ཤེ་སྤ་རྦོ་ ཚང་མེ་སང་ ཀྲག་ཤོག་།
13
ཀལ་ཏེ་ ང་ འཇིག་རྟེན་པ་ རྡང་ ཕོ་ཉ་རྒུ་ནི་ ཧད་ ཚང་མེ་ན་ སྤེ་ར་ ཏང་ཉེན་འདེ་, ངེ་ན་ ཞེན་མ་ལ་ ཤེ་སྤ་ མེད་ནི་, ཏེ་ནི་ ང་ ཧད་ངན་ཅེན་ནེ་ འདའ་མལ་ ཡང་ ཚིམ་ཚིམ་ ཙོག་སེ་ ནོག་། 2 ཀལ་ཏེ་ ང་ ལུང་རྟན་ ཁྱུད་, ཡང་ ཀོན་འཇོག་རྒེ་ སང་སྤེ་རེ་ ཐབ་ ཚང་མ་ རྒྱུའི་ ཡང་ ཅི་ཚང་མེ་ ཧོར་ལ་ ཤེ་རྒྱུ་, ཡང་ ངེ་ ལག་ལ་ རི་ རྒུལ་ཉེན་ཅེ་ ཏེཏ་པ་ ཡོད་ནི་, འིན་ན་ ངེ་ན་ ཞེན་མ་ལ་ ཤེ་སྤ་ མེད་ནི་, ང་ ཅང་ མག་། 3 ཀལ་ཏེ་ ང་ ཡོ་ཀན་ ཚང་མ་ ཉལ་རྦ་ཅེན་རྒུན་ལ་ མ་ཚེད་ ང་རང་ངེ་ ཟུྃ་སྤོ་འབོ་ལ་ སྲོག་ཆོད་ལ་ ཏང་ནི་, ངེ་ ཏོ་རྦེ་ཀ་ ཕོ་སོ་ ཅོ་སྲིད་ཅེ་ ནོག་, འིན་ན་ ཀལ་ཏེ་ ངེ་ན་ ཞེན་མེ་ཕི་ ཤེ་སྤ་ མེད་ནི་, ང་ ཅང་ ཕན་ཏོ་ མི་ཐོབ་།4 ཤེ་སྤ་རྦོ་ ཟོད་པ་ རྡང་ ཉིང་ཞེ་ ནོག་། ཤེ་སྤ་ལ་ ཕྲ་རྡོག་ ཡ་ རང་རྟོད་ ཡང་ ཕོ་སོ་ 5 རྡང་ ཤོད་པ་ སོག་པོ་ ཅོ་རྒོའེ་ཤེ་ མག་། རང་འདོད་ཅེན་ མི་ཡོང་ཤི་, སྲོ་ འགྱོ་སྤ་ མི་ཡོང་ཤི་, ཞེན་མེ་ ནོད་རྐྱལ་ཧན་འབེ་ ཐོ་ ཅོའེ་རྡེ་ མི་པོར་ཤེ་རྒུན་ ནོག་། 6 ཤེ་སྤ་རྦོ་ མི་འོའེ་སྤ་ ཆ་ཀན་རྒུ་ནི་ཀ་ རྐྱིད་པོ་ མ་ཅོ་ལ་, ཀྲང་པོ་ལ་ རྒྱལ་ཁ་ ཐོབ་ཅེ་ཀ་ རྐྱིད་པོ་ ཅོ་ཅེའོ་ ནོག་། 7 ཤེ་སྤ་ ཅོ་ཀ་ནེ་ ཅི་ཚང་མ་ སྲེན་ ཉེན་ནེ་ནོག་། ཁོང་རྒུ་ནི་ ཏེཏ་པ་ མ་ནི་ ཕྃ་ངེ་ མག་, ཡང་ ཀག་སྤོ་ རྡང་ རྡུང་ངལ་ ཐོང་ངེ་རྒྱ་ལ་ ཟོད་རྡེ་ནོག་།
8 མ་ཤེ་ཀ་ནེ་ ཧད་རྡེ་ན་ སྤེ་ར་ ཏང་ཅེ་, ལུང་རྟན་ ཤེད་ཅེ་ རྡང་ མིག་ས་ལེ་ ཤེ་རྒྱ་ ཡོ་ཀན་ནེ་ ཁྱུད་རྒུན་, ཞག་ཤིག་ མེ་ཀན་ འགྱུར་ཤེ་ ནོག་, འིན་ན་ ཤེ་སྤ་ ཏུའི་རྒྱུན་ ལུའི་རྡེ་ནོག་། 9 ཏ་ ཨ་ཧོ་རྒུ་ནི་ ཤེ་རྒྱུ་རྦོ་ ཚང་འགྲིག་ མེད་རྡེ་ ནོག་, ཡང་ ཡོང་ཅེ་ཅེན་ནེ་ ཏུའི་རྒུ་ནི་ ཧོར་ལ་ ལུང་རྟན་ ཤེད་ཀན་འབོ་ལ་ སོན་ཏེ་ མག་ ཁག་ཅིག་ ནོག་། 10 འིན་ན་ ཀོན་འཇོག་རྒེ་ ཅི་ཚང་མ་ ཚང་འགྲིག་ ཛེད་ཅེ་ ཏུའི་ ལེབ་ཟ་ནི་། ཚང་འགྲིག་ མེ་ཀན་ ཚང་མ་ ཏ་རུང་ མེ་ཀན་ ཆ་ནོག་།
11 ང་ ཕྲུ་རྒུ་ འིན་ཟ་ནི་ སྤེ་ར་ ཏང་ཅེ་, སམ་བ་ རྡང་ སམ་ཚུལ་རྒུན་ ངེ་ ཕྲུ་རྒུའི་ ཚུལ་ལ་ ཅོའེ་རྦེན་། འིན་ན་ ལྡན་འདེ་ ལྟིང་ནི་ ངེ་ ཕྲུ་རྒུའི་ ཅོ་ཚུལ་རྒུན་ ཕང་རྦེན་། 12 མེ་ལོང་ཞིག་རྒེ་ན་ ཟིམ་ཟིམ་ ཐོང་ངེ་ ཙོག་སེ་, ཏག་ས་ ཨ་ཧོ་རྒུ་ནི་ སལ་སྤོ་ ཅོའེ་རྡེ་ མ་ཐོང་ངེ་ ནོག་། འིན་ན་ ཏེ་ཏུའི་ལ་ ཨ་ཧོ་ལ་ ཅི་ཚང་མ་ སལ་སྤོ་ ཅོའེ་རྡེ་ ཐོང་ཉེན་ནེན་, ཀ་ཟུག་ མི་ཞིག་ལ་ འདུན་ལ་ ཐུག་ཏེ་ སྤེ་ར་ ཏང་ངེ་ཡོད་། ཏག་ས་ ང་ རྒྱུའི་ཡོ་ཀན་ ཚང་མ་ ཚང་འགྲིག་ མེད་ཏེ་ ནོག་, འིན་ན་ ཏེ་ཏུའི་ལ་ ང་ ཅི་ཚང་མ་ སལ་སྤོ་ ཅོའེ་རྡེ་ རྒྱུའི་ཆེན་, ཀ་ཟུག་རྒེ་ ཏག་ས་ ཀོན་འཇོག་རྒེ་ ང་ སལ་སྤོ་ ཅོའེ་རྡེ་ ཁྱེན་ནེ་ ཛེ་རྡེ་ཡོད་།
13 ཡུ་ སུམ་ཀ་ ཏུའི་རྒྱུན་ ལུའི་ཤེ་ ནོག་, ཏེཏ་པ་, རེ་ཝ་ རྡང་, ཤེ་སྤ་, ཡང་ ཡུ་རྒུ་ནི་ ནང་ནི་ ཀྲག་ཤོག་རྦོ་ ཤེ་སྤ་རྦོ་ ནོག་།