Elihudi sirya gawal dangna tep, pepu upu
36
Elihudi, aupu ton dukdongopra pepu.2 Nedi upu ton cap tapakra pepkusena cadi, sun ton moupra gekepkunerume. Weikanun ton men penkusene. Ada Allah er kure keca tep upu yambulanun ton lap pepkukena cadi, kandi aupu moupra gekepmemdi, moupra tenepkamrume. 3 Nedi pepkusen upuda, karenai di yana pepkusene. Allahdi ne tep ketekepra deipneua deiyo ngeboda, mali kuna pio gum di, pio dumsisi kupra kuredi, teleppu kurure. 4 Neda, kan damai tekra upu pepkene ngeboda, tali upu men pertamnune. Neda ila kael kemna deiyo kecada, ‘Nong neitamainge ake’ tenen, weika di konum kael kepsa tep, mok upu pio men pepkukene.
5 Tek sisi nun yuma kaele. Allah erda, ila puto weik ngebo kurure. Erdi tuai mutu ban-ban yuma neitamai kunge nesala yumada, sun tep bicau teneserure. Allahda, er ila puto weik kurenge cap, pio ila di kael keamudi, nong neitamainge yuma konum tenerur nge capda, weik kurure. 6 Tonda, sun mali kun kecapu pio talepmengedi, malipu kunge nesalada, ‘Pio gam tupa kunkameng’ tenen, men melipra kalengrure. ‘Sunda dadeptenge’ tenen, kaukeptaprepa, adipapu denunge. Dinino, sun dumsisi kupra, teleppu kunge nesala yuma tep nengeda, yuk nengdi ikin keca dopra, sun deiki deipmengopda, erdi telep upu bokeipredi, anesala tep melimrure.
7 Teka, Allahdi, “Angeda kunkamrume, angeda pio men kunkamrume,” pepra deipseu upu, talepmengedi, dumsisi teleppu kunge nesala tep nengeda, pio men tamrure. Anesala yuma tep, moupra diredi, kalengrure. Amutu-amutu neitamai yumada, ila nimi deiyo neng, sun Raja-Raja neng bungnungai, er sida takhta, Allahdi sun dumsisi kunge nesala dopra, ‘Anengda Raja neng damai deipnyopda, apio kunkamenge,’ tenepredi, deipre pangeda, yuk nesala epmengedi, aneng tep pio gispal donkamenge.
8 Dinino, yuk nesalada, mali kupmengepa, deiyo nengdi aneng tomopmengedi, rantai tapu di ateng koupra, wenemna ati pumbon dongombanungada, er pe mali kwamya menenga tep dongomengepa, kange mun kange doupra kunkamre. 9 Ukunkameng taruda, Allahdi, sun aneng tep upepra lap perure. “Sunda mali weik kupruma deiki di, sun wenemna tep akati dongopsei dinin, tek sisi ngeda, sundi mali kuprum ngeda ake, ake,” perure. Tonda, “Sundi ne upu yaniramnerum ngeda ake, ake,” pepra lap penkamemere. Tonda, “Sunda balila kuprumudi, salnong-nong kamna deiki di mali kupruma cadi, sun menenga tep, akati konum dongopsei. Atep ange moupra tenepkurume!” pepra wenemkamre.
10 Tonda, Allahdi, ‘Amali kunge nesalada, ne upu moupra gekenkamneng’ tenen, sun amul pakra deipredi, sun tep aupu ton perure. Ada, Allahdi sun tep, “Telep kuna ngeda ake. Mali kuna ngeda ake,” perure. Atep, sun mali kurumnge yumada, taprumudi, ka tamupra telep kun bisipu bankamrume,” pepra lap perure.
11 Allahdi upeprepa, anengdi er pere upu moupra gekepmengopda, sun malinge tapmengedi, Allah er amutara kupmengedi, er tep melipra pel donunge. Ukupra teleppu kunge pangeda, amenda taru sun tupa gam kunkameng taru yumada, tali kange deipra kunkamenge. Tonda, sundi pel donkamenge nge yumada, nong weik kupbarepa, teleppu kunkamenge. 12 Dinino, anengpu dinin, Allahdi pere upu tapmengedi, moupra men gekepmengopda, Allahdi go kareprepa, yu nengdi yana, yu weik parang ya di, anesala poptapmengepa, adipapu depkamenge. Ataru dipapu depmengopda sunda bicaue. Ada, sun walwal tupa kunmange dipu depkamenga tepa.
13 Ware nesala do yuma, sun kange dipru neitamai di, ‘Allahda nun songe, erdi pesere upu pio men talenkamepe,’ tenepmengedi, yu kange tenenangepu putarepa kununge. Sun wenemna cap, kael kemna cap tep, Allahdi go kareprepa, deiyo nengdi anesala tomopra ateng koudongonung dinin, ataru neitamaida, sundi angeda pio moupra men tenenunge. Sun kange dipru neitamaida, yu tenena cap, mali kunange cap tepapu kange derinunge. 14 Ukununga tep, sunda tupa kaber nengto kunge keteng tamun neitamaida, denunge. Ada, ali weik dangmengedi, adipapu denunge.
15 Dinino, Allah er kangeda, ‘Gume, sun mali kecapu talepra kunge nesalada, sun kange dipru telep kudina tep nengeda, ikin keca dopra sun deiki derinkamne. Ukupnyopda, kange mun kange doupra kunkameng taruda, ‘E, nun mali kunup ngeda ake. Telep kuna ngeda, ake,’ tenepmengedi, kael kemkamenge tenerure. Ikin keca karerya deiki di, sun amul pangdirure.
16 Atep, sun mali kuramrumpane, kange mun kange doupra, ikin weik kuramrum dinin, Allahdi kange lon upu peipseua deiki di, ka tamupra telepai deipseue. Ada pala telep mutu, ikin gumai deipseudi, jen keca yala-yala yuma kareamseupa, sun jen keca derinaida, weika di dekperamseupa, talepra jeramrume. 17 Ukupra kan tep telep kudiramkeu dinin, kanda pio balila weik kupmumdi, sun mali kunge nesala tep, upu weika di tupa-tupa penapu kurume. Atep nengeda, kandi tek sisi mali kuramrumnge tep, ukutaruda Allahdi walito wenemkerure, tenepne.
18 Tonda, kanda, ‘Yu weik kupkerepa, amenda taru Allah tep nalepra autunapu kupkurum’ tenen, moupra tenepmemdi, kalengdankamrume. Tonda, ‘Uo, co bo weik doproptene’ tenen, putana weik kupkeryopda, amenda taruda malipu kupkamrume. Angetopu, ‘Uo, co bo weika di inipra karepnetengpa, isomka ngebo kuptene’ tenena deiki di, mali kun bisipu benkamrume. Atep kanda, ‘Amali kunange yumada, kupnun’ tenen, moupra tenepmemdi, kalengdankamrume.
19 Ato mali kun keca kupmumya deiki di, ikin weik kupkeryopda, ila upu di ngolokra engepra, ‘Uo melipneo,’ pepra moroptuma peda, Allahdi men melipkamkere. Tonda, kan pe puto dipapu, kan pe dipapu men melipdatume. 20 Tonda, kandi, ‘Uo, lukunda menmena yatupa, kunungna neitamaipu kuptene. Ukupnyopda, Allahdi men epnetue,’ tenena pio gume. Tek sisi ngeda, lukunda neitamaida, nimi tenpu-tenpupu men denung dinin, ton taruda, tenpu yala nesala yuma peda, adipapu depmengepa, gum kupropkamenge.
21 Kanda, moupra tenepkurume! Ada, ‘Mali kupnyopda, ikin weik kupnerur’ tenen, kalengdankamrume. Deiyoda, kan konum kael kepmume. Allahdi karepkeupa, ikin keca weik kan damai yaua deiki di, kan kange tenenange yumada, piripetepkeue. Atep, kandi, ‘Mali kupnepa, ikin weik kupnerur’ tenen, moupra kalengdankamrume, pepkene.
22 Kanda moupra tenepkurume. Allah erda, tek sisi ila puto weik kurya deiki di, pio erepra deiki tara kurure. Allahdi pio telep kupra peteremseretopu, yuk ngebodi ton, pio men kuptue. 23 Wareto ngebodi, Allah tep, “Kanda ukupra-ukupra kuknamrume. Telep ngeda, ake. Abisipu bankamrume,” pepra, Allah tep petereptu do? Angetopu, wareto ngebodi, Allah tep, “Kandi mali kupmum ngeda ake,” pepra, weneptu do? Gume, nimidi men kuptenge.
24 Gume, Allahdi pio telep pel dorurnge tep, nimidi kange lon mut penunge. Ange tep nengeda, kan peda, Allahdi pio telep kunupsek pen pel dorur ngeda, lumdongona gume. Ange tep, ka di ton cap tenepmemdi, yuk neng tep, tupa-tupa lap penapu kunkamrume. 25 Allahdi ila mambul pel dorur ngeda, nimi ban-ban yumadi dinunge. Ukunung dinin, tuai mutu neitamai kunge nesala yumada, epra kail kemnung dinin, ‘Akurur ngeda, deiyo adano’ tenen, moupra men kael kemnunge. Karenaipu kunupa cadi, tuai mutu yuma neitamai kunge nesaladi, Allah er pel dorur ngeda, karenai dipu dinupe.
26 Nun nai bo Allahda, er tek sisi ila pio puto weik cap, ila mambul cap kurure. Er gam kuramu keteng tamun yumada, nun tuai mutu kunup nesaladi, pio men nukmanto tep, men kael keptepe. Teka, Allah er kure keca yumada, nun tuai nesaladi pio men kael kepmanto kuserure. 27 Allahdi pio mambul pel dorur ngeda men nukmanto dinin, ukupmantoda, tuai mutu neitamai di, me dopropredi, dua kankan deipre dingeda, er tenere taru konum yaryopda, upu peprepa mo cemrure. 28 Mo cemrur taruda, im neitamai di sangrure. Allahdi teneretopu, tuai mutu ban-ban yuma neitamai kunge nesala tep, mo karerepa, mo weika di cemrure.
29 Duada, wareto puto deiki di im neitamai pio embanapu kurur do? Tonda, Allah kururai, im deiki tarada, perenglang penange perenglang peprepa, adipapu ila kulman lelim ton gekenupe. Dinino, wareto ngebodi, ange yuma kael keptudi, lape pepsetu do? Gume men kuptenge. 30 Sun yumada, moupra dipetepkurume! Allahdi er dana-dana tara yuma perenglang penange karerepa, tuai mutu ban-ban yuma kunge nesaladi dinunge. Tonda, ila laut mokon pumbon, karu weikai dinin, pio amutara kwamre kecada, Allah er dipapu dirure. ‘Nimi tuai nengdi men epkameng’ tenen, akeca yumada, pio kunungnai kurura cadi, adeiki di inimrure.
31 Allahdi ila mambul pel dorya deiki di, tuai mutu neitamai kunge nesala yala-yala yuma tep, gam kuna deiyonge kareserepa, gam kunupe. Tonda, erdi ketekepra deiamu gam keca yuma tep, yuk-yuk dinin, sun jen keca weika di karerura deiki di, gam tupa kununge. 32 Allahdi perenglang pena ngeda, er pe buru di talerure. Akeca taleredi, ‘Acapu sakamre’ teneretopu, dokotemrepa, er konum tenemutopu, tek sisi atuaipu sangrure.
33 Mo cemre taruda, ila kulman lelim gekepmepyopda, adeiki di, ‘E, ukutaruda ila mo cap, mungna cap, perenglang penange cap, yankamre ja,’ tenenupe. Ange utopu, nimidi peirameng gam keca, sapi bisam do, kambing bisam do, bisam sisa do, sun ton kulman lelim gekepmengopda, sun peda, ‘Ila mungna cap, mo cap, perenglang penange cap yankure’ tenen, kael kemnunge.