པ་འུ་ལུ་ རྡང་ ཀོན་འཇོག་རྒེ་ ཆོའེ་ཚོག་།
10
ཏ་ ང་ པ་འུ་ལུའི་ ཁྱི་ཞ་རྒུན་ལ་ མ་ཤི་ཀེ་ འཇམ་པོ་ རྡང་ ཀ་ཀྲིན་ ཉམ་པོ་ ཞུ་ཝ་ པུ་ལེ་ཡོད་། ཁྱི་ཞ་རྒུ་ནི་ ང་ ཁྱི་ཞི་ ཕྲོ་ ཡོད་ཟ་ནི་ ངོ་མིག་ ཆུང་ཙེ་, འིན་ན་ ཐག་རིང་ནེ་ ངེ་ ཡི་རྒེ་རྒུན་ འབྲི་ ཟེར་ནེ་ མི་ ཝང་ཅེན་ ཡོང་འདུག་ ས་མེ་ནོག་། 2 ང་ ཡོང་ཟ་ནི་, ང་ཞི་ འཇིག་རྟེན་པེ་ འདོད་པ་ ནང་ཞིན་ ལེ་ཧ་ ཅོ་རུག་ སམ་ཀན་རྒུན་ ཉམ་པོ་ ཝང་ཆ་ ཀལ་ མི་རྒོ་ཤེ་ཕི་, ངེ་ ཁྱི་ཞ་རྒུན་ལ་ ཏག་ས་ ཞུ་ཝ་ པུ་ལེ་ཡོད་།3 ང་ཞ་ མི་ འིན་ན་, ང་ཞ་རྒུ་ནི་ འཇིག་རྟེན་པེ་ ཚུལ་ལ་ མག་ ཏང་ངེ་མེད་། 4 མི་རྒུ་ནི་ སྲན་ཀྲེ་ ཐམ་འདེ་ ཡོ་ཀ་ནེ་ ཟེར་རྒྱུ་རྒུན་ མེ་ཀན་ ཅོ་ཅེ་ལ་, ང་ཞ་རྒུ་ནི་ འཇིག་རྟེན་ནེ་ ལག་ཆ་རྒུན་ མ་ནོག་, ཀོན་འཇོག་རྒེ་ ལག་ཆ་ ཀྲག་པོ་རྒུན་ ཀོ་ལེ་ཡོད་། 5 ང་ཞ་རྒུ་ནི་ མི་རྒུན་ལ་ ཀོན་འཇོག་ ཤེ་ མ་ཤུག་ལ་ པོར་ཧན་ནེ་ ཕོ་སོ་ཅེན་ནེ་ རྒག་རྐྱིལ་ ཚང་མ་ མེ་ཀན་ ཅོའེན་། ཡང་ ཏེ་ རྒྱཔ་འགལ་ཅེན་ནེ་ སམ་ཚུལ་རྒུན་ ཕམ་ཅུག་ཏེ་, མ་ཤི་ཀེ་ ཞལ་ཏ་རྒུན་ ཁ་ཉེན་ཅེ་ ལབ་རྦེ་ཡོད་། 6 ཁྱི་ཞ་རྒུ་ནི་ ཅི་ས་ཐོག་ནི་ ང་ཞི་ ཁ་ ཉེན་ཅིག་, ཏེ་ནི་ ཁ་ མ་ཉེན་ནི་ ལུའི་ཧན་ ཚང་མ་ལ་ ང་ཞི་ ཆེད་པ་ ཅེད་རྡེན་།
7 རྡེན་འབེ་ ནེ་ལུག་པོ་ལ་ ལྟོའེ་ཧེ་, མ་ ལོ་ཁྱེལ་ ཉམ་པོ་ ང་ མ་ཤི་ཀ་ འིན་ ཟེར་ཧན་རྒུ་ནི་ ང་ཞ་རྒུན་འདང་ མ་ཤི་ཀེ་ འིན་ཀན་, ཁོ་རང་རྒུན་ ཙོག་སེ་ ལོ་ཁྱེལ་ ཡོ་ཀན་འབོ་ ཤེ་རྒོའེ་། 8 ཞེན་ ཙོབོ་ ཡི་ཤུའི་ ང་ཞ་རྒུན་ལ་ སལ་ལེ་ ཛེད་ཀ་ནེ་ ཝང་ཆེ་ན་ ཕོ་སོ་ ཅོའེ་རྡེ་, ངེ་ སྤེ་ར་ ཏྃ་རྡེ་ ཡོད་ནི་, ཏོ་ ཁྱི་ཞ་རྒུན་ ཏེཏ་པེ་ན་ མེ་ཀན་ ཅོ་ཅེ་ལ་ མན་, ཤེད་ཅེན་ འགྱུར་ཤེ་ལ་ འིན་འབེན་། ང་ ང་རང་ངེ་ ཝང་ཆ་ ཀོལ་ཧན་འབེ་ཀ་ ཁྲེལ་རྦ་ མི་ཚོར་།
9 ངེ་ ང་རང་ངེ་ ཡི་རྒེ་རྒུན་ རྒྱུད་ཏེ་, ཁྱི་ཞ་རྒུན་ འཇིའི་ཤུག་ཅེ་ ཙོན་འགྲུའི་ ཅོ་མེད་། 10 ཅེ་ཟེར་ནི་ ཁ་ཅིག་རྒེ་, “པ་འུ་ལུའི་ ཡི་རྒེ་རྒུན་ ཏོན་ཏག་ཅེན་ འདང་ ཝང་ཅེན་ ཡོང་འདུག་ འིན་ན་ ཨ་ཧོ་རྒུ་ནི་ ཕྲོ་ ཡོད་ཟ་ནི་, ཁོ་ ཧམ་བ་ མེ་ཀན་ འདང་ ཁོའེ་ ལྕིད་ མེ་ཀ་ནེ་ སྤེ་ར་ ཏང་འདུག་” ཟེ་རེ་ནོག་། 11 ཀ་ཟུག་ ཐག་རིང་ལ་ ཡོད་ཟ་ནི་, ང་ཞི་ ཡི་རྒེ་རྒུན་ འབྲི་རྡེ་ ཡོ་ཀན་ ཙོག་སེ་ ང་ཞ་ ཡོང་ཟ་ནི་, ང་ཞི་ ཝང་ཆ་ ལྟན་ཅེ་རྦོ་, ཏེ་ མི་རྒུན་ལ་ ཧ་ཀོ་རྒོ་ཤེ་ ནོག་། 12 ཏེ་ མི་ ཀྲག་པོ་རྒུ་ནི་ ཁོ་རང་རྒུན་ མ་ ཁག་ཅེན་ འིན་ ཟེར་ཧན་ ཙོག་སེ་ ཟེར་ཤེ་ ང་ཞི་ ཧམ་པ་ ཅོ་མེད་། འིན་ན་ ཁོང་རྒུ་ནི་ ཁོ་རང་ ཅིག་ ཏང་ ཅིག་ ལྟག་ཅེད་ཅེ་ ཡང་ ཅིག་ ཏང་ ཅིག་ པར་ལ་ རྡུར་ཟ་ནི་ ཙམ་ཤིག་རྒེ་ ཧ་འགྲང་ ནོག་།
13 འིན་ན་ ང་ཞ་རྒུ་ནི་ ཝང་ཆ་ནི་ ཐལ་རྡེ་ ཅོ་ཀ་ནེ་ ལེ་ཧ་རྒུ་ནི་ན་ ཕོ་སོ་ ཅོ་མེད་། ང་ཞ་རྒུན་ལ་ ཀོན་འཇོག་རྒེ་ སལ་ལེ་ ཛེད་ཀ་ནེ་ ལེ་ཧ་རྒུ་ནི་ ནང་ནི་ ཀྲུཔ་ཅུག་རྒེ་ ཛེད་ཀན་རྒུ་ནི་ཀ་ ཕོ་སོ་ ཅོའེན་, ཀ་རྦེ་ན་ ཁྱི་ཞ་ ཉམ་པོ་ ལེ་ཧ་ ཅོ་ཀན་རྒུན་ལ་ ཐེའེ་རྡེ་ འིན་། 14 ཀལ་ཏེ་ ཁྱི་ཞ་ས་ ང་ཞ་ མ་ནི་ མ་ཡོང་ངེ་ འིན་འབེན་ནི་, ཏེ་ནི་ ང་ཞ་རྒུ་ནི་ ཁྱི་ཞ་རྒུ་ནི་ཀ་ ཝང་ ཡོད་ ཟེར་ཟ་ནི་, ང་ཞ་ ཟེར་ཆོག་ཅེ་རྦེ་སང་ ཐལ་རྡེ་ ནོག་། འིན་ན་ ཁྱི་ཞ་ཚུག་པ་ ཡོྃ་རྡེ་ མ་ཤི་ཀེ་ ནེ་ཚུལ་ ཟང་པོ་ ཤེད་ཀན་ ང་ཞ་ ཏང་པོ་རང་ འིན་འབེན་, 15 མ་ཚེད་ ང་ཞ་རྒུ་ནི་ ཞེན་མེ་ ཅོའེ་ཧ་ནེ་ ལེ་ཧེ་ཀ་ ཕོ་སོ་ ཅོའེ་རྡེ་ རྟོད་པ་ མ་ནེན་འབེན་། འིན་ན་ ཁྱི་ཞ་རྒུ་ནི་ ཏེཏ་པེ་ན་ ཡར་རྒྱེ་ ཆ་ཤིག་ ཁྱི་ཞི་ ཕྲོ་ ང་ཞི་ ལེ་ཧ་རྒུན་ མང་ངེ་ རྐྱེན་ ཆ་ཅེ་ ང་ཞི་ རེ་ཝ་ འིན་། 16 ཏེ་ནི་ ང་ཞི་ ཁྱི་ཞ་རྒུ་ནི་ མལ་ལེ་སང་ ཐག་རིང་ལ་, ཞེན་སུ་ཞི་ལ་ ལེ་ཧ་ མ་ཅོ་ཀ་ནེ་ ས་ཅ་རྒུ་ནི་ན་ ནེ་ཚུལ་ ཟང་པོ་རྦོ་ ཤེད་ཉེན་ཅེ་ ནོག་, ཅེ་ཟེར་ནི་ ང་ཞི་ ཏེ་ ས་ཅེ་ཀ་ ཕོ་སོ་ ཅོ་ཉིན་ མེ་རག་ ཀ་རྦེ་ན་ ཞེན་མ་རྒུ་ནི་ ལེ་ཧ་ ཅོའེ་ ཚར་རྡེ་ འིན་། 17 ཀ་ཟུག་ ཏམ་པེ་ སུང་རབ་རྦེ་ན་ མོལ་རྡེ་ ནོག་, “ཀལ་ཏེ་ ཁྱི་ཞ་རྒུན་ ཕོ་སོ་ ཅོ་ཉིན་ ཡོད་ནི་ ཙོབོ་ ཀོན་འཇོག་ ཅིག་པེ་ཀ་ ཕོ་སོ་ ཅོའེ་ཧེ་།”
18 རང་འདང་རང་ལ་ རྟོད་པ་ ཏང་ཅེ་རྦོ་ལ་ མན་པ་ ཙོབོ་རྡེ་ རྟོད་པ་ པུལ་ཤེ་པོ་ལ་ རིན་ ཡོད་ཏེ་ ནོག་།