ཨེ་ཕེ་སུའི་པ་ 3

ཡ་ཧུ་འདཱ་པ་ མན་ཀན་རྒུ་ནི་ ཕྲོ་ པ་འུ་ལུའི་ ཆག་ལེ་།

ཏེ་རྒ་རྦེ་ཕི་ལ་ ང་ པ་འུ་ལུའི་, མ་ཤི་ཀ་ ཡི་ཤུའི་ ཞབ་རྟོག་ ཞུའི་རྡེ་ ཁྱི་ཞ་ ཡ་ཧུ་འདཱ་པ་ མན་ཀན་རྒུན་ལ་ ནེ་ཚུལ་ ཟང་པོ་ ཤེད་ཅེ་རྦེ་, ང་ ཙོན་ནེ་ན་ ཡོད་། 2 ཁྱི་ཞ་རྒུ་ནི་ འི་རྦོ་ ཚོར་རྡེ་ ཡོད་ཁྲོ་, ཀོན་འཇོག་རྒེ་ ང་ ཁྱི་ཞ་རྒུན་ ཉམ་པོ་ ཁོང་ངེ་ ཐུག་ཞེ་ རྒོ་ཅེ་ ཁག་ ཤེད་ཅེན་འབོ་ སལ་ལེ་ ཛེད་། 3 ཀོན་འཇོག་རྒེ་ སང་སྤེ་རེ་ ཐབ་ ང་ ངོན་ཅུག་རྒེ་ ཛེད་ཀན་འབོ་ ངེ་ འདོར་ལྡུའི་རྡེ་ འི་ འི་རྒེ་ན་ འབྲི་རྡེ་ འིན་། 4 ཏོ་ སིལ་ཟ་ནི་ མ་ཤི་ཀེ་ཕི་ སང་སྤེ་རེ་ ཐབ་, ང་ ཧ་ཀོ་ཀན་འབོ་ ཁྱི་ཞ་རྒུན་ལ་ རྒྱུའི་ ཆ་ཉེན་ནེན་། 5 ངུལ་མེ་ མི་རབ་རྒུན་ལ་, ཏེ་ སང་སྤེ་རེ་ ཐབ་པོ་ ངོན་ཅུག་རྒེ་ མ་ཛེད་ཀག་། འིན་ན་ ཏ་ ཏམ་པེ་ ཐུག་ཡིད་ རྒྱུད་ཏེ་ ཀོན་འཇོག་རྒེ་ ཁོ་རང་ངེ་ ཏམ་པ་ ཧུ་ཚབ་ ཏང་ ལུང་རྟོན་པ་རྒུན་ལ་, ཏོ་ ངོན་ཅུག་རྒེ་ ཛེད་།

6 ཏེ་ སང་སྤེ་རེ་ ཐབ་པོ་ནི་ འི་རྦོ་ ནོག་, ནེ་ཚུལ་ ཟང་པོ་ལ་ ཏེཏ་པ་ ཅོ་ཅེ་རྦེ་ ཡ་ཧུ་འདཱ་པ་ མན་ཀན་རྒུན་ལ་ ཡ་ཧུ་འདཱ་པ་རྒུན་ ཙོག་སེ་ ནོར་ཧལ་ ཐོབ་རྦེན་། ཡི་ཤུ་ མ་ཤི་ཀེ་ན་, ཏོ་ ཉ་ཧ་ ཟུྃ་སྤོ་ ཅིག་རྒེ་ ཡན་ལག་ འགྱུར་རྡེ་ ཀོན་འཇོག་རྒེ་ ཞལ་ཆེཏ་ ཛེད་ཀ་ནེ་ ནང་ལ་ འདྲེའེ་ ཉེན་ནེན་། 7 ཀོན་འཇོག་རྒེ་ ཤེད་ ཏང་ ཁོང་ངེ་ ཐུག་ཞེ་ཅེན་ནེ་ སོལ་རེ་ རྒྱུད་ཏེ་, ང་ ནེ་ཚུལ་ ཟང་པོ་ ཤེད་ཀ་ནེ་ ཞབ་རྟོག་པ་ འགྱུར་རྡེ་ འིན་།

8 ཀོན་འཇོག་རྒེ་ ཏམ་པ་ མི་ ཚང་མེ་ ནང་ནི་ ང་ ཚང་མེ་སང་ མིར་སི་ མེ་ཀན་ཞིག་ ཏང་, ཁོང་ངེ་ ཡ་ཧུ་འདཱ་པ་ མན་ཀན་རྒུན་ལ་ མ་ཤི་ཀེ་ ཧ་ལེ་ཤེ་ པང་ཛོད་རྡེ་ ཧོར་ལ་ ཤེད་ཅེ་ ཐུག་ཞེ་འབོ་ ང་ སལ་ལེ་ ཛེད་། 9 ཡང་ ཅི་ཚང་མ་ ཛེད་ཀ་ནེ་ ཀོན་འཇོག་རྒེ་ ཏག་ས་ཚུག་པ་ རྦེ་རྡེ་ པོ་རེ་ ཛེད་ཀ་ནེ་ ཐབ་ལྡིང་པོ་, མི་རྒུན་ལ་ ཧ་ཀོ་ཅུག་ཅེ་ལ་ ང་ འདམ་མེ་ ཛེད་།

10 ཀོན་འཇོག་རྒེ་ ཐུག་འདོད་པོ་ནི་ ཆོའེ་ཚོག་རྒུན་ རྒྱུད་ཏེ་ ཁོང་ངེ་ ཤེ་རབ་ ན་ཚོག་ ཚང་མ་ རྡེ་བ་ཅན་ནེ་ན་ ཡོ་ཀ་ནེ་ ཝང་སྲུལ་པ་ རྡང་ ཝང་རྒུན་ལ་ ལྟན་ནེ་ ཛེད་ཅེའོ་ ནོག་། 11 ཏེ་རྒ་རྦོ་ ཀོན་འཇོག་རྒེ་ ཐ་མེད་པེ་ ཐབ་ལྡིང་འབོ་ འིན་འབེན་, ཀའོ་ མ་ཤི་ཀ་ ཡི་ཤུ་ ཨ་ཧོའེ་ ཙོབོ་རྡེ་ན་ ཁོང་ངེ་ ཀྲུཔ་ཅུག་རྒེ་ ཛེད་།

12 ཨ་ཧོ་རྒུ་ནི་ མ་ཤི་ཀེ་ཀ་ ཏེཏ་པ་ རྡང་ ཁོང་ ཉམ་པོ་ འབྲེལ་ ཡོད་ཅེ་རྦེ་, མོ་ལམ་ འདང་ ཅོལ་ཟ་ནི་ ཨ་ཧོ་རྒུན་ འཇིའི་ མ་འཇིའི་རྡེ་ སེམ་རུའི་ ཉམ་པོ་ ཀོན་འཇོག་རྒེ་ ཧུ་འདུན་ལ་ ཡོང་ཉེན་ནེན་། 13 ཏེ་རྒ་རྦེ་ཕི་ལ་ ངེ་ ཞུ་ཝ་ འིན་, ཁྱི་ཞ་ ནེ་ཚུལ་ ཟང་པོ་ ཤེད་ཅེ་རྦེ་ ང་ རྡུ་ངལ་ ཐོང་ངེན་ ཡོ་ཀན་འབེ་ཀ་ སེམ་ཤུག་ མ་ཆག་རྒེ་, སྤལ་ངམ་ ཚོར་ཤིག་།

ཨེ་ཕེ་སུའི་ ཆོའེ་ཚོག་རྒེ་ཕི་ མོ་ལམ་།

14-15 ཏེ་རྒ་ ཏོན་འབེ་ཕི་ རྡེ་བ་ཅན་ འདང་ འཇིག་རྟེན་ ཉ་ཧེ་ན་ སྲོག་ ཡོ་ཀན་ ཚང་མ་ ཅོའོ་ ཛད་ཀ་ནེ་ ཡབ་ ཀོན་འཇོག་རྒེ་ ཧུ་འདུན་ལ་ ངེ་ ཐང་ཀེ་ཀ་ པིག་ཛུམ་ རྒྱབ་ཏེ་ ཁོང་ལ་ མོ་ལམ་ ཞུ་ཡོད་། 16 ངེ་ མོ་ལམ་འབོ་, ཀོན་འཇོག་རྒེ་ ཤུག་ ཉམ་པོ་ ཏམ་པེ་ ཐུག་ཡིད་ རྒྱུད་ཏེ་, ཁོང་ངེ་ ཧ་ལེ་ཤེ་ རྒྱུ་ནོར་རེ་ ཁྱི་ཞ་རྒུ་ནི་ སེམ་ ཤེད་ཅེན་ ཛེད་ཤིག་། 17 ཏེ་ནི་ ཏེཏ་པེ་ ཅོའེ་རྡེ་ མ་ཤི་ཀ་ ཁྱི་ཞི་ སེམ་མེ་ན་ ཞུ་རྡེན་, ཡང་ ཁྱི་ཞ་རྒུན་ ཀོན་འཇོག་རྒེ་ ཤེ་སྤེ་ན་ པ་ཀྲག་ ཟུམ་འདེ་ རྒྱེ་ཤེའོ་ ངེ་ མོ་ལམ་ འིན་། 18 ཀོན་འཇོག་རྒེ་ མི་ ཏམ་པ་ ཚང་མ་ ཉམ་པོ་, མ་ཤི་ཀེ་ ཤེ་སྤ་འབོ་ ཙམ་ཤིག་རྒེ་ ཞང་ཅེན་, རིང་མོ་, ཐོན་པོ་ རྡང་ ཐིལ་ལ་ འིན་ཀན་འབོ་ ཧ་ཀོ་ཅེ་ ཁྱུད་ ཁྱི་ཞ་རྒུན་ལ་ སལ་ཤིག་། 19 མ་ཤི་ཀེ་ ཤེ་སྤ་ ཀྲག་པོ་ ཀའོ་ སོན་ཏེ་ ཧ་ཀོ་ ཉེན་ནེ་ མག་, ཏོ་རྦེ་ ཐོང་ངོམ་ ཁྱི་ཞ་ ཆ་ཤིག་, ཏེ་ནི་ ཁྱི་ཞ་རྒུན་ ཀོན་འཇོག་ ཁོ་རང་ངེ་ ཤོད་ལམ་ ཉམ་པོ་ ཧང་ངེ་ ཛེ་རྡེན་།

20 ཨ་ཧོ་རྒུ་ནི་ ཀོན་འཇོག་ལ་ རྟོད་པ་ པུ་ལེན་, ཅེ་ཞུ་ནི་ ཨ་ཧོའེ་ན་ ཆག་ལེ་ ཛེད་ཀན་ ཁོང་ངེ་ ཤེད་ རྒྱུད་ཏེ་, ཨ་ཧོ་རྒུ་ནི་ ཞུ་ཀན་ ཡང་ སམ་ཀན་ ཚང་མེ་སང་ མང་ངེ་ ཁོང་ངེ་ ཛེད་ ཉེན་ནེ་ནོག་། 21 མི་རབ་ ཚང་མེ་ ཆོའེ་ཚོག་ ཏང་ མ་ཤི་ཀ་ ཡི་ཤུའི་ འིན་ཀན་རྒུ་ནི་ ཀོན་འཇོག་ལ་ ཚེ་རབ་ནི་ ཚེ་རབ་ ཏུའི་རྒྱུན་ སྤལ་ ཐོབ་ཤིག་, ཨ་མེན་།