“Nun nai Allah, er si Yahweh tep, telepe penkamepe,” pepu upu
150
Nun tuai kunup nesala yumadi nun nai bo Allah er si Yahweha tep, “Kanda pio teleppu kurume,” pepra er si tepapu eremkamepe. Allah Yahweh er atida, im deiki kurura cadi, mali keca tenpunge peda men kurura tep, pio lekai kurure.Atep, er nyapu yuma bulupmengedi, er tep, “Kanda pio teleppu kurume,” pepra, er si pio eremkamepe. Im deiki pio kuredi, im deiki alau tara yuma, er ila puto deiki di talerura cadi, er tepapu, “Telepe,” pepra gispal donkamepe. Ada, er nyapu yuma peda, puto di “Telepe,” pepra, er sipu eremkamepe.
2 Allah er tepapu kange deipra gispal donkamepe. Ada, ‘Allahda er ila puto deiki dipapu akeca-keca yuma talepra kurur ngebo cadi, er tepapu, “Telepe,” penkamepe.
Yuk neng yumada, er puto weik kuretopu ton men kununge’ tenen, er tepapu “Kanda ila erepra puto pio weik ngebo kuruma cadi, telepe pepkepe,” pepra, er tepapu gispal pio donkamepe.
Tonda, ‘Allah erda ila erepra kurur ngebodi, pio mambul weik pel dorure’ tenen, nun yumadi er sipu ila di eremkamepe.
3 Allah er si erepra gispal dona tep, bung-bung pena er sida terompet deiki di pung pepedi, mut pepra, er si pio eremkamepe.
Tonda yuk yala mut pena tep lelim perur keca, er si gambus cap, kecapi cap, ila lelim penmarya deiki di, Allah er sipu pio eremkamepe.
4 Allah er tep si eremna mut semne taru, lelim perur keca, er sida rebana doupmepya deiki di mut pepedi semkamepe. Tonda, kange lon mut pena tep, lelim perur keca er sida, kecapi cap, seruling cap doupra, mut penkamepa deiki di, er sipu pio eremkamepe.
5 Ange utopu, er si erepra mut pena tep lelim perur keca er sida ceracap, tonda canang cap, sun abutene keca doupmepya deiki di, mut moupra pepedi, Allah er sipu eremkamepe.
6 Tonda, Allah erdi ketekepra deiamupa, tuai mutu neitamai gam kure keca yala-yala yumadi, Allah Yahweh er tepapu kange deipra gispal dongedi, er sipu eremkamenge.
Nun nai bo Allah, er si Yahweh tep, “Kanda pio telep kurume,” pepra, er sipu eremkamepe.
Akonuma. ‘Tuai mutu neitamai gam kurur keca yumadi, Allah tep, “Telepe,” penkameng’ tenen, Haleluya pepne.
Ne Raja Dauddi akonuma pepne.