Pɛ Davidi dwi dɩm taanɩ
11
Tiu naga mʋ lagɩ ka nuŋi Zesea kugu kʋm yɩranɩ, yɩtu-puli dɩlʋ na nuŋi o nɛ sɩm yɩranɩ tɩn wʋ́ lə biə.b
2 Baŋa-Wɛ Joro maa wʋ́ taa wʋ kʋ tu baŋa nɩ.
Joro kʋm wʋ́ pa o taa jɩgɩ swan dɩ yi-pʋrʋ,
sɩ o taa waɩ o brɩ nɔɔna cɩga.
Joro kʋm ta wʋ́ pa o taa jɩgɩ dam dɩ yǝno,
sɩ o taa kwarɩ Baŋa-Wɛ.
3 O ywəəni maama wʋ́ taa wʋ Baŋa-Wɛ fʋʋn-kɔrɔ kʋm wʋnɩ mʋ.
O bá kwe o yiǝ na nɛ nɔɔna yibiyə na yɩ te tɩn
sɩ o ma o di ba taanɩ.
O ta bá tɔgɩ sawɩa baŋa nɩ sɩ o di sarɩya o pa nɔɔna.c
4 O nan wʋ́ tɔgɩ nɔn-ŋʋnnɩ baŋa nɩ mʋ
o di yinigə tiinə taanɩ.
O maa wʋ́ bʋrɩ cɩga bʋra
o pa nabwənə balʋ maama na zʋʋrɩ tɩga kam nɩ tɩn.
O ni-viu kʋm maa wʋ́ taa jɩgɩ dam tɩga kam je maama nɩ,
sɩ kʋ pa nɔn-balwaarʋ na cɔgɩm.
5 Nɔn-ŋʋnnɩ mʋ o lagɩ o vɔ o təŋə nɩ,
sɩ o zɩgɩ o cɩga wʋnɩ o nii o nɔɔna bam.
6 Wiirəd dɩ pəlbiə wʋ́ taa zʋʋrɩ daanɩ.
Gweerə dɩ bʋ-balɩ dɩ maa wʋ́ taa tigi jǝgǝ dɩdʋa nɩ.
Na-pwalɩ dɩ nyoŋ-pwalɩ wʋ́ taa tɔgɩ dɩ na-paala mʋ sɩ ba mɩ daanɩ.
Bu-balwa maa wʋ́ taa jɩgɩ-sɩ ba niə.
7 Naanɩ dɩ ga-varae wʋ́ zɩgɩ daanɩ ba di.
Ba biə bam dɩ maa wʋ́ taa tigi da-tee nɩ.
Nywəənu dɩ wʋ́ di ga-kʋrrʋ nɩ nabɛ na di te tɩn.
8 Bu-sɩsɩn wʋ́ taa je kapɛ bɔɔna ni nɩ ba kwɛɛra.
Bu-balwa dɩ wʋ́ kwe ba jɩn ba tʋrɩ anakɔyɩbanyi pwəgə je nɩ.
Kʋlʋkʋlʋ zʋnnɩ nan bá yi-ba.f
9 Nɔɔn-nɔɔnʋ daa bá kɩ o doŋ zʋnnɩ,
naa o cɔgɩ kʋlʋkʋlʋ
amʋ Baŋa-Wɛ piu kʋm je maama nɩ.
Bɛŋwaanɩ, tɩga baŋa maama wʋ́ su dɩ
nɔɔna balʋ na yɔɔrɩ ba mɩ dɩ Baŋa-Wɛ tɩn,
nɩ na na yɔɔrɩ ba su nɩnɩʋ kʋm wʋ maama te tɩn mʋ.g
10 Maŋa kam kʋntʋ na yiǝ, lʋgʋ baŋa dwi maama wʋ́ ba Zese dwi tu wʋm te, o yɩrɩ dɩm na wʋ wɛ wɛ tɩn ŋwaanɩ. O maa na zʋʋrɩ mɛ tɩn wʋ́ na zulə lanyɩranɩ.h 11 Maŋa kam kʋntʋ nɩ, Baŋa-Wɛ daa ta wʋ́ tɔgɩ DƖ dam dɩm baŋa nɩ sɩ DƖ ja DƖ nɔɔna balʋ ta na daarɩ yɩ ba wʋ tɩɩnɩ zanzan wʋnɩ tɩn DƖ joori sɔŋɔ. Tɩɩnɩ dɩm kʋntʋ maa yɩ Asiiri, dɩ Ezipi, dɩ Patrɔsɩ, dɩ Kusi, dɩ Elam, dɩ Babilɔnɩ, dɩ Hamatɩ, dɩ je sɩlʋ na wʋ nɩnɩʋ kʋm ni nɩ tɩn.
12 Dɩntʋ mʋ lagɩ DƖ zǝŋi drapoo sɩ tɩɩnɩ dɩm maama na,
sɩ DƖ daarɩ DƖ la Yisɩrayɛlɩ tiinə dɩ Zuda tiinə
balʋ na jagɩ tɩn DƖ kɩ daanɩ.
Bantʋ wʋ́ zɩgɩ tɩga baŋa ni maama nɩ mʋ ba joori.
13 Efrayim dwi tiinə maa wʋ́ yagɩ ba kazwɩ sɩm,
sɩ Zuda dwi tiinə daa yɩ taa kɩ dʋnʋ dɩ ba.
Efrayim tiinə bam daa bá taa kɩ wʋ-gʋrʋ
ba di dɩ Zuda tiinə bam.
Zuda tiinə bam dɩ nan bá culi Efrayim tiinə bam.
14 Ba nan wʋ́ tɔgɩ daanɩ mʋ ba sisəri ba tu
Filisi tɩʋ na wʋ wa-zʋʋrɩ seeni tɩn.
Ba maa wʋ́ kɩ daanɩ
sɩ ba vrɩ nɔɔna balʋ na zʋʋrɩ wa-puli seeni tɩn jɩjɩgɩrʋ.
Ba ta wʋ́ wanɩ Edɔm tɩʋ, dɩ Moabɩ tɩʋ sɩ ba taa te-dɩ,
yɩ Amɔn tɩʋ tiinə wʋ́ ba ba zʋ bantʋ dam kuri nɩ.
15 Baŋa-Wɛ wʋ́ pa tɩ-kʋra pəni
Ezipi nɩnɩʋ kʋm wʋnɩ.
DƖ maa wʋ́ twɩ DƖ jɩŋa DƖ pa viu zaŋɩ
Efratɩ bugə kam baŋa nɩ.
Bugə kam laan wʋ́ cɛ ka ji nabarɩ sɩrpɛ,
sɩ wʋlʋ maama na ve dɩ napra,
sɩ kʋ tu wanɩ o bɛ-ka.
16 Cwəŋə wʋ́ taa tigi ka paɩ Yisɩrayɛlɩ tiinə balʋ ta na daarɩ
yɩ ba zɩgɩ Asiiri tɩʋ nɩ ba joori sɔŋɔ tɩn.
Kʋ maa wʋ́ taa nyɩ dɩ Yisɩrayɛlɩ tiinə bam
dɛɛn na nuŋi Ezipi tɩʋ nɩ yɩ kʋ yɩ te tɩn mʋ.