ཨ་ཧོ་རྒུ་ནི་ ཀོན་འཇོག་རྒེ་ ཀྲང་པོ་ནི་ ཤེ་སྤ་ ཉམ་པོ་ ཤེད་འིན་ན་, ཨ་ཧོ་རྒུན་ ཅི་ས་ཐོག་ནི་ མ་ཤི་ཀེ་ན་ ལྡན་ནེན་, ཀའོ་ ཆོའེ་ཚོག་རྒེ་ འགོ་ ཞུ་རྡེ་ འིན་། 16 མ་ཤི་ཀེ་ ཁོ་རང་ངེ་ མི་ཚང་མ་ རྡམ་འདེ་ པོ་རེ་ ཛེད་ཏེ་ ནོག་, ཀ་ཟུག་རྒེ་ ཉ་རྦེ་ ཟུྃ་སྤེ་ ཡན་ལག་ ཚང་མ་ ཐུད་ཏེ་ པོ་རེ་ཡོད་། ཀལ་ཏེ་ ཟུྃ་སྤེ་ ཡན་ལག་ ཚང་མེ་ ཅོ་རྒོ་ཤེ་ཅེན་ནེ་ ལེ་ཧ་རྒུན་ ཅོ་ནི་ ཏེ་ནི་ ཟུྃ་སྤོ་ སོན་ཏེ་ ཤེ་སྤེ་ན་ ལྡན་འདེ་ ཤེད་ཅེན་ འགྱུ་རེན་།
མ་ཤི་ཀེ་ན་ མི་ཙེ་ སོ་མ་ཞིག་།
17 ཏེ་རྒ་རྦེ་ཕི་ལ་ ཙོབོ་རྡེ་ ཝང་ངེ་ན་ ངེ་ ཁྱི་ཞ་རྒུན་ལ་ ཟེ་འིན་, ཡང་ སྤང་པུད་རྡེ་ཡོད་, ཏ་ ཏེཏ་པ་ མེ་ཀན་རྒུན་ ཙོག་སེ་ མི་ཙེ་ པུད་ཅེ་ ཕོང་ཧེ་, ཅེ་ཟེར་ནི་ ཁོང་རྒུན་ རེ་ཝ་ མེ་ཀ་ནེ་ན་ འགོ་ཁོར་རྡེ་ ནོག་། 18 ཁོང་རྒུ་ནི་ སེམ་བ་, མུན་ཀྲག་རྒེ་ ཀང་འདེ་ ཁོང་རྒུན་ ཀོན་འཇོག་རྒེ་ སལ་ཧ་ནེ་ མི་ཙེ་ནི་ མ་ ཐག་རིང་ལ་ སོང་འདེ་ ནོག་, ཅེ་ཟེར་ནི་ ཁོང་རྒུ་ནི་ ནར་རྐྱི་ ཀོན་འཇོག་རྒེ་ ཧོར་ལ་ སམ་བ་ ཏང་ཅེ་ རྒག་ཏེ་ ཉིང་རྒུན་ ཀྱོང་པོ་ ཅོའེ་རྡེ་ ནོག་། 19 ཁོང་རྒུན་ མང་པོ་ ཁྲེལ་མེད་, ལུའི་འབྲེལ་ ངན་པེ་ ལྟིང་འགྲྃ་ནི་ རྒྱུག་རྒེན་, ཡང་ ཀྲིཔ་ ཚང་མ་ ཅོ་ཅེ་ལ་ རིྃ་རྡེ་ནོག་།
20 འིན་ན་ ཁྱི་ཞི་ མ་ཤི་ཀེ་ན་ མི་ཙེ་ པུད་ཅེ་ ལོབ་ཀན་འབོ་ ཁོང་རྒུ་ནི་ པུད་ཀན་ ཙོག་སེ་ མི་ཙེ་ མག་། 21 ཁྱི་ཞ་རྒུ་ནི་ ཡི་ཤུའི་ ཧོར་ལ་ ཚོར་རྡེ་ ཡང་ ཁོང་ངེ་ ནང་ནི་ ཡོང་ཀ་ནེ་ ཀྲང་པེ་ ཧོར་ལ་ ལོབ་ཏེ་ འིན་ཅེ་ཀ་ནི་ 22 ཉིང་པ་ རྡང་ ངུ་ལེ་ རྡིག་ཅེན་ མི་ཙེ་ པུད་ཚུལ་རྒུན་ ཕོང་ཧེ་ ཀའོ་ འགོམ་ཧོར་རེ་ འདོད་པེ་ ཀང་འདེ་ ཨ་ཧོ་ ཀྲང་པེ་ ལམ་ནི་ ཐག་རིང་ལ་ ཁྱེར་རེ་ཡོད་། 23 འིན་ན་ ཏམ་པེ་ ཐུག་ཡིད་ལ་ ཁྱི་ཞ་རྒུ་ནི་ སམ་ཚུལ་ལེ་ན་ འགྱུར་ཞ་ ཁྱོང་ཅུག་ཏེ་, 24 ཀོན་འཇོག་རྒེ་ ཁོ་རང་ ཙོག་སེ་ ཛེད་ཀ་ནེ་ མི་ཙེ་ སོ་མ་རྦོ་ ཀོའེ་ལག་ ཙོག་སེ་ རང་ལ་ ཧོན་ཧེ་, ཀའོ་ རྡེན་འབེ་ ཀྲང་པོ་ རྡང་ ཏམ་པ་ འིན་།
25 ཏེ་རྒ་རྦེ་ཕི་ལ་ ཟུན་ ཏང་ཅེ་ ཕྃ་རྡེ་ ཏེཏ་པ་ཅན་རྒུན་ལ་ ཀྲང་པོ་ ཟེར་རྒོའེ་, ཅེ་ཟེར་ནི་ ཨ་ཧོ་རྒུན་ ཟུྃ་སྤོ་ ཅིག་རྒེ་ ཡན་ལག་ སོ་སོ་ ནོག་། 26 “ཁྱི་ཞ་ སྲོ་ ཡོང་ན་ རྡིག་པ་ མ་ཅོ་ཧེ་”, ཉི་མ་ རྐྱོད་རྡེ་སང་ ངུལ་ལ་ སྲོ་ མེ་ཀན་ ཆ་ཅུག་། 27 ཏོ་རྦེ་ཀ་ནི་ རྡུད་ལ་ ཕན་ཏོག་ ལེན་ཅེ་ ཧབ་ མ་ཏང་ཧེ་།
28 ཧུན་མ་རྒུ་ནི་ ཧུ་ཅེ་ ཕོང་ཧེ་། འིན་ན་ ཁྱི་ཞ་རང་ངེ་ ལག་པ་ནི་ འབད་ཏེ་ ཀྲང་པོ་ ལེ་ཧ་ ཅོ་རྒོའེ་, ཏེ་ནི་ རྒོའེ་ཤེ་ཅན་རྒུན་ལ་ ཁྱི་ཞི་ ཡ་ཏོ་ ཅོ་ཉེན་ནེན་། 29 ཁྱི་ཞི་ ཁ་ནི་ སྤེ་ར་ ངན་པ་ མ་ནི་ འབིང་ མ་ཅུག་ལ་ ཟང་པོ་ རྡང་ ཕན་ཏོག་ཅེན་ནེ་ སྤེ་ར་ ཏོང་ཧེ་, ཏེ་ནི་ ཁྱི་ཞི་ སྤེ་ར་ ཉེ་ནེན་ ཡོ་ཀན་རྒུན་ལ་ ཁྱི་ཞི་ སེམ་རུའི་ རྐྱེ་ཅུག་ ཉེན་ནེན་།
30 ཀོན་འཇོག་རྒེ་ ཏམ་པེ་ ཐུག་ཡིད་ལ་ ཐུག་ཚེར་ རྐྱོད་ མ་ཅུག་། ཅེ་ཟེར་ནི་ ཐ་མེ་ ཏུའི་ལ་ ཐར་པེ་ ཞག་ལ་ ཁྱི་ཞ་ ཐར་པ་ ཐོབ་ཅེ་ཕི་ ལྟ་ལ་ ཀོན་འཇོག་རྒེ་ ཁྱི་ཞ་ ཏམ་པེ་ ཐུག་ཉིད་རྡེ་ ཐེ་ཙེ་ ཙོག་སེ་ སལ་ལེ་ ཛད་ཏེ་ནོག་།