7
Nuhdi apel dopra kuramupane, amenda taruda, Allah er si Yahwehdi upepu. “Ukuda konuma. Kan cap, kan nyapsilip yuma cap, sun yuma adopmarum gapung co ati wengberume. Ataru kurameng nesala yuma gum dinin, kan tenpupuda dipetepkesipa, dumsisi ngebo kuruma tep, akati wekrume. 2 Akati wekmem taruda, nedi, “Angeda telepe,” peipkesi keca, tu deiki embare gam kure keca, yoneitam bari nukrap ner cap, jem cap kepra bulupkurume. Tonda nedi, “Angeda malinge,” peipkesi keca, tu deiki embare gam kun keca yala yumada, butenepu ner cap, jem cap bulupkurume.3 Tonda, ma yala-yala yumada jem cap, ner cap butene-butene keprap, yoneitam bari pasang nukrap bulupkurume. Akeca yumada, ‘Amenda taru, tuai mutu neitamai gam kunkameng’ tenen, agapung co deiki dopmum ati pumbon dongopkurume. 4 Ukupmemnyopda, atumi di nukrap yoneitam bari tumi konum kupyopda, nedi peipnepa, ila mo cepkamare. Pio weika di cemamreanen, mo cemamrepane, keteng komuni cap, lukunda cap denge weik, 40 tumi deiki di konum cepyopda, ila mokon deiprepa, nedi ketekepra deiamsi gam kure keca yala-yala yuma jeproprepa, pio gum kupkamre. Tuai mutuda, tali dempu kupkamre.” Allahdi pepu. 5 Allah er si Yahwehdi peiputopu, Nuhdi angepu kupu.
6 Allahdi peipupa, tuai mutu deiki ila mokon dokotepu taruda, Nuhda er keteng tamun denge weik, 600 tahun konum kuramu. 7 Nuh cap, er ner cap, erdi deiamu nyapu cap, sundi domi nerapu cap, ‘Ila mokon jepkuser’ tenen, Nuhdi dopu gapung co ati pumbon wengbei. 8 Allahdi Nuh tep, “Ukupkamenge, ukupkamenge,” peiputopu, atarupuda, tuai mutu deiki yanipra baramu keca cap, ma cap, akeca-keca yala-yala yumadi, Nuh damai yai.
9 Yaidi, Allahdi peiputopu, jem cap, ner cap kepra, agapung co deiki dopu ati pumbon wengbei. 10 Wengbeipa, Allahdi peiputopu, tumi yoneitam bari konum kupupa, aila mokon gonga kepra welepmau.
11 Ataruda, Nuh er keteng tamun denge weik, 600 tahun konum kupkopda, ware butenenge neitamai, tumi tujuh belasnge (17) deiki di gonga kepu. Atumi dipapu, ila laut mokon pumbonda, me bungna yuma, me ila puto di bukra welepu. Tonda, im neitamai dadi, pio ila mo weik cemamu. 12 Gonga kepudi, tumi denge weik keteng komuni cap, lukunda cap denge weik, 40 tumi deiki di pio cemnapu kuramu.
13 Atumi dipapu, Nuh cap, er nyapu cap weneri, Sem cap, Ham cap, Yafet cap, uda Nuh er ner cap, tonda, er nyapudi domi nerapu cap, adipapu agapung co deiki dopu ati pumbon weki. 14 Nuh cap, er nyapsilip cap, gapung co ati weki taruda, sun cap, tali bura tara gam kure keca yala-yala yuma cap, nimidi peinung keca yala-yala yuma cap, tuai deiki yanipra embaramre keca yala-yala yuma cap, ma yala-yala yuma cap, Allahdi, “Ukupra ketenepkamrume,” peiputopu yaidi, akati kikiman weki.
15 Ware keca do yuma, isine kupmengedi, tuai mutu gam kure keca yumada, butene-butene kepra, Nuh damai yakanmaidi, ila gapung co deiki domu ati pum weki. 16 Allah er si Yahwehdi Nuh tep, “Ukupkurume,” peiputopu, agam kure keca yumada, jem cap, ner cap butene keprap weki. Yuma konum weki pangeda, Allahdi agapung co deiki domu ati buplan dekdongopu.
17 Atumi di gonga kepra, tumi denge weik, 40 tumi deiki di mo cemna cap, me bungna yuma pio bukra embana cap, pio kuramupane, mokonda pio weika di deipra welepbaramu. Mokon ila di deipra welepbanmaupane, agapung co deiki domu ati ereprapupa, tuai deiki dinin, mokon deiki erepra bukmau. 18 Amokon tupa-tupa pio deipyakanmaupane, agapung co erepra welepbanapu kunmaudi, mokon deikipu bungmau.
19-20 Mokon pio weika di deipra welepu pangeda, ware tuai tara, mutu dup do yuma, im neitamai iriamu tara mutu dup-dupai yuma singipdongopupa, mokon pumbonpu kupu. Ila mutu dup deiki tara peda, mokon deipwelepupa, yoneitam bari meter kupu. 21 Ukupu pangeda, tuai mutu ban-ban yuma kwamu gam kun keca yuma, mokon di jepropupa, yuma depu. Ada ma cap, nimi peirami keca cap, bura tara tali kuramu keca cap, tuai yanipra embaramu keca cap, ayala-yala yuma depi. Nimi tuai nesala yuma peda depi.
22 Tuai mutu ban-ban yuma, isine kwamu keca gam kuramu keca yuma depu. 23 Tuai mutu ban-ban yuma, gam kuramu keca yuma pio gum kupu. Tuai nesala cap, tuai deiki yanipra embaramu keca yala-yala yuma cap, im neitamai lakra embarami me yala-yala yuma cap, akeca yuma gum kupu. Nuh cap, er nyapsilip cap, sun cap gapung co deiki domu ati pumbon weki keca puda, gam kunmai. Yuk keca ton tenpu peda pio gume. 24 Ila mokon konum deipu pangeda, tuai mutu ban-ban yuma singipdongopudi, ue taru denge weik, 150 tumi deiki di kwamu.