Kejadian 38

Atarupu neitamaida, Yakubdi deiamu mi ton, er sida Yehuda, er weitap duap yuma tapra, Adulam mutu bena kuramu. Er cap kikiman kuramu ngebo sida, Hira kuramu. 2 Yehuda amutu neitamai kuramu taruda, Kanaan tara ngebo er sida Shuadi deiamu ner mi antapdarei. Dakunmaipane, amenda taruda, Yehudadi aner dopu. 3 Dopudi, kikiman maramreipa, er ner mundu douamudi, sal mi tenpu deipudi, er si tep Era peprei. 4 Amenda taru, aner dipu sal mi ton deipupa, er si tep, ‘Onan,’ peprei. 5 Amenda taru, sal mi tenpu ton deipupa, er si tep, ‘Sela,’ peprei. Amida, Kesib mutu neitamai di deipu.

6 Sun yuma dakuramipane, Yehuda er menmena taru deiamu mi Erya tep, ner moropupa karepi. Aner sida Tamar kuramu. 7 Yehudadi, ‘Ne mi Erya dopkamre’ tenen, Tamar moropupa, karepi dinin, Allah er si Yahweh er kangeda, ‘Gume, Erya pio malipu kurure,’ teneramnga cadi, Allah er si Yahwehdi dena deiyo keca karepupa, Erya depu.

8 Depupa, Yehudadi er amenda taru deiamu mi Onan tep upepu. “Uda, nun amutu kunup nesala kurameptopu, kan du bo depupa, tapu solu ner kandi dopra kikiman mapmarerumpa, kan du bo er yo pununa tep, nyapu deipkamrerume,” pepra deipu. 9 Yehudadi er mi Onan tep upepu dinin, Onandi utenepu. ‘Gume, aner cap kikiman mapnememnya neitamai di, aner mi deipyopda, amida ne mipu men kupkamre’ tenen, ukuramu. Ada, er cap, Tamar cap kikiman maramrei taru yumada, er den yungda, tu deiki dokotepupa sangmau. Ukuramnga deiyoda, ‘Ne du bo er yo pununa tep, aner cap, ne capdi nyapu men deipkamneme’ tenen, ukuramu.

10 Ukuramu dinin, Allah er si Yahwehdi er kangeda, ‘Onandi ukure ngeda, mali weik kurure,’ teneramudi, angebo Onan tep, Allah er si Yahwehdi dena deiyo keca karepupa, depu. 11 Depu pangeda, Yehudadi Tamar tep, upepu. “Ukutaruda, kan nai sisa damai tamupra bememdi, acapu solu nerpu kunkamreme. Nedi deipsi mi Selada, tupa yambul mipu kurur dinin, yambulanun ton nepyopda, erdi kan tep dopketue,” pepu. Yehudadi upepka deiyoda, ‘Ne mi Sela peda, depkamner do?’ tenen, aupu pepu. Upepka tep, Tamardi Yehuda damai tapra, er nai sisa damai tamupra bena kuramu.

12 Sun yumada pio kuramipane, amenda taruda, Yehudadi doamu ner depu. Ada, Syua er ner mi tepa. Yehuda er ner depupa, ikin kange doupra dakuramu dinin, amenda taru ikine ton men kuramu taruda, mutu si Timna mutu welepu. Ada domba bisam potong touna kael nesala kurami mutu cadi, er domba potong tounmai taru welerbeu. Er beu taruda, er kabo Adulam mutu ngebo Hira cap berei. 13 Sun butene bisi banmarei taruda, yuk nengdi Tamar tep upepi. “Kan yamal bo Yehudada, ‘Ne domba bisam potong toupkamaneng’ tenen, Timna mutu bana tep bisi banmare,” pepi.

14 Upepipa, Tamar gekepudi, sun amutu solu nerapu kuramitopu, er solu nerapu opkal kenengamu ngeda tapra, yuk tali opkal kenekmaudi, ‘Ne urasin epnedi kael kepnerur’ tenen, er urasin cap, giso cap getedongopu. Ukupu dingeda, Timna mutu ban bisi neitamai tenpu mutu si ton, Enaim mutu benmaudi, amutu dana-dana tara wipi beilya buplan dam buku. Ukupka deiyoda, ‘Gume, ne dopneu ngebo, er weit bo Selada konum nepu dinin, erdi ne tep kapul men dopnere. Atep abisi neitamai buknepa, ne yamal bo yan epneryopda tenepkamnere’ tenen, Enaim mutu dam buku.

15 Abukmaupane, Yehuda yau taruda epu dinin, ‘Aner er urasin opkal di getepdongopmara cadi, ada co bo karepmengedi, tali nyangmenge ner adano,’ tenepu. 16 Yehuda tali mangkau kange doupka cadi, ‘E, anerda ne midi dopu ner’ tenena gum di, er bukmauai bena upepu. “Nero, nun kikiman mapkaneme, ange putapnere,” pepra moropu. Upepupa, Tamardi tamupra pepu. “Kan cap mapnemnyopda, kandi wareto keca karepkamnerem do?” pepra asipetepu.

17 Asipetepupa, Yehudadi, “Gume, ne peinun domba bisam kan-kan di, yambul jem domba dopra karepkamakene,” pepu. Upepupnen, Tamardi, “Atep nengeda, ‘Gem domba tek sisi amenda karepkamnere tali men pepnere’ tenena tep nengeda, ware keca karepnetum do? Gem domba konum dopropnyopda, karepkunerem keca tamupra karepkamken ja,” pepu.

18 Upepupa, Yehudadi, “Kandi, ‘Nong kupkamre tenen, karepnetu keca,’ tenepmarem ngeda, wareto keca ke karepkuken do?” pepra asipetepu. Asipetepupa, Tamardi, “Uda, surat deiki co pe palepra deipmengedi, nimi si sengna, tanda tanggan kemna tep, aco pe neitamai darapdongorameng keca, kan kum dam gerekrum ngeda, loptapra karepkunereme. Tonda, kandi talepmarem maca ton karepkunereme,” pepra moropu. Ukupra moropka tep, Yehudadi apenmau keca yuma dopra, aner tep karepmaudi, sun kikiman mapmareipa, Tamardi mundu doupu.

19 Amutu tapra, er pe ati tamupra beu dingeda, er urasin cap, giso cap getepmau opkal kwiritapudi, sun solu nerapu kenengami opkal kange di ton cap kenekudi dakuramu. 20 Amenda taruda, Yehudadi, ‘Ne kapdi jem domba dopra, ne tali nyaksi ner kareprepa, ne ke taru tep aner karepsi keca tamupra kareprepa, duyankamnere’ tenen, jem domba dopra, er kabo Hira Adulam tara ngebo tep karepupa, dubeu. Aner karepkun’ tenen, epetepu dinin, men epu.

21 Men epka cadi, amutu kurami neng tep asipetepu. “Anengo, orwarda, Enaim mutu bisi damai buku ner, nimidi tali nyangamenge nerda, ukutaru dan kurur do?” pepra asipetepupa, sundi tamupra, “Gume, nun mutuda, tali nyangamenge ner, Enaim mutu bisi damai men bukamo, ton men kurure,” pepi.

22 Amutu nengdi upepya tep, Hira tamupra, Yehuda damai beudi upepu. “Kandi pepnemum nerda epetepsi dinin, pio men epsi. Tonda, amutu nengdi, ‘Gume, tali nyangdarameng ner ton, Enaim mutu bisi damai men bungamu, men dinupe,’ pepnei.” 23 Hiradi upepupa, Yehudadi tamupra pepu. “Atep ngeda dakwapye. Nedi aner tep karepsi kecada, tupa epetepnemempa, yuk neng gekepmengedi, autupsenung cadi, dakwapye. Tonda, nedi, ‘Ukupkamkene,’ pepsitopu, metek jem domba karepsipa, karerbenterepmum dinino, men epmuma tep dakwapye,” pepu.

24 Sun yuma tali dakuramipane, ware weneri ton konum kupupa, yuk nengdi Yehuda tep yana lap pepi. “Kau, kan midi doamu ner Tamarda, solu kurur dinin, yuk neng cap tali nyakdaramipa, ukuda mundu konum doupmar adano,” lap pepi. Upepra lap pepipa, Yehudadi upepu. “E, angeda pio mali cadi, nun kurameptopu, aner dopra duyarumdi, ila uku sekrumdi, aner dopra uku dongoprumpa, ukudi jepropkamemere,” pepu.

25 Upepka cadi, anengdi Tamar dorbena dopra duyanmai taruda, anerdi er yamal bo tep surat sekra dokotepu. Asurat neitamai aupu sekra deipu. “Ne mundu doupmanada, tali ngebodi gume. Ne dokotepkene keca talerur ngebodi nyakneue. Atep, atapu cap, amaca cap, co pe deiki darapdongorameng keca, nimi si sengna tanda tanggan kemna keca dipetepmemya deiki di, ‘Angebo aca’ tenen, kael kepkamarem do, gum do?” pepra sekudi, asurat cap, akeca weneri cap Yehuda damai dokotepu.

26 Dokotepupa, Yehuda dopropudi, dipetepudi, mambul kange doupra, ‘Uo, akecada nengepu kurure’ tenen, kael kepu. Kael kepudi upepu. “Uo, nun butene mali kupnumu dinin, nedi aner tep, ne mi Sela men karepsa tep, neda ila mali kupsi dinin, er puda yambul malipu kupu,” pepu. Upepudi, kange di ton cap aner pio men nyakamu. Sun kikiman men mapdarami.

27 Uda, sun yuma tali dakuramipane, Tamar mi deipkou taru kael kepi. Er mundu pumbonda, kwa nyapu kuprei. 28 Akwa nyapu derinmau taruda, tenpu midi er buru bepekra deipmaupa, aner mundu pumbon dadi, er buru katuai kupmaua cadi, ami derina tep melimna nerdi, bi tapu dopra, adeipkou mi er buru gap-gap getepmaudi upepu. “Menmena deipmau mida ange aca,” pepu.

29 Upepu dinin, amida er buru mepropmaupa, kwa mi butene ngeda, menmena deipmau. Deipmaupa, amelimna nerdi upepu. “Ukupra lopdamaumpa, deipmakera cadi, kan sida Peres penkamkepe,” pepmau. 30 Upepmaupa, adipapu kwa nyapu dinin, butene ngeda amenda deipmau. Adeipmau mida, ada arup taru er buru gap-gap deiki bi tapu getepmau mi tepa. Amenda deipmau mi er si tep, ‘Sera,’ pepra deipi.