ཏེཏ་པ་ཅན་རྒུན་ ཁྲིམ་ཁུང་ལ་ ཁྱེར་ མ་ཤུག་།
6
ཀལ་ཏེ་ ཁྱི་ཞི་ སུ་ཞིག་ལ་ ཞེན་ཡང་ ཏེཏ་པ་ཅེན་ཞིག་ ཉམ་པོ་ ཁྲུག་པ་ ཆ་ནི་, ཀ་ཟུག་རྒེ་ ཁྱི་ཞི་ ཏེ་ མིའུ་ ཞེན་ཡང་ ཏེཏ་པ་ཅན་རྒུ་ནི་ འདུན་ལ་ མ་ཁྱེར་རེ་, ཞུང་ངེ་ ཁྲིམ་ཁུང་ལ་ ཁྱེར་ཤེ་ ཧམ་བ་ ཅོའེན་? 2 ཅི་ ཨ་ཧོ་ ཏེཏ་པ་ཅན་རྒུ་ནི་ འཇིག་རྟེན་པ་རྒུན་ལ་ ཁྲིམ་ཅེད་ ཏང་ཅེའོ་ ཁྱི་ཞ་རྒུན་ལ་ རྒྱུའི་མེ་རྡེ་? ཡང་ ཀལ་ཏེ་ ཁྱི་ཞ་རྒུ་ནི་ འཇིག་རྟེན་པ་རྒུན་ལ་ ཁྲིམ་ཅེད་ཏེ་ཡོད་ནི་, ཅི་ ཁྱི་ཞ་རྒུ་ནི་ ཕྲོ་ འི་ ནེ་ལུག་ ཆུང་ཙེ་རྦོ་ལ་ ཁྲིམ་ཅེད་ ཏང་ཅེ་ ཁྱུད་ མེད་རྡེ་? 3 ཨ་ཧོ་རྒུ་ནི་ ཕོ་ཉ་རྒུན་ལ་ ཁྲིམ་ཅེད་ ཏང་ཅེའོ་, ཁྱི་ཞ་རྒུན་ལ་ རྒྱུའི་མེད་རྡེ་? ཏེ་རྒ་མི་རྦི་ཕི་ མི་ཙེ་ན་ སོང་ཀ་ནེ་ ཁྲུག་པ་རྒུན་ ནེན་ཏེན་ལ་ ཁྱི་ཞ་རྒུ་ནི་ སེལ་ ཉེན་རྒོའེ་། 4 ཀལ་ཏེ་ ཁྱི་ཞ་རྒུ་ནི་ན་ ཁྲུག་པ་ རི་ ཆ་ཡོད་ནི་, ཏེ་ནི་ ཅི་ ཆོའེ་ཚོག་ནེ་ ཕི་ལོག་ལ་ ཆོའེ་ཚོག་རྒེ་ན་ ཅང་ ཁག་ མེ་ཀ་ནེ་ ཁྲིམ་སྤོན་རྒུ་ནི་ཀ་ ཆ་ཡོད་། 5 ངེ་ འི་རྦོ་ ཁྱི་ཞ་རྒུན་ ཁྲེལ་ཅུག་ཅེ་ལ་ ཟེ་འིན་, ཅི་ ཆོའེ་ཚོག་རྒེ་ན་ འི་ ནེ་ལུག་རྒུན་ལ་ ཁྲིམ་ཅེད་ ཉེན་ཅེ་ཕི་, མི་ ཤེ་རབ་ཅེན་ ཅིག་ལ་ མི་འདུག་རྒེ་? 6 ཅི་ ཁྱི་ཞི་ ཕྲོ་ནི་ ཅིག་རྒེ་ ཞེན་ཡང་ མི་ཞིག་ ཁྲིམ་ཁུང་ལ་ ཏེཏ་པ་ མེ་ཀན་རྒུ་ནི་ ལག་ལ་ ཤའ་ ཅོ་ལ་ ཁྱེར་རེ་ཡོད་?7 ཁྱི་ཞ་རྒུ་ནི་ འི་ ཁྲུག་པ་རྒུན་ ཁྲིམ་ཁུང་ལ་ ཁྱེར་རེ་རྡང་, ཁྱི་ཞ་ ཕམ་ ཚར་རྡེ་ ནོག་། ཏེ་སང་ཏེ་ མི་འོའེ་སྤ་ ཆ་ཅུག་ཏེ་ མི་རྒྱལ་ལེ་? འགོ་ཧོར་ཤུག་ན་ མི་རྒྱ་ལེ་? 8 འིན་ན་ ཁྱི་ཞ་རྒུ་ནི་ལ་ ནོར་ཁྲུལ་ རྡང་ འགོམ་ཧོར་ ཏང་འདུག་, རང་ངེ་ ཏེཏ་པ་ཅེན་ནེ་ སྤུན་རྒུན་ལ་། 9 ཅི་, ལེ་ངན་ ཅོ་ཀན་རྒུན་ ཀོན་འཇོག་རྒེ་ རྒྱལ་སྲིད་རྡེ་ན་ ཞུའུ་ མི་ཉེན་ཤེའོ་ ཁྱི་ཞ་རྒུན་ལ་ རྒྱུའི་མེད་རྡེ་? རང་འདང་རང་ལ་ འགོ་མ་ཧོར་ཧེ་། ལུའི་འབྲེལ་ ངན་པ་, ཧུ་འདྲ་ ཅོལ་ཧན་, རང་ངེ་ ཞི་མེད་ མན་ཀན་ ཞེན་ཡང་ཞིག་ ཉམ་པོ་ ལུའི་འབྲེལ་ ཅོ་ཀན་, པུ་ཙ་ ཟུྃ་སྤོ་ཙོང་ཀན་, པུ་ཙ་ རྡང་ པུ་ཙ་རྒུ་ནི་ པར་ལ་ ཡང་ པོ་མོ་ རྡང་ པོ་མོ་རྒུ་ནི་ པར་ལ་ ལུའི་འབྲེལ་ ཅོ་ཀན་, 10 ཧུན་མ་ ཧུ་ཀན་, ནོར་ནབ་ཅེན་, ར་རོའེ་ཧན་, ཞེན་མ་ ངན་ ཏབ་ཀན་ འདང་ མི་རྒུན་ལ་ འགོམ་ཧོར་ཀན་ཅོ་རྒུན་ ཀོན་འཇོག་རྒེ་ རྒྱལ་སྲིད་རྡེ་ན་ ཆ་ མི་ཉེན་། 11 ཏུའི་ཞིག་ལ་ ཁྱི་ཞ་ ཁ་ཅིག་ལ་ ཏེ་ མི་རྒུན་ ཙོག་སེ་ ཡོད་པེན་། འིན་ན་ ཙོབོ་ ཡི་ཤུ་ མ་ཤི་ཀེ་ཀ་ ཏེཏ་པ་ ཅོ་ཅེ་ ཡང་ ཨ་ཧོའེ་ ཀོན་འཇོག་རྒེ་ ཐུག་ཡིད་རྡེ་ ཁྱི་ཞ་རྒུན་ སང་མ་ རྡང་ ཏམ་པ་ ཅོའོ་ ཛེད་ཏེ་ ཀོན་འཇོག་རྒེ་ ཧུ་འདུན་ལ་ མི་ ཀྲང་པོ་ རིག་ ཐེའེ་ཛེད་ཏེ་ ནོག་།
ལུའི་འབྲེལ་ ངན་པ་རྒུ་ནི་སང་ ཐག་རིང་ལ་ འདེད་ཅེ་།
12 ཁྱི་ཞ་རྒུ་ནི་ ཕྲོ་ནི་ ཁ་ཅིག་རྒེ་ ཟེ་རེ་ནོག་ “ངེ་ ཅི་ཚང་མ་ ཅོ་ཆོག་རྒེན་།” འིན་ན་ ངེ་ ཟེ་འིན་ “ཅི་ཚང་མ་ ཁྱི་ཞ་རྒུ་ནི་ཕི་ རྒྱལ་ལེ་ཞིག་ མན་།” ངེ་ལ་ ཟེར་ཉེན་ཅེ་ ནོག་ “ངེ་ ཅི་ཞིག་ ཅོ་ནྃ་ ཅོ་ཆོག་རྒེན་” འིན་ན་ ངེ་ ང་རང་ ཅི་ཞིག་ལ་ ཡོག་པོ་ མ་ནི་ འགྱུར་ མི་ཤུག་། 13 ཁྱི་ཞ་རྒུ་ནི་ ཕྲོ་ནི་ ཁ་ཅིག་རྒེ་ ཟེ་རེ་ནོག་ “ཁར་ཞི་རྦོ་ ཀྲོཏ་པེ་ཕི་ ཅོའེ་རྡེ་ ནོག་ ཡང་ ཀྲོཏ་པ་རྦོ་ ཁར་ཞི་ཕི་།” འིན་ན་ ཞག་ཤིག་ ཀོན་འཇོག་རྒེ་ ཏོ་ ཉ་ཧ་ མེ་ཀན་ ཅོའོ་ ཛེད་ཅེའོ་ ཀྲང་པོ་ མ་ནོག་རྒེ་? ཨ་ཧོ་རྒུ་ནི་ ཟུྃ་སྤོ་རྦོ་ ལུའི་འབྲེལ་ ངན་པེ་ མ་ནོག་, ཙོབོ་ལ་ ཞབ་རྟོག་ ཞུ་ཅེ་ཕི་ ཛེད་ཏེ་ ནོག་, ཡང་ ཙོབོ་རྡེ་ ཨ་ཧོ་རྒུ་ནི་ ཟུྃ་སྤོ་ལ་ ལྟ་རྟོག་ ཛེ་རྡེ་ནོག་། 14 ཅེ་ཟེར་ནི་ ཀོན་འཇོག་རྒེ་ ཨ་ཧོ་རྒུན་ ཁོ་རང་ངེ་ ཤེད་ རྒྱུད་ཏེ་, ཤི་ཀན་རྒུ་ནི་ ཕྲོ་ནི་ སོན་པོ་ ལང་ངེ་ ཛེ་རྡེན་, ཀ་ཟུག་རྒེ་ ཁོང་ངེ་ ཨ་ཧོ་རྒུ་ནི་ ཙོབོ་ ཡི་ཤུ་ ཤི་ཀན་རྒུ་ནི་ ཕྲོ་ནི་ སོན་པོ་ ལྃ་ངེ་ ཛེད་།
15 ཅི་ ངོའེ་སྤོ་ལ་ ཁྱི་ཞི་ ཟུྃ་སྤོ་ མ་ཤི་ཀེ་ ཁག་ཅིག་ འིན་ཀན་འབོ་, ཁྱི་ཞ་རྒུན་ལ་ རྒྱུའི་མེད་རྡེ་? ཏེ་ནི་ མི་ཞིག་རྒེ་ མ་ཤི་ཀེ་ ཁག་ འིན་ཀ་ནེ་ ཏེ་ ཟུྃ་སྤོ་རྦོ་, འཇང་ཙོ་མ་ཞིག་ ཉམ་པོ་ འདྲེའེ་རྡེ་ལ་ ཁྱེར་རྒོའེ་? མ་ནི་ མ་རྒོའེ་། 16 འཇང་ཙོ་མ་ ཉམ་པོ་ འདྲེའེ་ཧ་ནེ་ མིའུ་ ཏེ་ པོ་མོ་ ཉམ་པོ་ ཟུྃ་སྤོ་ ཅིག་ འགྱུར་ཧན་འབོ་, ཁྱི་ཞ་རྒུན་ལ་ རྒྱུའི་མེད་རྡེ་? ཅེ་ཟེར་ནི་ ཏམ་པེ་ སུང་རབ་རྦེ་ན་ མོལ་རྡེ་ ནོག་ “པུ་ཙ་ རྡང་ པོ་མོ་ ཉ་ཧ་ འབྲེལ་རྡེ་ ཟུྃ་སྤོ་ ཅིག་ འགྱུ་རེན་།” 17 འིན་ན་ ཀལ་ཏེ་ མི་ཞིག་ ཙོབོ་ ཡི་ཤུ་ ཉམ་པོ་ འབྲེལ་ནི་, ཁོ་ ཁོང་ ཉམ་པོ་ ཐུག་ཡིད་རྡེ་ན་ ཅིག་ འགྱུ་རེན་།
18 ལུའི་འབྲེལ་ ངན་པེ་ཀ་ནི་ ཤོར་རྡེ་ སོང་ཧེ་། འི་ རྡིག་པེ་ ཟུྃ་སྤོ་ལ་ ནོད་རྐྱལ་ཧན་ ཙོག་སེ་, ཞེན་ཡང་ རྡིག་པ་ཞིག་རྒེ་ ནོད་རྐྱལ་ མི་ཉེན་, ཅེ་ཟེར་ནི་ ལུའི་འབྲེལ་ ངན་པེ་ རྡིག་པ་རྦོ་ རང་ངེ་ ཟུྃ་སྤེ་ རྒྱཔ་འགལ་ལ་ ནོག་། 19 ཁྱི་ཞ་རྒུ་ནི་ ཟུྃ་སྤོ་ ཏམ་པེ་ ཐུག་ཡིད་རྡེ་ ཀོན་འཇོག་རྒེ་ ཁང་པ་ འིན་ཀན་འབོ་, ཅི་ ཁྱི་ཞ་རྒུན་ལ་ རྒྱུའི་ཆ་ མེ་རག་རྒེ་? ཀའོ་ ཁྱི་ཞ་རྒུ་ནི་ན་ ཞུ་རྡེན་ ཡང་ ཁྱི་ཞ་རྒུན་ལ་ ཀོན་འཇོག་རྒེ་ སལ་ལེ་ ཛེད་ཏེ་ འིན་། ཏ་ ཁྱི་ཞ་ ཁྱི་ཞ་རང་ངེ་ མག་། 20 ཅེ་ཟེར་ནི་ ཀོན་འཇོག་རྒེ་ ཁྱི་ཞ་རྒུན་ རིན་ ཆོན་མོ་ཞིག་ ཤལ་ལེ་ ཛེད་ཏེ་ ཉོ་ ཛེད་ཏེ་ འིན་། ཏེ་རྒ་རྦེ་ཕི་ལ་ ཁྱི་ཞ་རྒུ་ནི་ ཁྱི་ཞ་རང་ངེ་ ཟུྃ་སྤོ་ ཉམ་པོ་ ཀོན་འཇོག་ལ་ སི་ཝ་ ཅོ་རྒོའེ་།