Mikhadi si eremamu keca patungda, Dan yala nesaladi dopropya tep, seki upu
18
Ataru neitamai yumada, Israel mutu ila nimi deiyo kepra, Raja kuna neng ton, pio men kurami. Tenpu Raja ngebo peda, sun Israel nesala yuma tep, men taleamidi, upu ton men peramya tep, sunda tali-talipu kurami. Tonda, ataru peda, Dan yala nengdi pio tupa tenenapu kuramidi, 'Nun mutu epmepedi, nun pe tarapu kepropyopda, amutu tupa dakunkamep' tenen, enapu kurami. Deiyoda, sun Israel nesala yuk-yuk yala nesala tep, Israel deiyo nengdi, mutu tu ton konum bokra karepipa, ayala-yala nengdi, Kanaan tara nesala popbisipidi, amutu tu yuma dopromi dinin, sun Dan yala neng tep ngeda, kapula. Sundi amutuk tu men dororami. Sundi, 'Acapu pio kunkamep,' tenepmanto mutu tuda, Kanaan tara neng tupa taleramya cadi, Dan yala nengdi, aneng men poptapya tep, sun mutu tu kapul men dopromi.2 Atep nengeda, sun Dan yala neng kan-kan neitamai di, nimi pamubari (5) nengda, pio telep neng ton, kware gum di, kika weik neng wepra deipi. Apamubari nengda, sun yala neng dinin, sun cap kikiman amutu neitamai kurami neng wepra deipi. Ada, ila ati arum doramyai, Zora mutu cap, tonda Esytaol mutu cap, kuramidi deiami nengpu wepra deipi. Ukupi dingeda, sun apumbari neng tep, “Ortara mutu neitamai yumada, ‘Amutu kunge nesala wareto kunung do? Tonda sundi talenung mutu tuda, wareto mutu kurur do? Anengda, popbisiptepedi, sun mutu yuma dalupra doproptepe do?ʼ tenen, dirbenkurume,” pepi. Upepya tep, sun apamubari neng adipapu dirbei. Tonda, Efraim mutu iknapi dam tara mutupu bena dirbei. Dirbenmaiyanen, konum kupi dingeda, Mikha er ati ton epidi acapu bena mapi.
3 Sun Mika ati neitamai weki dingeda, akati pumbon kunmai nengdi penmai upu gekenmaipa, akaber ngebo Lewi yala ngebodi upu penmau. Apenmau upu yumada, sun Dan yala nengdi, angebo penmau upu kamu kael kepi. Atep nengeda, aneng sundi er damai bena asipetepi. “Kanda ware ngebodi amutu doupra yakeu do? Ware deiyo tep amutu kurum do? Kan amutuda ware pel talepra domemdi, upu talerum do?“ pepra asipetepi.
4 Asipetepipa, akaber ngebodi tamupra pepu. “Gume, ne amutu neitamai kununa deiyoda, Mikha erdi pepneua deiki di kunune. Mikha erdi, ‘Angebo ne melimna tep, imam pel talepra donkamnere’ tenen, wepra deipneue. Tonda, er dipapu ne pel donun nge tep, menenga keca karenange yuma peda, er dipapu karenerure,” pepu.
5 Lewi yala kaber ngebodi upepupa, sun Dan yala nengdi tamupra pepi. “Ange tep nengeda, nun melipra bana tep, kandi Allah tep asiptepkurume. ‘Tek sisi sun anengda, ayana kungedi, ormutu dirbenkamnung ngeda, nong kupkamre do, gum do?’ pepra, Allah tep asipetepkurume,” pepra moropi. 6 Upepra moropipa, aimam ngebodi tamupra pepu. “Jo, telepe. Sunda, ‘Uo,’ tenena pio gume. Allah Yahwehdi, sun embarumunge tep, pio kalekra dinkamsere. Er dipapu melimserepa, teleppu kunkamrume,” pepu.
7 Ange tep nengeda, apamubari neng banmaiyanen, Lais mutu bei. Beiopda, amutu neitamai kurami nesala tep, moupra dinmaidi tenenmai. Ada, ‘ Uo, sun Lais mutu neitamai kunung nesala, sun nongda, tek sisi Sidon mutu nesala kuramitopu kungepa epmepe,’ tenepi. Sunda, mambul kange douna gum di, ‘Yuk mutu nesala mar poryankamseng do, yuk ikin keca nun deiki kupkamser do?’ tenena pio gum di, tali kange deipra kununge. Tonda, ‘Sidon mutu kunge nesala damai men kunung dinin, sundi talenung bung keca cap, yuk telep keca capda, akeca yala-yala yuma weika di talepra kununga cadi, tenpunge peda, men putarure. Tuai mutu neitamai akwamre keca yumada, weika di talenunge. Sunda ikin pio men kununge. Sun kunge mutuda, Sidon mutu utopu kununge. Mutu sirikai kunung dinin, akeca-keca yuma sungdona gum di, telep dipapu kununge,’ tenepidi, kael kepi.
8 Lais mutu kwamunge yuma epra kael kepidi, ka di tamupra sun pe mutu cap, sun kayapu neng cap kuramyai, Zora mutu cap, tonda Esytaol mutu cap tamupra bei. Bei pangeda, sun pe yala nengdi asipetepi. “Uda, ortara mutu epmaruma cadi, wareto upu pepkaserum do? Wareto keca epmaruma tep, upu pepkaserum do?” pepra, asipetepi. 9-10 Asipetepipa, sun pamubari nengdi upepi. “Gume, ukutaruda, yamumpa nun yuma adipapu Lais mutu mar porbenkupe. Nunda adipapu ortara konum bena kunkamepe. Tonda amutu tuda, pio telep mutu epmape. Ila pala mutu cap, nimi weik mutu cap, tonda akeca-keca yala-yala yuma akupnapu kure mutu epmapa cadi, amutuda pio telep kurure. Atep nengeda, sun akunmarum nengda, tali gekertamnapu kunkamrum do? Tali dim pepra bukamrum do? Nun kangeda, menmena ortara mutu bepedi, amutu bena, dalupra dopropkamepe. Amutu kunge nesalada, tali kange doupra kununge. Sundi, ‘E, kange moupso, ortamna nengdi mar poryankamsenungʼ tenen, keteneipmeko, pio men tenenunge. Telep kangepu doupra kununge. Atep, nun tenenupada, nun nai bo Allah, erdi er puto karepserepa, ortamna nesala bisbisa kapkamepe. Allahdi amutu neitamai yuma doprapseredi, nun Dan yala neng tep karepkamasere,” pepi.
11 Anengdi upepipa, sun Dan yala deiyo neng yumadi gekepi. Ange tep nengeda, Zora mutu kurami nesala cap, tonda Esytaol mutu kurami nesala capdi, sun Dan yala neng dengeda pio weik, enam ratus (600) nengdi, ‘Mar porbenkamepe,’ tenepidi keteneipi. Ada, sun mar podana tep keca, jen yuma cap, nimi pon keca yuknge yuma cap, adipapu moupra doupidi, podana tep bei. 12 Sunda adipapu keteng dangban tara Kiryat-Yerim mutu tara dinin, Yehuda tara beidi, aceipu opkal bol dodin ati dopra kunmai. Ukupmaiya tep nengeda, amutu neitamai kurami nesaladi, amutu si tep, ‘Mahaneh-Dan mutu,’ perami. Tonda, tupa aupu sekmepu taru peda, amutu si tep, asipu tupa penunge. Sun upu deiki di, aupu deiyoda ake. Ada, ‘Dan yala nesaladi, sun opkal bol di dodin tenda ati domyai ake’ tenen, peramidi, tupa penunge.
13 Uda, amutu di pio ortara mutu adipdongopra baramyanen, Efraim mutu dinin, iknapi dam tara yaidi, Mikha er ati damaipu dourbenmai. 14 Mikha ati damai konum bena kunmai taruda, sun pamubari neng, ada Laish mutu dirbenmai nengdi, upepi. “Nun kayapu, sun ton konum kael keamrum do? Akati neitamai ton, nimi urasin utopu keca, patung ketekepra deipidi, gat keca er si perak di palepdongomi nge cap, tonda yuk tali keca si eremna tep yambul patung ton betaipinge capda, akati pumbon akurue. Ange kael keprum do? Ange utopu, tonda, Allahdi nimi tep, ‘Ukupkamrume,’ pepra, lap pena tep, petenkemna keca, er si efod opkal ton, akati pumbon akurure. Atep nengda, sundi, ‘Warenge kupkamep do?’ tenen, tenepkurume,” pepi.
15 Upepya tep ngeda, sun Dan yala nengdi, adipapu Mikha ati damai bei. Akati neitamai peda, Lewi yala kaber ngebo ton akuramu. Ukuramupa, sun apamubari nengdi er tep, “Telepe,” pepidi, yana upu talenmai. 16 Aupu pepi taruda, sun Dan yala nesala jen talen neng denge pio weik, enam ratus (600) neng, sun mar podan keca jen cap, mar du akeca yuma keteneprapidi, akati arum ongopgenepra weiami gel beilya damai dinin, akati arum wengbana tep bisi, ila bublan dopra deiamyai damai bena tekmai.
17 Acapu tekmai pangeda, sun apamubari nengda, ada ‘Amutu neitamai wareto kurur do?’ tenen, yana dinmai nengda, sunda akati arum neitamai yana weki. Weki dingeda, co deiki di petuprapidi, nimi urasin utopu ketekepra deiamidi, kunumna weik gat keca, er si perak di palepra deiamidi domi patung cap, tonda yuk yala yambul patung cap, tonda kain efod capda, ‘Ange dopropkup’ tenen, akati yana wekidi. Ange yuma doronmai taruda, Lewi yala kaber ngeboda, sun enam ratus (60) jen talena neng cap, kikiman bisi bana ila buplan damai tekmai. 18 Apamubari neng konum Mikha ati weki dingeda, erdi deiamu efod cap, nimi urasin utopu keca patung cap, berhalah si eremami isok-isok tep yambul patung cap dopra deiamipa, dopropi. Ukupipa, Lewi yala kaber ngebodi asipetepu. “Angeda, sun ware keca deiyo tep kunmarum do?” pepra, asipetepu.
19 Upepupa, sundi tamupra pepi, “Kanda kan burudi kan sipyal kinipdongopmemdi, dim pepo! Asimnada, pio meme. Nundi pepkepetopu, melipra nun upupu gekenkamserume. Atep, amenda taru kanda, nun imam ngebo cap, tonda nun nai bo utopu upu pena deiyo ngebo cap keipkamkepe. Imam tenpu nyapsilip tepapu kepmum ngeda gume. Pio telep ngeda, tenpu mutu yala neng yuma tep, upu lepsisingna cap, imam kepra derina capda, pio telepe!” pepi. 20 Aupu penmai pangeda, aLewi yala kaber ngebo, sun apenmai upu pio moupra gekenmau. Gekenmaua cadi, kain efod cap, tonda nimi urasin utopu keca, patung-patung cap, berhalah si eremna isok-isok cap, akeca yumada dopropu dingeda, sun aupu penmai neng cap, tonpa bei.
21 Ukupi dingeda, sun Dan yala nesala yumadi, sun bisi embanmaiyadi, sun men di baramitopu dukdongopra bei. Bisi banmai taruda, sun mepra banmai ngeda, ake. Ada, sun nyapu cap, nimidi peirameng gam keca cap, tonda sun bung keca yala-yala yuma capda, doupra mepra banmaipanen, sun jen talena nengda, amenda tara yakanmai. 22 Ange konum ukupra banmaiyanen, sun konum yambul karenai ortamna mutu beiopda, Mikhadi er cap, er kayapu neng, akati pumbon kikiman dakurami neng yuma cap tep, kong pepupa, yai pangeda, sun cap kikiman wisipra, Dan yala nesala benmai bisipu dombei. Konum sun anesala damai bei. 23 Mikha er tara neng yuma, ila upu deiki di kong pepi. Upepipa, sun Dan yala nesaladi tamupra dipetepidi, Mikha tep asipetepi, “Ada ware keca deiyo tep, kanda nimi pio ila di nun amenyan tara yakanmarum do?” pepra, asipetepi.
24 Asipetepi pangeda, Mikhadi tamupra pepu. “Gume, sunda ne petupra deiamsi keca, isok si eremna tep, nimi urasin utopu keca, patung-patung cap, ne imam ngebo, Lewi yala kaber ngebo cap, upula doupra, dubenmaneruma tepa. Ukupmanerumpa, neda akeca-keca pio gum kupmanera tep, sundi, ‘Ware kunkamar do?’ tenen, asipetepnerum ngeda, ware deiyo tep, aupu pepmanerum do! Tali dim pepra bukaman do? Gume,” pepu. 25 Upepupa, sun Dan yala nengdi tamupra pepi upuda ake. “Kanda kange moupkurume. Pio telep ngeda, sipal kinipdongopkurume. Ato upu pepmempa, kundenkapmengedi sunda nun kankan kunge yu neng gekepkengopda, kan dopra ila di wenepkengedi, kan poryakenunge. Ukupsengepa, kan cap, kan ati neng yuma capda, depkamrume,” pepi.
26 Aupu konum upepi pangeda, sun Dan yala nesela yumada, bisi deipra sun baramitopu kupra ortamna mutu bei. Mikhadi dinmaupanen, banmaiyanen, ‘Uo, sunda ila puto kunung dinin, ne putoda metekanunpu kunerura cadi, dakwapye, ne tapnedi nepe atipu tamupra benkamane,’ tenepu. Atep, sun Dan yala nesalada, pera orkaren mutu bei dingeda, Mikhadi ila puto di, er pe ati damai sepra beu.
Sun Dan yala nesaladi, Lais mutu nesala popbisipya tep, seki upu
27 Dan yala jen talena nengda, Mikhadi ketekepra deiamu patung-patung cap, efod cap, kunumna weik keca perak di ketekeipu keca cap, tonda er melimna tep Lewi yala kaber ngebo, imam pel doramu ngebo cap yumada, konum upula doupra bei. Ukupi dingeda, sun adipapu Lais mutu porbei. Uda, sun Lais mutu kurami nesalada, ila kange telep deiki di kuramidi, yuk mutu nesala tep ngeda, podana pio gum dipapu, telep kange dopra kurami. Ukupra kuramyaipu, sun Dan yala nengdi, Lais mutu neng tep mar porbei. Ukupidi, sun ati-ati yumada uku dongopra gawal daki.
28 Amutu neitamaida, tenpu ila pala ban mutuda, er si Bet-Rehob mutu kwamu. Dan yala nengdi, sun Lais mutu neng yuma popropi taruda, yuk mutu nesaladi, Lais mutu neng tep, ton yana men melimyaia deiyoda, sun Lais mutu nengda, pio bura tara neitamaito kurami. Ukuramya cadi, sunda yuk mutu nesala cap upu men sisingdarami. Sunda, ila karen mutu, Sidon mutu damai men kurami. Ila karen mutu ortara kuramya cadi, yuk mutu nengdi, sun Lais mutu nesala makuna tep, ton yana men melipi. Dan yala nengdi, Lais mutu bisbisa kapidi, sun domi ati yuma uku dongopra gawal daki dinin, amenda taruda, sun Dan yala nesela dipapu, amutu neitamai ati-ati yuma punupra dopra sengpepidi, amutupu talepra kurami.
29 Amutu tep punupidi, amutupu dinin, ukupu si sipepi mutuda, Dan mutu pepi. Asi pepinge deiyoda, sun apu yapudi deipipa, dadeipdanen yakarami nengdi peiami sipu pepi. Tonda, sun co puna ngeboda, er sida Dan perami. Tonda, amutu si tep, Dan pepinge deiyoda, Yakop erdi deiamu mi Dan tep, asi wepra si sipepi. Dinino, pumun taruda, amutu sida, Lais mutu perami.
30 Tali keca si eremna tep, nimi urasin utopu keca petupra deipi ngeda, apatung isok-isok si eremami kecada, Mikha ati pumbon di dalupra dopropidi, dubenami patung-patung yumada, akeca erepra deipidi, isok-isok sipu eremami. Ukupi dingeda, Musadi deiamu ngebo, er si Gersom, er angebodi deiamu ngebo Yonatan cap, tonda Yonatandi deipupa dadeipdanen yakarami neng cap, sun Dan yala nesala tep, imam utopu pel dorami dinin, isok si eremnapu kurami. Sun agerekdanen yakarami nengdi, imam neng kepra deipyakaramidi, isok sipu eremami. Ukupra kupyakaramiyanen, amenda dorkunkamu taruda, yuk karen mutu ila yua nengdi, amenda taru mar poryaidi, sun Dan yala nesala tep popbisipidi, aneng tomopidi, ateng koupra sunda karen mutu dubei.
31 Tonda, Mikha erdi nimi urasin utopu kepra, petupra deiamudi domu keca patungda, tali isok-isok si eremna ngeda, perak di palepra, dopra deipu ngeda, sun Dan yala nesaladi dalupra dopropidi, men taru Lais mutu perami dinin, amutu si teppu, Dan mutu perami mutu neitamaipu deipidi, isok sipu eremami. Amutu kurami taru neitamai yumada, Allah Yahweh er si eremna ati, tek sisi ngeda, tenda opkal bol di dodin ati deipi ngeda, Silo mutu akwamu dinin, sun Dan yala nesaladi, 'Allah er si eremna atida, damai akupmare,' tenena gum di, sun isok sipu eremami.