“Allah er tepapu, ‘Erda pio telep kurure,’ pepra, mut deiki di penkamrume,” pepu upu
100
Nun tuai mutu ban-ban yuma neitamai kunup nesala yumadi, Allah er si Yahweha tepapu, kange deipra mut penkamepe.2 Allah tep gudinkupe dingeda, ila kange deipmepedi, er si erepra gudinkamepe. Ukupra kunkamep taru yuma, kange deipmepedi, er damaipu yana, kange lon mut, pio telepnge di, er si erepra, mut penkamepe.
3 Tonda, nun betapra tenepkunupe. Allah er si Yahweh kure ngeboda, Allah tenpu kurure. Allah er dipapu nun tuai mutu nesala yuma ketekepseu. Ukupseudi, nun yumada Allah er pengepu kunupa tep, er dipapu moupra taleserure.
Domba deiyo nengdi, sun domba bisam dopra mutmuta paramre mutu, telepai deipmengedi, kalekra diramengtopu, Allah Yahwehdi, nun tep bicau teneseredi, melipra kalengserure.
4 Atep nengeda, er si eremna ati buplan wengkamep taru yuma cap, er si eremna ati damai nimi wengnai bulupra wengkamep taru yuma cap, Allah er tep, “Uo, kanda pio teleppu kurume,” pepra, telep upu pena deiki di bankamepe.
Akati dam cap, akati bo cap wengbenkamep taru yumada, Allah tep, “Uo, kandi bicau tenepra meliamsemumnge yuma tep, telepe penmakepe. Kanda pio teleppu kurume,” pepra mut pena deiki di, nun nai bo Allah er si tepapu gudinkamepe.
5 Ada tali tep gume. Deiyoda, Allah Yahwehda, teleppu kuredi, nun nimi tep bicau teneseredi, pio tupa melimseryada, pio men tamkamsere.
Allahdi, “Ukunkamsene,” pepra pedina upu deiki peseretopu, pio tek sisi kurure. Pumun taru dordi deipipa dadeipdanen yakanup nesala yuma tep, tamna gum dipapu, tupa-tupa teneseredi, melimserure.