པ་འུ་ལུ་ རྡང་ ཟུའི་མེ་ ཧུ་ཚབ་རྒུན་།
11
ཏ་རུང་ལ་ ངེ་ ཧ་འགྲང་ལ་ ཕོ་སོ་ ཅོ་ཀན་འབོ་ལ་, ཁྱི་ཞ་རྒུན་ ཙི་རྦིག་ཤིག་ ནྃ་ མ་ཚེར་རེ་ ཉེན་ཅེ་ རེ་ཝ་ ཅོའེན་། ཐུག་ཞེ་ ཛེད་ཏེ་ ང་ ཉམ་པོ་ ཟོད་པ་ ཅོའོ་ ཛེད་། 2 ཀོན་འཇོག་རྒེ་ ཁྱི་ཞ་ ཁོ་རང་ ཙོག་རྦོ་ འིན་ཅེ་ ཐུག་འདོད་ ཙོག་སེ་, ངེ་ ནང་ལ་ ཁྱི་ཞ་རྒུ་ནི་ཕི་ ཏེ་རྒ་ ཙོག་སེ་ འདོད་པ་ རག་། ཨ་རྦེ་ ཁོ་རང་ངེ་ པོ་མོ་རྦོ་ ཁོའེ་ མག་པེ་ ལག་ལ་ ལྟེད་ཟ་ནི་, སང་མ་ཞིག་ ཡོང་རྒོའེ་ སམ་མེ་ཡོད་, ཏེ་རྒ་ ཙོག་སེ་ མ་ཤི་ཀེ་ འགྱུར་ཤེ་ཕི་ ངེ་ ཁྱི་ཞ་རྒུན་ ཁོང་ངེ་ ཆག་ལ་ ལྟེད་ཟ་ནི་, སེམ་ཡིད་རྡེ་ ཐོག་ནི་ ཁྱི་ཞ་རྒུན་ སང་མ་ ཡོང་ཅེ་ ཁ་ཅེད་ ཅོའེ་རྦེན་། 3 འིན་ན་ རྡུད་ རུལ་ལ་ ཟུའི་རྡེ་ ཧ་ཝ་ ཟེར་ཧ་ནེ་ པོ་མོ་ལ་ འགོམ་ཧོར་ ཏྃ་ངེ་ ཙོག་སེ་, ཁོའེ་ ཅི་ ཅོའེ་རྡེ་ལ་ ཁྱི་ཞ་རྒུ་ནི་ སེམ་ ལག་མོ་ རྡང་ ཉིང་ངེ་ ཐིལ་ནི་ མ་ཤི་ཀ་ ཅིག་པེ་ ཡིན་ཅེ་རྦེ་ འདོད་པེ་ ལམ་ནེ་ ཐག་རིང་ལ་ ཁྱེ་རེ་ནོག་ སམ་འདེ་ ང་ འཇིའི་རྡེ་རག་། 4 སུ་ཞིག་ ཁྱི་ཞ་རྒུན་ས་ ཡོྃ་རྡེ་ ང་ཞི་ ལབ་ཀ་ནེ་ ཡི་ཤུའི་ ཧོར་ལ་ མན་ནེ་ ཡང་ ཡི་ཤུ་ སོ་སོ་ཞིག་རྒེ་ ཧོར་ལ་ ལབ་ནི་, ཡང་ ཁྱི་ཞ་རྒུན་ལ་ ཐོབ་ཏེ་ ཡོ་ཀ་ནེ་ ཐུག་ཡིད་པོ་ མ་ནོག་ ཡང་ སེམ་ཡིད་ སོ་སོ་ཞིག་ ཐོབ་ནི་, ཡང་ ང་ཞི་ ཤེད་ཀ་ནེ་ ནེ་ཚུལ་ ཟང་པོ་ ཁྱི་ཞི་ ཏེཏ་པ་ ཅོ་ཀན་འབོ་ མ་ནོག་ ཡང་ ནེ་ཚུལ་ ཟང་པོ་ སོ་སོ་ཞིག་ ཤེད་ནི་, ཁྱི་ཞ་རྒུ་ནི་ ཐེད་པོ་ ཉམ་པོ་ ཏོ་རྒུན་ ཉེན་འདུག་།5 འིན་ན་ ཅི་ས་ཐོག་ནི་ ང་ ཏེ་ མ་ཤི་ཀེ་ ཧུ་ཚབ་ ཀྲག་པོ་ རིག་ འིན་ ཟེར་ཧན་རྒུ་ནི་སང་ འུ་ཐུག་ མེད་། 6 སྤེ་ར་ ཏང་ཅེ་ན་ ང་ ཁོང་རྒུན་ ཙོག་སེ་ ཁེ་སྤ་ མེད་ཁྲོ་, འིན་ན་ ངེ་ན་ ཡོན་ཏེན་ མེད་ཏེ་ མན་། ང་ཞི་ ཅོ་ཀན་ འདང་ ལབ་ཀན་ ཚང་མེ་ན་ ཏོ་ སལ་སྤོ་ ཅོའེ་རྡེ་ ལྟན་འབེན་།
7 ཅི་ ངེ་ ང་རང་ པབ་མོ་ རྡང་ ཁྱི་ཞ་རྒུན་ལ་ སི་ཝ་ ཅོའེ་རྡེ་ ཀོན་འཇོག་རྒེ་ ནེ་ཚུལ་ ཟང་པོ་རྦོ་ རིན་ མེད་རྡེ་ ཤེད་ཟ་ནི་, རྡིག་པ་ ཅོའེ་རྡེ་ ནོག་རྒེ་?a 8 ངེ་ ཞེན་མ་ ཆོའེ་ཚོག་རྒུ་ནི་ཀ་ནི་ མུལ་ རོག་རྒུན་ ནེན་འདེ་ ཁྱི་ཞ་རྒུན་ལ་ རིན་ མེད་རྡེ་ ཞབ་རྟོག་ ཞུ་ཟ་ནི་, ཅི་ ངེ་ ཁོང་རྒུན་ ཅོམ་འདོག་རྒེ་? 9 ཡང་ ང་ ཁྱི་ཞ་རྒུན་ ཉམ་པོ་ ཡོད་རྡེ་ ཏུའི་ ངེ་ རྒོའེ་ཤེ་ཅན་རྒུན་ འདྲན་འདྲ་ མ་ཆ་ཟ་ནི་, ངེ་ སུ་ཞི་ལ་ ཡ་ཏོ་ ཅོ་ཅེ་ལ་ པར་རྡོ་ མ་ལྟན་འབེན་, ཅེ་ཟེར་ནི་ མ་ཀེ་འདོ་ནི་ཡཱེ་ནི་ ཡོང་ཀ་ནེ་ སྤུན་རྒུ་ནི་ ང་ རྒོའེ་ཤེ་ ཡོ་ཀན་ ཚང་མ་ ཁྱོྃ་། ང་ ཁྱི་ཞ་རྒུ་ནི་ཀ་ པར་རྡོ་ཞིག་ མ་ནི་ མ་འགྱུར་རྦེན་, ཡང་ ང་ འགྱུར་ཉིན་ན་ མེ་རག་། 10 ཀ་ཟུག་ མ་ཤི་ཀེ་ རྡེན་འབའ་ ངེ་ན་ ཡོ་ཀན་འབོ་ ནེན་ཏེན་ འིན་, ཨ་ཀ་ཡཱེ་b ཡུལ་ལེ་ན་ སུ་ཞིག་ལ་ ཏོ་རྒུ་ནི་ ཧོར་ལ་ ཕོ་སོ་ ཅོ་ཅེ་ནི་ ང་ རྒག་ཏེ་ པོར་ མི་ཉེན་། 11 ངེ་ ཁྱི་ཞ་རྒུན་ཀ་ནི་ ང་རང་ལ་ རྒོའེ་ཤེ་ཕི་ མུལ་ལེ་ རོག་རྒུན་ མི་ནེན་ཅེ་ཀ་ནི་, ཅི་ ངེ་ ཁྱི་ཞ་རྒུན་ལ་ ཤེ་སྤ་ མ་ཅོ་ལ་ ནོག་རྒེ་? མ་ནི་ མན་། ངེ་ ཁྱི་ཞ་རྒུན་ལ་ ཤེ་སྤ་ ཅོ་ཀན་འབོ་ ཀོན་འཇོག་རྒེ་ ཁྱེན་ནེ་ ཛེ་རྡེ་ནོག་།
12 འོ་ནེ་ ངེ་ ཏ་རུང་ང་ ཏེ་རྒ་རྦོ་ ཅོའེན་ འདེད་རྡེན་། ཏོ་རྦེ་ ཀྲག་པོ་ ཧུ་ཚབ་རྒུན་ལ་ ཁོང་རྒུ་ནི་ ལེ་རྦོ་ལ་ ང་ཞི་ ལེ་ཧ་ ཙོག་སེ་ འིན་ ཟེར་རྡེ་ ཕོ་སོ་ ཅོ་ཅེ་ ཧབ་ ཐོབ་ཅེ་ནེ་ རྒག་ཏེ་ པོར་རེན་། 13 ཁོང་རྒུན་ མ་ཤི་ཀེ་ ཟུའི་མ་ ཧུ་ཚབ་རྒུན་ ནོག་། ཁོང་རྒུ་ནི་ རྐྱོན་འཇེན་ནེ་ ལེ་ཧ་རྒུན་ ཅོའེན་, མ་ཤི་ཀེ་ ཧུ་ཚབ་ འིན་ཟུན་ ཏང་ངེ་ནོག་། 14 འིན་ན་ ང་ ཧ་ལེ་ཤེ་ མེ་རག་, རྡུད་རྡེ་ལ་ ཁོ་རང་ ཀོན་འཇོག་རྒེ་ ཀལ་ལེ་ ཛེད་ཀན་ འོད་རྡེ་ ཕོ་ཉ་ འིན་ཟུན་ ཏང་ངེ་ནོག་། 15 ཏེ་ནི་ རྡུད་རྡེ་ ཡོག་པོ་རྒུ་ནི་ལ་ ཁོ་རང་རྒུན་ ཀྲང་པོ་ ཞབ་རྟོག་པ་ འིན་ཟུན་ ཏང་ཀན་འབེ་ཀ་ ཨ་ཧོ་རྒུན་ ཧ་ལེ་རྒོ་ཤེ་ མག་། ལྟིང་འཇུག་ལ་ ཁོང་རྒུན་ལ་ ཁོ་རང་རྒུ་ནི་ ལེ་ཧ་ ངན་པ་ ཅོའེ་ཧན་རྒུན་ལ་ འོའེ་སྤེ་ ཆེད་པ་ ཕོག་རྒེ་ནོག་།
པ་འུ་ལུའི་ མི་ཙེ་ན་ པར་རྡོ་རྒུན་།
16 ངེ་ ཡང་ ཟེ་འིན་, འི་ཟུག་ སྤེ་ར་ ཏང་ཅེ་རྦེ་ ང་ ཧ་འགྲང་ཞིག་ ནོག་ མ་སམ་ཧེ་། ཀལ་ཏེ་ ཁྱི་ཞ་རྒུ་ནི་ ཏུ་ཟུག་ སམ་ནི་, ངེ་ ང་རང་ངེ་ ཧོར་ལ་ ཙི་རྦིག་ མང་ངེ་ ཕོ་སོ་ ཅོ་ཟ་ནི་, ང་ལ་ ཉོན་ཧེ་ ཀ་ཟུག་རྒེ་ ཁྱི་ཞ་རྒུ་ནི་ མི་ ཧ་འགྲང་ཞིག་རྒེ་ ཉེན་ནེ་ཡོད་། 17 ཞེན་ ཡུ་ཙོག་སེ་ ཕོ་སོ་རྒུན་ ཙོབོ་རྡེ་ ཆོག་ནི་ ཡོང་ངེ་ མག་, འིན་ན་ ངེ་ སམ་བ་ མེ་ཀན་ཞིག་ ཙོག་སེ་ སྤེ་ར་ ཏང་ངེ་ཡོད་། 18 ཏོ་རྒུ་ནི་ ཁོ་རང་རྒུ་ནི་ འཇིག་རྟེན་ནེ་ཀ་ འབྲེ་རྦུ་ ཐོབ་ཀན་རྒུ་ནི་ ཧོར་ལ་ ཕོ་སོ་ ཅོ་ཅེ་ཀ་ནི་ ངེ་ལ་ ཅོའེན་། 19 ཁྱི་ཞ་ ཀོ་རིན་ཐི་ མ་ཤི་ཀ་པ་རྒུན་ མ་ ཤེ་རབ་ཅེན་ འིན་ཅེ་ཀ་ནི་ ཁྱི་ཞ་རྒུ་ནི་ ཏེ་ ཧ་འགྲང་ངེ་ ལོབ་རྦོན་རྒུན་ལ་ ཆམ་འདེ་ འིན་ནེ་? 20 ཁྱི་ཞ་རྒུན་ ཝང་ངེ་ ཡོག་ལ་ སྲུལ་ཧན་, ཡང་ ཡོ་ཀན་ ཚང་མ་ ཀོག་ཏེ་ ཁྱེར་ཧན་, ཡང་ ཕན་ཏོག་ ནེན་ཀན་, ཡང་ ཀྲག་པོ་ ལྟན་ཀན་, ཡང་ འགྲམ་ལྕག་ ཏང་ཀན་ ཚང་མ་ལ་ ཁྱི་ཞ་རྒུ་ནི་ སྲན་འདེ་ འདེད་ཏུག་། 21 ཡུ་ཙོག་སེ་ ལེ་ཧ་རྒུན་ ཅོ་ཅེ་ན་ ང་ཞ་རྒུན་ མང་རྡེ་ འུ་ཐུག་ འིན་ཀན་འབོ་ ཤེད་ཅེ་ལ་ ང་རང་ ཁྲེལ་ལེ་ རག་། འིན་ན་ ཀལ་ཏེ་ ཏོ་རྒུ་ནི་ ཁོ་རང་རྒུ་ནི་ ཧོར་ལ་ ཕོ་སོ་ ཅོ་ཅེ་ ཧམ་བ་ ཅོ་ནི་, ངེ་ ང་རང་ངེ་ ཧ་འགྲང་ ཙོག་སེ་ སྤེ་ར་ ཏང་ཀན་འབེ་ཀ་ལ་, ཕོ་སོ་ ཅོ་ཅེ་ ཧམ་བ་ ཅོའེན་།
22 ཁོང་རྒུན་ ཨིབ་རི་པ་ ནོག་རྒེ་? ང་ལ་ འིན་། ཁོང་རྒུན་ ཨིས་ར་ཡེལ་པ་ ནོག་རྒེ་? ང་ལ་ འིན་། ཁོང་རྒུན་ ཨབ་ར་ཧམ་མེ་ ཕར་རྒྱུད་ ནོག་རྒེ་? ང་ལ་ འིན་། 23 ཁོང་རྒུན་ མ་ཤི་ཀེ་ ཞབ་རྟོག་ ཞུ་ཀན་ ནོག་རྒེ་? ཏ་ ངེ་ ཟེར་ཧན་ འདང་ ཟེར་ཤེ་ ཚང་མ་ མི་ཉོན་འབེ་ ཟེར་ཧན་ ཙོག་སེ་ ཚོར་ཤེན་། འིན་ན་ ངེ་ མ་ཤི་ཀ་ ཏོ་རྒུ་ནི་སང་ མང་ངེ་ ཞབ་རྟོག་ ཞུའི་རྡེ་ འིན་: ངེ་ ཁོང་རྒུ་ནི་སང་ ལེ་ཧ་ མང་ངེ་ སྲན་ཀྲེ་ ཅོའེ་རྦེན་, ལེན་ མང་པོ་ ཙོན་ཁང་ངེ་ན་ ཧར་, སི་ ཉེན་མེ་ཀན་ རྟལ་ལྕག་ རྒྱབ་, ལེན་ མང་པོ་ ཤི་ཅེ་ ཉེ་མོ་ལ་ ལེཔ་། 24 ལེན་ ང་ ཏུའི་ཧབ་ སོ་སོའེ་ན་ ཡ་ཧུ་འདཱ་པེ་ སྤོན་འབོ་རྒུ་ནི་ ཆོག་ནི་ ང་ རྟལ་ལྕག་ སུམ་ཅུ་སོར་རྒུ་ རྒྱབ་ཅེ་ ཆེད་པ་ལ་ ཕོག་།c 25 ལེན་པེ་ སུམ་ ང་ པེར་ཧ་ ཉམ་པོ་ རྡུྃ་, ལན་ཅིག་ ང་ རྡོ་ རྒྱབ་ཏེ་ སེད་ཅེ་ ཅོའེ་, ལེན་ སུམ་ ང་ ཡོ་ཀ་ནེ་ ཆུ་རེལ་རྦོ་ ཆག་ཏེ་ ཆུའི་ན་ ནུབ་, ཡང་ ང་ ཉི་མ་ རྡང་ ཚེན་ཞིག་ རྒྱམ་ཚོའེ་ ཆུའི་ན་ ལུའི་། 26 མ་ཤི་ཀེ་ཕི་ ངེ་ འི་ པར་རྡོ་རྒུན་ ཁུར་རྦེན་, ལེན་ མང་པོ་ མ་ ཐག་རིང་ངེ་ ཡུལ་རྒུན་ལ་ པེ་ལ་ སོང་འབེན་, ང་ སྃ་སྤོ་ རྡང་ ཅག་པ་རྒུ་ནི་ འཇི་སྤ་ སོང་, ང་ ང་རང་ངེ་ མི་ ཡ་ཧུ་འདཱ་པ་ མ་ཚེད་ ཡ་ཧུ་འདཱ་པ་ མན་ཀན་རྒུ་ནི་ ཀ་ནེ་ལ་ འཇི་སྤ་ སོང་། རྒྱལ་ས་, ཐང་རྟོང་, ཡང་ ཚོ་རྒུ་ནི་ ནང་ལ་ ང་ འཇི་སྤ་ མང་པོ་ ཅུང་, ཡང་ ཟུན་མ་ ཏེཏ་པ་ཅན་རྒུ་ནི་ ཀ་ནེ་ལ་ ང་ འཇི་སྤ་ སོང་། 27 ངེ་ ཏུའི་ རིང་མོ་ ལེ་ཧ་ ཧོཔ་ ཅོའེ་རྦེན་, ཚེན་ མང་པོ་ཞིག་ ཉིད་མེད་རྡེ་ ལུའི་, ལེན་ མང་པོ་ ལྟོག་རི་ རྡང་ ཧོམ་རི་ ལུའི་རྡེ་ ཟ་རྒྱུ་ མེད་པེན་, ཡང་ ཀོན་རྒྱུ་ མང་པོ་ མེད་འབེ་ ཀྲང་མོ་ལ་ ཡོྃ་།
28 ཏོ་རྒུ་ནི་ཀ་ ནེན་མ་ ཆོའེ་ཚོག་ ཚང་མ་ ཏེཏ་པེ་ནི་ ཀ་ཟུག་ཤིག་ ཡོད་ཁྲོ་ སམ་འདེ་, ང་ ཞག་ཏང་ ཚེར་ཧ་ ཡོྃ་། 29 ཁྱི་ཞ་རྒུ་ནི་ ཕྲོ་ ཏེཏ་པེ་ན་ ཤེད་མེད་ འིན་ཀན་རྒུན་, ང་ ཧ་ཀོ་རག་། ཏེཏ་པ་ཅན་རྒུན་ ཀྲང་པོ་ མན་ཀ་ནེ་ ལམ་མེ་ཀ་ ཁྲིད་ཀན་རྒུ་ནི་ཀ་ ང་ མ་སྲན་ཀྲེ་ སྲོ་ རག་།
30 ཀལ་ཏེ་ ང་ ཕོ་སོ་ ཅོ་རྒོའེ་ནི་, ཏེ་ནི་ ངེ་ ནེན་ཏེན་ལ་ ང་རང་ འུ་ཐུག་ འིན་ཀན་འབེ་ཀ་ ཕོ་སོ་ ཅོའེན་། 31 ཨ་ཧོ་རྒུ་ནི་ ཙོབོ་ ཡི་ཤུའི་ ཡབ་ ཀོན་འཇོག་, ཏུའི་རྒྱུན་ རྟོད་པེ་ འོའེ་སྤ་ ཐོབ་ཅེ་ འིན་ཀན་འབེ་ ངེ་ ཏོ་རྒུན་ ཟུན་ མ་ཏང་ཀན་འབོ་ ཁྱེན་ནེ་ ཛེ་རྡེ་ནོག་། 32 ང་ འདཱ་མེ་ཁེ་ རྒྱལ་སེ་ན་ ཡོད་ཟ་ནི་, རྒྱ་སྤོ་ ཨ་རི་ཏེ་ ཀ་ལོན་འབོ་, རྒྱལ་སེ་ རྒོ་རྒུ་ནི་ཀ་ ང་ ཟུམ་ཅེ་ཕི་ སྲུང་ཀན་རྒུན་ པོར་རྡེ་ འདུག་པེན་། 33 འིན་ན་ ཁོ་ རྡང་ ཁོའེ་ སྲུང་ཀན་རྒུ་ནི་ཀ་ནི་ ཤོར་ཤེ་ལ་, ང་ ཙེ་སྤོ་ཞིག་རྒེ་ན་ རྒྱལ་སེ་ སིག་པེ་ན་ ཡོ་ཀ་ནེ་ ཀར་ཧུང་ རྒྱུད་ཏེ་, ཡོག་ལ་ སྤབ་།