Prumpamaan tentang bibit di macam-macam tana
4
1  Satu kali Yesus mangajar lei di pinggir danau Galilea. Di situ banya skali orang datang bakumpul pa Dia. So itu, Dia nae ka prao tu da berlabu di pinggir danau trus dudu di situ, kong tu orang banya ada di pinggir danau. 2 Yesus kase ajar banya hal pa dorang pake prumpamaan. Dia kase ajar bagini pa dorang,
3 “Dengar bae-bae, ada tu petani pigi baambor bibit. 4 Samantara dia baambor di kobong, ada tu bibit yang da taciri di jalang, kong burung-burung datang teto tu bibit sampe abis. 5 Ada lei bibit tu da taciri di tana babatu-batu, tu de pe tana cuma sadiki. Tu bibit di tampa itu capat batumbu, lantaran de pe tana sadiki. 6 Mar serta matahari so kaluar, tu tanaman itu layu kong kring lantaran de pe akar nyanda tatanang butul di tana. 7 Kong tu bibit laeng da taciri di tana yang ada rumpu baduri. Serta tu bibit mulai batumbu, tu rumpu baduri lei batumbu jadi lebe basar kong gepe tu tanaman sampe so nimbole mo babua. 8 Mar tu bibit laeng komang da taciri di tana subur kong batumbu subur trus babua. Tiap pohong de pe hasil ada tu tiga pulu kali lipa, ada tu anam pulu kali lipa, deng ada lei tu sratus kali lipa.” 9 Yesus bilang lei, “Sapa tu ada talinga, badengar jo bae-bae.”
10 Serta Yesus so kurang sandiri, tu dua blas murit deng orang-orang tu da iko pa Dia batanya pa Dia tentang arti dari tu prumpamaan tadi. 11 Kong Yesus manyao, “Tuhan Allah beking ngoni bole tau tu rahasia tentang bagimana Tuhan Allah Berkuasa sbagai Raja. Mar pa orang laeng, tu hal itu da se tau pake prumpamaan, 12  supaya apa tu da tulis di Kitab Suci mo jadi,
‘Biar dorang balia,
mar dorang nyanda mangarti apa tu da lia.
Biar lei dorang badengar,
mar dorang nyanda mangarti.
So lantaran dorang bagitu,
dorang nyanda bertobat kong dapa ampung.’ ”
Yesus kase tau arti dari prumpamaan bibit
13 Abis itu, Yesus bilang pa dorang, “Ngoni nyanda mangarti so tu prumpamaan tadi? Kong bagimana dang ngoni mo dapa mangarti tu prumpamaan laeng? 14 De pe arti bagini: tu bibit yang petani da se ambor sama deng tu firman yang orang ja kase tau. 15 Tu bibit yang da taciri di jalang sama deng orang-orang yang da dengar tu firman. Pe klar dorang dengar, setang pe bos datang ambe tu firman dari pa dorang. 16 Tu bibit yang da taciri di tana babatu-batu, itu sama deng orang-orang yang da dengar tu firman kong iko trima deng hati snang. 17 Mar tu firman nyanda baakar butul pa dorang pe hati, so itu nyanda lama da batahang. Kalu dapa siksa deng mendrita lantaran percaya tu firman itu, dorang iko jadi nyanda percaya lei pa Tuhan. 18 Tu bibit yang da taciri di tana yang ada rumpu baduri sama deng orang-orang yang so dengar tu firman, 19 mar dorang talalu kuatir deng tu dorang pe hidop deng dorang tagila-gila deng harta deng lei tu keinginan-keinginan laeng. Samua itu beking tu firman nyanda ada de pe arti pa dong pe hidop, itu sama deng tu firman nyanda babua pa dong pe hati. 20 Kong tu bibit yang da ciri di tana subur, itu sama deng tu orang-orang yang badengar tu firman kong trima itu. Dorang hidop iko tu Tuhan pe mau, sama deng tu bibit yang da batumbu sampe babua. Ada yang babua tiga pulu kali lipa, ada tu anam pulu kali lipa, deng ada lei tu sratus kali lipa.”
Prumpamaan tentang pelita
21  Yesus bilang pa dorang, “Nyanda ada orang tu da pasang pelita kong tutu deng loto ato taru di kolong koi. Pasti dia taru pa de pe tampa supaya trang. 22  Bagitu lei, apa yang skarang ini tasambunyi, nanti orang mo dapa tau, deng apa yang skarang ini masi jadi rahasia, nanti orang mo tau. 23 So itu sapa tu ada talinga, badengar jo bae-bae!”
24  Kong Yesus bilang ulang, “Inga bae-bae apa tu ngoni da dengar. Kalu ngoni cari mangarti bae-bae, Tuhan Allah mo beking ngoni mangarti, kong Dia tamba lei sampe ngoni mo lebe mangarti. 25  Soalnya kalu ada orang yang mo trima tu Tuhan pe firman, Tuhan mo beking dia lebe mangarti. Mar kalu ada yang nimau mo trima tu Tuhan pe firman, apa yang dia so tau, Tuhan mo ambe lei dari pa dia.”
Prumpamaan tentang bibit yang batumbu sandiri kong babua jadi banya
26 Yesus bilang lei, “Tuhan Allah Berkuasa sbagai Raja pa Dia pe orang-orang, itu bole mo se sama deng ni prumpamaan: ada tu satu petani da baambor bibit gandum di kobong. 27 Tiap malam dia tidor serta so siang dia bangong, kong dia so nyanda inga lei deng tu bibit itu. Tu bibit itu batunas, batumbu trus sampe jadi tinggi, mar dia nintau bagimana kong tu gandum sampe jadi bagitu. 28 Soalnya tu tana itu sandiri yang da kase kaluar tu de pe hasil. Pertama tu tana kase batumbu de pe tunas, de pe batang kong de pe gandum yang baisi. 29  Kalu tu gandum itu so masa, tu petani itu iko pi potong lantaran so de pe oras bapete.”
Prumpamaan tentang Tuhan Allah berkuasa sbagai raja
30 Yesus babilang lei, “Kita mo pake satu prumpamaan for se trangkan tu Tuhan Allah Berkuasa sbagai Raja. 31 Tuhan Allah Berkuasa sbagai Raja bole mo se sama deng tu biji paling kacili yang da kase ambor di tana. Tu biji itu yang paling kacili dari samua biji yang ada di dunia. 32 Mar kalu tu biji itu se ambor di tana, dia batumbu kong jadi lebe basar dari samua tanaman di kobong sayor. De pe cabang-cabang basar sampe burung-burung bole mo basombar kong basarang di situ.”
33 Kong ada banya prumpamaan yang sama deng itu, tu Yesus ja pake for kase tau tu firman pa dorang. Dia ja mangajar pa dorang iko apa tu dorang mampu mo mangarti. 34 Dia cuma ja pake prumpamaan kalu mangajar pa tu orang banya. Mar kalu kurang Dia deng De pe murit-murit, Dia se tau deng jelas samua tu prumpamaan pe arti.
Yesus kase tedo tu angin kancang di danau
35 Di hari itu, serta so sore, Yesus bilang pa Dia pe murit-murit, “Mari jo torang pigi ka sabla danau.” 36 Kong dorang kase tinggal tu orang banya itu trus nae ka prao tu Yesus da nae akang. Yesus deng Dia pe murit-murit pigi deng prao, kong tu prao-prao laeng baku iko deng dorang. 37 Nyanda lama datang angin kancang, kong ada omba lei bapaka tu prao sampe tamaso akang aer kong tu prao mulai punung deng aer. 38 Waktu itu Yesus da tasono pake bantal di bagian blakang prao, kong Dia pe murit-murit se bangong pa Dia, dorang bilang, “Guru, Guru jang kase biar torang so mo mati.”
39 Yesus badiri kong togor deng kras tu angin, deng bilang pa tu danau itu, “Badiam! Tenang jo!” Trus tu angin badiam, kong tu danau jadi tedo skali.
40 Abis itu, Yesus bilang pa Dia pe murit-murit, “Kiapa ngoni tako? Kiapa ngoni nyanda percaya pa Kita?”
41 Dorang so tako skali kong baku bilang, “Sapa so Dia sebenarnya sampe tu angin deng omba di danau iko Dia pe prenta?”