Ke puhu kuasĩĩ wuhu wãkuãŋ
8
U Mbapẽnge tuu ke puhu kuasĩĩ wuhu kuã,
yãhãyĩŋ laam n nii seyĩĩ yalaale wo.
2 Ta n yee ndoo ga yãŋ,
ma pe yãhãyĩŋ tẽnlɛhɛ kuasĩĩ yãã,
pe ba yɛr Yãhã yaha ye.
Pe n tũũtũũ kuasĩĩ wãã pe kẽ.
3 Yãhãyĩŋ tẽnlɛhɛ waa ter n pa,
ma ba yɛr ke sãn Yãhã diŋ yisaha yahasee ye,
sãn wusuna cĩĩ ne u koho wo.
Pe n wusuna le u kẽ dege,
u ga u suhu Yãhã kẽ pe Yãhã nawee- byɛ Yãhã wãnar ne,
ke Yãhã diŋ yisaha yĩŋ na,
ke ma ke nangbãŋ niisayũhũ yaha ye.
4 Ke wusuna naawur n yir le cĩĩ wo u koho wo,
pe Yãhã nawee- Yãhã wãnar ne,
ma dugu ga Yãhã yaha ye.
5 U n le wusuna sãn cĩĩ gbe,
ma le yĩĩ ke Yãhã diŋ yisaha fla naa ne,
ma le miy yaha driyɛ̃ kãntraha na.
Pe n luhu gbleŋ nkãy ne,
yãhãgbãã tẽŋ ne,
Yãhã wãyɛhɛ kalkal ne,
kãntraha n yɛhɛ.
Te tũũtũũ
6 Pe yãhãyĩŋ tẽnlɛhɛ kuasĩĩ mpãy pe pye te tũũtũũ kuasĩĩ ne,
pe n pe ya gbihi te wãwuu na.
7 U yãhãyĩŋ tẽnlɛhɛ wãcir n u tũũtũũ wuu.
Sesantĩhĩ ma suhu naa ne ke wlãhã ntɔ̃r ne,
pe n too kaha woo driyɛ̃ kãntraha na.
Kãntraha wãlaŋ flɛ tãã,
ke fla neŋ n suhu.
Katyir wãlaŋ flɛ tãã,
ke fla neŋ katyir n suhu,
nyɛ̃pẽn byɛ n suhu.
8 U yãhãyĩŋ tẽnlɛhɛ syãŋ wuhu n u tũũtũũ wuu.
Ngaa,
mii yãŋ dyaŋ naa ke yigi tãŋ,
ke n miy le wãã muhulangbãŋ laam wo.
Ke muhulangbãŋ wãlaŋ flɛ tãã,
ke fla neŋ n wã klaha nii ntɔ̃r.
9 Yrãŋ wãn tii byɛ te ma ke muhulangbãŋ wo,
te wãlaŋ flɛ tãã,
fla neŋ wãn n ku.
Te salangbãy wãlaŋ flɛ tãã,
fla neŋ wãn n pye klaha-.
10 U yãhãyĩŋ tẽnlɛhɛ tãã wuhu n u tũũtũũ wuu.
Yrompua wãngbãŋ gaa n yir yãhãyĩŋ na,
ma ba too.
Naa pye u na mii terbui dyaŋ.
Lafey wãlaŋ flɛ tãã,
u n too fla neŋ syi lafey na,
tesẽ lɔr yisar ne.
11 Woo yrompua myaha kasruhu.
Te lɔr wãlaŋ flɛ tãã,
fla neŋ syi lɔr n wã klaha kasruhu.
Nawee- busãã n te lɔr wɔ,
ma ku.
Te tee ba sruhu naa n tɛr.
12 U yãhãyĩŋ tẽnlɛhɛ resyar wuhu n u tũũtũũ wuu.
Yai wãlacɛr flɛ tãã,
yroŋ wãlacɛr flɛ tãã,
pe yrompii wãlaŋ flɛ tãã,
too nde byɛ flɛ naney n wã klaha,
ma nii wam.
Yai yãhãcãã- wãlaŋ flɛ tãã,
fla neŋ syi cãã n yi kãã.
Kaa n yi kãã yĩmper cãã- na koo syi.
13 Ta n yee ndoo ga yãŋ,
ma luhu fle waa ne tuu n yir yãhãyĩŋ laam wo,
ma le gbey n pãã fãnga ne ma yee:
«Kayĩhĩ ma,
kayĩhĩ ma,
kayĩhĩ ga kãntrahafa dye pe yãhãyĩŋ tẽnlɛhɛ tãã mpãy tũũtũũ wuuyale wo,
poo pe n pai!»