6
ང་ཞ་ ཀོན་འཇོག་རྒེ་ ཁྲོ་པ་ ལེ་ཧ་ ཅོ་ཀན་རྒུན་ འིན་འབེ་, ང་ཞི་ ཁྱི་ཞ་རྒུན་ལ་ ཀོན་འཇོག་རྒེ་ ཐུག་ཞེའོ་ ནང་མེད་ ཅོའེ་རྡེ་ ཟུར་ལ་ ཕང་ མི་ཕང་ཅེ་ལ་ ཞུ་ཝ་ པུ་ལེ་ཡོད་། 2 ཅེ་ཟེར་ནི་ ཀོན་འཇོག་རྒེ་ ཏམ་པེ་ སུང་རབ་རྦེ་ན་ མོལ་རྡེ་ ནོག་,“ངེ་ འདམ་ཀ་ནེ་ ཏུའི་པེ་ཀ་
ང་ ཁྱི་ཞ་རྒུ་ནི་ མོ་ལམ་རྒུན་ ཚོར་།
ཐར་པེ་ ཞག་ལ་,
ངེ་ ཁྱི་ཞ་རྒུན་ལ་ ཡ་ཏོ་ ཅོའེ་རྡེ་ འིན་འབེན་།”
ལྟོའེ་རྡང་, ཏི་རིང་ ཀོན་འཇོག་རྒེ་ འདམ་མེ་ ཛེད་ཀ་ནེ་ ཏུའི་, ཏི་རིང་ ཐར་སྤེ་ ཏུའི་རྦོ་ ནོག་།
པ་འུ་ལུའི་ རྡུ་ངལ་རྒུན་།
3 སུ་ཞི་ལ་ རྒག་ མི་ཕུག་ཅེ་ ཡང་ ང་ཞ་རྒུ་ནི་ ཞབ་རྟོག་ ཞུ་ཀན་རྒུ་ནི་ན་, རྐྱོན་ ཕིང་ མི་ཉེན་ཅེ་ མི་ཙེ་ཞིག་, ང་ཞ་རྒུ་ནི་ པུད་རྡེ་ཡོད་། 4 ང་ཞ་རྒུ་ནི་ རྡུ་ངལ་, པར་རྡོ་ རྡང་ ཧུན་མེད་རྡེ་ འཇི་སྤེ་ན་ ཚང་མེ་ན་ ཟོད་པ་ ཉམ་པོ་ རྡོང་ལེན་ ཅོ་ཅེ་ རྒྱུད་ཏེ་, ང་ཞ་རྒུན་ ཀོན་འཇོག་རྒེ་ རྡེན་འབེ་ ཞབ་རྟོག་པ་ འིན་ཀན་འབོ་ ལྟན་ནེ་ནོག་། 5 སྤེར་ན་, ང་ཞ་རྒུན་ལ་ རྡུང་རྒྱབ་ ཏང་, ཙོན་ཁང་ངེ་ན་ ཧར་, སྲོ་ཡོང་ཀ་ནེ་ མི་ཚོག་རྒུན་ལ་ རྡོང་ལེན་ ཅོ་རྒོའེ་, ཟུྃ་སྤོ་ སིང་ ངལ་ངལ་ཚུག་པ་ ལེ་ཧ་ ཅོའེ་རྦེན་, ཚེན་ སོན་ཏེ་ ཉིད་མེད་པེ་ པུད་རྒོའེ་ ཡང་ ཟ་རྒྱུ་ མེད་པེ་ ལུའི་། 6 ང་ཞ་རྒུ་ནི་ན་ ཡོ་ཀ་ནེ་ སང་མ་, ཧ་ཀོ་, ཟོད་པ་, ཀ་ཀྲིན་, ཏམ་པེ་ ཐུག་ཡིད་, རྡེན་འབེ་ ཤེ་སྤ་, 7 ཀྲང་པོ་ ཤེད་ཅེ་, ཀོན་འཇོག་རྒེ་ ཤེད་རྡེ་ན་, ལག་པ་ ཡོའེ་སྤ་ རྡང་ ཡོའེ་མ་ ཉ་ཧེ་ན་ ཀྲང་པེ་ ནོལ་ཤེ་ ལག་ཆ་, ཏོ་རྒུ་ནི་ ང་ཞ་ ཀོན་འཇོག་རྒེ་ རྡེན་འབེ་ ཞབ་རྟོག་པ་ འིན་ཀན་འབོ་ ལྟན་ནེ་ནོག་། 8 མི་རྒུ་ནི་ ང་ཞ་རྒུན་ལ་ སི་ཝ་ ཡང་ ཁྲེལ་རྦ་, རྟོད་པ་ ཡང་ མེད་ར་ ཏང་ནྃ་, ང་ཞི་ ཀོན་འཇོག་ལ་ ཞབ་རྟོག་ ཞུ་འིན་། ང་ཞ་ ཀྲང་པོ་ འིན་ནི་, ཁོང་རྒུ་ནི་ ང་ཞ་རྒུན་ལ་ ཟུའི་མེ་ ཞབ་རྟོག་པ་རྒུན་ ནོག་ ཟེར་རྡུག་། 9 ཞེན་ ང་ཞ་རྒུན་ ཀོན་འཇོག་རྒེ་ ཞབ་རྟོག་པ་ འིན་ཀན་འབོ་ ཚང་མེ་ ཤེ་ནྃ་ ཁོང་རྒུ་ནི་ ང་ཞ་རྒུན་ལ་ ནང་མེད་ ཅོ་རུག་། ང་ཞ་རྒུན་ ཤི་ཅེ་ ཉེ་མོ་ལ་ ལུའི་ནྃ་ ཏ་རུང་ངེ་ སོན་པོ་ ཡོད་, རྡུང་རྒྱབ་ ཏང་ངེན་འདང་ འིན་ན་ སེད་ མ་སེད་། 10 ཉིང་རྒུ་ནི་ན་ རྡུ་ངལ་རྒུན་ ཡོད་ནྃ་, ང་ཞ་རྒུན་ རྐྱིད་པོ་ ཡོད་། ཉལ་རྦ་ཅེན་ འིན་ན་, སེམ་ཡིད་རྡེ་ ཐོག་ནི་ མང་པོ་ ཆུག་པོ་ འགྱུར་ཤུག་རྒེ་ཡོད་། འཇིག་རྟེན་ནེ་ ཐོག་ནི་ ཅང་ མེད་ནང་, སེམ་ཡིད་རྡེ་ ཐོག་ནི་ ང་ཞ་རྒུ་ནི་ ལག་ལ་ ཅི་ཚང་མ་ ཡོད་།
11 ཀོ་རིན་ཐི་པ་ ཡ་ཏོ་རྒུན་, ང་ཞི་ ཁྱི་ཞ་རྒུན་ལ་ ཀྲང་པོ་ ཟེ་འིན་, ཏ་ ང་ཞི་ ཉིང་ ཁྱི་ཞ་རྒུ་ནི་ཕི་སང་ པེ་རྡེ་ འིན་། 12 ང་ཞ་རྒུ་ནི་ ཤེ་སྤ་རྦོ་ ཁྱི་ཞ་རྒུ་ནི་ཕི་ རྒག་ཏེ་ པོ་རེ་ མེད་, འིན་ན་ ཁྱི་ཞ་རྒུ་ནི་ ཤེ་སྤ་རྦོ་ ང་ཞ་རྒུ་ནི་ཕི་ རྒག་ཏེ་ པོར་རྡུག་། 13 ངེ་ ཁྱི་ཞ་རྒུན་ལ་ ང་རང་ངེ་ ཕྲུ་རྒུ་ ཙོག་སེ་ སྤེ་ར་ ཏང་ངེ་ཡོད་, ཁྱི་ཞ་རྒུ་ནི་ལ་ ཉིང་འབོ་སང་ པེ་རྡང་།
སོན་པོ་ ཀོན་འཇོག་རྒེ་ ཁང་པ་།
14 ཁྱི་ཞ་ ཏེཏ་པ་ མེ་ཀན་རྒུན་ ཉམ་པོ་ ཡ་ཏོ་ ཉེ་མོ་ མ་འགྱུར་ཧེ་། ཀྲང་པོ་ ཀ་ཟུག་རྒེ་ ངན་པེ་ ཁྲོ་པ་ འགྱུར་ ཉེན་ནེན་? འོད་ ཀ་ཟུག་རྒེ་ མུན་ཀྲག་ ཉམ་པོ་ འདྲེའེ་ ཉེན་ནེན་? 15 མ་ཤི་ཀ་ རྡང་ རྡུད་རྡེ་ པར་ལ་ ཅི་ འགྲེལ་ ཡོ་ཀག་? ཅང་ མེ་ཀག་། ཏེཏ་པ་ཅན་ཞིག་ ཏེཏ་པ་ མེ་ཀན་ཞིག་རྒེ་ ཏེཏ་པ་ ཅོ་ཀན་འབེ་ན་ འདྲེའེ་ཉེ་ནེ་ནེ་? མ་ནི་ མི་ཉེན་། 16 ཀོན་འཇོག་རྒེ་ ཁང་པ་ འདང་ ཧུ་འདྲ་རྒུ་ནི་ པར་ལ་ ཅི་ འབྲེལ་ ཡོ་ཀག་? ཅང་ མེ་ཀག་། ཨ་ཧོ་རྒུན་, སོན་པོ་ ཀོན་འཇོག་རྒེ་ ཁང་པ་འབོ་ ནོག་, ཀ་ཟུག་ ཀོན་འཇོག་རྒེ་ ཏམ་པེ་ སུང་རབ་རྦེ་ན་ མོལ་རྡེ་ ནོག་།
“ང་ ཏོ་རྒུ་ནི་ ཕྲོ་ འདེད་ཏེ་ ཁོང་རྒུན་ ཉམ་པོ་ འགྲུ་ལེན་།
ང་ ཁོང་རྒུ་ནི་ ཀོན་འཇོག་ ཡང་ ཁོང་རྒུན་ ངེ་ མི་རྒུན་ འགྱུ་རེན་།”
17 “ཏེ་རྒ་རྦེ་ཕི་ལ་ ཏེཏ་པ་ མེ་ཀན་རྒུ་ནི་ ཕྲོ་ནི་ འབིང་འདེ་
ཁྱི་ཞ་རང་རྒུ་ནི་ ཏེ་ ཕྲོ་ནི་ སོ་སོ་ པེ་རྡེ་ འདེད་རྒོའེ་།
ཁོང་རྒུ་ནི་ ཁམ་ལོག་རྒེ་ ཅ་ལག་རྒུན་ལ་ ལག་པ་ མ་ཐུག་ཤིག་,
ཏེ་ནི་ ངེ་ ཁྱི་ཞ་རྒུན་ལ་ རྒ་སུའི་ ཞུའིན་།”
18 “ཡང་ ང་ ཁྱི་ཞ་རྒུ་ནི་ ཨ་རྦ་ རྡང་ ཁྱི་ཞ་རྒུན་
ངེ་ པུ་ཙ་ རྡང་ པོ་མོ་རྒུན་ འགྱུ་རེན་།”
ཙོབོ་ ཀུན་ཝང་ ཀོན་འཇོག་རྒེ་ མོལ་།