11
ཡང་ ང་ མ་ཤི་ཀེ་ སྤེ་ཀ་ འགྲུལ་ཧན་ ཙོག་སེ་, ཁྱི་ཞ་རྒུན་ ངེ་ སྤེ་ཀ་ འགྲུལ་རྒོ་ཤེ་ ནོག་།ཆོའེ་ ཅོ་ཅེ་ ཧོར་ལ་ ལབ་ཞ་།
2 ཁྱི་ཞ་རྒུ་ནི་ ཏུའི་རྒྱུན་ ང་ འི་ཏུ་ པོར་རྡེ་ ངེ་ ཏང་ཀ་ནེ་ ལབ་ཞ་རྒུ་ནི་ཀ་ འགྲུལ་ཅེ་རྦེ་, ངེ་ ཁྱི་ཞ་ རྟོད་པ་ ཏང་ངེ་ཡོད་། 3 འིན་ན་ ཁྱི་ཞ་རྒུན་ལ་ ཡུ་རྒུན་ ཧ་ཀོ་ ཅུག་ཉིན་རག་, ཏེཏ་པ་ཅན་ནེ་ པུ་ཙ་ ཚང་མེ་ འགོ་རྦོ་, མ་ཤི་ཀ་ ཞུ་རྡེ་ནོག་། ཏེཏ་པ་ཅེན་ནེ་ པོ་མོ་ ཚང་མེ་ འགོ་འབོ་, ཁོ་རང་རྒུ་ནི་ མག་པ་ ནོག་, ཡང་ མ་ཤི་ཀེ་ འགོ་རྦོ་, ཀོན་འཇོག་ ཞུ་རྡེ་ནོག་། 4 ཀལ་ཏེ་ པུ་ཙ་ཞིག་རྒེ་ མོ་ལམ་ ཞུ་ཟ་ནི་, ཡང་ ལུང་རྟན་ ཤེད་ཟ་ནི་, ཁོ་རང་ངེ་ འགོ་རྦོ་ ཀབ་ཏེ་ ཡོད་ནི་, ཁོའེ་ ཁོ་རང་ངེ་ འགོ་, ཡང་ནི་ མ་ཤི་ཀ་ ཁྲེལ་རྦ་ ཁྱོྃ་རྡེ་ ནོག་། 5 འིན་ན་ ཀལ་ཏེ་ པོ་མོ་ཞིག་རྒེ་ ཁོ་རང་ངེ་ འགོ་རྦོ་ ཀབ་ མ་ཀབ་ལ་ མོ་ལམ་ ཞུ་ནི་, ཡང་ ལུང་རྟན་ ཤེད་ནི་, ཏེ་ནི་ ཁོའེ་ ཁོ་རང་ངེ་ འགོ་, ཡང་ནི་ ཁོ་རང་ངེ་ མག་པ་, ཁྲེལ་རྦ་ ཁྱོྃ་རྡེ་ ནོག་། ཏུ་ཟུག་ ཅོ་ནི་, ཏེ་ པོ་མོ་རྦེ་ ཁོ་རང་ངེ་ སྲ་ འབྲག་ཏེ་ འགོ་ལག་ ཅོ་ཀན་ ཙོག་སེ་ ནོག་། 6 འོ་ནེ་ ཀལ་ཏེ་ པོ་མོ་རྦོ་ འགོ་ ཀབ་ཅེ་ཕི་ ཐེད་རྡེ་ མེད་ནི་, ཏེ་ནི་ ཁོའེ་ ཁོ་རང་ངེ་ སྲ་ ཚང་མ་ འབྲག་རྒོ་ཤེ་ ནོག་། འིན་ན་ པོ་མོ་ཞིག་ལ་ འགོ་ལག་ ཅོ་ཅེ་ ཡང་ སྲ་ པེཏ་ཆུང་ཙེ་ ཅེད་ཅེའོ་, ཁྲེལ་རྦ་ཞིག་ འིན་ཅེ་ཀ་ནི་, པོ་མོའེ་ འགོ་ ཀབ་རྒོ་ཤེ་ ནོག་།
7 པུ་ཙ་ ཀོན་འཇོག་རྒེ་ ཡིབ་ ཡང་ ཁོང་ངེ་ སྤལ་ལེ་ན་ ཅོའོ་ ཛེད་ཅེ་ཀ་ནི་, ཀོན་འཇོག་ལ་ ཅོལ་ཟ་ནི་, ཁོའེ་ ཁོ་རང་ངེ་ འགོ་ ཀབ་ མ་རྒོའེ་། འིན་ན་ ན་མ་རྒུན་ ཁོ་རང་ངེ་ མག་པེ་ སྤལ་རྦོ་ ནོག་། 8 ཨ་འདཱམ་ ཟེར་ཧན་ པུ་ཙ་ ཏང་པོ་, པོ་མོ་ནི་ ཅུང་འདེ་ མག་, འིན་ན་ ཧ་ཝ་ ཟེར་ཧན་ ཏང་པོ་ པོ་མོ་ པུ་ཙ་ནི་ ཅུང་འདེ་ ནོག་། 9 ཡང་ པུ་ཙ་ པོ་མེ་ཕི་ ཅོའོ་ མ་ཛེ་རྡེ་, པོ་མོ་ པུ་ཙེ་ཕི་ ཅོའོ་ ཛེད་ཏེ་ ནོག་། 10 ཏེ་རྒ་ རྒྱུ་ཚན་ འདང་ ཀོན་འཇོག་རྒེ་ ཕོ་ཉ་རྒུ་ནི་ ཟིག་རྡེན་ ཡོད་ཅེ་རྦེ་, པོ་མེ་ ཁོ་རང་ མག་པེ་ ཝང་ངེ་ ཡོག་ལ་ ཡོ་ཀན་འབོ་ ལྟན་ཅེ་ལ་, ཁོ་རང་ངེ་ འགོ་ ཀབ་རྦོ་ཤེ་ ནོག་།
11 ཙོབོ་རྡེ་ན་ ཏེཏ་པ་ཅན་ནེ་ པུ་ཙ་ཞིག་རྒེ་ ང་ པུ་ཙ་ཞིག་རྒེ་ རག་ལེ་རྡེ་ ཡང་ ཏེཏ་པ་ཅན་ནེ་ པུ་ཙ་ཞིག་རྒེ་ ང་ པུ་ཙེ་ཀ་ རག་ལེ་རྡེ་ འདེད་རྒོ་ཤེ་མེད་ ཟེར་ མི་ཉེན་། 12 ཅེ་ཟེར་ནི་ ཏང་པོ་, པོ་མོ་ པུ་ཙེ་ཀ་ནི་ ཅུང་འདེ་ འིན་ན་, ཏག་ས་ པོ་མེ་ཀ་ནི་ པུ་ཙ་ རྐྱེ་ནོག་། འིན་ན་ ཅི་ཚང་མ་ ཀོན་འཇོག་ཀ་ནི་ ཡོྃ་རྡེ་ ནོག་།
13 ཁྱི་ཞ་རང་ངེ་ ཐག་ཅོད་ཧེ་, ཅི་ མི་རྒུ་ནི་ ཕྲོ་ པོ་མེ་ རང་ངེ་ འགོ་ མ་ཀབ་རྦེ་ ཀོན་འཇོག་ལ་ མོ་ལམ་ ཞུ་ཅེ་རྦོ་, འོའེ་སྤ་ ནོག་རྒེ་? 14 ཅི་ པུ་ཙེ་ པོ་མོ་ ཙོག་སེ་ སྲ་ རིང་མོ་ པོར་ནི་, ཏོ་ རང་ཞིན་ མན་ཀན་ ཡང་ ཁྲེལ་རྦ་ཞིག་ མ་ནོག་རྒེ་? 15 ཡང་ སྲ་ རིང་མོ་ ཡོད་ཅེའོ་ པོ་མེ་ཕི་ སྤལ་ཞིག་ ནོག་, ཅེ་ཟེར་ནི་ སྲ་རྦོ་ ཁོ་ ཀབ་ཅེ་ལ་ སལ་ལེ་ ཛེད་ཏེ་ ནོག་། 16 འིན་ན་ ཡུ་རྦེ་ ཧོར་ལ་ རྒྱཔ་འགལ་ ཅོ་ཉིན་ ཡོ་ཀན་རྒུ་ནི་ཕི་ ངེ་ འེ་རྒ་རྦོ་ ཟེ་རེན་, ང་ཞ་རྒུན་ལ་ འེ་རྒ་རྦོ་ མ་ནི་, ཞེན་ཡང་ ལུག་སྲོལ་ཞིག་ མེད་, ཡང་ ཀོན་འཇོག་རྒེ་ ཆོའེ་ཚོག་རྒུ་ནི་ ནང་ལ་ མེད་རྡེ་ ནོག་།
ཏམ་པེ་ སོལ་རེ་ ཡང་ནི་ ཙོབོ་རྡེ་ འདོན་ཏང་ངེ་ཕི་ ཁྲིམ་རྒུན་།
17 ཏ་ ངེ་ ཟེར་ཤེ་ཅེན་འབེ་ན་, ཁྱི་ཞ་རྒུན་ལ་ རྟོད་པ་ ཏང་ཉེན་ཅེ་ མེ་རག་, ཅེ་ཟེར་ནི་ ཁྱི་ཞ་རྒུ་ནི་ ཛོམ་ཅེ་རྦེ་, ཕན་ཏོག་རྡེ་སང་ མང་ངེ་ ནོད་རྐྱལ་ ཁྱོང་འདུག་། 18 ཏང་པོ་, ཁྱི་ཞ་རྒུན་ ཆོའེ་ཚོག་རྒེ་ ཚུལ་ལ་ ཛོམ་ཟ་ནི་, ཁྱི་ཞ་རྒུ་ནི་ ཕྲོ་ པོ་མང་པོ་ པུད་ཏེ་ ཡོ་ཀན་འབོ་ ཚོར་། ཡང་ ངེ་ ས་མེ་རག་ ཏེ་ སྤེ་ར་ ཚོར་ཧན་ མང་ཆེ་རྦོ་ རྡེན་འབའ་ ནོག་། 19 ནེན་ཏེན་ལ་ ཀོན་འཇོག་རྒེ་ མི་རྒུན་ ངོའེ་རྟག་ ཆ་ཅེ་ཕི་ ཁོང་ངེ་ ཁྱི་ཞ་རྒུ་ནི་ ཕྲོ་ ཁག་ སོ་སོ་རྒུན་ ཆ་ཅུག་རྒེ་ ཛེད་ཏེ་ ནོག་།
20 ཙོབོ་རྡེ་ འདོན་ཏང་ངེ་ན་ ཟ་ཅེ་ལ་ ཁྱི་ཞ་རྒུན་ ཛོམ་ཟ་ནི་ རྡེན་འབའ་, ཁྱི་ཞ་རྒུན་ མ་ཤི་ཀེ་ ཀྲོང་ཤེའོ་ འི་ཏུ་ ཅོ་ཅེ་ལ་ ཐེད་རྡེ་ མི་འདུག་། 21 ཅེ་ཟེར་ནི་ ཁྱི་ཞ་ ཁ་ཅིག་རྒེ་, རང་ངེ་ ཁར་ཞི་རྒུན་ ཞེན་མ་རྒུན་ལ་ རྒོའེ་རྡེ་ མ་ཏང་ངེ་ ཟ་ཅེ་ལ་ རིྃ་རྡུག་, ཀ་རྦེ་ ཅོའེ་རྡེ་ ཁ་ཅིག་ ལྟོག་རི་ ལུའི་རྡུག་, ཡང་ ཁ་ཅིག་ ར་རོའེ་ རྡུག་། 22 ཅི་ ཁྱི་ཞ་རྒུན་ལ་ ཟ་ཅེ་ རྡང་ ཐུང་ཅེ་ཕི་, རང་རང་ངེ་ ཁང་པ་ མེད་རྡེ་? ཡང་ ཅི་ ཀོན་འཇོག་རྒེ་ ཆོའེ་ཚོག་ལ་ སོག་པོ་ ཅོ་ཅེ་ རྡང་ ཉལ་རྦ་ཅེན་རྒུན་ལ་ ཁྲེལ་རྦ་ ཁྱོང་ངེ་ལ་, ཐེད་རྡེ་ རག་རྒེ་? ངེ་ ཁྱི་ཞ་རྒུན་ལ་ ཅི་ ཟེར་རྒོའེ་, ཅི་ ངེ་ འི་འབོའེ་ཕི་ ཁྱི་ཞ་རྒུན་ལ་ རྟོད་པ་ ཏང་རྒོའེ་རྡེ་? འོ་ནེ་ ནེན་ཏེན་ ཡུ་རྦེ་ཕི་ ཁྱི་ཞ་རྒུན་ལ་ རྟོད་པ་ མི་ཏང་།
23 ང་ ཙོབོ་རྡེ་ ཆོག་ནི་ ལབ་ཞ་ ཐོབ་ཀན་འབོ་ ཁྱི་ཞ་རྒུན་ལ་ ཏྃ་རྦེན་། ཏེ་རྒ་ ཚན་ལ་ ནམ་ ཡུ་འདཱེ་ ཙོབོ་ ཡི་ཤུ་ འགྲ་ཝོ་རྒུ་ནི་ ལག་ལ་ ལྟེད་, ཙོབོ་རྡེ་ ཏི་རྒིར་རྦོ་ ནེན་ནེ་ ཛེད་, 24 ཡང་ ཀོན་འཇོག་ལ་ ཐུག་ཞེ་ཆེ་ པུལ་རྡེ་ ཁོང་ངེ་ ཏོ་ ཅག་རྒེ་ ཛེད་, ཡང་ མོལ་, “འི་རྦོ་ ཁྱི་ཞ་རྒུ་ནི་ཕི་ ཏང་ཀ་ནེ་ ངེ་ ཟུྃ་སྤོ་ འིན་། ང་ འི་ཏུ་ ཅོ་ཅེ་ལ་ འི་རྦོ་ ཅོའེ་ཧེ་།” 25 ཏེ་རྒ་ ཙོག་སེ་ ཁར་ཞི་ ལྟིང་ནི་ ཁོང་ངེ་ རྒུན་འགྲུམ་མེ་ ཁོའེ་ འདོན་རྐྱོ་རྦོ་ ནམ་ ཡང་ མོལ་, “འི་ ཀོ་རེའོ་ ཀོན་འཇོག་ ཏང་ ཁོང་ངེ་ མི་རྒུ་ནི་ པར་ལ་ ཞལ་ཆེཏ་ སོ་མ་ཞིག་ ནོག་, ཀའོ་ ངེ་ ཁྲག་ ཉམ་པོ་ ཅོའེ་རྡེ་ འིན་, ཁྱི་ཞ་རྒུ་ནི་ འི་རྦོ་ ཐུང་ཟ་ནི་ ང་ འི་ཏུ་ ཅོའེ་ཧེ་།” 26 ནམ་ ཁྱི་ཞ་རྒུ་ནི་ འི་ ཏི་རྒིར་རྦོ་ ཟོའེན་ ཡང་ འི་ ཀོ་རེ་འབོ་ནི་ ཐུང་ངེན་, མ་ཤི་ཀ་ ཡང་ ལོག་ཏེ་ རྐྱོད་རྐྱོད་ཚུག་པ་, ཁྱི་ཞ་རྒུ་ནི་ ཏོན་ལ་ ཙོབོ་ ཀྲོྃ་ངེ་ ཛེད་ཀན་འབོ་ མི་རྒུན་ལ་ ཁྱི་ཞི་ སྤང་པོ་ ཏང་ངེ་ནོག་།
27 ཏོ་རྦེ་ཕི་ སུ་ཞིག་རྒེ་ སི་ཝ་ མ་ཅོ་ལ་ འི་ ཏི་རྒིར་རྦེ་ཀ་ནི་ ཟ་ནི་ ཡང་ འི་ ཀོ་རེ་ ནང་ནི་ ཐུང་ནི་, ཙོབོ་རྡེ་ ཧུ་ཟུག་ ཏང་ ཧུ་ཁྲག་རྒུ་ནི་ རྒྱཔ་འགལ་ལ་ རྡིག་པ་ ཅོའེ་རྡེ་ རྐྱོན་འཇེན་ འགྱུར་རྡེ་ ནོག་། 28 ཏེ་རྒ་རྦེ་ཕི་ལ་ ཁྱི་ཞ་རྒུ་ནི་ ཏི་རྒིར་ ཟ་སང་ ཡང་ ཀོ་རེ་རྦོ་ནི་ ཐུང་ངེ་སང་ ངུལ་ལ་, ཁྱི་ཞ་རང་ལ་ ལྟག་ཅེད་ ཅོ་རྒོ་ཤེ་ ནོག་། 29 ཅེ་ཟེར་ནི་ ཀལ་ཏེ་ ཁྱི་ཞ་རྒུ་ནི་ མ་ཤི་ཀེ་ ཧུ་ཟུག་པོ་ལ་ སི་ཝ་ མ་པུ་ལེ་ ཏི་རྒིར་རྦོ་ ཟ་ནི་ ཡང་ ཀོ་རེ་འབོ་ནི་ ཐུང་ནི་, ཏེ་ནི་ ཁྱི་ཞ་རྒུ་ནི་ ཁྱི་ཞ་རང་ངེ་ཕི་ ཀོན་འཇོག་རྒེ་ ཁྲིམ་ཅེད་པོ་ ཟོའེ་རྡེ་ ཡང་ ཐུྃ་རྡེ་ ནོག་། 30 ཏེ་རྒ་རྦེ་ཕི་ ཁྱི་ཞ་ མང་པོ་ཞིག་ འུ་ཐུག་ ཏང་ ཟུར་མོ་ཅེན་ ཡང་ ཁ་ཅིག་ ཤི་རྡེ་ལ་ ནོག་།
31 འིན་ན་ ཀལ་ཏེ་ ཨ་ཧོ་རྒུ་ནི་ ཨ་ཧོ་ རང་ལ་ ལྟག་ཅེད་ ཅོའེ་རྦི་ནི་, ཨ་ཧོ་རྒུན་ ཡུ་ཙོག་སེ་ ཁྲིམ་ཅེད་རྡེ་ན་ ཡོྃ་རྡེ་ མེད་ཁྲོ་། 32 ཏེ་ན་ ཨ་ཧོ་ འཇིག་རྟེན་པ་རྒུན་ ཉམ་པོ་ ཆེད་པ་ མི་ཕོག་ཅེ་ཕི་, ཨ་ཧོ་རྒུན་ལ་ ཙོབོ་རྡེ་ ཁྲིམ་ཅེད་ སལ་ལེ་ ཛེད་ཟ་ནི་, ཁོང་ངེ་ ཨ་ཧོ་རྒུན་ རྐྱོང་ངེ་ ཛེད་ཏེ་ ནོག་།
33 ཏེ་ནི་ ངེ་ སྤུན་རྒུན་, ཁྱི་ཞ་རྒུན་ ཙོབོ་རྡེ་ འདོན་ཏང་ངེ་ཕི་ ཛོམ་ཟ་ནི་ ཅིག་ ཏང་ ཅིག་ལ་ སྲུྃ་རྡེ་ འདོད་ཧེ་། 34 ཀལ་ཏེ་ ཁྱི་ཞ་རྒུན་ ལྟོག་རྡེ་ཡོད་ནི་, ཏེ་ནི་ ཁྱི་ཞ་རྒུན་ ཛོམ་ཟ་ནི་ ཁྱི་ཞི་ཀ་ ཁྲིམ་ཅེད་ མི་ཡོང་ཤེ་ཕི་ རང་ངེ་ ཁང་པ་ ཁར་ཞི་ ཟོའེ་རྡེ་ ཤོག་ཧེ་། ང་ ལེབ་ཏེ་ ལྟིང་ནི་, ཁྱི་ཞ་རྒུན་ལ་ འི་ ཧོར་ལ་ ཞེན་ཡང་ ལབ་ཞ་རྒུན་ ཏང་ངེན་།