ཨིས་ར་ཡེལ་ལེ་ ཅོ་ཀ་ནེ་ ནོར་ཁྲུལ་རྒུན་ མི་ཅོ་ཅེ་།
10
སྤུན་རྒུན་ ཏུའི་ མང་པེ་ ངུལ་ལ་ ང་ཞི་ ཕ་མེ་པོ་རྒུན་ རི་ལྟོང་ངེ་ན་ ཁོར་རེན་ འདེད་ཀ་ནེ་ ཧོར་རྒུན་ ཁྱི་ཞི་ ཞེད་ མི་ཞེད་ཅེ་འབོ་ ངེ་ འདོད་པ་ འིན་། ཁོང་ ཚང་མ་ སྲིན་ནེ་ ལམ་ལྟན་འདེ་ ཚོའེ་ རྐྱིལ་ནི་ སེ་ཧམ་མེ་ཀ་ འགྲུལ་རྡེ་ འིན་འབེན་། 2 སྲིན་ནེ་ ཡོག་ལ་ ཡང་ རྒྱམ་ཚོའེ་ ནང་ནི་ འགྲུལ་ཧན་, ཁོང་རྒུན་ལ་ མོ་ཤེ་རྡེ་ རྒྱབ་ནི་ འགྲུལ་ཤེ་ལ་ ཁྲུའི་སལ་ལེ་ ཛེད་ཏེ་ འིན་འབེན་། 3 ཁོང་ ཚང་མེ་ ཀོན་འཇོག་རྒེ་ ཛེད་པ་ རྒྱུད་ཏེ་ སལ་ལེ་ ཛེད་ཀ་ནེ་ ཏི་རྒིར་ མན་ན་ ཟེར་ཧན་འབོ་ ཟོའེ་། 4 ཁོང་ ཚང་མེ་ ཀྲག་རྒེ་ཀ་ནི་ འབིང་ཅུག་རྒེ་ ཛེད་ཀན་ ཐུག་ཡིད་རྡེ་ ཆུ་རྦོ་ ཐུང་། ཁོང་ ཚང་མེ་ ཁོང་རྒུན་ ཉམ་པོ་ རྐྱོད་ཀ་ནེ་ ཀྲག་པེ་ཀ་ནི་ ཐུང་ ཀའོ་ མ་ཤི་ཀ་ འིན་འབེན་། 5 ཏེ་ན་ ཁོང་ མང་ཆེ་ ཉམ་པོ་ ཀོན་འཇོག་ ཐུག་ཉེ་ མ་ཛེད་, ཡང་ ཁོང་རྒུ་ནི་ རི་ལྟོང་ངེ་ན་ ཤི་རྡེ་ མེ་ཀན་ སོང་།6 ཨ་ཧོ་རྒུ་ནི་ན་ ཁོང་རྒུ་ནི་ ཅོའེ་ཧན་ ཙོག་སེ་ འདོད་པ་ ངན་པ་རྒུན་ མི་ཡོང་ཅེ་ཕི་, ཨ་ཧོ་རྒུན་ལ་ སྤང་པུད་ཏེ་ ཏོ་རྒུན་ ཆ་ཅུག་རྒེ་ ཛེད་ཏེ་ ནོག་། 7 ཏོ་རྦེ་ཕི་ ཁོང་རྒུ་ནི་ ཅོའེ་ཧན་ ཙོག་སེ་ ཧུ་འདྲ་རྒུན་ལ་ ཆོའེ་ མ་ཅོ་ཧེ་, ཀ་ཟུག་རྒེ་ ཏམ་པེ་ སུང་རབ་རྦེ་ན་ མོལ་རྡེ་ ནོག་ “ཁོང་རྒུ་ནི་ ཅོ་ཀ་ནེ་ ཧུ་འདྲ་, སེར་རེ་ པ་ལང་འབོ་ལ་ སི་ཝ་ ཅོ་ཅེ་ཕི་, མི་རྒུན་ ཐང་ཀེ་ཀ་ འདེད་ཏེ་ ཟ་ཅེ་ རྡང་ ཐུང་ཅེ་རྒུན་ འགོ་ཟུག་, ཡང་ ཁོང་རྒུན་ ལྃ་རྡེ་ ཤོད་པ་ ངན་པེ་ སེ་རྒུན་ ཏང་ངེན་ རྐྱིད་པོ་ ཅོའེ་།” 8 ཨ་ཧོ་རྒུན་ ལུའི་འབྲེལ་ ངན་པེ་ན་ འདྲེའེ་ མ་རྒོའེ་, ཀ་ཟུག་ ཁོང་ ཁ་ཅིག་རྒེ་ ཅོའེ་, ཀ་རྦེ་ ཁོ་རང་རྒུ་ནི་ ཕྲོ་ནི་ ལྟོང་ ཉི་ཤུ་སག་སུམ་ ཏེ་རྒ་ ཞག་ལ་ ཤི་ཅུག་།
9 ཨ་ཧོ་རྒུ་ནི་ མ་ཤི་ཀ་ ཚོད་ལྟ་ མི་རྒོའེ་, ཀ་ཟུག་རྒེ་ ཁོང་ ཁ་ཅིག་རྒེ་ ཅོའེ་ ཡང་ འབྲེ་རྦུ་རྦོ་ ཏུག་རུལ་རྒུ་ནི་ ཐམ་འདེ་ ཁོང་རྒུན་ ཤི་རྡེ་ འིན་འབེན་། 10 ཡང་ ཁོང་ ཁ་ཅིག་རྒེ་ ཅོའེ་ཧན་ ཙོག་སེ་, ཀོན་འཇོག་ལ་ ཟེར་རྒྱུ་ མ་ཏང་, ཅེ་ཟེར་ནི་ ཤི་ཅུག་ཀ་ནེ་ ཕོ་ཉེ་ ཁོང་རྒུན་ སེད་ཀག་། 11 ཨ་ཧོ་རྒུ་ནི་ཕི་ སྤེ་ཞིག་རྒེ་ ཚུལ་ལ་ ཏོ་ ཚང་མ་ ཁོང་རྒུན་ལ་ སོང་འདེ་ འིན་འབེན་། ཐ་མེ་ ཏུའི་ན་ འདེད་ཀ་ནེ་ ཨ་ཧོ་རྒུན་ལ་ སྤང་པུད་ཅེ་ཕི་, ཏོ་རྒུན་ འབྲི་རྡེ་ ནོག་།
12 ཀལ་ཏེ་ ཁྱི་ཞ་ ཏེཏ་པེ་ན་ རྟེམ་པོ་ ཡོད་ སམ་མེ་ཡོད་ནི་, འགྱེལ་ མི་འགྱེལ་ཤི་ཕི་ ཤང་ ཅོའེ་ཧེ་། 13 འི་ཏུ་ ཅོའེ་ཧེ་ ཁྱི་ཞ་རྒུ་ནི་ རྡིག་པ་ ཅོ་ཅེ་ འདོད་པ་རྦོ་ ཞེན་ མི་རྒུན་ལ་ ཡོ་ཀན་འབེ་སང་ སོ་སོ་ཞིག་ མག་། ཡང་ ཀོན་འཇོག་པོ་ ལོ་ཁྱེལ་ཅེན་ ཞུ་རྡེ་ནོག་, ཁོང་ངེ་ ཁྱི་ཞ་རྒུན་ལ་ ཚོད་ལྟོའེ་ ཁུ་རུ་རྦོ་ ཁྱི་ཞ་རྒུ་ནི་ ཁྱུད་རྡེ་སང་ མང་ངེ་ ཁུར་ ཤུག་རྒེ་ མི་ཛེད་། ཁྱི་ཞ་རྒུན་ ཚོད་ལྟོའེ་ན་ ཆ་ཟ་ནི་, ཁོང་ངེ་ ཟོད་པ་ ཉམ་པོ་ ཏོ་ ཁུར་ཉེན་ཅེ་ ལམ་ ཁྱི་ཞ་ ལྟན་ནེ་ ཛེ་རྡེན་།
14 ཏོ་རྦེ་ཕི་ ངེ་ སྤུན་རྒུན་, ཧུན་འདྲ་རྒུན་ལ་ ཅོལ་ཅེ་ནི་ ཤོར་རྡེ་ སོང་ཧེ་། 15 ཁྱི་ཞ་རྒུན་ ཁྲམ་པ་ཅེན་ནེ་ མི་རྒུན་ ནོག་། ངེ་ ཟེར་ཧན་རྒུན་ ཀྲང་པོ་ ནོག་རྒེ་ ཡ་ མག་ ཁྱི་ཞ་རང་ངེ་ ཐག་ཅོད་ཧེ་།
16 ཏང་པོ་, ཏམ་པེ་ སོལ་རེ་ ཏུའི་ལ་ འདོན་རྐྱོག་རྡེ་ན་ ཡོ་ཀ་ནེ་ རྒུན་འགྲུམ་ ཁོའེ་རྦོ་ལ་ ཅིན་ལབ་རྦེ་ཕི་ ཞུའི་རྡེ་ ཐུང་ངེ་རྡང་, མ་ཤི་ཀེ་ ཧུ་ཁྲག་རྒེ་ན་ འདྲེའེ་རྡེ་ མ་ནོག་རྒེ་? ཡང་ ཏི་རྒིར་རྦོ་ ཅག་རྒེ་རྡང་, ཨ་ཧོ་རྒུན་ མ་ཤི་ཀེ་ ཧུ་ཟུག་རྒེ་ན་ འདྲེའེ་རྡེ་ མ་ནོག་རྒེ་? 17 ཨ་ཧོ་རྒུན་ མང་པོ་ཞིག་ ཡོད་ན་, ཨ་ཧོ་ ཚང་མེ་ ཏི་རྒིར་ ཅིག་རྒེ་ཀ་ནི་ ཟ་ནོག་, ཀ་རྦེ་ ཨ་ཧོ་རྒུན་ ཟུྃ་སྤོ་ ཅིག་ འིན་ཀན་འབོ་ ལྟན་ནེ་ནོག་།
18 ཉི་སྤ་, ཨིས་ར་ཡེལ་པ་རྒུ་ནི་ ཧོར་ལ་ སམ་བ་ ཏོང་ཧེ་། ཁོང་རྒུན་ ཆོད་ཁྲི་ཀ་ སྲོག་ཆོད་ལ་ པུལ་རྡེ་ ཡོ་ཀན་རྒུན་ ཟོའེ་རྡེ་ ཅི་ ཁོང་རྒུན་ ཅིག་འགྲིལ་ མི་འདུག་རྒེ་? 19 ཅི་ ངེ་ ཧུ་འདྲ་རྒུན་ལ་ སྲོག་ཆོད་ལ་ པུལ་ཧ་ནེ་ ཁར་ཞི་རྒུ་ནི་ན་ རིན་ ཡོད་, ཡང་ ཏེ་ ཧུན་འདྲ་རྒུན་ ངོའེ་སྤེ་ ཀོན་འཇོག་ ནོག་ ཟེར་རྡེ་ ནོག་རྒེ་? 20 མན་ མ་ནི་ མག་།
ངེ་ ཟེ་འིན་ འི་ སྲོག་ཆོད་རྒུན་ རྡུད་རྒུན་ལ་ ཏྃ་རྡེ་ ནོག་, ཀོན་འཇོག་རྒེ་ མག་། ཡང་ ངེ་ ཁྱི་ཞ་རྒུན་ རྡུད་རྒུ་ནི་ ཕྲོ་ འདྲེའེ་ མི་འདྲེའེ་ཤེ་ འདོད་པ་ པོ་རེ་ཡོད་། 21 ཁྱི་ཞི་ ཙོབོ་ ཡི་ཤུའི་ འདོན་རྐྱོ་ རྡང་ རྡུད་རྒུ་ནི་ ཀོ་རེ་ ཉ་ཧེ་ ནང་ནི་ ཀ་ཟུག་རྒེ་ ཐུང་ངེན་? ཁྱི་ཞ་རྒུ་ནི་ ཙོབོ་ ཡི་ཤུའི་ འདོན་ཏང་ རྡང་ རྡུད་རྒུ་ནི་ ཁར་ཞི་ ཉ་ཧ་ ཀ་ཟུག་རྒེ་ ཟོའེན་? 22 ཅི་ ཏུ་ཟུག་ ཅོ་ཅེའོ་ནི་ ཁྱི་ཞ་རྒུ་ནི་ ཙོབོ་ལ་ ཐུག་སྲོ་ ཞང་ཤུག་ཏེ་ མ་ནོག་རྒེ་? ཅི་ ཨ་ཧོ་རྒུན་ ཁོང་ངེ་སང་ ཤེད་ཆེ་ ནོག་རྒེ་?
23 ཁྱི་ཞི་ ཕྲོ་ནི་ ཁ་ཅིག་རྒེ་ ཟེར་སྲིད་ཅེ་ ནོག་, “ངེ་ ཅི་ཞིག་ ཅོ་ནྃ་ འགྲིག་རྒེ་ནོག་”, འིན་ན་ ཅི་ཚང་མ་ ཁྱི་ཞི་ཕི་ ཟང་པོ་ཞིག་ མག་། ཡང་ ཁ་ཅིག་རྒེ་ ཟེར་སྲིད་ཅེ་ ནོག་, “ངེ་ ཅི་ཞིག་ ཅོ་ནྃ་ འགྲིག་རྒེ་ནོག་”, འིན་ན་ ཅི་ཚང་མ་ ཕན་ཏོག་ཅེན་ཞིག་ མག་། 24 ཁྱི་ཞ་རང་ ཅིག་པེ་ ཕན་ཏོག་རྡེ་ཕི་ མ་སམ་ལ་ ཞེན་ཡང་ སྤུན་རྒུ་ནི་ ཕན་ཏོག་རྡེ་ཕི་ སམ་བ་ ཏོང་ཧེ་།
25 ཁྱི་ཞ་རྒུ་ནི་ ཁྲོམ་མེ་ན་ ཤ་ ཀ་ཟུག་ཤིག་ ཐོབ་རྦེ་ཡོད་ནྃ་ ཟོ་ཧེ་, ཏོ་རྒུན་ ཧུ་འདྲ་རྒུན་ལ་ ཆོད་པ་ པུལ་རྡེ་ འིན་ན་ མན་ སམ་འདེ་ ཉིང་ངེ་ ཐེ་ཚོམ་ ཅོའེ་ཏེ་ ཏྲི་ཝ་ མ་འདྲི་ཤིག་། 26 ཅེ་ཟེར་ནི་ ཏམ་པེ་ སུང་རབ་རྦེ་ན་ མོལ་རྡེ་ ནོག་, “འཇིག་རྟེན་ འདང་ ཏེ་ནང་ལ་ ཡོ་ཀན་ ཚང་མ་ ཙོབོ་རྡེ་ འིན་།”
27 ཏེཏ་པ་ མེ་ཀ་ནེ་ མི་ཞིག་རྒེ་ ཁྱི་ཞ་རྒུན་ལ་ ཕི་རོའེ་ ཚལ་མ་ ཡོང་ ཟེར་ནི་, ཀལ་ཏེ་ ཁྱི་ཞ་རྒུན་ ཆ་ཉིན་ ཡོད་ནི་, འགྲོན་ཤོག་པོ་ ནེན་ཧེ་། ཁྱི་ཞ་རྒུན་ལ་ ཅི་ཞིག་ ཏང་ན་ ཟོ་ཧེ་། ཏོ་རྒུན་ ཧུ་འདྲ་ ཆོད་པ་ པུལ་རྡེ་ འིན་ནེ་ མན་ ཟེར་རྡེ་ ཏྲི་ཝ་ མ་འདྲི་ཧེ་། 28 འིན་ན་ ཀལ་ཏེ་ སུ་ཞིག་རྒེ་, “འི་ ཤ་འབོ་ ཧུ་འདྲ་ པུལ་རྡེ་ འིན་” ཟེར་ཏེ་ ཤེད་ཏང་, ཏེ་ནི་ ཤེད་ཀན་ འདང་ སེམ་མེ་ན་ ཐེ་ཚོམ་ མི་རྐྱེ་ཤེ་ཕི་ ཏོ་ མ་ཟ་ཧེ་། 29 ངེ་ ཁྱི་ཞ་རྒུ་ནི་ སེམ་མེ་ན་ སམ་ཀན་ མན་ནེ་, ཏེ་ ཤེད་ཀ་ནེ་ སེམ་མེ་ན་ སམ་ཀན་འབེ་ཕི་ ཟེར་རྡེ་ འིན་། ཁྱི་ཞ་རྒུ་ནི་ ཕྲོ་ནི་ ཁ་ཅིག་རྒེ་ ཟེར་སྲིད་ཅེ་ ནོག་, “ངེ་ ར་ཝང་ངེ་ན་ ཞེན་ མི་ཞིག་རྒེ་ ནོར་ཁྲུལ་ སམ་ཅེའོ་ ཅེ་ ཡང་རྒུ་ནི་ ཤག་ ཅོ་ནོག་? 30 ཡང་ ཀལ་ཏེ་ ངེ་ ཀོན་འཇོག་ལ་ ཟ་ཅེ་ཕི་ ཐུག་ཞེ་ཆེ་ ཞུ་ནི་, ཏེ་ནི་ ཅེ་ ངེ་ ཐུག་ཞེ་ཆེ་ པུལ་ཧ་ནེ་ ཁར་ཞི་འབེ་ཀ་ སུ་ཞིག་རྒེ་ ང་ ཉེད་ཀལ་ ཅོའེན་?”
31 ཏེ་ནི་ ཏོ་རྦེ་ ལེན་ལ་, ཁྱི་ཞ་རྒུན་ ཟ་ནྃ་, ཡང་ ཐུང་ནྃ་, ཡང་ ཅི་ཞིག་ ཅོ་ནྃ་, ཏེ་ ཚང་མ་ ཙོབོ་རྡེ་ ཟི་ཞིད་རྡེ་ཕི་ ཅོའེ་ཧེ་། 32 ཁྱི་ཞ་རྒུ་ནི་ ཅི་རིག་ ཅོ་ཡོད་ནྃ་, ཏོ་རྦེ་ ཡ་ཧུ་འདཱ་པ་ ཡང་ ཡ་ཧུ་འདཱ་པ་ མན་ཀན་རྒུན་ ཏེཏ་པེ་ན་ ཡོང་ཅེ་ན་ རྒག་རྐྱིལ་ མ་ཏང་ཧེ་, ཡང་ ཀོན་འཇོག་རྒེ་ ཆོའེ་ཚོག་རྒེ་ན་ ཡོ་ཀན་རྒུན་ལ་ རྡིག་པ་ ཅོ་ མ་ཅུག་ཧེ་། 33 ངེ་ལ་ ང་རང་ངེ་ ཅི་ཞིག་ ཅོ་ནྃ་, ཚང་མ་ལ་ ཐེད་ཅུག་ཅེ་ ཙོན་འགྲུའི་ ཅོ་ཡོད་། ངེ་ ང་རང་ངེ་ ཕན་ཏོག་རྡེ་ཕི་ མན་, ཞེན་མ་ མང་པེ་ ཕན་ཏོག་རྡེ་ཕི་ ཅོ་ཡོད་། ཁོང་རྒུན་ ཏེཏ་པེ་ན་ ཡོང་ཅེ་ རེ་ཝ་ པོར་རྡེ་ ངེ་ ཏོ་རྒུན་ ཅོ་ཡོད་།