U Yãhã Mbapẽnge tesẽ mpãy ne u sya yaha
14
Ta n yee ndoo ga yãŋ,
ma u Yãhã Mbapẽnge yãã ke yãŋ nge yĩŋ na pe n yee Syɔ̃.
Nawee- nyerkuay flɛ sẽnsye syãm pye u ne.
U Mbapẽnge myaha ma suhu u Mbapẽnge Tuhufua myaha ne,
te ba yrũhũ pe wakuhu na.
2 Ta n luhu yĩmbui laa ne,
le yir yãhãyĩŋ na mii langbãy tẽŋ dyaŋ,
mii yãhãgbãã tẽŋ dyaŋ.
Yĩmbui lii tẽ luhu,
le pye mii kornjongbãyfa dyaŋ pe te pẽn.
3 Pe nabuar naa yaanfãŋ le ke Yãhã nangbãŋ niisayũhũ yaha ye,
te yrãŋ wãn wãy tesyar yaha ye,
te nanlɛr ne.
Waa sẽ pye u ga waha koo yaa cã mii pe nawee- nyerkuay flɛ sẽnsye syãm sẽ me ye,
poo mpãy pe ba sya yaha kãntraha na.
4 Poo me mpãy ne,
pe sẽ pe ya wluhu tyatyãhã wãpyeŋ kuɛ ye ye,
ma kuee gbɛgbɛ.
U Mbapẽnge ma n gaha teelii teelii,
pe ma u ne.
Nawee- byɛ wo,
poo me nawee- mpãy ne pe cãã sya yaha Yãhã kẽ u Mbapẽnge ne.
5 Kawar sẽ n yi pe yɛ̃ wo ye.
Wãpee laa wee pe na ye.
Yãhãyĩŋ tẽnlɛhɛ tãã Yãhã kasãhã wĩĩ pãã
6 Ta n maha yãhãyĩŋ tẽnlɛhɛ waa yãã,
u n yir yãhãyĩŋ telai wo.
Yãhã kapãyĩĩ lii wãkuayãã wee le na ye,
le pye u ye wãpãã wĩĩ driyɛ̃fa ye,
kãntrɛ byɛ nawee- ne,
nawee- ter byɛ ne,
yor ter byɛ nawee- ne,
kui byɛ nawee- ne.
7 U naa le pãã fãnga ne ma yee:
«-Ye naa n fya Yãhã na,
-ye naa ke miingbãŋ gboho!
Ye sẽ yãã,
ke kasãhã yale nɔ wa.
Koo gii ke yãhãyĩŋ tãhã,
kãntraha ne,
muhulangbãŋ ne,
lɔr yisar ne,
-ye naa ke sey!»
8 Yãhãyĩŋ tẽnlɛhɛ syãŋ wuhu waa ter n taha,
ma nii n yee:
«Le too,
le kungbãy Babilɔn too,
loo lii le kui byɛ nawee- ta pe n dye tyatyãhã wo,
mii defĩĩ wɔfa dyaŋ wãwɔyai wee pe na ye.»
9 Yãhãyĩŋ tẽnlɛhɛ tãã wuhu waa ter n taha mii na,
ma nii le pãã fãnga ne ma yee:
«Wii u ke waygapyãhã wãŋ sey ke yirfua ne,
ma maha ke puhu gbãã u wakui na,
kaa na u koho na,
10 ufua -sẽ ga ba Yãhã ncafũhũ defĩĩ wɔ ke ncafũhũ sekui wo,
ngaa gɛ saa le wlãhã woo defĩĩ nwo wo u n nii yaayaa ye.
U ga naa fɛngbãn sya naa laam wo,
maha naatarmiy ne ke wo,
pe yãhãyĩŋ tẽnlɛhɛyɔ̃m yaha ye,
u Yãhã Mbapẽnge ne.
11 Mpãy pe ke waygapyãhã wãŋ sey ke yirfua ne,
tesẽ mpãy ne ke puhu gbãã pe na,
pe fɛngbãn naawur n yir yalebyɛ wãyɛryãã wee ye.
Wũũ saa pye yãã poo na kueekuee ye,
ke yai ke yĩmper.»
12 Loo ne,
mpãy pe n tɔ̃r Yãhã nawee- ne,
pe yai pe pe ya plãhã ke Yãhã kãnde kataŋ wãyãr ne,
tesẽ pe Yesu wãtaŋ ne pe Yatɛr.
13 Ta n luhu yĩmbui laa ne,
le yir yãhãyĩŋ na,
ma ra pye ma yee:
«Ma yai ma nde yrũhũ ma yee:
Ma gbe yagaa na,
mpãy pe n ku le Yesu kãnde wo,
poo wĩĩ n tãy!»
Yãhã Yrã bya n yee,
ãwã cĩĩnde ne,
a loo na pe ga wũũ pe tẽŋ ne,
a pe kayũhũ ma ke n taha pe na.
Driyɛ̃ wãsãhã yale
14 Ta n yee ndoo ga yãŋ,
ma yãhãsyɔ̃r raa yãã wãfir.
Waa ba tege nii te yãhãsyɔ̃r na.
U pye mii nawee dyaŋ.
Yĩŋfua sãn nkifai laa pye u yĩŋ na;
yũnklũhũ gaa pye u koho wo,
ke yɛ̃ wãtãy!
15 Yãhãyĩŋ tẽnlɛhɛ waa n yi ke yãhãyĩŋ Yãhã kangbãŋ wo,
ma pãã fãnga ne wii ye u ba nii te yãhãsyɔ̃r na,
ma u pye ma yee:
«Yir,
ma kãntrahafa pẽn!
Ma sẽ yãã,
pe wĩĩ ma mii dir dyaŋ te gbeyale nɔ wa.
Ma yũnklũhũ gbe,
ma re dir wãn kuãy!»
16 Wii u ba tege nii te yãhãsyɔ̃r na,
u n u yũnklũhũ gbe kãntrahafa myaha na;
kãntrahafa n gbe mii dir wãn dyaŋ pe ne gbe.
17 Yãhãyĩŋ tẽnlɛhɛ waa n maha yi ke Yãhã kangbãŋ wo.
Yũnklũhũ pye u bya ye,
ke wãtãy!
18 Yãhãyĩŋ tẽnlɛhɛ waa n maha yi ke Yãhã diŋ yisaha fla na.
Naa fãnga pye u ye.
U n pãã fãnga ne yãhãyĩŋ tẽnlɛhɛ wii ye yũnklũhũtãhã pye u ye,
ma u pye ma yee:
«Ma yũnklũhũtãhã gbe,
ma kãntraha defĩĩ katyisan kuãy;
ma sẽ yãã,
kãntraha defĩĩ katyipir nɔ wa wãgbeŋ na.»
19 U n u yũnklũhũ gbe kãntrahafa myaha na,
ma tẽn tẽ pe na mii defĩĩ katyipir dyaŋ tuu kuãy,
ma miy le wãã tyahangbãŋ wo,
pe pii pe n tãhã na.
Yãhã ncafũhũ tyahangbãŋ kẽ koo ne.
20 Pe n pe kãntrahafa tãhã defĩĩ pii dyaŋ le klo kãnkãy na.
Ntɔ̃r n cããŋ yi ga deydey,
kilo kurɛ gbeebua syi.
Pe wãcuhu ga waha nsyãŋ yigi ke yɛ̃ tãy.