7
ཨ་ཧོ་རྒུན་ལ་ ཏེ་ ཞལ་ཆེཏ་རྒུན་ ཡོད་ཅེ་ཀ་ནི་, ཡ་ཏོ་རྒུན་, ཨ་ཧོའེ་ ཟུྃ་སྤོ་ རྡང་ སེམ་ཡིད་ ཀྲིཔ་ ཅོ་ཀན་ ཚང་མ་ ཕྃ་རྡེ་ ཨ་ཧོ་རང་ སང་མ་ ཅོའེ་ཧེ་, ཡང་ ཀོན་འཇོག་ལ་ ཀུའི་སྤ་ ཅོའེན་ ཁོང་ངེ་ འཇིའི་རྡེ་ན་ ཨ་ཧོ་རང་ ཅི་ས་ཐོག་ནི་ ཏམ་པ་ འགྱུར་ཤུག་ཅེ་ལ་ ལེ་ཧ་ ཅོའེ་ཧེ་།2 ཉིང་ པེ་རྡེ་ ང་ཞ་རྒུན་ལ་ ཤེ་སྤ་ ཅོ་ཤིག་རྒང་, ང་ཞ་རྒུ་ནི་ སུ་ཞི་ལ་ ནོར་ཁྲུལ་ མ་ཅོའེ་རྦེན་, ཡང་ སུ་ཞི་ལ་ ལམ་ ནོར་ཧན་ནེ་ཀ་ ཁྲིད་ཏེ་ མ་ཁྱེར་རྦེན་, ཡང་ སུ་ཞིག་རྒེ་ ཀ་ནི་ལ་ ཕན་ཏོག་ མ་ནེན་འབེན་། 3 ཏོ་ ངེ་ ཁྱི་ཞ་རྒུན་ལ་ ཉེད་ཀལ་ ཟེ་རེ་མེད་། ངེ་ ངུལ་ལ་ ཟེར་རྦེན་, ང་ཞི་ ཁྱི་ཞ་ འི་ཟམ་ ཤེ་སྤ་ ཅོའེན་, ང་ཞ་ ཁྱི་ཞ་ ཉམ་པོ་ སོན་པོ་ འདེད་ཅེ་ ཡང་ ཤི་ཅེ་ལ་ ཀྲལ་འགྲིག་ ཡོད་། 4 ང་ ཁྱི་ཞ་རྒུ་ནི་ན་ ཚང་མེ་སང་ མང་ངེ་ ལོ་ཁྱེལ་ རག་, ཡང་ ཁྱི་ཞ་རྒུ་ནི་ཕི་ ང་ མ་སྲན་ཀྲེ་ ཕོ་སོ་ ཚོར་རེ་རག་། རྡུ་ངལ་ལེ་ ནང་ལ་, ཁྱི་ཞ་རྒུ་ནི་ ང་ མ་མང་པོ་ སེམ་རུའི་ ཏྃ་རྡེ་ ཐེད་ཅུག་།
པ་འུ་ལུའི་ ཐེད་པོ་།
5 མ་ཀེ་འདོ་ནི་ཡཱ་ནི་ ལེབ་རྦེ་རྡང་, ང་ཞ་རྒུན་ལ་ ངལ་ཚོ་ཅེ་ ཏུའི་ མེད་པེན་, ཅེ་ཟེར་ནི་ ང་ཞ་རྒུན་ལ་ ཆོག་ ཚང་མ་ནི་ ནག་ ཏང་ པར་རྡོ་ ཐོང་, ཏོ་ ཕི་ཏ་ནེ་ རྒྱཔ་འགལ་ ཅོ་ཀན་ འདང་ ཉིང་ངེ་ན་ འཇི་སྤ་རྒུན་ ནོག་། 6 འིན་ན་ ཧམ་པ་ མེ་ཀན་རྒུན་ལ་ སེམ་རུའི་ རྐྱེ་ཅུག་རྒེ་ ཛེད་ཀ་ནེ་ ཀོན་འཇོག་རྒེ་, ཏི་ཏུའི་ ང་ཞ་ས་ ལེཔ་ཅུག་རྒེ་ ཛེད་ཏེ་, ང་ཞ་རྒུན་ལ་ སེམ་རུའི་ རྐྱེ་ཅུག་རྒེ་ ཛེད་། 7 ཁོ་ ང་ཞ་རྒུ་ནི་ ཕྲོ་ ལེབ་ཅེ་ མ་ཚེད་, ཁྱི་ཞ་རྒུ་ནི་ ཁོ་ སེམ་རུའི་ ཏང་ཅེའོ་ ཚོར་རྡེ་, ང་ མ་ ཐེད་པོ་ སོང་། ཁྱི་ཞ་རྒུ་ནི་ ང་ ཐོང་ཅེ་ སྲན་ཀྲེ་ འདོད་པ་, ང་ ཚེར་ཧ་ ལྟན་ཅེ་ཕི་ ཁྱི་ཞ་རྒུན་ རྐྱོ་མོ་ ཆ་ཅེ་, ཡང་ ངེ་ ཏོན་ལ་ ཁྱི་ཞ་རྒུ་ནི་ སམ་བ་ ཏང་ཅེ་རྒུན་ ཚོར་རྡེ་, ང་ མ་ ཐེད་པོ་ སོང་།
8 ཞེན་ ངེ་ ངུ་ལེ་ ཡི་རྒེ་རྦེ་ ཁྱི་ཞ་རྒུ་ནི་ སེམ་ རྐྱོ་མོ་ ཅོའེ་རྡེ་ ཡོད་ནི་, ཏག་ས་ ང་ འགྱོད་པ་ མེ་རག་། ཏོ་ ཀལ་ཏེ་ ལྟིང་ནི་ ངེ་ འགྱོད་པ་ ཅོའེ་རྦེན་, ཅེ་ཟེར་ནི་ ང་ རྒྱུའི་སོང་ ཏེ་ ཡི་རྒེ་རྦེ་, ཏུའི་ ཉུང་ཙེ་ཞིག་ ཁྱི་ཞ་རྒུ་ནི་ སེམ་ རྐྱོ་མོ་ ཅོའེ་རྡོག་། 9 ཅི་འིན་ན་, ཏོ་ ཀལ་ཤེ་རྦོ་ལ་ ང་ ཐེད་པོ་ རག་, ཏོ་ ཁྱི་ཞ་རྒུན་ལ་ ཚེར་ཧ་ ཆ་ཅུག་ཅེ་ མ་ནོག་, ཏེ་ ཚེར་ཧ་རྦེ་, ཁྱི་ཞ་རྒུན་ལ་ སེམ་འགྱུར་ཅུག་ཏེ་, ཁྱི་ཞི་ མི་ཙེ་ པུད་ཚུལ་རྦོ་ འགྱུར་ཅུག་། ཏོ་ ཀོན་འཇོག་རྒེ་ ཁོ་རང་ངེ་ མི་རྒུན་ལ་ ཆ་ཅུག་ཅེ་ ཐུག་འདོད་ ཡོ་ཀ་ནེ་ ཚེར་ཧེ་ རིག་ཞིག་ ནོག་, སོང་འབེ་སང་ ང་ཞི་, ཁྱི་ཞ་རྒུན་ལ་ ཅི་ཞིག་རྒེ་ ཐོག་ནི་ལ་ ནོད་པ་ མ་རྐྱལ་རྦེན་། 10 ཀོན་འཇོག་རྒེ་ ཨ་ཧོ་རྒུན་ལ་ ཐོང་ངོམ་ ཆ་ཅུག་རྒེ་ ཛེད་ཅེ་ ཚེར་ཧ་རྦེ་, ཨ་ཧོ་རྒུན་ རྡིག་པ་ནི་ ཐག་རིང་ལ་ ཁྱེར་རེ་ ཛེད་ཅེ་ རྡང་ ཐར་པ་ ཐོབ་ཅུག་རྒེ་ ཛེ་རྡེ་ནོག་། ཏོ་ཙོག་སེ་ ཚེར་ཧེ་ཕི་ འགྱོད་པ་ ཅོ་རྒོའེ་ མེད་རྡེ་ ནོག་, འིན་ན་ སེམ་འགྱུར་ མེད་ཅེ་རྦེ་ འཇིག་རྟེན་ནེ་ ཚེར་ཧེ་ ཐ་མེད་པེ་ ཤི་ཅེ་ ཁྱོང་ངེ་ནོག་།
11 ལྟོའེ་ཧེ་, ཀོན་འཇོག་ ཐུག་ཐེད་ཅུག་ཀ་ནེ་ འགྱོད་པེ་, ཁྱི་ཞ་རྒུ་ནི་ན་ ཀ་ཟུག་ ལེ་ཧ་ ཟང་པེ་ འབྲེ་རྦུ་ མིན་འདུག་, སྤེར་ན་ སེམ་མེ་ན་ ཀྲང་པོ་ ཡང་ ཉེད་ ཕོག་ཀན་རྒུན་ མེ་ཀན་ ཅོ་ཅེ་ འདོད་པ་, རྡིག་པ་ ཅོ་ཀན་རྒུ་ནི་ཀ་ སྲོ་ སྲན་ཀྲེ་, རྡིག་པེ་ འཇི་ནང་, ང་ ཐོང་ཅེ་ འདོད་པ་, ངེ་ ལབ་ཞ་རྒུན་ ཁ་ཉེན་ཅེ་ལ་ རིང་ཤེ་, ནོར་ཁྲུལ་ ཅོ་ཀན་འབོ་ལ་ འགྱོ་སྤ་ ཆེད་པ་ ཀལ་ཤེ་, ཏོ་ ཚང་མ་ རྒྱུད་ཏེ་, ཁྱི་ཞ་རྒུན་ རྐྱོན་མེད་ འིན་ཀན་འབོ་ ཁྱི་ཞ་རང་ངེ་ ལྟན་འདེ་ ནོག་། 12 ངེ་ ངུལ་མེ་ ཡི་རྒེ་རྦོ་, ནོར་ཁྲུལ་ ཅོ་ཀན་ ཡང་ ནོད་པ་ ཕོག་ཀན་རྒུ་ནི་ ཧོར་ལ་ མ་འབྲི་རྦེན་, འིན་ན་ ཀོན་འཇོག་རྒེ་ ཧུ་འདུན་ལ་, ཁྱི་ཞ་རྒུན་, ང་ཞི་ཕི་ ཙམ་ཤིག་རྒེ་ ཏེཏ་པ་ཅེན་ འིན་ ཏོ་ ཁྱི་ཞ་རང་ངེ་ ཐོང་ཉེན་ཅེ་ རྒྱུ་ཚན་འབེ་ཕི་ འབྲི་རྦེན་། 13 ཏོ་རྦེ་ ཅོའེ་རྡེ་ ང་ཞ་རྒུན་ལ་ སེམ་རུའི་ རྐྱེ་རྡེ་ རག་།
ང་ཞ་ སེམ་རུའི་རྒུ་ནི་ ནེན་མ་, ཁྱི་ཞི་ སྤུན་ ཏི་ཏུའི་ལ་ རྒ་སུའི་ སེམ་མེ་ན་ ཞིའི་རྡེ་ ཁྱོྃ་རྡེ་ ཐེད་པོ་ ཆ་ཅུག་ཅེ་རྦོ་ལ་ ང་ཞ་རྒུན་ མ་ ཐེད་པོ་ སོང་། 14 ཁྱི་ཞི་ཕི་ ང་ ཙམ་ཤིག་རྒེ་ ཕོ་སོ་ ཚོར་ཧན་འབོ་ ངེ་ ཏི་ཏུའི་ལ་ ཤེད་པེན་, ཡང་ ཁྱི་ཞ་རྒུ་ནི་ ངེ་ རེ་ཝ་ མ་ཅག་རྒེ་ལ་ ནོག་། ཏོ་རྦེ་ཕི་ ངེ་ ཁྱི་ཞ་རྒུན་ལ་ ཏུའི་རྒྱུན་ ཀྲང་པོ་ ཤེད་རྡེ་ ཙོག་སེ་ ཏག་ས་ལ་ ངེ་ ཁྱི་ཞི་ ཧོར་ལ་ སྤུན་ ཏི་ཏུའི་ལ་ འདུན་ལ་ ཕོ་སོ་ ཅོ་ཀན་འབོ་ རྡེན་འབའ་ འིན་ཀན་ ལྟན་ནེ་ནོག་། 15 ཁྱི་ཞ་རྒུ་ནི་ ཁོའེ་ ཁ་ཉེན་འདེ་ འཇིའི་ རྡང་ ཉིང་ངེ་ ཐིལ་ནི་ སི་ཝ་ ཉམ་པོ་ རྒ་སུའི་ ཞུ་ཀན་རྒུན་, འི་ཏུ་ ཅོའེ་རྡེ་ ཁོའེ་ ཁྱི་ཞ་རྒུན་ལ་ ངུལ་ལེ་སང་ མང་ངེ་ ཡ་ཤ་ ཅོ་རུག་། 16 ང་ མ་མང་པོ་ ཐེད་པོ་ རག་ ཅེ་ཟེར་ནི་ ང་ ཁྱི་ཞ་རྒུ་ནི་ན་ ཐར་ཁྱེལ་རྦོ་ ལོ་ཁྱེལ་ རག་།