Raja Dauddi Allah er si Yahweh tep, ‘Telepe,’ pepra mut pepu upu
22
Allah er si Yahwehdi Raja Daud tep konum lyepu pangeda, Daud kange derin mut penmau. Angeda musum tep gume, ‘Daud poptepe’ tenen, er podan neng yuma cap, Saul capdi, Daud portererami dinin, Allahdi meliamupa, men popbisipya tep, Raja Dauddi aupu deiki di mut pepudi, Allah er sipu erepu. 2 Raja Dauddi mut deiki pepu upuda ake.Ne nai Allah, kanda Yahweh kurume. Ne podan nengdi popkupterepnenge taru yumada, kandi melipra kalengnerume. Tonda kan dipu lyemnerume. Ukuruma cadi, ‘Yu nengdi popkuneng do?’ tenen, mutu yangne gel deiki sepdaro banedi inimdongoramnetopu, kanda lelimdongonerume. Ange utopu, ‘Yu nengdi popkuneng’ tenen, mali neng men wekmanto gel ati pumbon wekra inimbanuntopu, kanda ange utopu kunerume. Kan pedipapu talepdongopnemempa, ikin kunere keca yuma neitamai di lyemnerume.
3 Ne nai Allaho, ne kware kunere taru yumada, gel imir wekra inimbanetopu, ikin kunere taru yumada, kan dipu melipra lelimdongoneruma cadi, kan amnyo tara inipra banune. Jen talen nengdi, ‘Mar podan taruda, mar dopmengepa, beknurur’ tenen, kelapye lelipra kuramengtopu, kandi melipra kalengnerume. Ne melimna tep, kelapye utopu kunerume. Ne lyemna deiyo ngeboda kan pua. Ne nai Allah kanda gil bukamre mutu buma iriamu tara inimbenun utopu kan puto deiki di leleamnemume. Pio yu nengdi, ‘Angebo popkup,’ tenepmengedi, poryakanenung dinin, ne nai bo kandi lyemnerume. 4 Ange tep nengeda, nedi ne nai bo Allah er si Yahweh tep, ‘Melipneo,’ pepra moropnyopda, ne podan neng kan-kan kunapu peda, Allahdi lyemnerure. Ne nai bo Allah, pio mambul ngebo cadi, nimi yumadi er si eremkamne ngeda pio telepe pua.
5 Tek sisi ila me ouprepa, nimi ame neitamai sakmengepa, ame ongopdongopredi, sun jepmanto kuramretopu, yu nengdi ne popmanto kupnei. ‘Popnengepa depkamne,’ tenepsidi, ikin kange doupra tenimtonapu kuramsi dinin, kandi lyepnemume. Me di opra nimi denai debaramretopu, yu nengdi nimi pon keca di ne nongda portereramnei dinin, kandi lyepnemume. 6 Tonda ne kuramsi taru yumada, nimi tapu koupdongopmengepa, men benmanto kuramengtopu, dena damai kuramsidi, ‘Uo, ukutaru tek sisi depkamne ja,’ teneramsi dinin, kandi lyepnemume. Tonda, angetopu, ma pena pumbon wekrepa youramretopu, ne peda utopu kwuamneupa depmanto kuramsi. Depmanto kuramsi dinin, kandi lyepnemumpa tupa gam kunune.
7 Ada, ne kange mun kwamneupa, mali kange doupra kuramsi taru yumada, Yahweha kan tep ila di mali peramkesi. ‘Ne nai Allah, ne melipneo,’ peramsa deiki di, Allah kan si eremna ati, kan kurumai di aupu gekepnemume. Tonda ne engepsidi mali upu peramsa yumada, kan amul di ne peramsinge tep gekeramnerumdi, lyemamnemume.
8 Tonda mutu-mutu yuma lokudi embandaramu. Tonda ataru dipu pio im neitamai kurepa dipe keca deiyo kepkai yumada, ila di lokredi moropsemamu. Ada musum di gume, Allah er yu weik kupka tep, akeca-keca yuma moropsemamu. 9 Ukupmantoda, er u pumbon bisida, uku bu jeramupa ket ila di beleramu. Er sipyal pumbon dingeda, uku bu ila di beleramu. Tonda er sipyal pumbon di uku jeramre kalum ila di beleramupa katuai kuamu.
10 Ukupmantoda Allah er si Yahwehdi im neitamai dikda pepu dua kan-kan di tuai kwerepu. Er yan amutamna di kunuku dua kan-kan deiki kwerepu. 11 Ukupmanto yuk taruda, malaikat sun si Kerub, sun deiki welepra lakra embaramu. Tonda kumanya puto deiki di, welepra embaramudi, pol deiki di embaramre utopu langamudi menmena yakaramu.
12 Nimidi lyom opkal dopra sun nong ongopdongorameng utopu, ataruda weika di kunuku dua cap, ila mo cap, er nong dana-dana tara ongopdongopra deiamudi, ila di kunukamupa, yakaramu dinin, nimidi men epmanto kurami. 13 Ataruda Allah er dirine weik kuramnga neitamai dipapu, perelang pena cap, uku bu cap, adua neitamai dipu beleramu. 14 Ukuramu taruda, Allah er si Yahwehdi, er puto im deiki di kulman popneto kupupa, nimi yuma gekerami. Allah er si Yahwehda, akeca-keca yuma talepra, deiki tara kuredi, Ila Puto Eremna Ngebo kurya deiki di, er upuda, ila di peramupa, nimi ban-ban yuma gekerami.
15 Tonda, Allahdi meliamseupa, nun jen talen nengdi jen tapu loptapra mar peramipane, nun podan neng yuma kware kuramupa, sepdaro bendopi. Ange utopu Allah im deiki di dokotepupa, perelang pena weika di pepu pangeda, nun podan neng yuma kware kupupa, bendopi. 16 Ne nai Allah er si Yahwehdi nimi wenepu taruda, er yu kupupa, upu puto di peramudi, er u pumbon di “Gus,” pepupa, tu amu kwamu keca yumada katuai kupu. Laut mokon amutara yuma capda, tengeptapupa katuai kupu.
17 Allahda im deiki ikurur ngebodi, ne lyemna tep, ikin kuramsi taruda, im deiki di er buru kwerepudi talepra dopropneue. Ila mokon jepmanto neng me pumbon di kuramengtopu, ikin weik kuramsi taru neitamai di dopra lyepneue. 18 Ange utopu, ne tep, ‘Poptepe,’ teneramnei neng, ila di balila kupra, puto weik kurami dinin, ne putoda bounpu kupneua cadi, men lyepdanmanto kuramsi dinin, ne nai bo Allahdi ne tep lyeprapneudi, telep kupra deipneue. 19 Ayu nengda, sundi ne tep, ‘Tali lupra poptepe’ tenen, domembaramnei di piriramneipa, ikin pio weik kuramsi dinin, Allah er si Yahwehdi ne tep pio meliamneudi, lyepneue. Ne dipru kwa dipra deipneue.
20 Neda podan neng kan-kan kuramsipane, Allahdi ne tep tupa bicau teneramneudi, kange deiamneua cadi, lyepra dopropneudi, pio telepai deipneue. Ila pala mutu neitamai tekmepepa, mali keca tenpunge peda nun damai men yanmanto kuretopu, Allahdi ne dopra telep mutu deipneua tep, kange deipra teleppu kunune.
21 Ne dumsisi ngebo kuramsa tep, Allah er si Yahwehdi ne tep telep kweipneu. ‘Angebo mali do, telep do?’ tenen, dipetepneupa, nedi mali keca ton men kuramsa cadi, telep kuramsitopu, upu bokeipneudi, menenga keca karepneue. Erda ne damai kuramudi epneua ja. 22 Angeda mesum tep men pepne. Ne nai bo Allah, er si Yahwehdi, ‘Ukunkamrume,’ peiamseu upu moupra gekeramsidi, er upu talepra kuramsi. Neda bouna di kuramsidi, Allah erdi, ‘Ukunkamrume, angeda men kunkamrume,’ peiamseu upupu gekepra dombaramsidi, Allah tapra mali men kuramsi. Atep nengeda, menenga keca karepneue.
23 Allahdi, ‘Ukunkamrume, angeda ton men kunkamrume,’ peiamseu upu yumada, ne damai deipnedi, pio moupra tupa-tupa tenenune. Erdi, ‘Ukunkamrume,’ peamseu upu yumada, pio men tamamsi. Aupu yumada tupa talepra kunune. 24 Tonda erdi kael kepneuada, nedi er tep metek malinge pe ton men kuramsi. Tonda, ‘Ne mali kupnun’ tenen, pio moupra kalengdaramsidi, mali kun keca men kuramsi. Allahdi moupra diramneupa teleppu kuramsi. 25 Ne dumsisi ngebo kuramsidi, mali keca ton men kupsa tep, Allah er si Yahwehdi, ne damai kuramneudi moupra diramneupane, ne dumsisi kuramsitopu, ‘Angeboda teleppu kurure’ tenen, telep kweipneudi, menenga keca karepneue.
26 Ne nai Allah ne kaele. Ware neng do yuma, Allah kan tep, men tapungedi, kan damaipu dukdongopra, pio moupra talenge neng tep nengeda, kan pedi, sun tep men tamrume, pio melimrume. Kandi, ‘Ukunkamsene, ukupra melipkamsene,’ peseremtopu, pio angepu kurume. Mali keca tenpunge peda, men kunge neng tep nengeda, kan pedi, mali keca tenpunge peda men kareserume. Dumsisipu kurumupa, dinupe.
27 Mali kuna pio gum di, teleppu kunge nengda, kandi teleppu kudimempa, dikenupe. Dinino, dipru mali-mali kunge neng tep nengeda, sun kunge keca betapra dipetepmemdi, wenemrume. Walwal utopu men kurume, nimi kunge keca yuma betapra dimemdi, upu bokra deriserume. 28 Tonda dipru boun kupra amutara kunge nengda, melipra lyemdorume dinin, dipru eremenge nengda, moupra dimemdi, wenepra amutara kupra derirume.
29 Ne nai Allah, kan si Yahweh, kanda weica dirine jeramretopu kunerume. Ne nai Allah Yahweh, kandi ne ikin weik kunerepa, ‘Ware kupkun do?’ tenen, tenimtonapu kunere taru yumada, kunungna neitamai utopu kunerur dinin, kandi dirinepu kudinerume. Ne kunkamne keca yumada, kan dipu lape peneremepa, telep bisipu banune. 30 Atep kan puto melipnerema deiki di, ne podan neng gung weik kuptenga peda, neda balila deipra kuptenedi, aneng tep porbetene. Allah kan puto melimneruma deiki di, ila wiringna wirikamtupane, kaplepra bendoptene. Ada, ikin weik kunerur ngeda, bisbisa kaptenedi, teleppu kunkamne ja.
31 Tonda Allah kan tenemem bisida, pio telep bisi pua. Kandi nimi tep, ‘Ukupra kumumdi, abisipu bankamrume,’ pesereme ngeda telep bisi pua. Malinge tenpu peda men kurure. Tonda, kan Allah Yahwehdi peserem upuda pio tek sisi pua. Malinge tenpu peda men kurure. Tonda jen talena nengdi, ‘Mar dopmengepa, bekserur’ tenen, kelapye doupra lelimdongorameptopu, nimi yuma ikin kupre taru yumada, ‘Allah er dipapu melipra kalengkamsere,’ tenen, kan teppu teka tenepmepya deiki di, kandi telep kupra melimserume. Ukusemempa, mali keca nun damai ton men yana kupsetu.
32 Angeda, mesum tep men peptene. Deiyoda, nun nai bo Allah, kanda Yahweh, tenpupu kurume. Yuk Allah ton pio gume. Allah kan tenpu mutu yangne gil utopu kumemdi, lelimserume. Lelipsememdi nun tep kalengserume. Yuk ngebo ton ange men kuptue, kan tenpua. 33 Tonda Allah er dipu ne tep puto deiyo keca karenerure. Er puto deiki di pio pe deipra puto kemdinerure. Tonda er dipapu ne emban bisi yuma peda, teleppu kupnemempa, telep kupra embanune. 34 Allahdi ne yan puto cap, kat-kat kemna deiyo keca cap, karenerepa, rusa bisam yan kat-kat di, ila mutu dupai welepra embaramretopu, Allahdi, ne puto kepra deipnerepa, ila mambul pel peda doptene. Ikin weik kuptua peda, er melimnerya deiki di, tupa pel doptene.
35 Tonda, Allahdi, puto deiyo keca ne buru deiki karenerepa, ne podan neng tep, balila kupnedi porbetene. Puto deiyo keca weik karenerya tep, jenda, besi keca di keteneipnetengedi, peproptenepa dagwaliptue. 36 Tonda ne nai bo Allah, kandi pio melipra lyemnememnga deiki di, ne podan neng yuma tep bisbisa kemnune. Ukupmantoda jen talena nengdi, ‘Mar dopmengepa, bekserur’ tenen, kelapye doupra lelimdongorameptopu, Allah kan dipapu melipra kalengnerume. Kanda ila deiki tara kurum ngebo dinin, kan amutara kune ngebo damai yamemdi, teleppu kupra ereipnemume. Kan melimneruma deiki di, ila ngebo keipnemume.
37 Kandi ne tep, ‘Er yan men luklem pepkamre, tonda er yanda tamopkamre’ tenen, karayong bisi telep yaipnemempa, tali kange doupra lupra embanune. Ne kunkamne keca yumada, kandi telep kweipnerema deiki di, iriwarye kange douna gum dipapu, teleppu kunkamne. 38 Ton ngeda, nedi podan neng yuma popra dopronen baramsi. Ukupbaramsidi, aneng yuma popra gawal dakamsi. Aneng yuma kapul men popra gawal daksi taruda, ne mutu tamupra men yasi. 39 Nedi podan neng popra bisipbaramsi taruda, sundi ka di ton cap tamupra men tekmanto kurami. Sun yuma, popra bisipbaramsipa, ne yan damaipu saka dourbarami.
40 Angeda mesum tep gume. Kandi nimi podarbana tep, kan puto weike karepnemuma deiki di porbaramsi. Tonda, kan meliamnemuma deiki di, ne podan neng yumada popbisipsipa, ne gispal dona tep ne yan damai tu gutam dipdongopra kurami. 41 Ne nai Allah, kan puto di meliamnemuma deiki di, ne podan neng yumada, kware kupupa, sun amnyo karekra, sepdaro bura saka barami. Kan puto deiki di, ne podan neng yumada, nedi popra gawal dakbaramsi.
42 Ange tep nengeda, sun podan neng yumadi, ‘Uo, ware ngebodi makupsetu do?’ tenen, mali perami dinin, yuk nengdi sun tep men makurami. Tonda, ‘Allah er si Yahwehdi makupsetu do?’ tenen, mali peramkei dinin, Allah kandi ne podan neng tep bicau tenepra men gekepmumdi, men lyepropmume. 43 Nedi anesala popra gawal dakamsi taru yumada, sikke but lupra dingtamamengtopu, aneng poptapra gawal dangamsi. Tonda nedi sun tep popra bisipbaramsada, nimi weika di bisi deiki embangedi, bental yanipra baramengtopu kuramsi. Aneng yuma popbisip baramsidi, gawal dakamsa tep pepne.
44 Tonda, ne nai bo Allah, ne mutu neng dinin, ‘Angebo popbisipkamepe’ tenen, poryakaramnei dinin, kandi ne tep, aneng kan-kan di lyepra deipnemume. Tonda, amutu nesala sun talena deiyo ngebo keipnemumpa, sunda ne amutara kununga cadi, ne nyapu kununge. Neda sun nimi deiyo ngebo tupa kunune. 45 Tonda kandi meliamnemumpa, ne men kael keamsi nesala, yuk mutu-mutu dakunge neng peda, ne tep kware kuprepa, bouna di ne amutara yana buknedi, ne pene upu pepnepa, adipapu ne peramne upu yumada adipapu amul gekepra dombanenunge. 46 Sun balila weik kurami dinin, ne tep kware weik kuprepa, dipru boun kuprepa, sun ila gel ati pumbon, yuk nengdi men wekmanto kurami dinin, kware tep moropsepdara yakangedi, ne amutara bukra kununge.
47 Ange tep nengeda, ne nai Allah, kan sida Yahweh, gampu kurum ngebo tep, telepe pepkene! Tonda, kanda mutu yangne gil lelemamsertopu, kandi melipra lelimdongoramsemume. Allah kanda mutu yangne gil utopu kusememdi, nun Lyemna Deiyo Ngebo, nun nai Allah kan si tep ila di eremkamkepe. 48 Ne nai Allah, ne podana nengdi ne tep ikin keca ne deiki deipnengopda, kandi tamupra aneng tep wenepra poprume. Kan melimneruma deiki di, yuk mutu-mutu dakunge neng yuma tep, popbisipsipa, ne amutara kununge.
49 Yuk mutu nengdi, ne tep ateng kouramengtopu, ikin keca ne deiki deipnei dinin, kan dipu ne ikin kuramnge yumada loptapra lyepropnemume. Tonda ne podan neng kan-kan kuramsi taru, sundi ne tep popmanto kuramnepane, kandi lyepropnemume. Ne nai Allah kandi puto keca karepnemumpa, ne podan neng yuma popbisipsipa, kandi ne doupra sun deiki tara deipnemume. Ange utopu kandi melipra lelip dongomnemumpa, ne tep, ‘Poptaptepe,’ teneramneidi, dombaramnei neng yuma pe tep, kandi wenepra popmumpa, sundi ne tep men popnei.
50 Naio, ange-ange yuma konum kuramnemuma tep nengeda, amutu-amutu nesala yuma neitamai kunkamne taru di, telep mut pepra Allah kan si Yahweh tep, si eremkamkenune. Nedi telep mut pepnedi, Allah kan si Yahweh tep pio si eremkamkenune. 51 Allah kandi, ‘Angebo Raja kunkamre’ tenen, wepra ereiyamnemum ngebo tep, meliamnemuma deiki di, ne podan neng yuma popra bisipbaramsane, Israel nesala yala-yala yuma tep, sun ila nimi deiyo ngebo Raja kuna tep, ka di tamupra ereipnerume.
Tonda Allah kandi, ‘Angebo Raja Israel kunkamre’ tenen, bicau tenepra weamnemum ngeboda, ne Daud tep, tamna pio gum dipapu tupa ne tep, telep kupra melimnerume. Tonda, ne cap, ne nyapsilip cap, dadeipdanen bankameng nesala yuma cap tep, tamna pio gum dipapu, bicau tenepra kusemempa, pio teleppu pio kunkamenge.”
Aupu yumada, Raja Dauddi, mut pepra Allah er si tep eremaudi pepu.