ཧུ་འདྲ་ ཆོད་པ་ པུལ་ཧན་ནི་ ཁར་ཞི་།
8
ཏ་ ཁྱི་ཞི་ ཧུ་འདྲ་རྒུན་ལ་ པུལ་ཧན་ནི་ ཁར་ཞི་ ཧོར་ལ་ ཏྲི་ཝ་ འདྲི་ཀན་འབོ་ལ་, འོ་ནེ་ “ཨ་ཧོ་ ཚང་མ་ལ་ ཏོ་རྦེ་ ཧོར་ལ་ ཤེ་རྒྱ་ ཡོད་ཏེ་ ནོག་།” ཤེ་རྒྱེ་ ཨ་ཧོ་རྒུན་ལ་ ཕོ་སོ་ཅུག་རྒེ་ནོག་, འིན་ན་ ཆོའེ་ཚོག་ ཤེད་ཅེན་ ཆ་ཅུག་ཀན་རྦོ་ ཤེ་སྤ་རྦོ་ ནོག་། 2 “ང་ ཅི་ཚང་མ་ ཤེ་ཡོད་” ཟེར་ཧན་རྒུན་ལ་ ངོའེ་སྤོ་ལ་ ཏ་རུང་ མ་མང་པོ་ ཤེ་རྒོ་ཤེ་ ཡོད་ཏེ་ ནོག་། 3 འིན་ན་ ཀལ་ཏེ་ སུ་ཞིག་ ཀོན་འཇོག་ལ་ ཤེ་སྤ་ ཅོ་ནི་, ཏེ་མི་ནི་ ཀོན་འཇོག་རྒེ་ ཁྱེན་ནེ་ ཛེ་རྡེ་ནོག་།4 ཏ་ ཧུ་འདྲ་ ཆོད་པ་ པུལ་ཧ་ནེ་ ཁར་ཞི་ ཟ་ཅེ་ ཧོར་ལ་ ཟེར་ནི་, ཧུ་འདྲ་རྒུན་ ཅང་ མན་ཀན་ ཡང་ ཀོན་འཇོག་ ཅིག་ཅིག་ ཞུ་རྡེ་ ཡོ་ཀན་འབོ་ ཨ་ཧོ་ ཚང་མ་ལ་ རྒྱུའི་ནོག་། 5 ནམ་ཀ་ ཡང་ འཇིག་རྟེན་ནེ་ན་, མང་པོ་ཞིག་ལ་ ཀོན་འཇོག་ ཟེར་རེ་ནོག་, ནེན་ཏེན་ལ་ མི་ མང་པེ་ ཀོན་འཇོག་ ཏང་ ཙོབོ་ མང་པོ་ཞིག་ལ་ ཅོལ་ལེ་ནོག་། 6 འིན་ན་ ཅི་ཚང་མ་ ཞྃ་ངེ་ ཛེད་ཀ་ནེ་ ཀོན་འཇོག་ ཅིག་, ཨ་ཧོའེ་ ཡབ་, ཡང་ ཡི་ཤུ་ མ་ཤི་ཀ་ ཙོབོ་ ཅིག་, ཁོང་ རྒྱུད་ཏེ་ ཀོན་འཇོག་རྒེ་ ཅི་ཚང་མ་ ཅོའོ་ ཛེད་ཀན་ འདང་ ཨ་ཧོ་རྒུན་ལ་ མི་ཙེ་ སལ་ལེ་ ཛེད་ཀན་འབོ་ལ་ རྒྱུའི་ནོག་།
7 ཅི་འིན་ན་ ཏེཏ་པ་ཅན་ ཁ་ཅིག་ལ་ ཏེ་ ཚང་མ་ རྒྱུའི་ མེད་ཏེ་ ནོག་། ཁྱི་ཞ་རྒུ་ནི་ ཕྲོ་ནི་ ཁ་ཅིག་རྒེ་ ཏ་རུང་ལ་ ཧུ་འདྲ་རྒུན་ སོན་པོ་ ནོག་ སམ་འདུག་། ཏེ་རྒ་རྦེ་ཕི་ལ་ ཏོ་རྒུ་ནི་ སེམ་མེ་ན་ ཧུ་འདྲ་རྒུན་ལ་ པུལ་ཧ་ནེ་ ཁར་ཞི་ ཟ་ནི་, རྡིག་པ་ ཅོའེ་རྡེ་ འིན་ སམ་མེ་ནོག་། 8 ཁར་ཞི་ནི་ ཨ་ཧོ་རྒུན་ ཀོན་འཇོག་ ཉམ་པོ་ ཉེ་མོ་ འགྱུར་ཤུག་རྒེ་ མག་། ཨ་ཧོ་རྒུ་ནི་ ཟ་ན་ ཡ་ མ་ཟ་ནྃ་, ཀོན་འཇོག་རྒེ་ ཧུན་འདུན་ལ་ ཅང་ རྐྱལ་ཤེ་ ཡང་ ཐོབ་ཅེ་ མེ་ཀག་། 9 འིན་ན་ ཁྱི་ཞ་རྒུན་ལ་ ཏོ་རྦེ་ན་ ར་ཝང་ ཡོད་ཅེ་རྦེ་, ཁྱི་ཞ་རྒུ་ནི་ ཏེཏ་པེ་ན་ འུ་ཐུག་ཅེན་ནེ་ སྤུན་ཞིག་ རྡིག་པེ་ན་ འགྱེལ་ མི་ཅུག་ཅེ་ལ་ ཤང་ ཅོའེ་ཧེ་། 10 སྤེར་ན་, ཀལ་ཏེ་ ཁྱེ་རང་ ཤེ་རྒྱ་ཅེན་འབེ་ ཏེ་ ཧུ་འདྲེ་ ཀོན་འཇོག་རྒེ་ ཁང་པེ་ ནང་ནི་ ཁར་ཞི་ ཟ་ ཐོང་འདེ་ ཏེཏ་པ་ འུ་ཐུག་ཅེན་ནེ་ ཁོ་རང་ངེ་ སམ་ཀ་ནེ་ རྒྱཔ་འགལ་ ཅོའེ་རྡེ་, ཧུ་འདྲ་ པུལ་ཧ་ནེ་ ཏེ་ ཁར་ཞི་ ཟ་ཅེ་ན་ ཧམ་བ་ རྐྱེ་སྲིད་ཅེ་ མག་རྒེ་? 11 ཏེ་ནི་ ཁྱི་ཞ་རྒུ་ནི་ ལག་ལ་ ཡོ་ཀ་ནེ་ ཤེ་རྒྱ་རྦེ་, ཏེ་ ཏེཏ་པ་ འུ་ཐུག་ཅེན་ སྤུན་ནེ་ ཏེཏ་པ་རྦོ་ མེ་ཀན་ ཅོ་ནོག་, ཀ་རྦོ་ཕི་ མ་ཤི་ཀ་ ཀྲོང་ངེ་ ཛེད་། 12 ཏུ་ཟུག་ ཅོ་ནི་, ཁྱི་ཞི་ རྡིག་པ་ ཅོའེ་རྡེ་ ནོག་ སམ་ཀ་ནེ་ སྤུན་འབོ་ལ་ ཏོ་ ཅོ་ཅེ་ལ་ སེམ་རུའི་ ཏྃ་རྡེ་, ཁྱི་ཞི་ མ་ཤི་ཀེ་ རྒྱཔ་འགལ་ལ་ རྡིག་པ་ ཅོའེ་རྡེ་ ནོག་། 13 ཏོ་རྦེ་ཕི་ལ་ ཀལ་ཏེ་ ཤ་ ཟ་ཅེ་རྦེ་, ང་རང་ངེ་ སྤུན་ཞིག་ལ་ རྡིག་པ་ ཅོ་ཅུག་རྒེ་ཡོད་ན་, ཏེ་ནི་ ངེ་ ཤི་ཤི་ ཚོག་པ་ལ་ ཤ་ མ་ནི་ མི་ཟ་, ཅེ་ཟེར་ནི་ ངེ་ ང་རང་ངེ་ སྤུན་ཞིག་ལ་ རྒག་ ཕུག་ཅུག་ཉིན་ མེ་རག་།