རྡེ་བ་ཅན་ནེ་ ཟུྃ་སྤོ་།
5
ཨ་ཧོ་རྒུན་ལ་ རྒྱུའི་ནོག་, ཨ་ཧོ་ འདེད་ཀ་ནེ་ འི་ འཇིག་རྟེན་ནེ་ ཀུར་རྦོ་ མེ་ཀན་ ཆ་ནི་, ཨ་ཧོ་རྒུན་ལ་ ཐ་མེད་ཀ་ནེ་ ཁང་པ་ཞིག་ རྡེ་བ་ཅན་ནེ་ན་ ཡོད་ཏེ་ ནོག་, ཀའོ་ མི་ ལག་པ་ནི་ མ་ཅོ་ལ་ ཀོན་འཇོག་ ཁོ་རང་ངེ་ ཨ་ཧོ་རྒུ་ནི་ཕི་ ཛེད་ཏེ་ ནོག་། 2 ཨ་ཧོ་རྒུན་ ཏག་ས་ ཡོ་ཀ་ནེ་ ཟུྃ་སྤོ་ནི་ འུ་ཐུག་ཏེ་, ཀོའེ་ལག་ སོ་མ་ ཙོག་སེ་ རྡེ་བ་ཅན་ནེ་ ཟུྃ་སྤོ་འབོ་ ཀོན་ཅེ་ལ་ རིྃ་རྡེན་ ནོག་། 3 ཨ་ཧོ་རྒུ་ནི་ རྡེ་བ་ཅན་ནེ་ ཟུྃ་སྤོ་འབོ་ ཀོན་ཅེ་ འིན་ཅེ་ཀ་ནི་, ལྕུ་རུ་ལ་ མི་ལུའི་། 4 འི་ འཇིག་རྟེན་ནི་ ཟུྃ་སྤེ་ན་ འདེད་ཟ་ནི་, ཨ་ཧོ་རྒུན་ འུ་ཐུག་རྒེ་ནོག་, འིན་ན་ ཨ་ཧོ་རྒུན་ འི་ ཚང་མེ་ཀ་ནི་ ཐར་ཤེ་ཕི་ལ་ ཤི་ཉིན་ མན་འགྲོ་། འི་ ལྟག་སྤ་ མེ་ཀ་ནེ་ ཟུྃ་སྤོ་རྦོ་, ཐ་མེད་པེ་ མི་ཙེ་ན་ འགྱུར་ཤེ་ཕི་, རྡེ་བ་ཅན་ནེ་ ཟུྃ་སྤོ་རྒུན་ ཀོན་ཉིན་ འགྲོ་ནོག་། 5 ཡུ་རྒུ་ནི་ཕི་ ཀོན་འཇོག་ ཁོ་རང་ངེ་ ཨ་ཧོ་རྒུན་ ཀྲལ་འགྲིག་ ཅོའོ་ ཛེད་ཏེ་ ནོག་། ཡང་ ཨ་ཧོ་རྒུན་ལ་ ཏམ་པེ་ ཐུག་ཡིད་ སལ་ལེ་ ཛེད་ཏེ་, ཁོང་ངེ་ སལ་ལེ་ ཛེད་ཅེ་ ཚང་མ་ ཁག་ཁུར་ ཛེད་ཏེ་ ནོག་།6 ཏོ་རྦེ་ཕི་ ང་ཞ་རྒུན་ལ་ ཏུའི་རྒྱུན་ ལོ་ཁྱེལ་ རག་, འི་ འཇིག་རྟེན་ནི་ ཟུྃ་སྤེ་ན་ ཡོད་ཟ་ནི་, ང་ཞ་རྒུན་ ཙོབོ་ ཉམ་པོ་ རྡེ་བ་ཅན་ནེ་ ཁམ་པེ་ན་ མ་འདེད་ལ་ འིན་ཀན་འབོ་ རྒྱུའི་ནོག་། 7 ང་ཞ་རྒུ་ནི་ མི་ཙེ་ ཐོང་ཀན་འབེ་ཀ་ མ་ནོག་, ཀོན་འཇོག་རྒེ་ན་ རྡེན་ཆེ་ཤེ་ ཅོའེན་འདང་ པུད་རྡེ་ཡོད་། 8 འོ་ནེ་ ང་ཞ་རྒུན་ལ་ ནེན་ཏེན་ ལོ་ཁྱེལ་ རག་, ཡང་ ངེ་ ཟེ་འིན་ འི་ འཇིག་རྟེན་ནེ་ ཟུྃ་སྤེ་ན་ འདེད་རྡེ་སང་, རྡེ་བ་ཅན་ནེ་ ཁང་པེ་ན་ ཙོབོ་ ཡི་ཤུ་ ཉམ་པོ་ འདེད་རྡེ་ལ་ ཐེད་རྡེ་རག་། 9 ཏོ་རྦེ་ཕི་ལ་ ང་ཞ་རྒུན་ འི་ ཟུྃ་སྤེ་ན་ འདེད་རྡེན་ ཡོད་ཁྲོ་ ཡང་ ཏེ་རྦོ་ནི་ ཐག་རིང་ལ་, ཡི་ཤུ་ ཐུག་ཐེད་ཅུག་ཅེ་ ང་ཞི་ མིག་ཞི་ འིན་། 10 ཅེ་ཟེར་ནི་ ཞག་ཤིག་ ཨ་ཧོ་ ཚང་མ་ མ་ཤི་ཀེ་ ཧུ་འདུན་ལ་ ཁྲིམ་ཅེད་རྡེ་ཕི་ ལྃ་རྒོའེ་རྡེ་ནོག་། ཏེ་ནི་ འི་ འཇིག་རྟེན་ནེ་ ཟུྃ་སྤེ་ན་ ཟང་པོ་ ཡང་ ངན་པ་ ཅོ་ཀན་རྒུ་ནི་ འབྲེ་རྦུ་ ཨ་ཧོ་ རེ་རེ་ལ་ མིན་ནེ་ནོག་།
མ་ཤི་ཀ་ རྒྱུད་ཏེ་ ཀོན་འཇོག་ ཉམ་པོ་ འབྲེལ་།
11 ཙོབོ་རྡེ་ ཁྲིམ་ཅེད་ ཙམ་ཤིག་ ཀག་སྤོ་ ཡོ་ཀན་འབོ་ ང་ཞ་ རྒྱུའི་ཡོད་ཅེ་ཀ་ནི་, ང་ཞི་ ཞེན་མ་རྒུན་ལ་ མ་ཤི་ཀེ་ན་ ཏེཏ་པ་ ཅོ་ཅུག་ཅེ་ ཙོན་འགྲུའི་ རྒྱལ་ལེ་ ཅོའེན་། ང་ཞི་ ཉིང་ངེ་ན་ ཡོ་ཀན་འབོ་, ཀོན་འཇོག་རྒེ་ སལ་སྤོ་ ཁྱེན་ནེ་ ཛེ་རྡེ་ནོག་, ཡང་ ཁྱི་ཞ་རྒུ་ནི་ལ་ ཤེ་ཤེ་ རེ་ཝ་ ཅོའེན་། 12 ང་ཞི་ ཡང་ ང་ཞ་རང་ངེ་ ཧོར་ལ་ ཕོ་སོ་ ཅོ་རུག་རྒེ་? ཅོ་མེད་། ང་ཞི་ ཁྱི་ཞ་རྒུན་ལ་ ང་ཞི་ ཧོར་ལ་ ཐེད་པོ་ ཅོ་ཅེ་ ཧབ་ ཏང་ངེ་ཡོད་, ཏེ་ནི་ ཁྱི་ཞ་རྒུ་ནི་ སེམ་ ཀྲང་པོ་ ཡོད་ཅེ་ལ་ ཕོ་སོ་ མ་ཅོ་ལ་, རང་ངེ་ ལེ་ཧ་རྒུ་ནི་ཀ་ ཕོ་སོ་ ཅོ་ཀན་རྒུན་ལ་ ལེན་ཏང་ཉེན་ནེན་།
13 ཀལ་ཏེ་ ང་ཞི་ མི་ ཉོན་བ་རྒུན་ ཙོག་སེ་ སྤེ་ར་ ཏང་འདུག་ སམ་མེ་ཡོད་ནི་, ཏོ་ ཀོན་འཇོག་ལ་ སྤལ་ ཐོབ་ཅེ་ལ་ ཅོ་ཡོད་། ཡང་ ཀལ་ཏེ་ ང་ཞི་ ཤེ་རབ་ཅེན་ནེ་ ལབ་ཞ་ ཏང་འདུག་ སམ་ནི་, ཏོ་ ཁྱི་ཞ་རྒུ་ནི་ ཕན་ཏོག་རྡེ་ཕི་ འིན་། 14 མ་ཤི་ཀེ་ ཤེ་སྤེ་ ང་ཞ་ ཏོ་རྒུན་ ཅོ་ཅུག་ཏུག་། ཨ་ཧོ་རྒུ་ནི་ མ་ཤི་ཀ་ ཨ་ཧོ་ ཚང་མེ་ ཏོན་ལ་ ཀྲོྃ་རྡེ་ འིན་ཀན་འབོ་ལ་ ཏེཏ་པ་ ཅོའེ་རྦེ་, ཨ་ཧོ་རྒུ་ནི་ ཨ་ཧོ་རང་ངེ་ ཉིང་འབོ་ མི་ཙེ་ པུད་ཚུལ་རྦོ་, ཤི་རྡེ་ འིན་ཀན་རྦེ་ཀ་ལ་, ཏེཏ་པ་ ཅོ་ནོག་། 15 མ་ཤི་ཀ་ ཚང་མེ་ཕི་ ཀྲོྃ་། ཁོང་ངེ་ ཏོ་ ཅོའོ་ ཛེད་ ཅེ་ཟེར་ནི་, མི་ཙེ་ སོ་མ་ ཐོབ་ཀན་རྒུ་ནི་ ཁོ་རང་རྒུ་ནི་ཕི་, མི་ཙེ་ མ་པུད་ལ་, མ་ཤི་ཀ་ ཀྲོྃ་རྡེ་ སོན་པོ་ ལང་ངེ་ ཛེད་ཀན་འབེ་ཕི་ མི་ཙེ་ པུད་ཅེ་ ཐུག་འདོད་ ཛེ་རྡེ་ནོག་།
16 ཏ་ ང་ཞི་ འཇིག་རྟེན་པེ་ སམ་ཚུལ་ ནང་ཞིན་ མི་ཞིག་ ཟང་པོ་ ཡང་ ངན་པ་ ནོག་ ཟེར་རྡེ་ ཐག་ཅེད་རྡེ་ མེད་། ཏུའི་ཞིག་ལ་ ང་ཞ་རྒུ་ནི་ལ་ མ་ཤི་ཀ་ ཏེ་རྒ་ ཙོག་སེ་ སམ་མེ་ཡོད་པེན་, ཏ་ ཏག་ས་ ང་ཞ་རྒུ་ནི་ ཏོ་ ཅོ་མེད་། 17 ཏོ་རྦེ་ ཏོན་ཏག་པོ་ནི་, མ་ཤི་ཀེ་ འིན་ཀན་རྒུན་ མི་ སོ་མ་ཞིག་ འགྱུར་རྡེ་ ནོག་། མི་ཙེ་ ཉིང་པ་རྦོ་ མེ་ཀན་ ཡང་ སོ་མ་ཞིག་ འགོ་ཟུག་ སོང་འདེ་ ནོག་།
18 ཏེ་ ཚང་མ་ ཀོན་འཇོག་རྒེ་ ཆོག་ནི་ ནོག་, ཁོང་ངེ་ མ་ཤི་ཀ་ རྒྱུད་ཏེ་, ཨ་ཧོ་རྒུན་ ཁོ་རང་ས་ ལོག་ཏེ་ ཁྱོང་ངེ་ ཛེད་ཏེ་ ནོག་། ཡང་ ཀོན་འཇོག་རྒེ་ ང་ཞ་, ཁོང་ འདང་ མི་རྒུ་ནི་ན་ ཐུན་འབྲེལ་ ཅོ་ཅེ་ ཁག་པོ་ ཀ་ལེ་ ཛེད་ཏེ་ ནོག་། 19 མ་ཤི་ཀ་ རྒྱུད་ཏེ་ ཀོན་འཇོག་རྒེ་ འི་ འཇིག་རྟེན་པ་རྒུན་ ཁོ་རང་ ཉམ་པོ་ ཐུན་འབྲེལ་ ཅོའོ་ ཛེད་ཏེ་ ཏོ་རྒུ་ནི་ རྡིག་པ་རྒུན་ ཁོ་རང་རྒུ་ནི་ རྒྱཔ་འགལ་ལ་ སི་ མ་ཛེད་, ཡང་ ཁོང་ངེ་ ང་ཞ་རྒུན་ལ་ འི་ ཐུན་འབྲེལ་ལེ་ ཁྲིན་འབོ་ ཞེན་མ་ ཤེད་ཅེ་ལ་ སལ་ལེ་ ཛེད་། 20 ཏོ་རྦེ་ཕི་ ང་ཞ་རྒུན་ མ་ཤི་ཀེ་ ཧུ་ཚབ་ འིན་, ཡང་ ང་ཞ་ རྒྱུད་ཏེ་ ཀོན་འཇོག་རྒེ་, འཇིག་རྟེན་པ་རྒུན་ལ་ ཞུ་ཝ་ པུ་ལེ་ནོག་། མ་ཤི་ཀེ་ ཚབ་ ཅོའེ་ཏེ་ ང་ཞི་ ཞུ་ཝ་ པུ་ལེ་ཡོད་ “འཇུ་འཇུ་, ཀོན་འཇོག་ས་ ལོག་ཏེ་ ཤོག་ཧེ་།” 21 ཀོན་འཇོག་རྒེ་ རྡིག་པ་ མ་ནི་ མེ་ཀ་ནེ་ མ་ཤི་ཀ་ ཨ་ཧོ་རྒུ་ནི་ རྡིག་པེ་ཕི་ ཆོད་པེ་ ཚུལ་ལ་ ཧོ་ ཛེད་། ཨ་ཧོ་རྒུན་ མ་ཤི་ཀ་ རྒྱུད་ཏེ་, ཀོན་འཇོག་རྒེ་ ཧུ་འདུན་ལ་ ཀྲང་པོ་ སི་ཅེ་ལ་ ཏོ་ ཅོའོ་ ཛེད་།