2
Yanẹn bạ yablạ dạ lewijẹẹn ledạbại jẹ yakọi tạ yadẹ kẹ Jisẹsa
AJisẹs oni maana dạ ABẹtẹliyẹm, kạ lọsẹ jạ AJudiya. Mạ kebee simaa AẸrọd nwạ oni dạ Ọbọọl wạ ọkpamma Judiya. Kạ AJisẹs ọmaana kẹ, yanẹn bidi bạ yakpei boong ọgẹna mkpọkpọna, yablạ dạ apaa yạ lewijẹẹn lẹpakai yayạ dạ AJerusalẹm. Kạ kebee sạ yayạ daa, yabimai yanẹn yajiyi bẹ, “Ọyayawẹẹn wạ oomung ọmaanai, wạ nạ odạ ọbọọl wạ AJu maa ọyau dẹndẹ o. Kạ amọọn yau dạ apaa yạ lewijẹẹn lẹpakai daa, yokạạ kẹ ẹkpọkpọna yạ ekoowạ mọọn ejạu nwạ ọmaana kẹ mạ ekpoon imin. Nwạ ọkaama amọọn yoyạ maa tạ yokạạm letu yokạạ ẹ.”
Kạ kebee sạ ọbọọl Ẹrọd opuu boong imin ọwọọnga ẹ kaani, nwạ obạ yanẹn yawẹ ebạạ bạ yayau dạ AJerusalẹm. Ndạ ọsẹng ọdẹ kaa bạ keyooyi nyau bạ yadeen, obạ Yakoowạ nsọwa ebạạ ọblau bẹ obi ẹ, AKrais imaa nạ ọmaana dẹndẹ o.
Yapọọna ẹ yabi ẹ, “Nạ ọmaana dạ ABẹtẹliyẹm wạ ọyau dạ AJudiya, aajaa ndạ ọtọnganẹn wạ Ọbasẹ onifọngi ojạu.” Awu Bẹtẹliyẹm wạ ayau dạ lipaa AJudiya, awu adạ lọtumaanẹnpoon kạ lipoon jạ liyau dạ AJudiya ọsẹnga obaa kạ kamlee kawu nkạ ọnẹn wạ nnạ ọkpamma yanẹn bạ Izirẹl nạ oblạ.
Ẹdọ adạ Ẹrọd opuu aajaa, mmạ ọdẹ kaa yaseen bimaa dạ koduuwạ. Ọblau bẹ ẹkpọkpọna imaa kebee sạ edạbạ ẹ, yayin ẹ. Mmạ otoom bẹ dạ ABẹtẹliyẹm, okạạ bẹ ekoo, obi bẹ, “Baa kọu yakạbi baa kebee yawoo wẹẹn imaa. Òodạ aa boong wạ abaa kạạ ẹ kẹ, baa fukẹn yayin, oblạ maa ami keyena nkọu nkạạm letu nkạạ ẹ.”
Kạ yapuu kẹ kọtọnga kạ Ọbọọl yawẹ kẹ, yaseen bimaa yanoomạ bẹ yablạ kẹ. Kạ yakuuyi, yayeni yakạạ ẹkpọkpọna imaa edạbạ yẹ kẹn kạ lokạ lọbẹ, mmạ yatooli ẹ tutu efi ebee ẹyọọl mạ apaa yạ awẹẹn imaa ọyau maa. 10 Kạ mbạ yakạạ ẹkpọkpọna imaa, ọdaali bẹ ẹtẹẹm ọbọọli kẹ eti. 11 Yayạ dạ ẹtọ imaa yamlee kaa, yakạạ wẹẹn imaa obạ yaaka wạ okpeyạ AMeri. Yamạạn adudungi kạ lọsẹ yatọọnga ẹ, mmạ yafodạ akpaa abẹ yadạạli kaa bloong bạ yẹtawa ẹpla yatoon ẹ. Yatoon ẹ gool, obạ ebạạm yạ ẹdaali koploong yạ eblạ kạ keti sạ yadẹi frankinsẹnsi obạ amẹẹ.
12 Ọbasẹ odooyi bẹ lemlee kạ yidẹ, obi bẹ, bẹ nnạ yaduukạ yakọu yakạạ Ẹrọda, ọkaama yasẹnga bẹ eti ẹdọẹdọ yapana.
AJosẹf otoo Jisẹsa ọwau ọkọu dạ Ijip
13 Kạ yaseen bimaa yablạ kẹ, otoomnẹn kawọnga wạ Ọbasẹ wana oyinni Josẹfa kạ yidẹ obi ẹ, “Noomạ ọ adạạli wẹẹn imin obạ yaaka atạ akọu dạ Ijip, yau daa tutu njạu ọ tạ awọọn, ọgẹna Ẹrọd nạ owoo wẹẹn imaa dạ nạ ọfi ẹ kẹ.”
14 Ọkaama AJosẹf mmạ onoomạ ẹ kạ adeedeesa, odạạli wẹẹn imaa obạ yaaka otạ ọkọu dạ Ijip. 15 Ọyau daa tutu Ọbọọl Ẹrọd obạ. Bloong bimaa yedạbạ bẹ adạ ọtọnganẹn wạ Ọbasẹ onijại obi:
“Ami ndẹ wẹẹn ọmi tạ oblạ
dạ Ijip ofukẹn.”
Ẹrọd ofi kẹ bẹẹnbẹẹn dạ ABẹtẹliyẹm
16 Kạ AẸrọd ofi oyimạ kẹ obi yaseen bimaa yanạng ẹ yẹkpaani, ọkọnni ẹ kaani. Ọkaama ọkpaa ojạu obi tạ yafikẹ bẹẹnbẹẹn bạ yadạ yadạm bẹẹn ebạạ dạ ABẹtẹliyẹm, obạ apaa yạ abanga daa ebạạ, bạ yayau kạ omạnạ ẹ mbạntam mpoo otạ ọyika. Onạngi aajaa tạ oblemạ kebee sạ yaseen bimaa yayini ẹ yajạu ẹ yakạạ ẹkpọkpọna imaa.
17 Mạ eti imina mmạ kọtọnga kạ Ọbasẹ onại kạ ẹma yạ ọtọnganẹn ọwẹ Jẹrimaya tạ kodạbạ kẹ lọtumajạu kạ ojại obi:
18 “Yapu lemlee dạ ARama,
lemlee letoi lobạ akọkọna.
Rakẹl otoi lobạ ọgẹna bẹẹnna:
Ọọdẹya tạ yafawa ẹ ẹtẹẹm,
ọgẹna mbạ yabạ kẹ.”
Yatoo Jisẹsa yawọọn dạ Izirẹl
19 Kạ AẸrọd obạ kẹ, otoomnẹn kawọnga wạ Ọbasẹ ọkọi odungạnạ obạ AJosẹf kạ yidẹ kạ ọyau dạ Ijip, ojạu ẹ obi ẹ, 20 “Noomạ ọ, dạạli wẹẹn obạ yaaka, atạ aduukạ ọ akọu dạ Izirẹl ọsẹnga obaa yanẹn bạ yani wooyi tạ yafi kẹ wẹẹn imaa, yaabạkẹ.” 21 Ẹdọ Josẹf onoomạ ẹ odạạli wẹẹn imaa obạ yaaka otạ oduukạ ẹ ọkọu dạ Izirẹl.
22 Odạ kạ AJosẹf ofi opuuwạ yajạu Akelọs, wạ odạ wẹẹn wạ AẸrọd ọnọọma kẹ kạ kẹbọọl sạ yaatẹ dạ AJudiya, ọkala Josẹfa tạ oduukạ ẹ ọkọu dạ AJudiya owuuyi daa. Ọbasẹ mmạ oyeni okạạ ẹ ekoo kạ yidẹ, ọkaama ọkọu oodạ, dạ apaa AGalilia. 23 Ẹdọ owuuyi dạ lopoon jạ yadẹi Nazarẹt. Ọkaama ofi odạ lọtumajạu boong wạ Ọbasẹ onitọnga kẹ kạ mma yạ yatọnganẹn yawẹ, kạ ojại obi, “Nạ yadẹ Wẹẹn imaa, ọnẹn wạ oblạ dạ ANazarẹt.”