ཆོའེ་ཚོག་རྒེ་ན་ ལུའི་འབྲེལ་ ངན་པ་ ཉེད་ཀལ་ ཛེད་།
5
ཁྱི་ཞ་རྒུ་ནི་ ཕྲོ་ ཏུ་ཟུག་ ལུའི་འབྲེལ་ ངན་པ་ རི་ འདུག་ ཟེར་རྡེ་ ཚོར་, ཀའོ་ ཏེཏ་པ་ མེ་ཀན་རྒུ་ནི་ལ་ ཅོའོ་ མག་, ཁྱི་ཞི་ ཆོའེ་ཚོག་རྒེ་ན་ པུ་ཙ་ཞིག་རྒེ་ ཁོ་རང་ངེ་ མ་ཡར་མོ་a ཉམ་པོ་ ལུའི་འབྲེལ་ པོར་རྡུག་ ཟེར་རྡེ་ ང་ ཤེད་རྡེ་རག་། 2 ཁྱི་ཞ་རྒུ་ནི་ རྡུག་པོ་ རྡང་ ཁྲེལ་རྦེ་ན་ ཉ་ངན་ ཅོའེ་རྡེ་, ཏེ་ མིའུ་ ཆོའེ་ཚོག་རྒེ་ ཕྲོ་ནི་ ཕིང་རྒོའེ་ཤེ་ ནོག་། འིན་ན་ ཁྱི་ཞ་རྒུ་ནི་ ཏོ་རྦེ་ཀ་ ཕོ་སོ་ ཚོར་རྡུག་།3-4 ཞེན་ ང་ ང་རང་ ཁྱི་ཞ་རྒུ་ནི་ ཕྲོ་ མེད་ནྃ་, སེམ་ཡིད་རྡེ་ ཐོག་ནི་ ང་ ཁྱི་ཞ་ ཉམ་པོ་ འིན་། ཡང་ ང་ ཏུ་རུ་ ཁྱི་ཞ་ ཉམ་པོ་ ཡོ་ཀན་ ཙོག་སེ་, ངེ་ ཙོབོ་ ཡི་ཤུའི་ ཝང་ངེ་ན་, ཏེ་ མི་རྦེ་ཀ་ ཁྲིམ་ཅེད་ ཏྃ་ ཚར་ཏེ་ འིན་། ཁྱི་ཞ་ ཆོའེ་ཚོག་ སོན་རྡེ་ ཛོམ་ཟ་ནི་, ངེ་ སེམ་ ཡང་ ཙོབོ་ ཡི་ཤུའི་ ཤུག་, ཁྱི་ཞ་རྒུན་ ཉམ་པོ་ ཡོང་ངེན་། 5 ཏེ་ནི་ ཁོ་ རྡུ་ངལ་ ཐོང་འདེ་ འདོད་པ་ ངན་པ་རྒུ་ནི་ཀ་ནི་ འགྱོད་པ་ རྐྱེ་རྡེ་, ཙོབོ་ ཡི་ཤུ་ ལོག་ཏེ་ ཕེབ་ཅེ་ ཞག་ལ་, ཁོ་ རྐྱོབ་ཅེ་ཕི་ ཁྱི་ཞ་རྒུ་ནི་ ཏེ་ མིའུ་ ཆོའེ་ཚོག་ནི་ ཕི་ལོག་ལ་ ཕིང་འདེ་ རྡུད་རྡེ་ ལག་ལ་ ལྟེད་རྒོའེ་།
6 ཁྱི་ཞ་རྒུ་ནི་ ཏོ་རྦེ་ཀ་ ཕོ་སོ་ ཅོ་ཅེའོ་ མང་ངེ་ ཁྲེལ་རྦེ་ སྤེ་ར་ཞིག་ རག་། ཅེ་ འི་ རྡིག་པ་རྦོ་ པག་པེ་ སོན་ཏེ་ན་, ཕེལ་ཧན་ནེ་ རྐྱུར་ ཆུང་ཙེ་ ཙོག་སེ་ འིན་ཀན་འབོ་ ཁྱི་ཞ་རྒུན་ལ་ རྒྱུའི་ཆ་ མེ་རག་རྒེ་? 7 ཁྱི་ཞ་རྒུ་ནི་ ཕྲོ་ནི་ རྐྱུར་ ཉིང་པ་རྦོ་ ཕིང་འདེ་ མེ་ཀན་ ཅོ་རྒོའེ་། ཏེ་ནི་ རྐྱུར་ མེ་ཀ་ནེ་ པག་པེ་ སོ་མ་ རུའི་ཧན་ ཙོག་སེ་, ཁྱི་ཞ་རྒུན་ ཏམ་པ་ འགྱུ་རེན་, ཀའོ་ ཁྱི་ཞ་རྒུན་ རྡེན་འབའ་ ནོག་, ཅེ་ཟེར་ནི་ པེ་སག་རྒེ་ ལུ་རྒུ་ མ་ཤི་ཀ་ ཨ་ཧོའེ་ རྡིག་པ་རྒུ་ནི་ཕི་ སྲོག་ཆོད་ པུ་ལེ་ ཛེད་། 8 ཏོ་རྦེ་ཕི་ ཨ་ཧོ་རྒུ་ནི་ ངན་སེམ་ འདང་ ངན་པ་ རྐྱུར་ ཉིང་པེ་ ཏི་རྒིར་ ཉམ་པོ་ རྒ་རྟོན་ མ་ཅོ་ལ་, སང་མ་ རྡང་ ཀྲང་པེ་ རྐྱུར་ མེ་ཀ་ནེ་ ཏི་རྒིར་རྦོ་ ཉམ་པོ་ རྒ་རྟོན་ ཅོའེན་།b
9 ངེ་ ཁྱི་ཞ་རྒུན་ལ་ ངུལ་ལ་ འབྲི་ཟ་ནི་, ལུའི་འབྲེལ་ ངན་པ་ པོར་ཧན་ནེ་ མི་རྒུན་ ཉམ་པོ་ མི་འདྲེའེ་ཤེ་ཕི་ ཟེར་རྦེན་། 10 འིན་ན་ ཏེཏ་པ་ མེ་ཀན་ ཀའོ་རྒུན་ ལུའི་འབྲེལ་ ངན་པ་རྒུ་ནི་ན་ འདྲེའེ་རྡེ་ཡོད་, ཡང་ ནོར་ནབ་ཅེན་, རྡང་ འགོ་ཧོར་ཧན་, ཡང་ ཧུ་འདྲ་རྒུན་ལ་ ཆོའེ་ཅོ་ཀན་རྒུ་ནི་ ཧོར་ལ་ ཟེར་རྡེ་ མན་, ཀལ་ཏེ་ འིན་འབེན་ནི་ ཏེ་ནི་ ཁྱི་ཞ་རྒུན་ལ་ འི་ འཇིག་རྟེན་ ཕང་རྒོའེ་རྡེ་ ཡོད་ཁྲོ་། 11 ངེ་ འབྲི་ཅེ་ ཏོན་ཏག་པོ་ནི་ ཁྱི་ཞ་རྒུན་, ཏེཏ་པ་ཅེན་ འིན་ ཟེ་རེན་འདང་, ལུའི་འབྲེལ་ ངན་པེ་ན་ འདྲེའེ་ཧན་ རྡང་ ནོར་ནབ་ ཡོ་ཀན་, ཡང་ ཧུ་འདྲ་ ཅོལ་ཧན་, ཞེན་མེ་ ཧོར་ལ་ སོག་པོ་ ཟེར་ཧན་, ཡང་ ར་རོའེ་ཧན་, ཡང་ མི་རྒུན་ལ་ འགོམ་ཧོར་ ཏང་ཀན་རྒུན་ ཉམ་པོ་ འབྲེལ་ མི་ཅོ་ཤེའོ་ འིན་། ཏོ་ཙོག་སེ་ མི་རྒུན་ ཉམ་པོ་ ཁར་ཞི་ལ་ མ་ཟ་ཧེ་།
12 ཆོའེ་ཚོག་རྒེ་ ཕི་ལོག་ལ་ ཡོ་ཀ་ནེ་ ཏེཏ་པ་ མེ་ཀན་རྒུན་ལ་ ཁྲིམ་ཅེད་ ཏང་ཅེའོ་ ངེ་ ཁག་ མན་། འིན་ན་ ཆོའེ་ཚོག་རྒེ་ འིན་ནེན་ཞིག་ རྡིག་པ་ ཅོ་ཀན་རྒུན་ལ་ ཁྲིམ་ཅེད་ ཏང་ཅེའོ་ ནེན་ཏེན་ལ་ ཁྱི་ཞ་རྒུ་ནི་ ཁག་ ནོག་། 13 ཀོན་འཇོག་རྒེ་ ཏེཏ་པ་ མེ་ཀན་རྒུན་ལ་ ཁྲིམ་ཅེད་རྡེ་ ཛེ་རྡེན་། ཏམ་པེ་ སུང་རབ་རྦེ་ན་ མོལ་རྡེ་ འདུག་, “ཁྱི་ཞ་རྒུ་ནི་ ཕྲོ་ནི་ མི་ ངན་འབོ་ ཕིང་རྒོའེ་།”