ཉིང་ པེ་རྡེ་ སལ་ཅེ་།
8
སྤུན་རྒུན་ ཀོན་འཇོག་རྒེ་ མ་ཀེ་འདོ་ནི་ཡཱེ་ ཆོའེ་ཚོག་རྒུ་ནི་ན་ ཁོ་རང་ངེ་ ཐུག་ཞེ་ རྒྱུད་ཏེ་ ཛེད་ཀན་རྒུན་, ངེ་ ཁྱི་ཞ་རྒུན་ལ་ ཧ་ཀོ་ ཅུག་ཉིན་རག་། 2 ཁོང་རྒུན་ལ་ ནག་ ཏང་ པར་རྡོ་ མང་པེ་ ཚོད་ལྟ་ ཡོྃ་ ཡང་ མང་རྡེ་ལ་ ཉལ་རྦ་ཅེན་ འིན་ འིན་ན་ རྐྱིད་པོ་ ཁོང་རྒུ་ནི་ ནང་ནི་ ལུད་ཏེ་ ཆ་ཅེ་རྦེ་, ཁོང་རྒུན་ ཉིང་སང་ པེ་རྡེ་ སལ་ཧན་རྒུན་ ནོག་།3 ཁོང་རྒུ་ནི་ ཁྱུད་ ནང་ཞིན་ ཙམ་ཤིག་ ཏང་ཉེན་ན་ ཏྃ་ མེ་ཚད་, ཏེ་སང་ མང་ངེ་ ཏང་ཀན་འབོ་ལ་ ངེ་ སྤང་པོ་ ཏང་ཉེན་ཅེ་རག་, ཡང་ ཏོ་ ཁོང་རྒུ་ནི་ ཐེད་པོ་ ཉམ་པོ་ ཅོ་རུག་། 4 ཡེ་རུ་ཤ་ལེམ་མེ་ རྒྱལ་སེ་ན་ ཡོ་ཀ་ནེ་ ཏེཏ་པ་ཅན་རྒུན་ལ་ ཡ་ཏོ་ ཅོ་ཅེ་ སི་ཝེ་ན་ ཁོང་རྒུ་ནི་ ཁག་ ནེན་ཉེན་ཅེ་ལ་, ང་ཞ་ ཡང་ནི་ ཡང་ འཇུ་འཇུ་ ཟེ་རེན་ ཞུ་ཝ་ པུལ་རྡུག་། 5 ཡང་ ཁོང་རྒུ་ནི་ ང་ཞི་ སམ་ཀ་ནེ་སང་ མང་ངེ་ ཅོའེ་, ཅེ་ཟེར་ནི་ ཀོན་འཇོག་རྒེ་ ཐུག་འདོད་ ནང་ཞིན་ལ་ ཁོ་རང་རྒུན་ ཏང་པོ་, ཙོབོ་ ཡི་ཤུ་ ཏེ་ནི་ ང་ཞ་རྒུན་ལ་ ཏང་འདུག་།
6 ཏེ་རྒ་རྦེ་ཕི་ལ་ ང་ཞ་རྒུ་ནི་ སྤུན་ ཏི་ཏུའི་, འགོ་མ་ ཁྱི་ཞ་རྒུན་ལ་ མུལ་ རོག་རྒུན་ རྡུའི་རྡེ་ ཁྱོང་ཅེ་ འགོ་ཟུག་ ཅོ་ཅེ་ལ་ སེམ་རུའི་ ཏྃ་། ཏེ་ མུལ་ རོག་རྒུན་ རྡུ་ཅེ་འབོ་ ཀྲུཔ་ཅུག་ཅེ་ལ་ སེམ་རུའི་ ཏང་ཅེ་ཕི་, ངེ་ ཁོ་ ཁྱི་ཞི་ཀ་ ལོག་ཏེ་ ཆ་ཅེ་ལ་ ཞུ་ཝ་ པུ་ལེ་ཡོད་། 7 ཁྱི་ཞ་རྒུ་ནི་ ལེ་ཧ་ མང་པེ་ན་ མ་ རྒྱ་ལེ་ ཅོའེ་རྡེ་ ནོག་, སྤེར་ན་ ཏེཏ་པེ་ན་, སྤེ་ར་ ཏང་ཅེ་ནི་, ཤེ་རྒྱུ་ན་, ལེ་ཧ་ ཅོ་ཅེ་ འདོད་པེ་ན་, ཡང་ ང་ཞི་ཕི་ ཁྱི་ཞ་རྒུ་ནི་ ཤེ་སྤེ་ ན་། ངེ་ འདོད་པ་རྦོ་, ཁྱི་ཞི་ ཉིང་ པེ་རྡེ་ ཏང་ཅེ་ ལེ་ཧ་རྦེ་ ནང་ལ་ རྒྱ་ལེ་ ཅོ་རྒོ་ཤེ་ ས་མེ་རག་།
8 ངེ་ ཁྱི་ཞ་རྒུན་ལ་ ཏོ་ ཅོའེ་ ཟེར་རྡེ་ ཀཱ་ ཏང་ངེ་མེད་། འིན་ན་ ངེ་ ཞེན་ཡང་ ཆོའེ་ཚོག་རྒེ་ ཏང་འདོད་ཅེན་རྒུན་ ཉམ་པོ་ རྡུར་རྡེ་ ཁྱི་ཞ་རྒུ་ནི་ ཤེ་སྤ་ ཙམ་ཤིག་རྒེ་ ཀྲང་པོ་ འིན་ཀན་འབོ་, ཐི་ཚོད་ལྟ་ ཉིན་རག་།
9 ཨ་ཧོ་རྒུ་ནི་ ཙོབོ་ ཡི་ཤུ་ མ་ཤི་ཀེ་ ཐུག་ཞེ་རྦོ་ ཁྱི་ཞ་རྒུན་ལ་ རྒྱུའི་ཡོད་ཏེ་ ནོག་། ཞེན་ རྡེ་བ་ཅན་ནེ་ན་ ཁོང་ ཆུག་པོ་ འིན་ནི་, ཁྱི་ཞ་རྒུ་ནི་ ཏོན་ལ་ ཁོང་ ཉལ་རྦ་ཅེན་ འགྱུར་རེ་ ཛེད་། ཁྱི་ཞ་རྒུན་ རྡེ་བ་ཅན་ནེ་ན་ ཆུག་པོ་ འགྱུར་ཤུག་ཅེ་ཕི་, ཁོང་ ཉལ་རྦ་ཅེན་ འགྱུར་རེ་ ཛེད་།
10 འི་རྦོ་ ངེ་ ཁ་རྡ་ འིན་, ལོ་ ཅིག་རྒེ་ ངུལ་ལ་ ཁྱི་ཞ་རྒུ་ནི་ འགོ་ཟུག་ ཅོ་ཀ་ནེ་ ལེ་ཧ་རྦོ་, ཀྲུཔ་ཅུག་ནི་ རྒྱ་ལེ་ ཆ་ཅེ་ ནོག་། ངུལ་མེ་ ལོའེ་ན་ ཁྱི་ཞ་རྒུན་ ཏང་པོ་རང་ འིན་འབེན་, ཀའོ་རྒུ་ནི་ ཡེ་རུ་ཤ་ལེམ་མེ་ན་ ཡོ་ཀ་ནེ་ མ་ཤི་ཀ་པ་རྒུན་ལ་ མུལ་ ཏང་ཅེ་ འདོད་པ་ ཡོད་ཅེ་ མ་ཚེད་ ཏྃ་རྡེ་ འིན་འབེན་། 11 ཏ་ ཁྱི་ཞ་རྒུ་ནི་ ཀ་ལེ་རྦོ་ ངུལ་ལ་ འགོ་ཟུག་ ཅོའེ་ ཏོ་ ཀྲུཔ་ཅུག་ རྒོ་ཤེ་ ནོག་། ཁྱི་ཞ་རྒུ་ནི་ ངུལ་ལ་ ཏང་ཅེ་ སེམ་མེ་ འདོད་པའོ་, ཏག་ས་ ཏེ་རྒ་ ཙོག་སེ་ ཏང་ཅེ་ན་ ལྟོན་ཧེ་, རང་རང་ངེ་ ཁྱུད་ ནང་ཞིན་ལ་ ཏོང་ཧེ་། 12 ཁྱི་ཞ་རྒུ་ནི་ ཅི་ཞིག་ ཏང་ཅེ་ ཐག་ཅེད་ ཅོའེ་ ཀལ་ཏེ་ ཡུན་རིང་ཞིག་ ཏང་ནི་, ཏོ་རྦེ་ ཀོན་འཇོག་ ཐུག་ཉེ་ ཤུག་རྒེ་ནོག་, ཡང་ ཏོ་ ཁྱི་ཞ་རྒུ་ནི་ ཏང་ཅེ་ ཁྱུད་ནི་ ཐལ་རྡེ་ མ་ཏང་, ཁྱི་ཞ་རང་ངེ་ ཁྱུད་ ནང་ཞིན་ ཏང་རྒོའེ་། 13 འོ་ནེ་ ངེ་ འདོད་པ་རྦོ་, ཁྱི་ཞ་རྒུ་ནི་ ཏང་ཅེ་རྦེ་, ཞེན་མ་རྒུ་ནི་ མི་ཙེ་རྦོ་ ལ་མོ་ཞིག་ ཡང་ ཁྱི་ཞ་རང་རྒུ་ནི་ མི་ཙེ་རྦོ་ ཀག་སྤོ་ཞིག་ འགྱུར་ཤུག་ཅེ་འབོ་ མན་, འིན་ན་ ཚང་མ་ འདྲན་འདྲ་ ཡོང་རྒོ་ཤེའོ་ འིན་། 14 ཏག་ས་ ཁྱི་ཞ་རྒུ་ནི་ ལག་ལ་ མང་པོ་ ཡོད་ཅེ་ཀ་ནི་, རྒོའེ་ཤེ་ཅན་རྒུན་ལ་ ཡ་ཏོ་ ཅོ་ཉེན་ནེན་། ཡོང་ཅེ་ཅེན་ནི་ ཏུའི་ན་, ཁོང་རྒུན་ལ་ མང་པོ་ འཇོར་རྡེ་ ཁྱི་ཞ་རྒུན་ལ་ རྒོའེ་ཤེ་ ཡོད་ཟ་ནི་, ཁྱི་ཞ་ ཉམ་པོ་ རྒོའེན་, ཏེ་ནི་ ཚང་མ་ འདྲན་འདྲ་ འགྱུ་རེན་། 15 ཀ་ཟུག་ ཏམ་པེ་ སུང་རབ་རྦེ་ན་ མོལ་རྡེ་ འདུག་།
“མང་པོ་ རྡུའི་རྡེ་ ཁྱོང་ཀན་རྒུ་ནི་ ལག་ལ་
ཀོལ་ལ་ ཏང་ཅེ་ལ་ མ་ལུའི་རྡེ་ ནོག་།
ཡང་ ཉུང་ཙེ་ རྡུའི་རྡེ་ ཁྱོང་ཀན་རྒུ་ནི་
རྒོའེ་ཤེ་ འདྲན་འདྲ་ སོང་འདེ་ ནོག་།”
ཏི་ཏུའི་ རྡང་ ཁོའེ་ ཁྲོ་པ་རྒུན་།
16 འིན་ན་ ཀོན་འཇོག་ལ་ ཐུག་ཞེ་ཆེ་, ཁོང་ངེ་ ང་ཞི་ སྤུན་ ཏི་ཏུའི་ལ་, ཁྱི་ཞ་རྒུ་ནི་ཕི་ ངེ་ན་ ཡོ་ཀ་ནེ་ འདོད་པ་རྒུན་ ཙོག་སེ་ སལ་ལེ་ ཛེད་ཏེ་ འདུག་། 17 ཏི་ཏུའི་, ཁྱི་ཞ་ ཐུག་རྒེ་ལ་ ཡང་ སོང་ ཟེར་ཧ་ནེ་ ང་ཞི་ ཞུ་ཝ་རྦོ་ལ་ ཐེད་པོ་ ཅོའེ་། རྡེན་འབའ་, ཁོ་ ཁོ་རང་, སོང་འདེ་ ཁྱི་ཞ་རྒུན་ལ་ ཐུག་ཅེ་ལ་, རིྃ་རྡེ་ ཤི་རུག་། 18 ང་ཞ་རྒུ་ནི་ ཞེན་ སྤུན་ཞིག་ལ་, ཏི་ཏུའི་ ཉམ་པོ་ ལམ་ཅུག་རྒེ་ཡོད་། ཆོའེ་ཚོག་ ཚང་མེ་ ཁོ་ ནེ་ཚུལ་ ཟང་པོ་ ཤེད་ཅེ་ ཞབ་རྟོག་རྒེ་ཕི་ རྟོད་པ་ པུལ་རྡུག་། 19 ང་ཞི་ ཡེ་རུ་ཤ་ལེམ་མེ་ན་ ཡོ་ཀ་ནེ་ ཏེཏ་པ་ཅན་རྒུ་ནི་ཕི་ མུལ་ རོག་རྒུན་ ཁྱེར་ཟ་ནི་, ང་ཞ་རྒུན་ལ་ ཡ་ཏོ་ ཅོ་ཅེ་ཕི་, ཆོའེ་ཚོག་རྒུ་ནི་ ཁོ་ རྡམ་འདེ་ འིན་འབེན་, ཏེ་ ཞབ་རྟོག་རྒུ་ནི་, ཙོབོ་ ཡི་ཤུ་ སྤལ་ ཁྱོང་ཅེ་ ཡང་ ང་ཞ་རྒུན་ ཡ་ཏོ་ ཅོ་ཅེ་ལ་ རིྃ་རྡེན་ ཡོ་ཀན་ ལྟན་ནེ་ནོག་།
20 ང་ཞ་ མུལ་ མང་པེ་ རོག་རྦོ་ ནོར་རྡེ་ ཀོལ་འདུག་ ཟེར་ཤེ་ནེ་ རྐྱོབ་ཅེ་ཕི་, ང་ཞི་ ཁོ་ རྡང་ ཏི་ཏུའི་ ཉ་ཧ་ ང་ཞ་ ཉམ་པོ་ ཡེ་རུ་ཤ་ལེམ་མེ་ རྒྱལ་ས་ ཁྱེར་རེན་། 21 ང་ཞ་རྒུ་ནི་ ཅོ་ཀན་ ཀྲང་པོ་ འིན་ཀན་འབོ་ ཙོབོ་ ཟིག་ཤེ་ མ་ཚེད་ མི་རྒུ་ནི་ལ་ ཐོང་ཅེ་ལ་ ཙོན་འགྲུའི་ ཅོའེན་།
22 ང་ཞ་རྒུ་ནི་ ཁོང་ ཉ་ཧ་ ཉམ་པོ་ ཞེན་ཡང་ སྤུན་ཞིག་ལ་ ལམ་ཅུག་རྒེ་ཡོད་, ཁོའེ་ ཏུའི་ཧབ་ མང་པོ་ཞིག་རྒེ་ན་, ཁོ་རང་ ཙམ་ཤིག་རྒེ་ ཙོབོ་ལ་ ཞབ་རྟོག་ ཞུ་ཅེ་ལ་ རིྃ་རྡེན་ ཡོ་ཀན་འབོ་, ལེན་ མང་པོ་ ལྟན་འདེ་ ཏྃ་། ཁྱི་ཞ་རྒུ་ནི་ན་ མང་ངེ་ རྡེན་ཆེ་ཤེ་ཡོད་ཅེ་རྦེ་, ཏ་ ཏག་ས་ ཁོ་ མང་ངེ་ རིྃ་རྡེན་ ནོག་། 23 ཏི་ཏུའི་ནི་, ངེ་ ཁྲོ་པ་ ང་ ཉམ་པོ་ ཁྱི་ཞ་ ཡ་ཏོ་ ཅོ་ཀན་འབོ་ འིན་, ཡང་ ཁོ་ ཉམ་པོ་ ཡོ་ཀ་ནེ་ སྤུན་ ཉ་ཧ་, ཆོའེ་ཚོག་རྒུ་ནི་ ལམ་ཅུག་ཏེ་ འིན་, ཡང་ མ་ཤི་ཀ་ སི་ཝ་ ཁྱོང་ངེ་ནོག་། 24 ཏེ་རྒ་རྦེ་ཕི་ལ་ ཁོང་ སུམ་ཀ་ རྡང་ ཞེན་ ཆོའེ་ཚོག་རྒུ་ནི་ འདུན་ལ་ ཁྱི་ཞི་ ཤེ་སྤ་ རྡང་ ང་ཞི་ ཁྱི་ཞ་རྒུ་ནི་ ཧོར་ལ་ ཕོ་སོ་ ཅོ་ཀན་འབོ་ ནེན་ཏེན་ འིན་ཀེན་འབོ་ ལྟོན་ཧེ་།