ཡེ་རུ་ཤ་ལེམ་མེ་ མ་ཤི་ཀ་པ་རྒུ་ནི་ཕི་ མུལ་ རོག་རམ་ རྡུ་ཅེ་།
9
ཡེ་རུ་ཤ་ལེམ་མེ་ ཏེཏ་པ་ཅན་རྒུ་ནི་ཕི་ ཞབ་རྟོག་རྒེ་ ཧོར་ལ་ ངེ་ ཁྱི་ཞ་རྒུན་ལ་ འབྲི་རྒོའེ་ མེད་རྡེ་ ནོག་། 2 ཅེ་ཟེར་ནི་ ཁྱི་ཞ་ ཀོ་རིན་ཐི་ ཆོའེ་ཚོག་རྒུན་ ཡ་ཏོ་ ཅོ་ཅེ་ལ་ ཙམ་ཤིག་ རིྃ་རྡེན་ ཡོ་ཀན་འབོ་ ང་ རྒྱུའི་ཡོད་། ཡང་ ཁྱི་ཞ་ ཨ་ཀ་ཡཱེ་aན་ ཡོ་ཀན་རྒུ་ནི་, ལོ་ ཅིག་ནི་ཕ་ལ་ རོག་རྒེ་ མུལ་ ཀལ་ཆོག་ཆོག་ ཡོ་ཀན་འབོ་, ངེ་ མ་ཀེ་འདོ་ནི་ཡཱེ་ ཆོའེ་ཚོག་རྒུ་ནི་ འདུན་ལ་ ཕོ་སོ་ ཅོའེ་རྡེ་ ཤེད་པེན་། རྡེན་འབའ་, ཁྱི་ཞ་རྒུ་ནི་ ཡ་ཏོ་ ཅོ་ཅེ་ འདོད་པ་ ཆོན་མེ་ ཅོའེ་རྡེ་, མ་ཀེ་འདོ་ནི་ཡཱེ་ན་ ཡོ་ཀ་ནེ་ ཏེཏ་པ་ཅེན་ མང་པོ་ཞིག་ལ་ ཏང་ཅེ་ འགོ་ཟུག་།3 འིན་ན་ ཁྱི་ཞ་རྒུ་ནི་ ཧོར་ལ་ ངེ་ ཕོ་སོ་ ཅོ་ཀན་འབོ་ ནོར་རྡེ་ མན་ཀན་ ཡང་ ངེ་ ཟེར་ཧན་ ཙོག་སེ་ ཁྱི་ཞ་རྒུ་ནི་ མུལ་ ཚང་མ་ རྡུའི་རྡེ་ ཀྲལ་འགྲིག་ ཅོ་ཉེན་ཅེ་ཕི་, ངེ་ ཁྱི་ཞ་རྒུ་ནི་ཀ་ འི་ སྤུན་ སུམ་ཀ་ ཀ་ལེ་ཡོད་། 4 ཀལ་ཏེ་ མ་ཀེ་འདོ་ནི་ཡཱེ་ ཏེཏ་པ་ཅན་ ཁ་ཅིག་ ང་ ཉམ་པོ་ ཡོད་ཏེ་ ཁྱི་ཞ་རྒུན་ ཀྲལ་འགྲིག་ མེ་ཀན་འབོ་ ཐོང་ནི་, ཏེ་ནི་ ངེ་ ཕོ་སོ་ ཅོ་ཀན་འབེ་ཀ་ ང་ ཅིག་པོ་ མ་ཚེད་ ཁྱི་ཞ་རྒུན་ལ་ ཁྲེལ་རྦ་ ཆ་ཅེ་ ནོག་། 5 ཏེ་ནི་ ཁྱི་ཞ་རྒུ་ནི་ ཏམ་འཇའ་ ཅོ་ཀ་ནེ་ མུལ་རྒུན་ ཀྲལ་འགྲིག་ ཡོད་ཅེ་ཕི་ ངེ་ འི་ སྤུན་ ཚང་ཀ་ ངེ་སང་ ངུལ་ལ་ ལམ་ཅུག་རྒེ་ཡོད་། འིན་ན་ ཏོ་ ཏང་ཉིན་ མེད་རྡེན་ ཏང་ཀ་ནེ་ ཁྱོའེ་མ་ཞིག་ མན་, ཐེད་ཏེ་ ཏང་ཀ་ནེ་ ཁྱོའེ་མ་ཞིག་ ཡོང་རྒོའེ་ ས་མེ་རག་།
6 འི་རྦོ་ མ་ཞེད་ཧེ་, ས་ངོན་ ཉུང་ཙེ་ ཏབ་ཀ་ནེ་ ཞིང་འབད་པ་ཞིག་ལ་ ལྟོན་ཏོག་ལ་, ཉུང་ཙེ་ཞིག་ མ་ནི་ མིན་ནེ་ མག་། འིན་ན་ ཉིང་ པེ་རྡེ་ ས་ངོན་ ཏབ་ཀན་འབེ་ ལྟོན་ཏོག་ལ་, མང་པོ་ ངེན་། 7 ཙམ་ཤིག་ ཏང་ཉེན་ཅེ་རག་, ཏོ་ ཁྱི་ཞ་ རེ་རེ་ རང་ངེ་ ཉིང་ངེ་ན་ ཐག་ཅེད་རྒོའེ་། སེམ་ མ་ཐེད་རྡེ་ ཡང་ ཝང་ངེ་ན་ མ་ཏང་ཧེ་, ཅེ་ཟེར་ནི་ ཀོན་འཇོག་ ཐེད་པོ་ ཉམ་པོ་ ཏང་ཀན་འབོ་ལ་ ཐུག་ཐེད་རྡེ་ ཛེ་རྡེ་ནོག་། 8 ཡང་ ཀོན་འཇོག་རྒེ་ ཁྱི་ཞ་རྒུན་ལ་ རྒོའེ་ཤེ་ཅན་རྒུན་ ཉིང་ པེ་རྡེ་ སལ་ལེ་ ཛེ་རྡེ་ནོག་། ཏེ་ནི་ ཏུའི་རྒྱུན་ ཁྱི་ཞི་ རྒོའེ་ཤེ་ ཚང་མ་ ཀྲུཔ་ཅེ་ མ་ཚེད་, ཞེན་མ་རྒུན་ལ་ ཡ་ཏོ་ ཅོ་ཉེན་ནེན་། 9 ཀ་ཟུག་ ཏམ་པེ་ སུང་རབ་རྦེ་ན་ མོལ་རྡེ་ ནོག་།
“ཁོང་ངེ་ རྒོའེ་ཤེ་ ཡོ་ཀན་ ཚང་མ་ལ་ ཉིང་ པེ་རྡེ་ སལ་ལེ་ནོག་,
ཁོང་ ཀྲང་པོ་ འིན་ཀན་འབོ་ ཏུའི་རྒྱུན་ ལུའི་རྡེན་།”
10 ཡང་ ཞིང་འབད་པེ་ ས་ངོན་ རིག་ལ་ ཀོན་འཇོག་རྒེ་ ཏི་རྒིར་ལ་ སལ་ལེ་ ཛེ་རྡེ་ནོག་། འེ་རྒ་ ཙོག་སེ་ ཁོང་ངེ་ ཁྱི་ཞ་རྒུ་ནི་ རྒོའེ་ཤེ་ཅན་རྒུན་ རིག་རྒེ་ ཛེད་ཏེ་ ཁྱི་ཞ་རྒུན་ལ་ ཡོ་ཀན་རྒུན་ ཕེལ་ཅུག་རྒེ་ ཛེ་རྡེ་ནོག་། ཏེ་ནི་ ཁྱི་ཞ་རྒུ་ནི་ན་ ཉིང་ པེ་རྡེ་ མང་ངེ་ ཏང་ཅེ་ ལྟོན་ཏོག་ མིན་ནེན་།
11 འོ་ནེ་ ཏུའི་རྒྱུན་ ཉིང་ པེ་རྡེ་ ཏང་ཅེ་ཕི་, ཁྱི་ཞ་རྒུན་ལ་ ཅི་ས་ཐོག་ནི་ ཅིན་ལབ་ སལ་ལེ་ ཛེ་རྡེན་། ཡང་ ནམ་ ང་ཞི་ ཁྱི་ཞ་རྒུན་ཀ་ནི་ ཏེ་ མུལ་རྒུན་ ཁྱེར་རྡེ་ རྒོའེ་ཤེ་ཅན་རྒུན་ལ་ ཏང་ངེ་རྡང་, ཁོང་རྒུ་ནི་ ཀོན་འཇོག་ལ་ ཐུག་ཞེ་ཆེ་ ཞུ་ནོག་། 12 ཏེ་ནི་ འི་ ཏང་ཅེ་ཅེན་ནེ་ ཞབ་རྟོག་པེ་ འབྲེ་རྦུ་ ཟང་པོ་ མིན་ནེ་ནོག་, ཏང་པོ་ ཡེ་རུ་ཤ་ལེམ་མེ་ ཏེཏ་པ་ཅན་རྒུན་ལ་ རྒོའེ་ཤེ་ཅན་རྒུན་ ཐོབ་ཅེ་ རྡང་ ཉི་སྤ་ ཁོང་རྒུ་ནི་ ཐེད་པོ་ ཉམ་པོ་ ཀོན་འཇོག་ལ་ ཐུག་ཞེ་ཆེ་ པུལ་ཤེ་རྒུན་ ནོག་།
13 ཁྱི་ཞ་རྒུ་ནི་ ཞབ་རྟོག་རྒེ་ འབྲེ་རྦུའི་, ཁོང་རྒུ་ནི་ ཀོན་འཇོག་ལ་ སྤལ་ ཐོབ་ཅུག་ལ་ ནོག་, ཅེ་ཟེར་ནི་ ཁྱི་ཞ་རྒུ་ནི་ ཁོང་རྒུན་ འདང་ ཏེཏ་པ་ ཡོ་ཀན་ ཚང་མ་ལ་, ཉིང་ པེ་རྡེ་ ཏང་ཅེའོ་ རྒྱུད་ཏེ་, ཁྱི་ཞ་རྒུན་ མ་ཤི་ཀེ་ ནེ་ཚུལ་ ཟང་པོ་ ཁ་ཉེན་ཀན་ འིན་ཀན་འབོ་, ལྟན་ནེ་ནོག་། 14 ཡང་ ཀོན་འཇོག་རྒེ་ ཁྱི་ཞ་རྒུན་ལ་ སལ་ལེ་ ཛེད་ཀ་ནེ་ ཐུག་ཞེ་ ཁྱི་ཞ་རྒུན་ནེ་ ནང་ནི་ ལུད་རྡེན་ ཡོད་ཅེ་རྦེ་, ཁོང་རྒུ་ནི་ ཉིང་ནི་ ཁྱི་ཞ་རྒུ་ནི་ཕི་ མོ་ལམ་ ཞུ་ནོག་། 15 ཙམ་ཤིག་རྒེ་ ཧ་ལེ་ཤེ་ རྡང་ ཚིག་ རྒྱུད་ཏེ་ ཤེད་ མི་ཉེན་ཤེ་ ཀོན་འཇོག་རྒེ་ ཐར་པ་ རྐྱེ་ཅེ་ཕི་, ཀོན་འཇོག་ལ་ ཐུག་ཞེ་ཆེ་ པུལ་ཧེ་།