ན་མ་ ཅོ་ཅེ་ ཧོར་ལ་ ལབ་ཞ་།
7
ཏ་ ཁྱི་ཞ་རྒུ་ནི་ ཡི་རྒེ་ན་ ང་ ཏྲི་ཝ་ འདྲི་རྡེ་ ཡོ་ཀ་ནེ་ ལེན་ལ་, འོ་ནེ་, པུ་ཙ་ ཡང་ པོ་མོ་རྒུ་ནི་ ན་མ་ མ་ཅོ་ནི་ རྒྱ་ལེ་ ནོག་། 2 འིན་ན་ འཇིག་རྟེན་ནེ་ན་ ལུའི་འབྲེལ་ ངན་པ་ མྃ་རྡེ་ ཡོད་ཅེ་ཀ་ནི་, པུ་ཙ་ རེ་རེ་ ན་མ་ ཅིག་ ཡང་ པོ་མོ་ རེ་རེ་ མག་པ་ ཅིག་ ཡོང་རྒོ་ཤེ་ ནོག་།3 མག་པེ་ ཁོ་རང་ངེ་ ན་མེ་ ལུའི་འབྲེལ་ལེ་ རྒོའེ་ཤེ་ཅན་རྒུན་ ཀྲུཔ་ཅུག་རྒོའེ་, ཡང་ ན་མེ་ ཁོ་རང་ངེ་ མག་པེ་ ལུའི་འབྲེལ་ལེ་ རྒོའེ་ཤེ་ཅན་རྒུན་ ཀྲུཔ་ཅུག་རྒོའེ་། 4 ཏོ་ ན་མེ་ ཁོ་རང་ངེ་ ཟུྃ་སྤེ་ཀ་ ཁོ་རང་ངེ་ མག་པ་ ཝང་ཆ་ ཡང་ མག་པེ་ ཁོ་རང་ངེ་ ཟུྃ་སྤེ་ཀ་ ཁོ་རང་ངེ་ ན་མ་ ཝང་ཆ་ ཏང་ངེ་ནོག་།
5 ཁྱི་ཞ་རང་ ཏུའི་ མང་པོ་ མོ་ལམ་ ཏང་ཉེན་ཅེ་ཕི་ ཁྱི་ཞ་ ཉ་ཧེ་ ཁ་ཆམ་འདེ་, ཏུའི་ ཉུང་ཙེ་ཞིག་ ལུའི་འབྲེལ་ མི་ཅོ་ སམ་ནི་ མ་ཐེ་ལ་, ཁྱི་ཞ་ ཉ་ཧེ་ པར་ལ་ ཟུྃ་སྤེ་ རྒོའེ་ཤེ་ཅན་རྒུན་ མ་ཅོ་ལ་ མ་འདེད་ཧེ་། ཏེ་ཏུའི་རྦེ་ ལྟིང་ནི་, ཉ་ཧ་ ཡང་ ཉམ་པོ་ ཛོམ་རྒོའེ་, ཅེ་ཟེར་ནི་ ཁྱི་ཞ་ རང་སེམ་ ཆུན་ཅེ་ན་ ཤེད་མེད་ ཡོད་ཅེ་ཀ་ནི་, རྡུད་རྡེ་ རྡིག་པེ་ན་ འགྱེལ་ ཅུག་སྲིད་ཅེ་ ནོག་། 6 ངེ་ ཏོ་ ཅོ་ཅེ་ལ་ ཀཱ་ ཏྃ་རྡེ་ ཟེ་རེ་མེད་, འིན་ན་ ཁ་རྡ་ ཏང་ངེ་ཡོད་། 7 ང་ ཙོག་སེ་ ཚང་མ་ ན་མ་ མ་ཅོ་ལ་ འདེད་ཏེ་ ཡོད་ཅེའོ་, ངེ་ འདོད་པ་ ཅོའེན་། འིན་ན་ ཀོན་འཇོག་རྒེ་ ཆོག་ནི་ མི་ རེ་རེ་ མིག་ས་ལེ་ ཁྱུད་རིག་ སལ་རྡེ་ ཡོད་ཏེ་ ནོག་, མི་ ཅིག་ལ་ ཁྱུད་རྡེ་ རིག་ ཅིག་ ཡང་ མི་ཞིག་ལ་ ཡང་ ཁྱུད་རྡེ་ རིག་ཞིག་།
8 ཏ་ ངེ་ ན་མ་ མ་ཅོ་ཀན་ འདང་ འ་ནེ་ མ་རང་མོ་ ཡང་ ན་མ་ ཀྲོང་ཧན་ནེ་ མག་པ་རྒུན་ལ་ ཟེ་འིན་། ན་མ་ མ་ཅོ་ལ་ འདེད་ནི་, རྒྱ་ལེ་ ནོག་ ཀ་ཟུག་རྒེ་ ང་ འདེད་ཏེ་ ཡོད་། 9 འིན་ན་ ཀལ་ཏེ་ ཁོང་རྒུ་ནི་ རང་འདང་རང་ལ་ ཆུན་ མ་ཉེན་ན་, ན་མ་ ཅོ་རྒོ་ཤེ་ ནོག་། ལུའི་འབྲེལ་ ཅོ་ཅེ་ འདོད་པེ་ན་ མེ་ འབར་རེ་སང་ ན་མ་ ཅོ་ན་ རྒྱལ་།
10 ཏ་ ན་མ་ ཅོ་ཀན་རྒུན་ལ་ ངེ་ ཀཱ་ ཏང་ངེ་ཡོད་, ཀའོ་ ང་རང་ནི་ མན་ ཙོབོ་ ཡི་ཤུའི་ ཆོག་ནི་ འིན་། ན་མེ་ རང་ངེ་ མག་པ་ ཕང་ མི་རྒོའེ་། 11 འིན་ན་ ཀལ་ཏེ་ ཁོའེ་ ཁོ་རང་ངེ་ མག་པ་ ཕང་ནི་, ཏེ་ པོ་མོ་རྦོ་ ཅིག་པོ་ འདེད་རྒོའེ་ ཡང་ ཁོ་རང་ངེ་ མག་པ་ ཉམ་པོ་ ཡང་ ཛོམ་རྒོའེ་། ཏེ་རྒ་ ཙོག་སེ་ མག་པེ་ ཁོ་རང་ངེ་ ན་མ་ ཅེད་ མི་རྒོའེ་།
12 ཏ་ ཞེན་ ང་ ཙོབོ་རྡེ་ ཆོག་ནེ་ ཁ་ཀྲང་ངེ་ ཀཱ་ཞིག་ མེད་ནྃ་, ངེ་ འི་རྦོ་ ཁྱི་ཞ་ ལུའི་རྡེ་ ཡོ་ཀན་རྒུན་ལ་ ཟེ་འིན་, ཀལ་ཏེ་ མ་ཤི་ཀ་པེ་ པུ་ཙ་ཞིག་ལ་ ཏེཏ་པ་ མེ་ཀ་ནེ་ ན་མ་ཞིག་ ཡོད་ནི་ ཡང་ ཏེ་ པོ་མོ་རྦོ་ ཁོ་ ཉམ་པོ་ འདེད་ཅེ་ལ་ ཐེད་རྡེ་ཡོད་ནི་, ཏེ་ པུ་ཙེ་ ཁོ་ ཅེད་ མོ་རྒོའེ་། 13 ཡང་ ཀལ་ཏེ་ མ་ཤི་ཀ་པེ་ པོ་མོ་ཞིག་ལ་ ཏེཏ་པ་ མེ་ཀ་ནེ་ མག་པ་ཞིག་ ཡོད་ནི་, ཡང་ ཁོ་ ཏེ་ པོ་མོ་ ཉམ་པོ་ འདེད་ཅེ་ལ་ ཐེད་རྡེ་ཡོད་ནི་, ཏེ་ པོ་མོ་རྦེ་ ཁོ་ ཕང་ མི་རྒོའེ་། 14 ཏེ་ མ་ཤི་ཀ་པེ་ ན་མེ་, ཁོ་རང་ངེ་ ཏེཏ་པ་ མེ་ཀ་ནེ་ མག་པ་རྦོ་ སང་མ་ ཅོ་ནོག་། ཡང་ ཏེ་ མ་ཤི་ཀ་པེ་ མག་པེ་, ཁོ་རང་ངེ་ ཏེཏ་པ་ མེ་ཀ་ནེ་ ན་མ་རྦོ་ སང་མ་ ཅོ་ནོག་། ཀལ་ཏེ་ ཏུ་ཟུག་ མན་འབེན་ནི་ ཀོན་འཇོག་རྒེ་ ཧུ་འདུན་ལ་ ཁོང་ངེ་ ཕྲུ་རྒུ་རྒུན་ ཏམ་པ་ཞིག་ མེད་ཁྲོ་། འིན་ན་ ཁོང་རྒུན་ ཀོན་འཇོག་རྒེ་ ཧུ་འདུན་ལ་ ཏམ་པ་ རིག་ ནོག་། 15 ཀལ་ཏེ་ ཏེཏ་པ་ མེ་ཀ་ནེ་ མག་པ་ ཡ་ ན་མ་རྒུན་ རང་ངེ་ ཞི་མེད་ ཉམ་པོ་ འདེད་རྡེ་ལ་ ཐེད་རྡེ་ མེད་ནི་, ཏེ་ནི་ ཆ་ཅུག་། ཏོ་ཙོག་སེ་ ནེ་ལུག་རྒེ་ན་ མ་ཤི་ཀ་པ་ མག་པ་ ཡང་ ན་མ་རྒུ་ནི་ ཉམ་པོ་ འདེད་ཅེ་ཕི་, ནའ་ ཁུར་ཧན་རྒུན་ལ་ ལྟེན་འདེ་ འདེད་རྒོའེ་ མེ་ཀག་། ཀོན་འཇོག་རྒེ་ ཁྱི་ཞ་རྒུན་ ཞིའི་རྡེ་ན་ འདེད་ཅེ་ཕི་, འབོ་ ཛེད་ཏེ་ ནོག་། 16 ན་མ་རྒུན་, ཁྱི་ཞི་ ཅོའེ་རྡེ་ ཁྱི་ཞི་ མག་པ་རྒུན་ ཏེཏ་པེ་ན་ ཡོང་སྲིད་ཅེའོ་ རྒྱུའི་ཆ་ མེ་རག་རྒེ་? ཡང་ མག་པ་རྒུན་ ཁྱི་ཞི་ ཅོའེ་རྡེ་, ཁྱི་ཞི་ ན་མ་རྒུན་ ཏེཏ་པེ་ན་ ཡོང་སྲིད་ཅེའོ་ རྒྱུའི་ཆ་ མེ་རག་རྒེ་?
17 ཙོབོ་རྡེ་ ཁྱི་ཞ་རྒུན་ ཀ་ཟུག་ ནེ་ལུག་ཤིག་རྒེ་ན་ པོ་རེ་ ཛེད་ཏེ་ ཡོད་ནྃ་, ཁྱི་ཞ་ རེ་རེ་ ཏེ་ན་ འདེད་རྒོ་ཤེ་ ནོག་། ཡང་ ཀ་ཟུག་ ནེ་ལུག་རྒེ་ན་ ཁྱི་ཞ་, ཀོན་འཇོག་རྒེ་ འགོ་མ་རང་ ཏེཏ་པེ་ན་ འབོ་ ཛེད་ཟ་ནི་ ཡོད་པེན་, ཏེ་རྒ་ ནེ་ལུག་ ཙོག་སེ་ན་ འདེད་རྒོའེ་། འི་རྦོ་ ཆོའེ་ཚོག་ ཚང་མེ་ཕི་ ངེ་ ཁྲིམ་འབོ་ འིན་། 18 སྤེར་ན་ ཡ་ཧུ་འདཱ་པ་ཞིག་རྒེ་ ཏེཏ་པ་ཅེན་ འགྱུར་རེ་སང་ ངུལ་ལ་, ཁོ་རང་ལ་ འགོཔ་ཅེཏ་ ཅོའེ་རྡེ་ ཡོད་ནི་, ཏོ་ འགྱུར་ཤེ་ ཙོན་འགྲུའི་ མ་ཅོ་ཧེ་། ཡང་ འགོཔ་ཅེཏ་ མ་ཅོ་ཀ་ནེ་ མི་ཞིག་ ཏེཏ་པ་ཅེན་ འགྱུར་ནི་, ཁོའེ་ ཁོ་རང་ལ་ འགོཔ་ཅེཏ་ ཅོ་རྒོའེ་ མེད་ཏེ་ ནོག་། 19 ཅེ་ཟེར་ནི་ ཀོན་འཇོག་རྒེ་ ཧུ་འདུན་ལ་ འགོཔ་ཅེཏ་ ཅོ་ཀན་ ཡང་ མ་ཅོ་ཀན་འབེ་ན་ ཅང་ ཁྱད་ མེད་ཏེ་ འིན་ནོག་། ཁག་ཅེན་འབོ་ ཀོན་འཇོག་རྒེ་ ཀཱ་རྒྱ་རྒུན་ སྲུང་ཅེའོ་ ནོག་།
20 འོ་ནེ་ ཀོན་འཇོག་རྒེ་ ཁྱི་ཞ་རྒུན་ལ་ འབོ་ ཛེད་ཟ་ནི་ ཡོ་ཀ་ནེ་ ནེ་ལུག་པེ་ན་ ཁྱི་ཞ་ རེ་རེ་ འདེད་རྒོ་ཤེ་ ནོག་། 21 ཀོན་འཇོག་རྒེ་ འབོ་ ཛེད་ཟ་ནི་, ཁྱི་ཞ་ ཚེ་ཡོག་ འིན་འབེན་ནེ་? ཀལ་ཏེ་ འིན་ནི་ ཚེར་ཧ་ མ་ཅོ་ཧེ་, འིན་ན་ ཀལ་ཏེ་ ཁྱི་ཞ་རྒུན་ལ་ ཚེ་ཡོག་ནི་ ཐར་ཤེ་ ཧབ་ ཐོབ་ནི་, ཏེ་ ཧབ་པོ་ ནེན་ཧེ་། 22 ཡང་ ཀལ་ཏེ་ ཁྱི་ཞ་ ཙོབོ་རྡེ་ འབོ་ ཛེད་ཟ་ནི་ ཚེ་ཡོག་ འིན་ནི་, ཏ་ ཁྱི་ཞ་རྒུན་ ཙོབོ་རྡེ་ན་ རྡིག་པེ་ ཚེ་ཡོག་ནི་ ཐར་རྡེ་ ནོག་། ཡང་ ཀལ་ཏེ་ ཁྱི་ཞ་རྒུན་ ཙོབོ་རྡེ་ འབོ་ ཛེད་ཟ་ནི་ ཚེ་ཡོག་ མན་འབེན་ནི་ ཏ་ ཁྱི་ཞ་རྒུན་ མ་ཤི་ཀེ་ ཚེ་ཡོག་ འགྱུར་རྡེ་ ནོག་། 23 ཀོན་འཇོག་རྒེ་ རིན་ ཆོན་མོ་ཞིག་ ཤལ་ལེ་ ཛེད་ཏེ་ ཉོ་ ཛེད་པེ་, ཁྱི་ཞ་ མི་ ཚེ་ཡོག་ འགྱུར་ མ་ཤུག་ཧེ་། 24 སྤུན་རྒུན་, ཁྱི་ཞ་ རེ་རེ་ ཏེ་རྒ་ ཙོག་སེ་ ལུའི་རྒོའེ་ ནམ་ ཁྱི་ཞ་རྒུན་ ཀོན་འཇོག་རྒེ་ འབོ་ ཛེད་ཟ་ནི་ ཡོད་པེན་།
25 ཏ་ ཁྱི་ཞི་ ན་མ་ མ་ཅོ་ཧན་རྒུ་ནི་ ཧོར་ལ་ ཏྲི་ཝ་ འདྲི་ཀན་འབོ་ལ་, ཏོ་རྒུན་ལ་ ཏང་ཅེ་ལ་ ཙོབོ་རྡེ་ ང་ ཀཱ་ཞིག་ སལ་ལེ་ མ་ཛེད་, འིན་ན་ ཙོབོ་རྡེ་ ཁོ་རང་ངེ་ ཉིང་ཞེ་ན་ རྡེན་ཆེ་ཤེ་ ཅོ་ཉེན་ཅེ་ཕི་ ང་ ཤེ་རབ་ སལ་ལེ་ ཛེད་, ཡང་ ངེ་ ཏོ་ ཁྱི་ཞ་རྒུན་ ཉམ་པོ་ རྒོའོ་ཡོད་། 26 ཏག་ས་ ཨ་ཧོ་རྒུན་ ཏུའི་ རྐྱོ་མེ་ན་ ཡོད་ཅེ་རྦེ་, ངེ་ ས་མེ་རག་ ཁྱི་ཞ་རྒུན་ ཀ་ཟུག་ ནེ་ལུག་ཤིག་རྒེ་ན་ ཡོད་ནྃ་, ཏེ་ནེ་ན་ འདེད་རྒོ་ཤེ་ ནོག་། 27 ཀལ་ཏེ་ ཁྱི་ཞ་རྒུན་ལ་ ན་མ་ ཡོད་ནི་, ན་མ་ ཅེད་ཅེ་ ཡང་ ཀལ་ཏེ་ ན་མ་ མེད་ནི་, ན་མ་ ཅོ་ཅེ་ ཙོན་འགྲུའི་ མ་ཅོ་ཧེ་། 28 འིན་ན་ ཀལ་ཏེ་ ཁྱི་ཞ་རྒུ་ནི་ ན་མ་ ཅོ་ནི་, ཏོ་ རྡིག་པ་ཞིག་ མག་། ཡང་ ཀལ་ཏེ་ པོ་མོ་ ན་ཅུང་ཞིག་རྒེ་ ན་མ་ ཅོ་ནི་, ཏེ་རྦོ་ལ་ རྡིག་པ་ཞིག་ མག་། ཅི་འིན་ན་ འི་ རྐྱོ་མེ་ ཏུའི་ལ་a, ན་མ་ ཅོ་ཀན་རྒུན་ལ་ མང་ངེ་ ནག་ ཐོང་ངེན་ ཡང་ ངེ་ ཁྱི་ཞ་རྒུན་ འི་ ནག་རྒུ་ནི་ ཐར་ཤུག་ཅེ་ ཙོན་འགྲུའི་ ཅོའེན་།
29 ངེ་ སྤུན་རྒུན་ ངེ་ ཟེར་ཤེ་ ཏོན་འབོ་, མ་ཤི་ཀ་ ལོག་ཏེ་ ཕེབ་ཅེ་ ཏུའི་རྦོ་ ཉུང་ཙེ་ཞིག་ མ་ནི་ ལུའི་རྡེ་ མེད་ཅེ་ཀ་ནི་, ཏག་ས་ནི་ཕ་ལ་ ན་མ་ ཅོ་ཀན་རྒུ་ནི་ ཞབ་རྟོག་རྒེ་ན་ ན་མ་ ཅོ་སང་ ངུལ་ལ་ ཏང་ཀ་ནེ་ ཏེ་རྒ་ ཏུའི་རྦོ་ ཏག་ས་ལ་ ཏང་རྒོའེ་། 30-31 རྐྱོ་མོ་ ཡོ་ཀན་ རྡང་ རྐྱིད་པོ་ ཡོ་ཀན་ ཡང་ ཉོ་ཚོང་ ཏང་ངེན་ འདེད་ཀན་ ཡང་ ནོར་ མང་པོ་ ཡོ་ཀན་རྒུ་ནི་ ཏོ་རྒུ་ནི་ ཧོར་ལ་ ཏུའི་རྒྱུན་ ས་མེན་ མ་འདེད་ཧེ་, ཅེ་ཟེར་ནི་ འི་ འཇིག་རྟེན་ནེ་ན་ ཡོ་ཀན་ ཚང་མ་ འགྱོ་སྤ་ མེ་ཀན་ ཆ་ཅེ་ ནོག་།
32 ཁྱི་ཞ་རྒུན་ ཏེ་ མི་ཙེ་ ཚེར་ཧ་རྒུ་ནི་ ཐར་རྒོ་ཤེའོ་ ངེ་ འདོད་པ་ འིན་། སྤེར་ན་, ན་མ་ མ་ཅོ་ཀ་ནེ་ པུ་ཙ་ཞིག་རྒེ་ ཁོ་རང་ངེ་ ཏུའི་རྦོ་ ཙོབོ་ལ་ ཞབ་རྟོག་ ཞུ་ཅེ་ན་ པུད་ཉེན་ནེ་ནོག་ ཡང་ ཁོང་ ཐུག་ཉེ་ཤུག་ཅེ་ ཧོར་ལ་ སམ་བ་ ཏང་ངེ་ནོག་། 33 འིན་ན་ ན་མ་ ཅོ་ཀ་ནེ་ པུ་ཙེ་ ཁོ་རང་ངེ་ འཇིག་རྟེན་ནེ་ ཁག་ ཏང་ རང་ངེ་ ན་མ་ ཐེད་ཅུག་ཅེ་ ཧོར་ལ་ ས་མེ་ནོག་, 34 ཡང་ ཁོའེ་ སེམ་པོ་ ཁག་ཉི་ན་ རྒོ་རྒོའེ་རྡེ་ནོག་། ཏེ་རྒ་ ཙོག་སེ་ མག་པ་ ཤི་ཀན་ ཡང་ ན་མ་ མ་ནི་ མ་ཅོ་ལ་ འདེད་ཀ་ནེ་ པོ་མོ་རྒུ་ནི་, ཟུྃ་སྤོ་ རྡང་ སེམ་ཡིད་ ཉ་ཧ་ ཉམ་པོ་ ཏུའི་ སོན་ཏེ་ ཙོབོ་ལ་ ཞབ་རྟོག་ ཞུ་ཉེན་ནེ་ནོག་། འིན་ན་ ན་མ་ ཅོའེ་ཧ་ནེ་ པོ་མོ་ཞིག་རྒེ་ ཁོ་རང་ངེ་ འཇིག་རྟེན་ནེ་ ཁག་རྒུན་ འདང་ ཁོ་རང་ངེ་ མག་པ་ ཐེད་ཅུག་ཅེ་ ཧོར་ལ་ ས་མེ་ནོག་། 35 ངེ་ འི་རྦོ་ རྒག་རྐྱིལ་ ཏང་ཅེ་ཕི་ མན་, ཁྱི་ཞ་རྒུ་ནི་ ཕན་ཏོག་རྡེ་ཕི་, ཟེ་འིན་། ངེ་ འདོད་པ་རྦོ་, ཅི་ས་ཐོག་ནི་ ཁྱི་ཞ་རྒུ་ནི་ སེམ་འབོ་ ཡེན་ མ་ཡེན་ནེ་ ཙོབོ་ལ་ ཞབ་རྟོག་ རྒྱ་ལེ་ ཅོའེ་རྡེ་ ཞུ་ཅུག་ཅེའོ་ འིན་།
36 མི་ཞིག་རྒེ་ པོ་མོ་ ན་མ་ ཅོ་ཅེ་ལ་ ལོ་ པུད་རྡེན་ ཆ་ཡོད་ནི་, ཁོའེ་ ཨ་རྦེ་ ཁོ་ ན་མ་ ཅོ་ཅེ་ ཁག་ཅེན་ ནོག་ སམ་ནི་, ཁོའེ་ སམ་ཚུལ་རྦོ་ པོ་མོ་ལ་ ན་མ་ ཅོ་ཅུག་ ཏང་རྒོའེ་། ཏོ་ ཅང་ རྡིག་པ་ མག་། 37 འིན་ན་ ཞེན་ མི་ཞིག་རྒེ་ རང་ངེ་ ཉིང་ནི་ ནེན་ཏེན་ ཐག་ཅེཏ་ཏེ་, རང་ངེ་ པོ་མོ་ལ་ ན་མ་ ཅོ་ཅུག་ ཏང་ རྒོའེ་ཤེ་ མག་ སམ་ནི་, ཨ་རྦེ་ འདོད་པེ་ ནང་ཞིན་ པོ་མོ་ལ་ ན་མ་ ཅོ་ཅུག་ ཏང་རྒོ་ཤེ་ མག་། ཏོ་ རྒྱ་ལེ་ ནོག་། 38 ཏེ་ནི་ པོ་མོ་ལ་ ན་མ་ ཅོ་ཅུག་ཀན་འབོ་ རྒྱ་ལེ་ ནོག་, ཡང་ ན་མ་ ཅོ་ མ་ཅུ་ཀན་འབོ་ལ་ མ་ རྒྱ་ལེ་ ནོག་།
39 མག་པ་ སོན་པོ་ ཡོད་ཏུའི་ ན་མ་ ཁོ་རང་ངེ་ མག་པ་ ཉམ་པོ་ འདེད་རྒོའེ་། ཀལ་ཏེ་ ཁོའེ་ མག་པ་ ཀྲོྃ་ནི་, ཏེ་ པོ་མོ་རྦེ་ ཁོ་རང་ ཐེད་ཀ་ནེ་ པུ་ཙ་ ཉམ་པོ་ ན་མ་ ཅོ་ནྃ་, འགྲིག་ཏེ་ ནོག་, འིན་ན་ ཏེ་ པུ་ཙ་རྦོ་ ཙོབོ་རྡེ་ཀ་ ཏེཏ་པ་ ཅོ་ཀན་ཞིག་ ཡོང་རྒོའེ་། 40 ངེ་ སམ་འབེ་ན་, ཏེ་ པོ་མོ་ལ་ ཅིག་པོ་ འདེད་ན་ མང་ངེ་ ཅིན་ལབ་ ཐོབ་རྦེན་། ཡང་ ངེ་ སམ་མེ་རག་, ངེ་ལ་ ཀོན་འཇོག་རྒེ་ ཐུག་ཡིད་ རྒྱུད་ཏེ་ ཁ་རྡ་ ཏྃ་རྡེ་ འིན་།