Kanaan mutu neitamai, amutu tu yuma wilipra bokamunge tep, pepu upu
34
Allah Yahwehdi Musa tep peipu.2 Aupuda, Israel nesala tep peipsena cadi, kandi sun Israel nesala damai bememdi upepkurume. ‘Kanaan mutu bemumdi, nedi sun tep amutu karepsenepa, sundi ange dopra talepkamrum mutu yumada, pio tep akunkamrume. Amutu wilimdonaida ake. 3 Selatan tara kapu mutu tuda, Sin mutu katawai di dipdongopra, Edom mutu tara cap, adinin keteng yakan tara, garam pio weik kure ila laut mokon er sida Laut Mati, tonda Laut Garam peramengaida, aca sekdongopra deipka sirik tara kapu tuda, selatan tara sirikai kupkamre. 4 Tonda adinin iknapi dam tara selatan tarada, mutu si Akrabim bisi ban tara di dipra benamnganen, ongopra Zin mutu dama di, itara adinin, sirik mutu sida, Kades-Barnea mutu di atara wilimdonai sekropkamrume. Tonda, keteng wengbanai ada, Azar-adar mutu di dipra, adinin Asmon tara kapu mutu tu cap, 5 Adinin dukdongopra, keteng wengban tara bena, Asmon tu wilimnai di dipdongopra, Mesir tara ila ban mutu neitamai, me gumai di bena, asirikda, ila laut mokon er si Laut Mediterania damai bena, sirik wilimdonai kupkamre.
6 Tonda keteng wengban tara tep nengeda, sundi ila laut mokon pirimanai, er si Laut Mediterania, aca di wilipropmumdi, aca di keteng yakan tara kure tuda doropkamrume. 7 Arah utara dapu tamna tu wilimdonai tep nengeda, sunda ila laut mokon, er si Laut Mediteraniada keteng wengban tara dinin, ortara neitamai di wilipropmumdi, adinin orketeng yakan tara, Hor mutu tara yuma mutu tu wilimdonai ton dadeipkamrume. Aneitamai kwamu tuda dopropkamrume. 8 Tonda, Hor mutu damai tara di, dipdongopra orketeng yakan tara mutu si Hamat mutu bisi ban tara, adinin Zedad tara cap, dipdongopra wilimdonai dadeipkamrume. 9 Tonda adinin, ortara Zifron mutu damai di dipra, sirikaida Hasar-Enan mutu ada, arah utara tamna, dapu taru tuda, mutu tu wilimdonai ton dadeipkamrume. Aneitamai kwamu tuda bena dopropkamrume.
10 Uda keteng yakan tara mutu tu wilimdonaida, Hasar-Enan tara mutu di dipdongopra, arah selatan iknapi tara dinin Zefam mutu damai tara di bena, wilipropkamrume. 11 Selatan tarada Zefam mutu di dipra adinin, kwerepra Ribla mutu bemumdi, Ai mutu dam tara dinin, keteng wengban tara adi dukdongopra, adinin Galilea mokon damai dinin, dapu tara ada, keteng yakan tara mutu buma di bena, wilipra dopropkamrume. 12 Arah selatan tara tep nengeda, Yordan me pirman tara di dipdongopra, ila laut mokon er sida Laut Mati, adeipka damai di mutu tu wilimdonai sirik ngeda, dopra deipkamrume. Ukupmum dingeda, daneitamai kwamu mutu tu yumada, sun yuk-yuk talepra kunkamrum mutu tu akapseutopu wilipra talepmumdi kunkamrume. 13 Allah Yahwehdi Israel nesala tep peipmau upuda, Musadi konum pepra deipu dingeda aupu ton pepu. “Amutu doropkumum dingeda, sundi, ‘Ange wipkup do, ange do?’ tenen, kael kemna deiyo keca, er sida undi,a ange pel dopmum deiki, si katuai kupmaretopu amutu tu dopropkamrume. Ada, Allahdi pepmasertopu, Israel yala nesala neitamai dinin, topnebari (9) yala nesala cap, tonda, Manasye yala neng dinin, sun neitamai di bokra, Yordan me goupra ortara kunkameng neng cap tep, sun kunkameng mutu ton yuk wilipra deipkurume,” pepmasere.
14 Ukupkamruma deiyoda ake. Sun Ruben yala nesala cap, Gad yala nesala cap, tonda Manasye yala neng dinin, sun neitamai di bokra, Yordan me goupra ortara kunkameng nesalada, sun kunkameng mutu tep, sundi atu konum karepmepupa dopropi. Tonda atupu dopropi ngeda, ada sun nai yapudi deipipa, dadeipdanen yakaramitopu, konum bokra karepmepupa, dopropya tep, amutu tuda pio angepu talepra kunkamenge. 15 Sun anesala pio tep talepra kunkameng mutu tuda, Yordan me duman di dipra ortara keteng wengban tara embaramre dinin, Yordan me goupra keteng yakan tara dinin, Yerikho mutu dam tara tu karepmepupa, ange talepra kunkamenge.
Kanaan mutu tu talepra bongdinkami neng tep, ‘Sun anengdi atu bokra karepkamsenge,’ pepra deipu upu
16 Allah Yahwehdi Musa tep pepu.
17 Amutu kunkamrum nesala neitamai di, sun kunkamrumai tep, tu talepra bongdinkamser nengda ake. Ada imam Elieser cap, tonda Nun erdi deiamu ngebo Yosua cap, sun dipapu amutu tu bokra derinkamserenge. 18 Tonda, amutu tu dorona tep nengeda, sun abutene neng melimna tep, sun Israel nesala neitamai di, yala yuk-yuk akurumya utopu, tenpu yala tep, tenpu ngebo wepra deipkurume. Nimi yuk-yuk ton wepra deipmumpa, sun cap, Elieser cap, Yosua cap, kikiman pel donkamnunge. Adeiki di Yosua cap, Elieser cap, sun Israel yala deiyo neng capdi, sun kunkamrum mutu tu tep nengeda, bokra derinkamsenge. 19 Amutu tu yuma bokra karena tep nengeda, sundi wepra deipi neng sun sida ake: Yuda yala neng neitamai di Yefunedi deiamu ngebo, Kalep wepra deipkurume. 20 Simeondi deiamu neng, sun yala neng neitamai di, Amihuddi deiamu ngebo, Samuel wepra deipkurume. 21 Benyamin yala neng neitamai di Kislondi deiamu ngebo, Eliad wepra deipkurume. 22 Dandi deiamu neng, sun yala neng neitamai di Yoklidi deiamu ngebo, er si Bokki wepra deipkurume.
23 Yusufdi deiamu neng dinin, Manasyedi deiamu neng, sun yala neng neitamai di Efotdi deiamu ngebo, Haniel wepra deipkurume. 24 Efraimdi deiamu neng, sun yala neng neitamai di Siftandi deiamu ngebo, Kemuel wepra deipkurume. 25 Zebulondi deiamu neng, sun yala neng neitamai di Parnah di deiamu ngebo, Elizafan wepra deipkurume. 26 Izakardi deiamu neng, sun yala neng neitamai di Azandi deiamu ngebo, Paltiel wepra deipkurume. 27 Asyerdi deiamu neng, sun yala neng neitamai di Selomidi deiamu ngebo, Ahihut wepra deipkurume.
28 Naftalidi deiamu neng, sun yala neng neitamai di Amihuddi deiamu ngebo, Pedael wepra deipkurume.
Ayala tep deiyo kepi neng Yehudada, Yefune er mi Kalep kepu. Simeonda Amihud er mi Samuel kepu. Benyamin Kislon er mi Eidad kepu. Dan yala ngebo er sida Yokli, er mi Buki kepu. Manasye yala ngebo, er sida Efot, er mi Haniel kepu. Efraim yala ngebo er sida Siftan, er mi Kemuel kepu. Zebulon yala ngebo er sida Parnah, er mi Elisafan kepu. Izakar yala ngebo er sida Asan, er mi Paltiel kepu. Asyer yala ngebo er sida, Selomi, er mi Ahihut kepu. Naftali yala ngebo er sida Amihud, er mi Pedael kepu.
| Yala si | Deiyo ngebo |
| Yehuda | Yefune er mi Kalep |
| Simeon | Amihud er mi Samuel |
| Benyamin | Kislon er mi Elidad |
| Dan | Yokli er mi Buki |
| Yusup er mi Manasye | Efot er mi Haniel |
| Yusuf er mi Efraim | Siftan er mi Kemuel |
| Zebulon | Parnah er mi Elisafan |
| Isakar | Asan er mi Paltiel |
| Asyer | Selomi er mi Amihud |
| Naftali | Ahimud er mi Pedael |
29 Allahdi, “Sun aneng yumada, sun yala yuk-yuk akurumya utopu, sun deiyo kepra talepsengedi, sun kunkamrum mutu tu wilipra derina deiyo nengda, Elieser cap, Yosua cap, sundi tu wilimrengepa melimkameng neng ton wepkurume,” pepra deipupa, wepi neng sun sida aca deiki tara konum sekmape. Ada, sun Kanaan mutu kunkamrumada, aneng dipapu tu bokra derinkamsenge.