Nabi Elisadi solu ner tep, melipu upu
4
Tenpu taruda, solu ner tenpu nabi ngebo, er si Elisa, er damai beudi pepu. “Naio, ne domsi ngeboda, kan amutara kuramudi, kan melimna pelpu pio doramu dinin, ukutaruda, er konum depu. Tonda naio, kanda konum kael keamume. Ne domneu ngeboda, Allah er amutara kuramudi, ‘Allah tep gispal donkamne’ tenen, Allah er pel talepra, telep kupra doramu ngeda, kan pio kael kemamume. Dinino ne domneu ngebo, erdi sun yuk neng kecada, ‘Keana taru dopropnedi, amenda taru ange yuma tamupra karepkamken ja,’ pepra, dororamu ngeda, tupa akupke. Atep ukutaruda, akeca deiyo ngebodi, yana ne nyapu butene dopropkanere. Ukupredi, sun anyapu butene tep, pel palepra dimrepa, menenga keca dorona gum dipapu, sun kikiman er tep, ikin pel donapu kunkamrenge. Ada, ne akenge ngebodi dopramunge pununa cap, kunumna cap tep, tali pel donkamrenge,” pepra, asolu nerdi nabi Elisa tep lap pepu.2 Atep nengeda, nabi Elisadi asolu ner tep pepu. “Uo nino, nedi ware keca pel dopteneya deiki di melipketene do?” pepra asipetepu. “Tonda, nanino, kan ati pumda ware kecapu tupa akupmaker do?” pepra asipetepu. Asipetepupa, asolu nerdi tamupra pepu, “Gume, ne atida yuk keca yala-yala ton pio men deipsi. Ange yuma gum kupmaner dinin, tenpu ngeda, yambul me mauda, zaitun co du me mokon kipra deiamne mau tenpu, ne atida deipsipa, tupa akapu,” pepu. 3 Upepupa, Elisadi tamupra pepu. “Kan kayapu neng dana-dana tara damai bememdi, me mauda, minyak me ton pio kina gum, tali gopu kwamre me mau ton, bena mororbenkurume. Moropmempa, tali gopu kwamre me mau karepkengopda, ange yuma bulupra deipkunerume.” Nabi Elisadi aner tep pepu.
4 Ange yuma konum kupmem dingeda, kan cap, kan nyapu butene cap, sun pe ati pumbon wekmumdi, adipapu akati wengna bisi buplan dekdongopkurume. Ukupmemnyopda, kan ati pumbon tupa akapkeu me mau, minyak zaitun kipra deiamumnge dopra, abulupra deipmamum metek me mau yumada, minyak zaitun dingdongonkamrume. Ada, kandi deiamum me mau tenpu ngeda, amaudi yuk mau pumbon dikdongopkurume. Tenpu-tenpu dinin, konum dinikre pangeda, ame mau dopra, yukai deipmemdi, yuk metek me mau ton, dopra dikdongopkurume. Angeda pio kupbankurume.” Nabi Elisadi asolu ner tep pepu.
5 Upepu pangeda, adipapu aner er ati pum tamupra beu. Aner cap, er nyapu butene cap yuma, sun ati konum tamupra beidi, ati pumbon weki dingeda, adipapu bisi buplan dekdongopi. Ukupyopda, adipapu yambul me mau di, minyak zaitun kiamu me mau dopropu. Dopropu dingeda, yambul me mau, er nyapudi karepmarei me mau yuma, apumbonpu minyak zaitun dikdongopra embeu. Ukupra dikdongopra embanmauanen, tenpu-tenpu dinin, ametek me mau dikdongopudi, doupra yukai deipu. 6 Ame mau yuknge yuma konum dinikyakanmauanen, ange yuma konum diniku pangeda, asolu nerdi, mau tenpu ton moropu. Moropupa, er nyapu tenpu ngebodi pepu. “Na nino, ametek me mau bulupra deipmapunge yumada, konum gawal dakmaneme. Tenpu ton men kwapmasere,” pepu. Aupu pepu taru dipapu, er nin menop taru kiamu me mau, aminyak zaitun me mokonda, pio men embanmaue. Ametek me mau pumbon di, ton cap men embenmaue.
7 Ukupka cadi, amenda taru asolu nerdi, nabi Elisa damai bena, er tep lap pepu pangeda, Eliadi pepu. “Aminyak meda, dopropmemdi, yuk neng tep tamupra kunupmemdi, aco bo dopropkamrema deiki di, kan domkeu ngebodi keana taru tep, dopromu keca yo pununa tep, kunupkamrume. Akeca talena deiyo ngebo tep karepmemnyopda, aco bo tupa akapkamre ngeda dopra, kan putan keca kunupmemdi, kan cap, kan nyapu butene cap, gam tupa kunkamrume. Ada, minyak zaitun kunupkamrem co bo weik, itara kupkamre ngeda, adeiki di sun putan keca kunupra jerumudi gam kunkamrume,” pepu.
Elisadi, wisi ner tep makupu upu
8 Tenpu tumi Elisa Sunem mutu beu. Beupa, amutu kuramu isomka nerdi er tep pepu. “Jen tonpa jepkamape,” pepu. Atep nengeda, ware kuprap do, amutu tamupra embaramu taru yumada, aner damai benapudi, sun jen tonpa jepnedi ka tamupra baramu. 9 Tenpu taru beu pangeda, anerdi er nenge tep pepu, “Ne kaele ayanmar ngeboda, Allah er pel don ngebo, pio dumsisi kure ngebo nun damai yakarure.
10 Atep nengeda, nundi er mana tep, nun ati ban kupra gat keca di dopmepunge deiki tara, alau ati dopra keteneipnemedi, er putapkamre keca, bangku do, meja do, weica do, tonda er manai do, ange yumada nundi ketenepra akati pumbon deipkunume. Ukupneme pangeda, er nun damai yakankamre taru yumada akatipu welepra mankamre,” pepu. Upeputopu, sun butene ukupreipa, Elia sun damai yakaramu taru akati welepra maramu.
11 Amenda tarada, sundi keteneipmarei atipu, Elisa welepra beudi bena mapu. 12 Konum beu dingeda, Elisa er melimne ngebo Gehazi tep pepu. “Kandi Sunem mutu ner tep upupkurume,” pepupa, bena upupupa, er melimne ngebo cap tonpa yareipa, aner Elisa urasin tara yan teku. 13 Ukupu pangeda, Elisadi er melimne ngebo Gehazi tep pepu. “Aner tep pepkurume. Nun makuna tep ikin pel weika di konum doramsemume. Atep nengeda, ukutaruda nundi kan tep ton ware keca kupketeneme do? Nedi kan melimna tep, ‘Amutu ila nimi deiyo ngebodi melipkamker’ tenen, er damai upu peiptenepa makunkamker do? Agum dingeda, nedi amutu jen talena neng, ‘Sun deiyo ngebo melipkamker’ tenen, peipkamne do?” pepupane anerdi tamupra pepu. “Gume, neda amutu neng kan-kan kununa. Amutu nengda ne yala neng pua,” pepudi beu.
14 Beu pangeda, Elisadi tamupra Gehazi tep peipu. “Aner makuna tep, ware keca kupteneme do?” pepu. Upepupane, Gehazidi tamupra, “Aner mi kapul men deiamu dinin, ukutaruda er nengeda, pio wisi cadi, mi men deipretenge,” pepu. 15 Upepu pangeda, Elisadi er melimne ngebo tep, “Aner upupmempa ne damai yankurure,” pepupa, er melimne ngebodi upupupa, aner cap yareipa, anerda Elisa ati buplan dam yan teku.
16 Yan tekupa, Elisadi aner tep pepu. “Ayan tekrem taru utopu, orketeng tamun deikida, kan mundu douamemyane, sal mi deipmemdi iripkamreme,” pepupa, anerdi tamupra Elisa tep pepu. “Gume nai, kanda Allah er pel dorum ngebo cadi, mok upu pena gume. Tali upu pertamna gume,” pepu. 17 Upepu dinin, sun dakuramreianen, Elisa apemutopu, aner konum mundu douamnganen, orketeng tamun ataru utopu taru dipu, sal mi deipu.
18 Asal mi konum deiamnga nepu taruda, tenpu tumi er naida gandum wa peamyai, er nyapu cap kinmaiyai beu. 19 Ange mi er nai bo kunmauai beudi, dato-dato di, “Uo nai, nai, ne giso pu ila di jenmanere,” pepra bena engepudi er nai tep pepu. Ukupupa, er nai bo gekepudi, er melimna ngebo tep pepu. “Ne mi doupra er nin damai beso,” pepu.
20 Upepupa, amelimna ngebodi ami doupra, er nin koripu dubeudi karepupa, atumida er nindi dopra iripdaropudi, atumi komuni neitamai kepu pangeda, keteng dukduk di ami depu. 21 Depu pangeda, er nindi ami doupra, Elisa Allah pel don ngebo maramngai, alau ati bena deipra akati buplan dekdongopra, er ninda tapra beu.
22 Ukupu dingeda, er akengebo tep bena pepu, “Kandi tenpu ngebo pepmempa, keledai bisam gemnge tenpu duyaredi, ne doupra Elisa damai dubenkunere,” pepu. “Angeda mesum tep gume. Allah pel don ngebo Elisa damai berbera benkuna tepa. Ukupne dingeda, ne adipapu tamupra yankuna tepa,” pepu. 23 Er nengedi, ‘Deiyo ace,’ tenena gume tep upepu. “Ware keca deiyo tep, ‘Atumida Elisa damai benkun,’ tenepmarem do? Tonda, ataruda war tengdongon taru gume. Tonda, atumida Allah er gispal dona tep, pel dona gum tumi men kwapmare. ‘Amambul taru men kepmarpapu do?’ tenena tep pepkena,” pepu. Upepupa, er nerdi kan wang-wang pena gume. “Ne tali benkuna tepa,” pepu.
24 Ukupu dingeda, keledai bisam bali deiki welepra bukudi, er doupra benkou ngebo tep pepu. “Bouna di bana gume. Menmena benkunume dinin, nedi pepnyaipu bena dimpepkurume. Men pepnyopda, lupra bana pua,” pepu. 25 Aner adipapu Allah er pel don ngebo Elisa Karmel mutu kunmauai benkoua tep, bisi banmauanen, Elisa damai yau. Ataru di, yambul karenai tupa yakanmaupa, Elisa konum epmemeudi, er pel don ngebo Gehazi tep pepu. “Kao epo, Sunem mutu ner yakanmara cadi, bena asipetepkurume.
26 Er yakanmarai bisi neitamai sepdara bena asipetepo, ‘Ka nero, telep kurum do? Kan nengeda telep kurur do? Kan deipmum mi telep kurur do?’ pepra asipetepkurume,” pepu. Upepupa, Gehazi adipapu bena asipupa, anerdi, “Telepe akeca-keca yuma telep pua,” pepu.
27 Upepu dingeda. Allah er pel don ngebo Elia damai Karmel mutu deiki beu dingeda, Elisa yan bena talepdongopra, er gispal dona tep, gutam tu dipdongopra bena bukudi, er yan talepu dinin, Elisa er melimne ngebo Gehazidi, “Ukuna gume,” pepu. Upepupane, Elisadi pepu. “Gume ne kabo aner kaukepo. Yapo pena gume. Ne kangeda, er dipru neitam tenepmardi kange mun kupmare. Dinin, akupre ngeda Allah er si Yahwehdi ne damai ton men peipneua tep, ‘Deiyoda ace,’ men tenepne,” pepu.
28 Upepupa, Sunem mutu nerdi, “Naio, nedi ‘Sal mi ton deiptene’ tenen, moropkesi do? Gume, nedipu men moropkesi dinin, kan dipapu ‘Sal mi deipkamreme,’ pepnemum dinin, ataruda, nedi kan tep, ‘Naio, men kupmanto keca pepnemepa, ila di putapkamner dinin, men kupyopda kange mun kupkamne ja,’ pepkesi. Upepkesi dinin, ne mi konum depmanere,” pepu.
29 Ange tep nengeda, Elisadi Gehazi tep pepu. “Kan deiki kenekmarem opkal pinggang getepmemdi, adepmau mi damai sepdaro benkurume. Tonda, ne douramne maca dopra beo. Menmena benkurema cadi, bisi bankamarem taruda, nimi ton antapdamum dingeda, telepe pena gume. Tonda yuk nengdi kan tep, telepe pepkenga peda, tamupra telepe pepra upu sisingna gume. Ukupmamemyane, adepmau mi damai menmena bememdi, ne maca doupmamemnya ami er urasin deiki deipkamarume,” pepra deipu.
30 Upepu dinin, ami er nindi, “Gume naio, kan cap Allah er si Yahweh cap, tek sisi gam kureruma utopu, nedi tek sisi upu Allah er si deiki di, pepkene. Neda kan tapra yuk men benkamne. Kan koripu kunkamana. Ne pe yuk men benkamane,” pepupa, Elisa bukroudi, sun tonpa bisi berei. 31 Sun bisi banmarei taruda, menmena, Elisa er melimne ngebo Gehazida, menmena adepmau mi damai benmaudi, Elisa douamu maca dopra ami er urasin deiki deipmaupane, ami gam men kupudi, upu ton men pepu. Ukupupa, Gehazidi ayanmau bisipu tamupra Elisa bisi yakanmauaipu yaudi, “Ange mida men gamapmare,” pepu.
32 Upepu pangeda, Elisa akati bo yana wekudi, ami dipetepupa, konum depmautopu tupa kupu, kapul men gamapu. 33 Ukupka cadi, Elisa alau ati buplan dekdongopudi, er cap ami cappu kunmareipapu, Allah er si Yahweh tep moropu. 34 Moropu dingeda, adeamu mi er nong deiki mapmaudi, ami er sipyal damda Elisa er pe sipyal deipu. Ange utopu, ami er buru deikida er pe buru deipu.
Utopu ton, ami er asuru damda er pe asuru deipu. Elisa er nongda adeamu mi utopu kiklip kepra deipu dingeda, Allah moropupa, ami er nongda kange di ton cap bupu piripu. 35 Ukupu pangeda, Elisa akati bopu kunmaudi orbenapna, abenapna kepbanmauanen, ka di ton cap, ami er nong deiki mapmaudi, dinmaupane, adeamu mida ue yoneitam bari teiplyu kepu pangeda, isin erepu dingeda asuru lapu.
36 Ukupu pangeda, Elisadi er melimne ngebo Gehazi tep upupu. Upupupa yau pangeda, upepu. “Sunem mutu ner tep pepmempa, ne damai yankurure,” pepra deipupa, perbeu. Adipapu aner Elisa damai yau taruda, Elisadi aner tep upepu. “Kan mi doropo,” pepupa doropu. 37 Ada, aner konum akati bo wekudi, Elisa er gispal dona cap, telepe pena cap tep, er yan tekmauai beudi, bena genepdongopra ila di “Telepe,” pepu dingeda, ami doupra, akati bura tara beudi er pe ati pumbonpu tamupra beu.
Nabi Elisadi, nimi men kupmanto keca, butene kupunge tep, seki upu
38 Tenpu taruda, Israel yala nesala sun kurami mutu neitamai yumada, jen putana li ton kupu. Ukupupa, Elisa tamupra Gilgal mutupu beu. Beudi, nabi gung tenpu bena peteremau taruda, er melimna ngebo tenpu tep, “Talena dana-dana jen gamna mau er si panci, ilange dorberume,” pepu. Ada sun awekmai nabi-nabi neng, sun jen keca, tu keca cap, malilya cap gamna tep, “Ila panci dorbena keteneipkurume,” pepu. 39 Upepupa, anabi-nabipu dinin, tenpu ngebo ton wai dam beudi, ‘Amalilya jepkup,’ tenepudi, kipmantonge tep erbeu. Ukupudi, tali koupmengepa burada paramu labu du mouamnga epu. Epu dingeda, adipapu amouamupa epmaunge yumada, dakra duyau. Adoupra yau pangeda, adipapu yambula di tekra-tekra agamne ila mau pumbon dongopu. Ange peda, sun anabi-nabi neng yumada, kael kemna guma tep, ‘Alabu duda, nimi jepmengopda, adipapu deptenge. Akecada, nimi popmantonge akurure’ tenen, men kael keami. Tonda, ato labu duda, sun pio ton men jeramya tep, ton pio men kael keami.
40 Uda, sun kap tenpu ngebodi, alabu du cap, sapi tu cap, amau pumbon konum gapu dingeda, erdi sun anabi-nabi neng jena tep, bokra karepu. Dinino, sun anabi-nabi neng ajen kecada, yambula dipapu konum jepetepe dingeda, adipapu ila upu di ngolokra Elisa tep pepi. “Uo naio, kanda Allah er pelpu dorum ngebo, ange jen keca nun kabodi gapmaser keca neitamaida, nimi pona tep yu keca ton akapmar adano,” pepi. Upepra sun anengda, ‘Gume angeda, men jepkupe,’ tenepi.
41 Ukupipa, Elisadi aneng tep pepu. “Atep, sundi, gandum du taikra deringe keca, er si tepung, yambula di doproprumudi, duyankurume,” pepu. Atepung dopropidi, Elisa tep karepi pangeda, Elisadi atepung yambula di, amau pumbon dongopra deipu. Ange ukupu dingeda, Elisadi pepu. “Ukutaruda, adapmarum ngeda, ton cap bokurume. Bokmumpa, sun yumadi akeca tali lupra jena telepe pua,” pepu. Upepupanen, amau pumbon gapmai jen keca yumada, teleppu kupupa, nimi popmanto yu kecada, men kupu. Sun yumadi jenmai dinin, tenpunge peda, pu men talepka cadi, men depi.
42 Tenpu yuk taruda, nimi tenpu ton, mutu si Bahal-Salisa di, Allah er pel dona ngebo nabi Elisa damai yau. Ada, angebodi Elisa tep, gandum ukupu taikmaunge cap, utopu roti kwaneng dua puluh ton yana karepu. Aroti ngeda, aketeng tamun deiki di, menmena weni kipmaunge di, agandum ukupunge ketekepmainge cap doupra, aroti kwaneng daprapudi, Elisa tep kareryau. Ada, ‘Allah er gispal donkamne’ tenen, kupu. Ukupu pangeda, Elisadi, er pel melimna neng, sun nabi-nabi neng tep, “Aroti kwanengda, bokra amutu kunge nesala yuma tep karepmumpa, sun jepkunge,” pepu. 43 Upepupa, sun anabi-nabi neng, sun melimna ngebodi upepu. “Gume naio, ware kupra aroti kwaneng yambula dipapu karepnepa, amutu kunge nesala, denge pio weik seratus (100) neng kungetopu men kunupsek peptue. Men jeptenge. Ange doupra kareptepya peda, sun yumadi jeptenge do? ‘Angeda tek sisi suktalepkamsere,’ tenepmepe,” pepi. Upepi dinino, Elisadi kange di ton cap pepu. “Boknapu kupmempa, sun adipapu jepkunge,” pepu. Ada tali tep men pepsene. Deiyoda, Allah Yahwehdi konum peipseu. ‘Angepu karepmumpa, sun anengdi dopropmengedi, adipapu jepkamenge. Ange konum jepmengopda, ton gawal yambulanun ton tapkamenge,” pepu.
44 Elisadi upepka tep nengeda, er melimna ngebodi, sun nabi-nabi neng tep karepupa, anengdi amutu nesala denge pio weik seratus (100) neng jen bokra karepipa, amutu nesaladi ajen keca yuma jepropi. Ange yuma konum jepi dinin, Allah Yahwehdi peiamutopu, gawal yambula di ton tupa tapi.