ཆག་ཆོག་ཆོག་རྒེ་ ཟ་མེ་ན་ ཡོ་ཀ་ནེ་ ནོར་།
4
ཀོན་འཇོག་རྒེ་ ཁོ་རང་ངེ་ ཉིང་ཞེ་ན་, ང་ཞ་རྒུན་ལ་ འི་ ཞབ་རྟོག་རྒེ་ ཆག་ལེ་རྦོ་ སལ་ལེ་ ཛེད་ཅེ་ཀ་ནི་, ང་ཞ་རྒུ་ནི་ མ་ནི་ སེམ་རུའི་ མི་ཕང་། 2 ང་ཞ་རྒུ་ནི་ སེམ་ངན་ རྦེ་རྡེ་ ཡོ་ཀན་ འདང་ ཁྲེལ་རྦེ་ ལེ་ཧ་ ཚང་མ་ ཕྃ་རྡེ་, སུ་ཞི་ལ་ འགོ་མ་ཧོར་ ཡང་ ཀོན་འཇོག་རྒེ་ ཀེའེ་ན་ འགྱུར་ཞ་ མ་ཁྱོང་ངེ་ འིན་། ཀོན་འཇོག་རྒེ་ ཟིའི་ཤེ་ ང་ཞ་རྒུན་ལ་ རྒྱུའི་ཡོད་པེ་ ཁོང་ངེ་ ཁྲིན་རྒུན་ ང་ཞི་ ཀྲང་པོ་ ཤེད་རྡེ་ཡོད་, ཡང་ ང་ཞི་ ལེ་ཧ་རྒུ་ནི་ ཅོའེ་རྡེ་, སེམ་ སང་མ་ ཡོ་ཀན་ ཚང་མེ་, ང་ཞ་ ལོ་ཁྱེལ་ཅེན་ འིན་ཀ་ནེ་ སྤང་པོ་ ཏང་ངེ་ནོག་།3 ཀལ་ཏེ་ ང་ཞི་ ཤེད་ཀ་ནེ་ ནེ་ཚུལ་ ཟང་པོ་རྦོ་ ཀབ་ཏེ་ པོ་རེ་ཡོད་ནི་, ཏོ་ ལྟོང་ཤེ་ཅན་ནེ་ ལམ་མེ་ཀ་ འགྲུ་ལེན་ ཡོ་ཀན་རྒུ་ནི་ཀ་ནི་ རྦེ་རྡེ་ པོར་རྡེ་ ནོག་། 4 འི་ འཇིག་རྟེན་ནི་ཀ་ ཝང་སྲུལ་ཧན་ནེ་ རྡུད་རྡེ་, ཏེཏ་པ་ མེ་ཀ་ནེ་ ཉིང་རྒུན་ ཀྱོང་པོ་ ཅོའེ་རྡེ་ སམ་བ་རྒུན་ ཞར་ ཤུག་རྒེ་ནོག་། ཁོང་རྒུན་ལ་ ནེ་ཚུལ་ ཟང་པེ་ ཟི་ཞིད་ཅེན་ནེ་ རྡེན་འབེ་ འོད་པོ་ ཐོང་ མི་ཉེན་ཅེ་ལ་ ཁོའེ་ ཏོ་ ཅོ་ནོག་། ཁོང་རྒུ་ནི་ ཅི་ས་ཐོག་ནི་ ཀོན་འཇོག་ ཙོག་སེ་ འིན་ཀ་ནེ་ མ་ཤི་ཀེ་ ཟི་ཞིད་རྡེ་ ཧོར་ལ་ ནེ་ཚུལ་ ཟང་པོ་ནི་ ཧ་མ་ཀོ་ ནོག་།
5 ང་ཞ་རྒུ་ནི་ ང་ཞ་རང་ངེ་ ཧོར་ལ་ ཆོའེ་ཤེད་རྡེ་མེད་, འིན་ན་ ཡི་ཤུ་ མ་ཤི་ཀ་ ཙོབོ་ ནོག་ ཟེར་རྡེ་ ཆོའེ་ཤེད་རྡེ་ཡོད་། ཡང་ ཡི་ཤུའི་ ཏོན་ལ་, ང་ཞ་རྒུན་ ཁྱི་ཞི་ ཡོག་པོ་ འིན་། 6 ཀོན་འཇོག་རྒེ་ མོལ་, “མུན་ཀྲག་རྒེ་ན་ འོད་ ཅུང་ཤིག་།” ཏེ་རྒ་ ཁོ་རང་ངེ་ ནེ་ཚུལ་ ཟང་པོ་རྦོ་ རྒྱུད་ཏེ་ ཏེ་ འོད་པོ་ ཨ་ཧོ་རྒུ་ནི་ ཉིང་ངེ་ན་ འབར་ཤུག་རྒེ་ ཛེད་ཅེ་རྦེ་, ཨ་ཧོ་རྒུ་ནི་ ཡི་ཤུ་ མ་ཤི་ཀེ་ ཞལ་འདོང་ ཐོང་འདེ་ ཀོན་འཇོག་རྒེ་ ཟི་ཞིད་པོ་ ཧ་ཀོ་ ཉེན་ནེན་།
7 ཞེན་ ང་ཞ་རྒུ་ནི་ ཉིང་ངེ་ན་ ཏེ་ འོད་པོ་ ཁྲ་ཆེམ་ཆེམ་ ཅོའེན་ ཡོད་ན་, ང་ཞ་རྒུན་ ཏེ་ རིན་ཅེན་ ནོར་ པོར་ཧན་ནེ་ ཆག་ཅེ་ ཟ་མ་ ཙོག་སེ་ འིན་། ཡུ་རྦེ་ ཀ་ནི་, ང་ཞ་རྒུ་ནི་ འཇིག་སྤོ་ ཁྱུད་པོ་ ང་ཞ་རང་ངེ་ མ་ནོག་, ཀོན་འཇོག་རྒེ་ ཆོག་ནི་ འིན་ཀན་འབོ་ སལ་སྤོ་ ཧ་ཀོ་ནོག་།
8 ང་ཞ་རྒུན་ལ་ ཆོག་ ཚང་མ་ནི་ ནག་ ཏང་ པར་རྡོའེ་ ནེན་འདེ་ ཡོད་ཏེ་ལ་, ང་ཞ་རྒུན་ མ་ཆག་རྒེ་ ནོག་། ང་ཞ་རྒུན་ ཐེ་ཚོམ་མེ་ན་ ཡོད་ནྃ་, ང་ཞ་རྒུ་ནི་ རེ་ཝ་ ཆོད་ཏེ་ རག་ ཟེ་རེ་མེད་། 9 ང་ཞ་ མི་རྒུ་ནི་ ནག་ ལྟན་ནྃ་, ཀོན་འཇོག་རྒེ་ ཕང་ངེ་ ཛེད་རྡེ་ མི་འདུག་། ང་ཞ་ མག་རྐྱོན་ མ་སྲན་ཀྲེ་ ཆ་ནྃ་, ང་ཞ་རྒུན་ མེ་ཀན་ ཅོ་ཅུག་རྒེ་ ཛེ་རྡེ་ མི་འདུག་། 10 མ་ཤི་ཀེ་ ཐུག་ཡིད་ ང་ཞ་རྒུ་ནི་ན་ ཞུ་ཧན་འབོ་, མི་རྒུ་ནི་ ཐོང་ ཉེན་ཅེ་ཕི་, རྡུ་ངལ་རྒུན་ རྒྱུད་ཏེ་ ང་ཞི་ ཟུྃ་སྤོ་རྒུ་ནི་ལ་ ཡི་ཤུ་ ཀྲོང་ཤེ་རྦེ་ན་ ཁག་ནེ་ནེན་ ནོག་།
11 འོ་ནེ་ ཡི་ཤུའི་ ཤེད་པོ་ ང་ཞ་རྒུ་ནི་ ཤི་ཅེ་ ཟུྃ་སྤེ་ན་ ཞུ་རྡེ་ ཡོ་ཀན་འབོ་ ཐོང་ ཉེན་ཅེ་ཕི་ ཏུའི་རྒྱུན་ ང་ཞ་རྒུན་ ཤི་ཅེ་ འཇི་སྤེ་ན་ ལུའི་རྡེ་ནོག་, ཅེ་ཟེར་ནི་ ང་ཞ་རྒུ་ནི་ མ་ཤི་ཀེ་ ཞབ་རྟོག་ ཞུའི་རྡེ་ ནོག་། 12 ང་ཞ་རྒུན་ ཤི་ཅེ་ འཇི་སྤེ་ན་ འདེད་རྡེ་ཡོད་, འིན་ན་ ཏོ་རྦེ་ འབྲེ་རྦུ་རྦོ་, ཁྱི་ཞ་རྒུན་ལ་ ཐ་མེད་པེ་ མི་ཙེ་ ཐོབ་ཀན་འབོ་ ནོག་།
13 ཀ་ཟུག་ སུང་རབ་རྦེ་ན་ མོལ་འདུག་, “ངེ་ ཀོན་འཇོག་རྒེ་ན་ ཏེཏ་པ་ ཅོ་ཅེ་ཀ་ནི་, ངེ་ ཁོང་ངེ་ ཁྲིན་འབོ་ ཤེད་པེན་” ཏེ་རྒ་ ཙོག་སེ་ ང་ཞ་རྒུ་ནི་ལ་ ཏེཏ་པ་ ཅོའེ་རྡེ་ ནེ་ཚུལ་ ཟང་པོ་རྦོ་ ཤེད་རྡེ་ཡོད་། 14 ང་ཞ་ རྒྱུའི་ཡོད་, ཙོབོ་ ཡི་ཤུ་ ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེད་ཀ་ནེ་ ཀོན་འཇོག་རྒེ་ ང་ཞ་རྒུན་ལ་ མ་ཤི་ཀ་ ཉམ་པོ་ སོན་པོ་ ལང་ངེ་ ཛེ་རྡེན་། ཡང་ ང་ཞ་ ཁྱི་ཞ་རྒུན་ ཉམ་པོ་ ཁོ་རང་ངེ་ ཧུ་འདུན་ལ་ ཁྱོང་ངེ་ ཛེ་རྡེན་། 15 ང་ཞ་རྒུན་ལ་ རྡུ་ངལ་ ཐོང་ཀན་ ཚང་མ་ ཁྱི་ཞ་རྒུ་ནི་ ཕན་ཏོག་རྡེ་ཕི་ འིན་། ཡང་ ཀོན་འཇོག་རྒེ་ ཐུག་ཞེའོ་ མི་ མང་ངེ་སང་ མང་ངེ་ ཐོབ་ཏེ་ ཐུག་ཞེ་ཆེ་ ཞུ་ཀན་ མང་པོ་ ཡོང་ངེན་, ཀོན་འཇོག་ལ་ སྤལ་ མང་ངེ་སང་ མང་ངེ་ ཐོབ་རྦེ་ ཛེད་ཅེ་ ནོག་།
16 ཏེ་རྒ་རྦེ་ཕི་ལ་ ང་ཞ་རྒུ་ནི་ རེ་ཝ་རྦོ་ མ་ནི་ ཕང་ངེ་ མེད་། ཞེན་ ང་ཞ་རྒུན་ ཟུྃ་སྤེ་ ཐོག་ནི་ ཉམ་མེན་ ཆ་ནྃ་, ང་ཞ་རྒུ་ནི་ སེམ་ལ་ ཀོན་འཇོག་རྒེ་ ཞག་པེ་ ཞག་ལ་ ཁྱུད་ སལ་ལེ་ ཛེད་ཏུག་། 17 ང་ཞ་རྒུན་ལ་ ཐོང་ཀ་ནེ་ རྡུ་ངལ་རྒུན་ ཆུང་ཙེ་ ཡང་ ཏུའི་ མང་པོ་ཞིག་ ལུའི་རྡེ་ མག་། འིན་ན་ ང་ཞི་ཕི་ ཏོ་རྒུ་ནི་ འབྲེ་རྦུ་ ཐ་མེད་པེ་ ཟི་ཞིད་པོ་ འིན་, ཀའོ་ འི་ རྡུ་ངལ་རྒུ་ནི་སང་ མང་རྡེ་ལ་ འཇིག་སྤོ ཡོད་ཏེ་ ནོག་། 18 ཏེ་རྒ་རྦེ་ཕི་ལ་ ང་ཞ་རྒུ་ནི་ མིག་པོ་ ཐོང་ཀ་ནེ་ རྡུ་ངལ་རྒུ་ནི་ཀ་ མ་པོ་རེ་, མ་ཐོང་ཀ་ནེ་ ཟི་ཞིད་པེ་ཀ་ པོ་རེ་ཡོད་ ཅེ་ཟེར་ནི་ ཐོང་ཀན་རྒུན་ འགྱོ་སྤ་ མེ་ཀན་ ཆ་ནོག་, འིན་ན་ མ་ཐོང་ཀན་འབོ་ ཏུའི་རྒྱུན་ ལུའི་ཤེ་ ནོག་།