སེམ་ཡིད་རྡེ་ ཁྱུད་།
12
ཏ་ ངེ་ སྤུན་རྒུན་ ཏམ་པེ་ ཐུག་ཡིད་རྡེ་ ཨ་ཧོ་རྒུན་ལ་ སལ་ལེ་ ཛེད་ཀ་ནེ་ ཁྱུད་རྒུ་ནི་ ཧོར་ལ་, ཁྱི་ཞི་ ཧ་ཀོ་རྦོ་ ནོར་ཁྲུལ་ཅེན་ཞིག་ མི་ཡོང་ཅེ་ འདོད་པ་ ཅོ་ཡོད་། 2 ཏེཏ་པ་ མེ་ཀན་ འིན་ཟ་ནི་, ཁྱི་ཞ་རྒུན་ སྤེ་ར་ ཏང་ མ་ཉེན་ཀ་ནེ་ ཧུ་འདྲ་རྒུ་ནི་ ལམ་ ནོར་ཧན་ནེ་ཀ་ ཁྲིད་ཀན་འབོ་ ཁྱི་ཞ་རྒུན་ལ་ རྒྱུའི་ནོག་། 3 ཏོ་རྦེ་ཕི་ སུ་ཞིག་ལ་ ཀོན་འཇོག་རྒེ་ ཐུག་ཡིད་རྡེ་ན་ ཡི་ཤུ་ ངན་ ཏབ་ མི་ཉེན་ ཡང་ ཏམ་པེ་ ཐུག་ཡིད་ ཅིག་པོ་ རྒྱུད་ཏེ་ མ་ཐེ་ལ་, སུ་ཞིག་ལ་ “ཡི་ཤུ་ ཚང་མེ་ ཙོབོ་ ཞུ་རྡེ་ནོག་” ཟེར་ མི་ཉེན་ཅེའོ་ ངེ་ ཁྱི་ཞ་རྒུན་ལ་ རྒྱུའི་ ཆ་ཅུག་ཉིན་རག་།4 ཐུག་ཡིད་རྡེ་ ཁྱུད་ ན་ཚོག་ མང་པོ་ཞིག་ ཡོད་ཏེ་ ནོག་, འིན་ན་ ཏེ་ ཚང་མ་ ཆ་ས་རྦོ་ ཐུག་ཡིད་ ཁོ་རང་ ནོག་། 5 ཞབ་རྟོག་ ན་ཚོག་ཤིག་ ཡོད་ཏེ་ ནོག་, འིན་ན་ ཨ་ཧོ་རྒུ་ནི་ ཙོབོ་ ཅིག་རྒེ་ ཞབ་རྟོག་ ཞུ་ནོག་། 6 ཀོན་འཇོག་རྒེ་ཕི་ ཨ་ཧོའེ་ ལེ་ཧ་ ན་ཚོག་ ཅོ་ནོག་, འིན་ན་ ཨ་ཧོའེ་ ཅོ་ཀ་ནེ་ ལེ་ཧ་ ཚང་མེ་ན་ ཏེ་རྒ་ ཀོན་འཇོག་པེ་ ཆག་ལེ་ ཛེད་རྡེ་ནོག་།
7 ཅིག་ ཏང་ ཅིག་ལ་ ཡ་ཏོ་ ཅོ་ཉེན་ཅེ་ལ་, ཐུག་ཡིད་རྡེ་ ཁྱུད་ ཨ་ཧོ་ རེ་རེ་ལ་ ཀོན་འཇོག་རྒེ་ སལ་ལེ་ ཛེ་རྡེ་ནོག་། 8 ཏེ་རྒ་ ཐུག་ཡིད་པོ་ རྒྱུད་ཏེ་, མི་ཞིག་ལ་ ཁ་རྡ་ ཤེ་རབ་ཅེན་ ཏང་ཉེན་ཅེ་ ཁྱུད་, ཡང་ཞིག་ལ་ ཏེ་རྒ་ ཐུག་ཡིད་པོ་ རྒྱུད་ཏེ་, མིག་ས་ལེ་ ཤེ་རྒྱུ་ནེ་ ཁྲིན་འབོ་ སལ་ལེ་ ཛེ་རྡེ་ནོག་། 9 ཏེ་རྒ་ ཐུག་ཡིད་པེ་ ཅིག་ལ་, རྡེན་ཆེ་ཤེ་ ཆོན་མོ་ རྡང་ ཞེན་ཞིག་ལ་, ཕན་ཅུག་ཅེ་ ཁྱུད་རྒུན་ སལ་ལེ་ནོག་། 10 ཁོང་ངེ་ མི་ཞིག་ལ་ ཧ་ལེ་ཤེ་ ལྟའ་རྒུན་ ལྟན་ཅེ་ ཁྱུད་, ཞེན་ཞིག་ལ་ ལུང་རྟན་ ཤེད་ཅེ་ ཁྱུད་, ཞེན་ཞིག་ལ་ ཁྲིན་འབོ་ ཀོན་འཇོག་རྒེ་ ཐུག་ཡིད་རྡེ་ ཆོག་ནི་ ནོག་རྒེ་ མག་ ལྟ་ཉེན་ཅེ་ ཁྱུད་པོ་, ཞེན་ཞིག་ལ་ མ་ཤེ་ཀ་ནེ་ ཧད་རྡེ་ན་ སྤེ་ར་ ཏང་ཅེ་ ཁྱུད་ ཏང་ ཞེན་ཞིག་ལ་ ཏེ་ ཧད་རྒུན་ འགྱུར་ཤེ་ ཁྱུད་རྒུན་ སལ་ལེ་ ཛེ་རྡེ་ནོག་། 11 འིན་ན་ ཏེ་ ཁྱུད་རྒུན་ ཏེ་རྒ་ ཐུག་ཡིད་ ཅིག་ཅིག་པེ་ སལ་ལེ་ ཛེ་རྡེ་ནོག་། མི་ རེ་རེ་ ཀ་ཟུག་ ཁྱུད་རིག་ ཐོབ་རྦེན་, ཏོ་ ཁོང་ ཅིག་པེ་ ཐག་ཅེད་རྡེ་ ཛེ་རྡེ་ནོག་།
ཟུྃ་སྤོ་ ཅིག་ལ་ ཁག་ མང་པོ་།
12 ཞེན་ མི་ ཟུྃ་སྤོ་ལ་ ཁག་ མང་པོ་ཞིག་ ཡོད་ནྃ་, ཡན་ལག་ ཚང་མེ་ ཟུྃ་སྤོ་ ཆ་ཚང་ཞིག་ ཀྲུཔ་རྦེ་ནོག་། ཏེ་རྒ་ ཙོག་སེ་ ཆོའེ་ཚོག་རྒུན་ མ་ཤི་ཀེ་ ཧུ་ཟུག་ ནོག་། 13 ཨ་ཧོ་ ཁ་ཅིག་ ཡ་ཧུ་འདཱ་པ་ ཡང་ ཁ་ཅིག་ ཡ་ཧུ་འདཱ་པ་ མག་། ཁ་ཅིག་ ཚེ་ཡོག་ ཡང་ ཁ་ཅིག་ ར་ཝང་ཅེན་ ནོག་། འིན་ན་ ཏམ་པེ་ ཐུག་ཡིད་རྡེ་ན་ ཨ་ཧོ་ རེ་རེ་ལ་ ཁྲུའི་སལ་ལེ་ ཛེད་ཅེ་རྦེ་ ཨ་ཧོ་རྒུན་ ཟུྃ་སྤོ་ ཅིག་ ནོག་། ཏ་ ཨ་ཧོ་ རེ་རེ་ ཏེ་རྒ་ ཐུག་ཡིད་ ཅིག་པེ་ཀ་ནི་ ཐུང་ངེན་ ནོག་།
14 འོ་ནེ་, ཟུྃ་སྤོ་རྦོ་ལ་ ཡན་ལག་ ཅིག་ མ་ནོག་ མང་པོ་, སོ་སོ་ རིག་ ཡོད་ཏེ་ ནོག་། 15 ཀལ་ཏེ་ ཧང་པེ་ ཟེར་ནི་, “ང་ ཟུྃ་སྤེ་ ཡན་ལག་ མན་ ཅེ་ཟེར་ནི་ ང་ ལག་པ་ མན་།” ཅི་ ཏོ་རྦེ་ ཧང་པ་ ཟུྃ་སྤེ་ ཡན་ལག་ ཅིག་ ལུའི་རྡེ་ མ་ནོག་རྒེ་? 16 ཡང་ ཀལ་ཏེ་ ནམ་ཅོག་རྒེ་ ཟེར་ནི་, “ང་ ཟུྃ་སྤེ་ ཡན་ལག་ མན་ ཅེ་ཟེར་ནི་ ང་ མིག་ མན་”, ཅི་ ཏོ་རྦེ་ ནམ་ཅོག་པོ་ ཟུྃ་སྤེ་ ཡན་ལག་ ཅིག་ ལུའི་རྡེ་ མན་ནོག་རྒེ་? 17 ཀལ་ཏེ་ ཟུྃ་སྤོ་ སོན་ཏེ་ མིག་ འིན་འབེན་ནི་, ཀ་ཟུག་རྒེ་ ཁྱི་ཞ་རྒུ་ནི་ ཚོར་རེན་? ཡང་ ཀལ་ཏེ་ ཁྱི་ཞ་རྒུ་ནི་ ཟུྃ་སྤོ་ སོན་ཏེ་ ནམ་ཅོག་ འིན་འབེན་ནི་, ཏེ་ནི་ ཀ་ཟུག་རྒེ་ ཁྱི་ཞ་རྒུ་ནི་ ཀྲི་མ་ ཚོར་རེན་?
18 འིན་ན་ ཨ་ཧོ་རྒུ་ནི་ ཟུྃ་སྤོ་འབོ་ལ་ ནེན་ཏེན་ལ་ ཡན་ལག་ མང་པོ་ཞིག་ ཡོད་ཏེ་ ནོག་། ཡང་ ཀོན་འཇོག་རྒེ་ ཏེ་ ཡན་ལག་རྒུན་ ཁོང་ངེ་ ཐུག་འདོད་ ནང་ཞིན་ལ་, རང་རང་ངེ་ མལ་ལེ་ཀ་ པོ་རེ་ ཛེད་ཏེ་ ནོག་། 19 ཀལ་ཏེ་ ཟུྃ་སྤོ་རྦོ་ལ་ ཡན་ལག་ ཅིག་ མ་ནི་ མེད་པིན་ནི་, ཏེ་ནི་ ཀ་ཟུག་ ཡམ་ཚེན་ཞིག་ མེད་ཁྲོ་། 20 འོ་ནེ་, ཡན་ལག་ མང་པོ་ཞིག་ ཡོད་ཏེ་ ནོག་, འིན་ན་ ཟུྃ་སྤོ་ ཅིག་། 21 མིག་རྒེ་ ལག་པ་ མ་ནི་ མི་ཟེར་, “ང་ ཁྱེ་རང་ རྒོའེ་ཤེ་ མེ་རག་།” འགོའེ་ ཧང་པ་ མ་ནི་ མི་ཟེར་ “ང་ ཁྱེ་རང་ངེ་ རྒོའེ་ཤེ་ མེད་།”
22 ངོའེ་སྤོ་རྦོ་ འུ་ཐུག་ ཐོང་ཀན་ འདང་ ཁག་ཅེན་ མན་ཀ་ནེ་ ཟུྃ་སྤེ་ ཡན་ལག་རྒུན་ ཚང་མེ་སང་ རྒོའེ་ཤེ་ཅན་འབོ་ ནོག་། 23 ཡང་ སི་ཝ་ ཉུང་ཙེ་ཅེན་ འདང་ ལྟན་ མི་རྒོ་ཤེ་ཅེན་ནེ་ ཟུྃ་སྤེ་ ཁག་རྒུན་ལ་ ཨ་ཧོ་རྒུ་ནི་ ནང་རྟག་ ཆོན་མོ་ ཉམ་པོ་ ཀོའེ་ལག་ ཧོན་འདེ་ རྒྱ་ལེ་ ནྃ་རྟག་ ཅོའེ་རྡེ་ རྐྱོབ་ཏེ་ པོ་རེ་ནོག་། 24 ལྟན་ན་ འགྲིག་ཅེ་ཅེན་ནེ་ ཞེན་ ཡན་ལག་རྒུན་ལ་, ཏོ་ཙོག་སེ་ མིག་ས་ལེ་ ནང་རྟག་ རྒོའེ་རྡེ་ མག་། ཏེ་ནི་ ཀོན་འཇོག་རྒེ་ སི་ཝ་ ཉུང་ཙེ་ཅེན་ནེ་ ཡན་ལག་རྒུན་ལ་ མང་ངེ་ སི་ཝ་ རྡང་ ལྟ་ཏོག་ ཏང་ཅུག་ཏེ་ ཟུྃ་སྤོ་ སོན་ཏེ་ ཉམ་པོ་ ཀྲང་པོ་ པོ་རེ་ ཛེད་ཏེ་ ནོག་། 25 ཏོ་ ཅིག་ ཏང་ ཅིག་ལ་ ལྟ་ཏོག་ ཅོ་ཅེ་ མ་ཚེད་, ཐུའི་མི་ ཚང་མེ་ན་ ཐུན་འབྲེལ་ ཡོང་ཅེ་ལ་ ཅོའོ་ ཛེད་ཏེ་ ནོག་། 26 ཀལ་ཏེ་ ཡན་ལག་ ཅིག་ལ་ ཟུར་མོ་ ཡོང་ནི་, ཞེན་ ཡན་ལག་ ཚང་མ་ལ་ ཏོ་ ཉམ་པོ་ རྡུ་ངལ་ ཐོང་ངེ་ནོག་, ཡང་ ཀལ་ཏེ་ ཡན་ལག་ ཅིག་ལ་ སི་ཝ་ ཐོབ་ནི་, ཏོ་ ཉམ་པོ་ ཞེན་ ཡན་ལག་ ཚང་མེ་ལ་ ཐེད་པོ་ ཅོ་ནོག་།
27 ཏ་ ཁྱི་ཞ་ ཚང་མ་ ཛོམ་འདེ་, མ་ཤི་ཀེ་ ཧུ་ཟུག་པོ་ ནོག་, ཡང་ ཁྱི་ཞ་ རེ་རེ་ ཏོ་རྦེ་ ཡན་ལག་རྒུན་ ནོག་། 28 ཀོན་འཇོག་རྒེ་ ཆོའེ་ཚོག་རྒེ་ཕི་, འདམ་མེ་ ཛེད་ཀ་ནེ་ ཡན་ལག་ ཁ་ཅིག་ ཡུ་རྒུན་ ནོག་།
ཏང་པོ་ནི་, མ་ཤི་ཀེ་ ཧུ་ཚབ་རྒུན་,
ཉི་སྤ་ནི་, ལུང་རྟོན་པ་རྒུན་,
སུམ་པ་ནི་, ལོབ་རྦོན་རྒུན་,
ཏེ་ནི་ ཧ་ལེ་ཤེ་ ལྟའ་ ལྟན་ཀན་རྒུན་,
ཏེ་ནི་ ཕན་ཅུག་ ཉེན་ཅེ་ ཁྱུད་ ཡོ་ཀན་རྒུན་,
ཏེ་ནི་ ཅིག་ ཏང་ ཅིག་ལ་ ཡ་ཏོ་ ཅོ་ཀན་རྒུན་,
ཏེ་ནི་ ཆོའེ་ཚོག་ འུ་ཁྲིད་ཅེ་ ཁྱུད་ ཡོ་ཀན་རྒུན་,
ཏེ་ནི་ མ་ཤེ་ཀ་ནེ་ ཧད་རྒུ་ནི་ན་ སྤེ་ར་ ཏང་ཉེན་ཅེ་ ཁྱུད་ ཡོ་ཀན་རྒུན་།
29 ཅི་ ཨ་ཧོ་ ཚང་མ་ ཡི་ཤུ་ མ་ཤི་ཀེ་ ཧུ་ཚབ་རྒུན་ འིན་ནེ་? ཅི་ ཨ་ཧོ་ ཚང་མ་ ལུང་རྟོན་པ་རྒུན་ འིན་ནེ་? ཅི་ ཨ་ཧོ་ ཚང་མ་ ལོབ་རྦོན་རྒུན་ འིན་ནེ་? ཅི་ ཨ་ཧོ་ ཚང་མ་ལ་ ཧ་ལེ་ཤེ་ ལྟའ་ ཅོ་ཅེ་ ཝང་ ཡོད་རྡེ་? 30 ཅི་ ཨ་ཧོ་ ཚང་མ་ལ་ ཕན་ཅུག་ ཉེན་ཅེ་ ཁྱུད་ ཡོད་རྡེ་? ཅི་ ཨ་ཧོ་ ཚང་མ་ལ་ མ་ཤེ་ཀ་ནེ་ ཧད་རྒུ་ནི་ན་ སྤེ་ར་ ཏང་ཉེན་ཅེ་ ཁྱུད་ ཡོད་རྡེ་? ཅི་ ཨ་ཧོ་ ཚང་མ་ལ་ མ་ཤེ་ཀ་ནེ་ ཧད་རྡེ་ ཧད་འགྱུར་ ཅོ་ཉེན་ཅེ་ ཁྱུད་ ཡོད་རྡེ་? 31 ཆོའེ་ཚོག་ལ་ ཚང་མེ་སང་ ཕན་ཏོག་ མང་ངེ་ ཏང་ཉེན་ཅེ་ ཁྱུད་རྒུན་ ཁྱི་ཞ་ ཐོབ་ཅེ་ འདོད་པ་ པོར་རྒོ་ཤེ་ ནོག་།
འིན་ན་ ཏ་ ངེ་ ཁྱི་ཞ་རྒུན་ལ་ མི་ཙེ་ པུད་ཚུལ་ ཚང་མེ་ ནང་ནི་ རྒྱལ་ཤོག་ འིན་ཀན་འབོ་ ལྟན་ནེན་།