U cɔɔ, tesẽ ke nwɔngbãŋ wãtrũhũ ne
12
Kayar wĩĩ laa n yi yãhãyĩŋ wo,
wãngbãy!
Le pye cɔɔ waa,
yai u maha tã,
yroŋ ne u trɛ tãã ye.
Yĩŋfua nkifai laa pye u cɔɔ yĩŋ na,
le pye yrompii sẽnsye syãm ne.
2 U cɔɔ pye lai ne,
ma naa n kui.
Le ba u yigi,
ma naa u yaa.
3 Kayar wĩĩ laa ter n maha yi yãhãyĩŋ na.
Loo pye nwɔngbãŋ gaa wãtrũhũ,
ke pye wãyãhã naa dyaŋ.
Ke pye yĩy kuasĩĩ ne,
yĩhĩ sẽnsye ne.
Yĩŋfua nkifaha kuasĩĩ pye te yĩy na.
4 Yãhãyĩŋ yrompii wãlaŋ flɛ tãã,
ke nanuɛ̃ naa fla neŋ syi yrompii pɛ tege naa n yaha kãntraha na.
Le lai le u cɔɔ yigi,
ke nwɔngbãŋ wãtrũhũ n ga yɛr u cɔɔ yaha ye,
koo ga u puee kaa,
puee wii u ga see.
5 U cɔɔ n naa kicar see.
U puee n kuã yir ga ta Yãhã yaha ye,
ke nangbãŋ niisayũhũ tãy.
Woo puee kẽ u ga ba yĩnfar gbe kãntrɛfa byɛ na,
fãngangbãŋ ne.
6 U cɔɔ n fã ga tẽyãfũũ klo wo.
Yãhã ba teele laa gbihi yaha u kẽ ke fla na,
u waha naa u yɛ̃ digi yãã plii yĩĩkuay gbeetãã nsoho wo.
7 Loo kur ye,
naan taa n yir yãhãyĩŋ wo.
Yãhãyĩŋ tẽnlɛhɛ yĩŋfua waa pe n yee Minsyɛl,
woo ma suhu u tẽnlɛhɛ ne,
pe n naan cɛr ke nwɔngbãŋ ne ke sãndãpee ne.
8 Pe n yia ke nwɔngbãŋ na,
pe sãndãpee ne,
ma pe kar kãã yãhãyĩŋ wo.
9 Ke nwɔngbãŋ n miy tege wãã.
Koo kẽ nwoho gii ne ke pye faale wo,
koo kẽ pe n yee sãndãpee yĩŋfua,
pe maha ke yee Setane;
koo kẽ ke driyɛ̃fa byɛ wlaŋ.
Ke n miy tege wãã kãntraha na,
ke sãndãpee byɛ ne.
10 Ta n luhu yĩmbui laa ne,
le yir yãhãyĩŋ na fãnga ne,
ma ra pye ma yee:
«Yagaa,
syayahayale nɔ wa,
Yãhã fãngangbãŋ ne,
ke yĩnfar ne;
te yĩnfar wãã ke Yĩndefua Crise kẽ.
Ye sẽ yãã,
wo nampyeŋ- wãpee pããfua
Setane miy tege yaha;
woo kẽ u naa pe wãpee pãã Yãhã yaha ye,
ke yai ke yĩmper.
11 Wo nampyeŋ- yia u na,
u Yãhã Mbapẽnge ntãŋ kãmay na,
tesẽ Yãhã cĩĩnde lii ne pe naa n pãã,
ma sya pe yrã kẽ ma ku.
12 Loo ne yãhãyĩŋ yai ke naa nuhu di,
tesẽ yii yãhãyĩŋfa ne.
Kãntrahafa,
yii poo na,
muhulangbãŋfa ne,
kayĩhĩ ma ke n pai ye ye.
Ye sẽ yãã,
u sãndãpee yĩŋfua tege ga ye kuɛ ye.
Tuu cã draha sẽ gboho u ye ye,
ncafũhũ n u yigi.»
13 Ke nwɔngbãŋ ke yãã ke miy tege yaha kãntraha na,
ke n u cɔɔ kar,
cɔɔ wii u u naa kicar see.
14 Fle nkaasyir sĩĩ raa n wãã u cɔɔ kẽ,
u waha yir u ka le tẽyãfũũ klo wo,
u niisaha wo.
Koo fla na,
u ga naa u yɛ̃ digi yãã dyɛ- tãã gblihi ne,
ke nwɔngbãŋ saa maha waha nɔ u na ye.
15 Ke nwɔngbãŋ n langbãŋ gaa pur yi wãã ke yɛ̃ wo,
u cɔɔ kur kuɛ ye,
ma ga u gbe tɛr mii lafeŋ dyaŋ.
16 Kãntraha n u cɔɔ sya yaha,
ma ke yɛ̃ yãr,
ma ke lafeŋ loho byɛ le wãã tãŋ,
loho gii ke nwɔngbãŋ ba pur yi ke yɛ̃ wo.
17 Ke nwɔngbãŋ laam n sroŋ war u cɔɔ ne,
ke n sya tɛr ma ga naan cɛr u cɔɔ pii na.
Poo me pe Yãhã kãnde yãr,
ma maha le cĩĩnde le yaha pe laam wo,
cĩĩnde lii Yesu le yar.
18 Loo kur ye,
ke nwɔngbãŋ n yir yɛr muhulangbãŋ yɛ̃ na.