ཁྲིམ་ ཁ་ཉེན་ཅེ་ ཡང་ ཏེཏ་པ་ ཅོ་ཅེ་།
3
འོ་ ཧ་འགྲང་, འགཱ་ལ་ཏི་ཡཱ་པ་རྒུན་, སུའི་ ངན་ཆོའེ་ ཅོའེ་རྡེ་ ཁྱི་ཞ་རྒུན་ པུང་ངུ་ ཙོག་སེ་ ཧ་འགྲང་ འགྱུར་ཤུག་? ངེ་ ཁྱི་ཞ་རྒུན་ལ་ ཡི་ཤུ་ མ་ཤི་ཀ་ རྐྱང་ཤིང་ངེ་ཀ་ ཀྲོང་ཧན་འབོ་, ཁྱི་ཞ་རང་ངེ་ མིག་ནེ་ ཐོང་ཀན་ ཙོག་སེ་ སལ་སྤོ་ ཅོའེ་རྡེ་ ཤེད་པེན་། 2 ངེ་ ཁྱི་ཞ་རྒུན་ལ་ འེ་རྒ་ ཏྲི་ཝ་ ཅིག་པོ་ འདྲི་ཡོད་, ཁྱི་ཞ་རྒུན་ལ་ ཏམ་པེ་ ཐུག་ཡིད་, མོ་ཤེ་ ཁྲིམ་རྒུན་ སྲུང་ཅེའོ་ ཐོབ་རྦེ་ ཡང་ མ་ཤི་ཀེ་ ཧོར་ལ་ ཁྲིན་འབོ་ ཚོར་རྡེ་ ཏེཏ་པ་ ཅོ་ཅེའོ་ ཐོབ་? 3 ཁྱི་ཞ་རྒུན་ འི་ཟུག་ ཧ་འགྲང་ རིག་ ཀ་ཟུག་རྒེ་ འགྱུར་? ཁྱི་ཞ་རྒུ་ནི་ མ་ཤི་ཀེ་ན་ མི་ཙེ་འབོ་ ཏམ་པེ་ ཐུག་ཡིད་ རྒྱུད་ཏེ་ འགོ་ཟུག་ ཅོའེ་རྡེ་, ལྟིང་ནི་ ཅི་ཕི་ ཁྱི་ཞ་རྒུ་ནི་ མི་ ཁྱུད་རྡེ་ན་ ཏོ་ ཀྲུབ་ཅུག་ཅེ་ ཙོན་འགྲུའི་ ཅོའེན་? 4 ཁྱི་ཞ་རྒུ་ནི་ རྡུ་ངལ་ ཚང་མ་ ནེན་ཅེའོ་ ཕན་ཏོག་ མེད་རྡེ་ མན་འགྲོ་? ནེན་ཏེན་ལ་ ཏེ་རྒུན་ ཏོན་མེད་ལ་ སོང་འདེ་ མན་འགྲོ་, འིན་ནེ་?5 ངེ་ ཁྱི་ཞ་རྒུན་ལ་ ཡང་ འདྲིན་, ཁྱི་ཞ་རྒུ་ནི་ ཁྲིམ་རྒུན་ སྲུང་ཅེའོ་, ཀོན་འཇོག་རྒེ་ ཁྱི་ཞ་རྒུན་ལ་ ཏམ་པེ་ ཐུག་ཡིད་ སལ་ཅེ་ ཡང་, ཁྱི་ཞི་ ཕྲོ་ ཧ་ལེ་ཤེ་ ལྟའ་རྒུན་ ཅོའོ་ ཛེ་རྡེ་, ཡ་ མ་ཤི་ཀེ་ ཧོར་ལ་ ཚོར་ཧ་ནེ་ ཁྲིན་འབོ་ནི་ རྡེན་ཆེ་ཤེ་ ཅོ་ཅེའོ་ ཛེད་?
6 ཏེ་རྒ་ ཙོག་སེ་ “ཨབ་ར་ཧམ་མེ་ ཀོན་འཇོག་རྒེ་ན་ རྡེན་ཆེ་ཤེ་ ཅོ་ཅེའོ་, ཀོན་འཇོག་རྒེ་ ཁོང་ལ་ ཀྲང་པོ་ ཐེའེ་ ཛེད་།” 7 སོང་པེ་སང་ ཀོན་འཇོག་རྒེ་ན་ ཏེཏ་པ་ ཅོ་ཀན་རྒུན་ ཨབ་ར་ཧམ་མེ་ ངོའེ་སྤོ་ ཕར་རྒྱུད་ འིན་ཀན་རྒུན་ ཧ་ཀོ་ མེ་རག་རྒེ་?
8 མ་ཡོང་པེ་ ཏུའི་ན་, ཀོན་འཇོག་རྒེ་ ཡ་ཧུ་འདཱ་པ་ མན་ཀན་རྒུན་ལ་ ཏེཏ་པ་ ཅོ་ཅེ་ རྒྱུད་ཏེ་, ཀྲང་པོ་ ཐེའེ་ ཛེད་ཅེའོ་, སུང་རབ་རྦེ་ ངོན་ཅུག་། ཡང་ “རྒྱལ་ཁབ་ ཚང་མ་ ཁྱེ་རང་ རྒྱུད་ཏེ་ ཅིན་ལབ་ ཐོབ་རྦེན་” མོལ་འདེ་ ནེ་ཚུལ་ ཟང་པོ་ནི་, ཏུའི་ མང་པེ་ ངུལ་ལ་ ཨབ་ར་ཧམ་མེ་ ཤེད་རྡེ་ ཛེད་། 9 ཏོ་རྦེ་ཕི་ མ་ཤི་ཀེ་ན་ ཏེཏ་པ་ ཅོ་ཀན་ ཚང་མ་ལ་, ཨབ་ར་ཧམ་ ཏེཏ་པ་ཅེན་ མི་ ཉམ་པོ་ ཅིན་ལབ་པོ་ ཐོབ་རྦེན་།
10 འིན་ན་ ཀོན་འཇོག་རྒེ་ འདུན་ལ་ ཀྲང་པོ་ ཐེ་ཅེ་ཕི་, ཁྲིམ་ ཁ་ ཉེན་ཅེ་ཀ་ རག་ལེ་རྡེ་ འདེད་ཀན་རྒུན་ལ་, ཁོང་ངེ་ ངན་ ཕོག་རྒེན་། ཅེ་ཟེར་ནི་ སུང་རབ་རྦེ་ན་ མོལ་རྡེ་ ནོག་, “ཁྲིམ་མེ་ སྤེ་ཆེ་ན་ འབྲི་ཛེད་ཏེ་ ཡོ་ཀན་ ཚང་མ་ མ་སྲུང་ཀན་རྒུན་ལ་, ངན་ ཕོག་རྒེན་།” 11 ཏེ་ནི་ ཁྲིམ་ སྲུང་ཅེ་ ཙོན་འགྲུའི་ ཅོའེ་རྡེ་ སུ་ཞི་ལ་ ཀོན་འཇོག་རྒེ་ ཧུ་འདུན་ལ་ ཀྲང་པོ་ མི་ཐེ་ཤེའོ་, སལ་སྤོ་ སོང་འདེ་ ནོག་། ཅེ་ཟེར་ནི་ ཏམ་པེ་ སུང་རབ་རྦེ་ན་ མོལ་རྡེ་ ནོག་, “ཏེཏ་པ་ ཅིག་པོ་ རྒྱུད་ཏེ་ མི་ ཀྲང་པོ་ཞིག་ལ་ མི་ཙེ་ ཐོབ་རྦེ་ནོག་།” 12 འི་ ཏེཏ་པེ་ ལམ་འབོ་, ཁྲིམ་མེ་ ལམ་ ཀ་རྦེ་ “ཁྲིམ་ ནང་ཞིན་ འགྲུལ་ཧན་རྒུན་ལ་ ཏེ་ ཁྲིམ་ ཚང་མ་ ཁ་ཉེན་འདེ་ མི་ཙེ་ པུད་རྒོའེ་རྡེ་ནོག་” ཟེར་ཧན་འབེ་སང་ མ་ སོ་སོ་ཞིག་ ཡོད་ཏེ་ ནོག་།
13 འིན་ན་ ཨ་ཧོ་ ཚང་མ་ ཁྲིམ་མེ་ ངན་ ཕོག་ཀ་ནེ་ཀ་ནི་ མ་ཤི་ཀེ་ རིན་ ཤལ་ལེ་ ཛེད་ཏེ་ ཐར་ཤུག་, ནམ་ ཨ་ཧོའེ་ ཅོ་ཀ་ནེ་ ལེ་ཧ་ ངན་པ་རྒུ་ནི་ ངན་འབོ་, ཁོང་ངེ་ ཁོ་རང་ངེ་ཀ་ ཁུར་རེ་ ཛེད་ཏེ་ ཁོང་ རྐྱང་ཤིང་ངེ་ཀ་ རྐྱང་། ཅེ་ཟེར་ནི་ ཏམ་པེ་ སུང་རབ་རྦེ་ན་ འབྲི་ཛེད་ཏེ་ འདུག་, “ལྕང་མེ་ཀ་ རྐྱང་ཀན་ ཚང་མ་ལ་ ངན་ ཕོག་ཏེ་ ནོག་།” 14 མ་ཤི་ཀ་ ཡི་ཤུ་ རྒྱུད་ཏེ་, ཀོན་འཇོག་རྒེ་ ཡ་ཧུ་འདཱ་པ་ མན་ཀན་རྒུན་ལ་, ཨབ་ར་ཧམ་མེ་ ཞལ་ཆེཏ་ ཛེད་ཀ་ནེ་ ཏེ་རྒ་ ཅིན་ལབ་པོ་ སལ་ལེ་ ཛེད་། ཁོང་ངེ་, ཨ་ཧོ་རྒུན་ལ་ ཏེཏ་པ་ རྒྱུད་ཏེ་, ཞལ་ཆེཏ་ ཛེད་ཀ་ནེ་ ཏམ་པེ་ ཐུག་ཡིད་འབོ་, ཐོབ་ཅེ་ རྒྱུ་ཚན་འབེ་ཕི་, ཏོ་ ཛེད་།
ཁྲིམ་རྒུན་ འདང་ ཀོན་འཇོག་རྒེ་ ཞལ་ཆེཏ་།
15 ཤེ་སྤ་ སྤུན་རྒུན་ ཏ་ ང་ ཞག་ཏང་ངེ་ མི་ཙེ་ རྡང་ འབྲེལ་ཧ་ནེ་ སྤེ་ཞིག་ ཏང་ཅུག་། མི་ ཉི་རྡེ་ པར་ལ་ ཆེཏ་ཏོན་ འབྲི་རྡེ་ ལྟིང་ནི་ སུ་ཞིག་ལ་, ཏོ་ལ་ ནང་མེད་ ཅོ་ མི་ཉེན་, ཡང་ ཏོ་ལ་ ནེན་འདེ་ ཐེ་རྦ་ ཟེར་ མི་ཉེན་། 16 ཀོན་འཇོག་རྒེ་ ཞལ་ཆེཏ་རྒུན་ ཨབ་ར་ཧམ་ འདང་ ཁོང་ངེ་ ཕར་རྒྱུད་ལ་, ཅོའོ་ ཛེད་ཏེ་ ནོག་། སུང་རབ་རྦེ་ན་ “ཕར་རྒྱུད་རྒུན་” མོལ་རྡེ་ མི་འདུག་, ཀ་རྦེ་ ཏོན་འབོ་ མི་ མང་པོ་ཞིག་, འིན་ན་ “ཕར་རྒྱུད་ལ་” མོལ་རྡེ་ འདུག་, ཀ་རྦེ་ ཏོན་འབོ་, མི་ ཅིག་ཅིག་ ཡང་ནི་ མ་ཤི་ཀ་། 17 ངེ་ ཟེར་ཤེ་ ཏོན་འབོ་, མོ་ཤེ་ལ་ སལ་ཧ་ནེ་ ཁྲིམ་མེ་སང་ ལོ་ ཞིབ་རྒྱ་ སུམ་ཅུའི་ ངུལ་ལ་, ཀོན་འཇོག་རྒེ་ ཨབ་ར་ཧམ་ ཉམ་པོ་ ཞལ་ཆེཏ་ ཛེད་། མོ་ཤེ་རྡེ་ ཁྲིམ་འབོ་, ཀོན་འཇོག་རྒེ་ ཨབ་ར་ཧམ་ ཉམ་པོ་ ཆེཏ་ཏོན་ ཛེད་ཀན་འབོ་, ཅག་ཏེ་ མེ་ཀན་ ཅོ་ མི་ཉེན་། 18 ཀལ་ཏེ་ ཁྲིམ་རྒུན་ སྲུང་ཅེའོ་, ཨ་ཧོ་རྒུན་ལ་ ཀོན་འཇོག་རྒེ་ ཐར་པེ་ ནོར་ཧལ་རྦོ་ ཐོབ་རྦེ་ཡོད་ནི་, ཏེ་ནི་ ཐར་པ་རྦོ་ ཞལ་ཆེཏ་ ཛེད་ཀན་འབེ་ཀ་ རག་ལེ་རྡེ་ མེད་ཏེ་ ནོག་། འིན་ན་ ཀོན་འཇོག་རྒེ་ ཐུག་ཞེ་ན་ ཨབ་ར་ཧམ་ ཁོ་རང་ངེ་ ཞལ་ཆེཏ་ རྒྱུད་ཏེ་, ཐར་པེ་ ནོར་ཧལ་རྦོ་ སལ་ལེ་ ཛེད་།
19 ཏེ་ནི་ ཅི་ཕི་ ཁྲིམ་པོ་ ཏྃ་རྡེ་ ནོག་? འི་རྦོ་ མི་རྒུན་ལ་ ཁོང་རྒུ་ནི་ རྡིག་པ་རྒུན་ ལྟན་ཅེ་ཕི་ ཞལ་ཆེཏ་རྡེ་ ལྟིང་ནི་, ཏེ་ཀ་ ནེན་མ་ སལ་ལེ་ ཛེད་། འིན་ན་ ཏེ་ ཁྲིམ་འབོ་ ཏེ་ཏེ་ཚུག་པ་ ལུའི་ཤེ་ལ་ ཅོའོ་ ཛེད་, ནམ་ཚུག་པ་ ཏེ་ ཕར་རྒྱུད་པོ་ ལེཔ་ མི་ལེབ་, ཀའོ་ ཀོན་འཇོག་རྒེ་ ཞལ་ཆེཏ་ ཛེད་ཏེ་ འིན་འབེན་། ཀོན་འཇོག་རྒེ་ ཏེ་ ཁྲིམ་པོ་ ཕོ་ཉ་རྒུན་ རྒྱུད་ཏེ་, མོ་ཤེ་ལ་ སལ་ལེ་ ཛེད་, ཁོ་ནི་ ཀོན་འཇོག་ ཏང་ མི་རྒུ་ནི་ པར་ལ་ པར་མི་ཞིག་ འིན་འབེན་། 20 ཏ་ རྡེ་ ཅིག་རྒེ་སང་ མང་ངེ་ན་ ཆེཏ་ཏོན་ ཅོ་ཟ་ནི་, པར་མི་ རྒོའེ་ཤེ་ ཆ་ནོག་། འིན་ན་ ཀོན་འཇོག་ ཅིག་ ཞུ་རྡེ་ འིན་ཅེ་ཀ་ནི་, ཁོང་ངེ་ ཨབ་ར་ཧམ་ ཁོ་རང་ངེ་ ཞལ་ཆེཏ་པོ་ སལ་ཟ་ནི་, པར་མི་ ཀོལ་ལེ་ མ་ཛེད་།
21 ཏེ་ནི་ ཅི་, ཁྲིམ་འབེ་ ཀོན་འཇོག་རྒེ་ ཞལ་ཆེཏ་ལ་ རྒྱཔ་འགལ་ ཅོ་ནོག་རྒེ་? མ་ནི་ ཅོའོ་ མག་། ཀལ་ཏེ་ ཁྲིམ་མེ་ ཨ་ཧོ་རྒུན་ལ་ མི་ཙེ་ སོ་མ་ཞིག་ ཏང་ཉེན་ནེ་ ཡོད་ནི་, ཏེ་ནི་ ཏོ་ ཁ་ ཉེན་ཅེ་ནི་ ཨ་ཧོ་རྒུན་ ཀོན་འཇོག་རྒེ་ ཧུ་འདུན་ལ་ ཀྲང་པོ་ ཅོའེ་རྡེ་ ཡོད་ཁྲོ་། 22 འིན་ན་ ཏམ་པེ་ སུང་རབ་རྦེ་, ཨ་ཧོ་ ཚང་མ་ རྡིག་པེ་ ཙོན་པ་ འིན་ཀན་འབོ་ སྤང་པོ་ སལ་ལེ་ ཛེད་ཏུག་། ཏོ་རྦེ་ཕི་ ཡི་ཤུ་ མ་ཤི་ཀེ་ན་ ཏེཏ་པ་ ཅོ་ཅེ་ ཅིག་པོ་ རྒྱུད་ཏེ་, ཀོན་འཇོག་རྒེ་ ཐར་སྤེ་ ཞལ་ཆེཏ་པོ་ ཐོབ་རྦེ་ནོག་།
ཏེཏ་པ་ རྒྱུད་ཏེ་ ཀོན་འཇོག་རྒེ་ ཕྲུ་རྒུ་རྒུན་།
23 འི་ ཏེཏ་པ་རྦོ་ ཡོང་ངེ་སང་ ངུལ་ལ་, ཁྲིམ་འབོ་ ཨ་ཧོ་རྒུན་ ཙོན་ཁང་ངེ་ན་ ཧར་རྡེ་ ཀུ་ལིག་ ཅུག་ཏེ་ པོར་རྡེ་ ནོག་, ནམ་ཚུག་པ་ ཏེཏ་པ་རྦོ་ ངོན་ མི་ངོན་། 24 ཏེ་ ཁྲིམ་འབོ་, མ་ཤི་ཀ་ ངོན་ངོན་ཚུག་པ་ ཨ་ཧོ་རྒུན་ ཁྲིད་ཀ་ནེ་ ཁག་ཁུར་པ་ ཅོའོ་ ཛེད་། ཏེ་ནི་ མ་ཤི་ཀེ་ན་ ཏེཏ་པ་ ཅོ་ཅེ་ རྒྱུད་ཏེ་ ཨ་ཧོ་རྒུན་ ཀྲང་པོ་ ཐེའེ་ ཛེ་རྡེན་། 25 འིན་ན་ ཏ་, ཏེ་ ཏེཏ་པེ་ ལམ་འབོ་ རྐྱོད་ཅེ་ཀ་ནི་, ཨ་ཧོ་རྒུན་ལ་ ཁྲིམ་མེ་ ལྟ་ཏོག་རྒེ་ ཡོག་ལ་ འདེད་རྒོའེ་ མེ་ཀག་། 26 མ་ཤི་ཀ་ ཡི་ཤུའི་ན་ ཏེཏ་པ་ ཅོ་ཅེ་རྦེ་, ཁྱི་ཞ་ ཚང་མ་ ཀོན་འཇོག་རྒེ་ ཕྲུ་རྒུ་རྒུན་ ནོག་། 27 ཁྲུའི་ནེ་ནེ་རྡང་, ཁྱི་ཞ་ ཚང་མ་ མ་ཤི་ཀ་ ཉམ་པོ་ ཅིག་འགྲིལ་ སོང་འདེ་ མ་ཤི་ཀེ་ ཤོད་ལམ་རྒུན་ ཀོའེ་ལག་ སོ་མ་ ཙོག་སེ་ ཀོན་འདེ་ ནོག་། 28 ཏ་ ཡ་ཧུ་འདཱ་པ་ རྡང་ ཡ་ཧུ་འདཱ་པ་ མན་ཀན་, ཚེ་ཡོག་ ཏང་ ར་ཝང་ཅེན་, པུ་ཙ་ རྡང་ པོ་མོ་རྒུ་ནི་ པར་ལ་ ཅང་ ཁྱེད་ མེ་ཀག་, ཅེ་ཟེར་ནི་ ཁྱི་ཞ་ ཚང་མ་ མ་ཤི་ཀ་ ཡི་ཤུའི་ན་ ཅིག་ ནོག་། 29 ཁྱི་ཞ་ མ་ཤི་ཀེ་ འིན་ཅེ་ཀ་ནི་, ཁྱི་ཞ་རྒུན་ ཨབ་ར་ཧམ་མེ་ རྡེན་འབེ་ ཕྲུ་རྒུ་རྒུན་ ནོག་། ཡང་ ཀོན་འཇོག་རྒེ་ ཞལ་ཆེཏ་ ནང་ཞིན་, ཁྱི་ཞ་རྒུན་ ཨབ་ར་ཧམ་མེ་ ནོར་ཧལ་ལེ་ རྡག་པོ་ འགྱུ་རེན་།