3
ང་ཞི་ ཡང་ ང་ཞ་རང་ངེ་ཀ་ ཕོ་སོ་ ཅོ་ཅེ་ འགོ་ཟུག་ ཅོའེ་རྡེ་ ནོག་རྒེ་? ཡང་ ང་ཞ་ ཞེན་རྒུན་ ཙོག་སེ་ ཁྱི་ཞ་ ལྟན་ཅེ་ལ་ ཡང་ ཁྱི་ཞ་རྒུ་ནི་ཀ་ནི་ ངོ་ཁྲོཏ་ ཡི་རྒེ་ རྒོའེ་ཤེ་ ཡོད་ཏེ་ ནོག་རྒེ་? 2 ཏེ་ ཡི་རྒེ་རྦོ་ ང་ཞི་ ཉིང་ངེ་ཀ་ འབྲི་ཀན་ ཁྱི་ཞ་རང་རྒུན་ འིན་, ཀའོ་ ཚང་མེ་ སིལ་རྡེ་ ང་ཞི་ ཁྱི་ཞི་ ཕྲོ་ ཅོ་ཀ་ནེ་ ལེ་ཧ་ ཟང་པོ་རྒུན་ ཧ་ཀོ་འིན་། 3 མ་ཤི་ཀེ་ ཆོག་ནི་ ང་ཞི་ ལེ་ཧ་རྒུ་ནི་ འབྲེ་རྦུ་ ལྟན་ཀ་ནེ་ ཡི་རྒེ་, ཁྱི་ཞ་ ནོག་། ཏེ་ ཡི་རྒེ་ ཉི་འགུ་ ཉམ་པོ་ མ་ནོག་, ཀོན་འཇོག་ སོན་པེ་ ཐུག་ཡིད་ ཉམ་པོ་ འབྲི་རྡེ་ ནོག་། ཏོ་ ཀཱ་རྒྱ་ ཅུ་ ཙོག་སེ་ རྡོ་ཀ་ ཧོའེ་རྡེ་ མེད་པེ་, མི་རྒུ་ནི་ སེམ་མེ་ན་ ཡོད་ཏེ་ ནོག་།4 ཏེ་ ཚང་མ་ ཟེར་ཤེ་ན་ ང་ཞ་རྒུན་ལ་ ལོ་ཁྱེལ་ རག་, ཅེ་ཟེར་ནི་ མ་ཤི་ཀ་ རྒྱུད་ཏེ་, ཀོན་འཇོག་རྒེ་ན་ ང་ཞ་རྒུ་ནི་ ཏེཏ་པ་ རྟེམ་པོ་ འིན་། 5 ང་ཞི་ ཟེ་རེ་མེད་, ང་ཞ་རང་ངེ་ ལག་ལ་ ཞབ་རྟོག་ ཞུ་ཅེ་ ཁྱུད་རྒུན་ ཡོད་, འིན་ན་ ཀོན་འཇོག་རྒེ་ ཆོག་ནི་ སལ་ལེ་ ཛེད་ཏེ་ འིན་། 6 ཁོང་ངེ་ ང་ཞ་རྒུན་ལ་ ཁོ་རང་ངེ་ ཆེཏ་ཏོན་ སོ་མེ་ ཞབ་རྟོག་ ཞུ་ཅེ་ ཁྱུད་ སལ་ལེ་ ཛེད་ཏེ་ ནོག་། འི་ ཆེཏ་ཏོན་ སོ་མ་རྦོ་, འབྲི་ཀ་ནེ་ ཁྲིམ་རྒུན་ ཁ་ཉེན་ཅེའོ་ མ་ནོག་, ཀོན་འཇོག་རྒེ་ ཁོ་རང་ངེ་ ཐུག་ཡིད་ སལ་ལེ་ ཛེད་ཅེའོ་ ནོག་། འབྲི་རྡེ་ ཡོ་ཀ་ནེ་ ཁྲིམ་ ཉིང་པ་རྦེ་, ཤི་ཅེ་ ཁྱོང་ངེ་ནོག་ འིན་ན་ ཐུག་ཡིད་པེ་, མི་ཙེ་ སོ་མ་ སལ་ལེ་ནོག་།
ཆེཏ་ཏོན་ སོ་མེ་ ཟི་ཞིད་།
7 ཞེན་ ཏུ་ཟུག་ ནེ་ལུག་ ཟི་ཞིད་ཅེན་ ཉམ་པོ་ འགོ་ཟུག་ཏེ་ལ་, རྡོ་ཀ་ ཧོ་ཀན་ ཀཱ་རྒྱ་ ཅུ་རྦེ, ཤི་ཅེ་ ཆོག་ལ་ ཁྲིད་, ཀའོ་ ཨིས་ར་ཡེལ་པ་རྒུ་ནི་ མོ་ཤེ་ རྡོང་ལ་ ལྟ་ མ་ཉེན་, ཅེ་ཟེར་ནི་ ཁོང་ངེ་ རྡོང་ནི་ ཀོན་འཇོག་རྒེ་ ཟི་ཞིད་ འདང་ཤེན་ འབིང་ངེ་ཡོད་པེན་, འིན་ན་ འདྃ་རྦོ་ ཀུ་ལེ་ ཀུ་ལེ་ལ་ ཡོལ་ལེན་ སོང་། 8 ཏ་ ཏམ་པེ་ ཐུག་ཡིད་རྡེ་ མི་ཙེ་ སལ་ཅེ་རྦེ་ ཅི་ ཨ་ཧོ་རྒུ་ནི་ འི་ ཆེཏ་ཏོན་ སོ་མེ་ན་ མང་རྡེ་ལ་ ཟི་ཞིད་ མང་པེ་ རེ་ཝ་ ཅོ་ མི་རྒོའེ་? 9 ཁྲིམ་ཅེད་ ཁྱོང་ཀ་ནེ་ ཀཱ་རྒྱ་ ཅུ་རྦོ་ ཟི་ཞིད་ཅེན་ཞིག་ ཡོད་ནི་, ཏེ་ནི་ ཀོན་འཇོག་རྒེ་ ཧུ་འདུན་ལ་ ཨ་ཧོ་ ཀྲང་པོ་ ཛེད་ཀ་ནེ་ ཆེཏ་ཏོན་ སོ་མ་རྦོ་ལ་, ཙམ་ཤིག་རྒེ་ ཟི་ཞིད་ མེད་ཁྲོ་། 10 ངོའེ་སྤོ་ལ་, འགོ་མེ་ ཟི་ཞིད་པོ་ ཆེཏ་ཏོན་ སོ་མེ་ ཧ་ལེ་ཤེ་ ཟི་ཞིད་པོ་ ཉམ་པོ་ རྡུར་ནི་, ཟི་ཞིད་ མ་ནི་ མེ་ཀན་ ཙོག་སེ་ ནོག་། 11 ཡང་ ཀལ་ཏེ་ ཏེ་ ཡོལ་ལེན་ ཆ་ཀན་འབོ་ ཟི་ཞིད་ ཉམ་པོ་ སོང་འདེ་ འིན་ནི་, ཏེ་ནི་ ཏུའི་རྒྱུན་ ལུའི་ཤེ་ ཆེཏ་ཏོན་ སོ་མ་ལ་, ཙམ་ཤིག་རྒེ་ ཟི་ཞིད་ མང་ངེ་ མེད་ཁྲོ་།
12 ཏེ་ ཆེཏ་ཏོན་ སོ་མ་རྦེ་ ང་ཞ་རྒུན་ལ་ ཏེ་ཟམ་ ལོ་ཁྱེལ་ ཏང་ཅེ་ཀ་ནི་, ང་ཞ་རྒུན་ ཆོའེ་ཤེད་ཅེ་ན་ མང་ངེ་ ཧམ་བ་ཅེན་ འགྱུར་། 13 ང་ཞ་རྒུན་ མོ་ཤེ་ ཙོག་སེ་ མན་, ཁོའེ་ ཨིས་ར་ཡེལ་པ་རྒུ་ནི་ ཁོ་རང་ངེ་ རྡོང་ངེ་ཀ་ནི་ ཀུ་ལེ་ལ་ ཡོལ་རྡེ་ ཆེན་ ཡོ་ཀ་ནེ་ ཟི་ཞིད་པོ་ལ་ མི་ལྟ་ཅེ་ཕི་, ཁོ་རང་ངེ་ རྡོང་འབོ་ རེ་ ཉམ་པོ་ ཀབ་། 14 འིན་ན་ ཏོ་རྒུ་ནི་ ཉིང་རྒུན་ རྐྱོང་པོ་ འགྱུར་། ནེན་ཏེན་ལ་ ཏག་ས་ལ་ ནམ་ ཆེཏ་ཏོན་ ཉིང་པ་རྦོ་ སིལ་ལེ་རྡང་, ཁོང་རྒུན་ལ་ ཧ་ཀོ་ ཉེན་ནེ་ མག་ ཀ་ཟུག་ མོ་ཤེ་ རྡོང་ལ་ ཀབ་ཀན་འབོ་ ཙོག་སེ་། མ་ཤི་ཀ་ ཅིག་པེ་ན་ ཏེཏ་པ་ ཅོ་ཅེ་རྦེ་, ཏེ་ ཀབ་ཀན་འབོ་ ཐེན་ནེ་ ཛེ་རྡེན་། 15 འོ་ནེ་, ཏི་རིང་ལ་ མོ་ཤེ་ ཁྲིམ་རྒུན་ སིལ་ཟ་ནི་, ཁོང་རྒུ་ནི་ ཉིང་རྒུན་ ཀབ་ཏེ་ ཁོང་རྒུན་ལ་ ཧ་ཀོ་ ཉེན་ནེ་ མག་།
16 འིན་ན་ སུ་ཞིག་རྒེ་ ཙོབོ་རྡེ་ན་ ཏེཏ་པ་ ཅོ་ཅེ་རྡང་, ཀབ་ཏེ་ ཡོ་ཀན་འབོ་ ཐེན་ནེ་ ཛེ་རྡེ་ནོག་། 17 ཏ་ ཙོབོ་ནི་ ཐུག་ཡིད་ ཞུ་རྡེ་ནོག་, ཡང་ ཏམ་པེ་ ཐུག་ཡིད་ ཡོ་ཀན་རྒུན་ལ་ ཏེ་ ཁྲིམ་རྒུ་ནི་ཀ་ནི་ ར་ཝང་ ཡོད་ཏེ་ ནོག་། 18 ཨ་ཧོ་ ཚང་མེ་ཀ་ནི་ ཀབ་ཏེ་ ཡོ་ཀན་འབོ་ ཐེན་ཅེ་ཀ་ནི་, ཨ་ཧོ་རྒུ་ནི་ ཐོང་ ཙོབོ་རྡེ་ ཟི་ཞིད་པོ་ ཕེལ་ཅུག་རྒེ་ནོག་, ཀ་ཟུག་རྒེ་ མེ་ལོང་ངེ་ འདང་ ཁྱབ་ཤུག་རྒེ་ཡོད་། ཡང་ ཐུག་ཡིད་ འིན་ཀ་ནེ་ ཙོབོ་རྡེ་, ཨ་ཧོ་རྒུན་ མང་ངེ་སང་ མང་ངེ་ ཁོ་རང་ ཙོག་སེ་ ཅོའོ་ ཛེད་ཏེ་, ཨ་ཧོ་རྒུན་ ཁོང་ངེ་ ཟི་ཞིད་ཅེན་ནི་ ཟོབ་ཏ་ན་ འགྱུ་རེན་ ཆ་ནོག་།