Zlghafta ta Zwaŋa Lazglafta, tsaya ghuɓasaptá ghəŋa haɗik
5
1 Dər wati ma mndu ta zlghaftá mnay kazlay:
*Yesu ná,
*Kristi ya kəʼa,
tsa mndu ya ná,
nda na ka Zwaŋa Lazglafta.
Ka ɗvu ɗva tsa mndu ya ta Da ni Lazglafta katsi ná,
dzaʼa ɗvu ɗva guli ta zwana Lazglafta.
2 Ka ɗvu ɗva mu ta Lazglafta,
ta snay mu ta zlaha ni guli ná,
tsaya kəl amu ka snaŋta ɗvu ɗva mu ta Zwana Lazglafta kəʼa.
3 Snata mu ta zlaha Lazglafta ná,
tsaya ɗvafta mu ta Lazglafta kahwathwata.
Bla a tsa zlahuha niª ya guli wa.
4 Inda zwana Lazglafta ná,
ghuɓasap ghuɓasa həŋ ta ghəŋa haɗik.
Nda ghuɓasa ghəŋa haɗik,
kabga nda fa ghəŋa mu ta Yesu Kristi.
5 Wa mndu ta ghuɓasaptá ghəŋa haɗik na?
Ba mndu ta zlghafta kazlay:
Yesu ná,
Zwaŋa Lazglafta ya kəʼa ta ghuɓasapta.
Masləmtsəka Yesu Kristi
6 *Yesu *Kristi ná,
sasa ta ghəŋa haɗik,
ka lam tsi nda ma ima batem,
ka pghiŋtá tsi ta usa ni ma mtakwa niª.
Lami nda ma ima batem kweŋkweŋ yeya wu,
pghiŋ pgha ta usa ni guli.
Sulkuma Lazglafta ta mnamatá tsa skwiha ya kazlay:
Mantsa ya nzakwa ni kəʼa,
kabga haɗ tsatsi ta tsakalawi wa.
7 Hkən skwiª ta maramaŋta kazlay:
Yesu ná,
Zwaŋa Lazglafta ya kəʼa.
8 Tsa skwiha hkən ya ná,
mamu Sulkuma Lazglafta,
nda imi,
nda us.
Tsa skwiha hkən ya ná,
ka skwa turtuk gwaɗa taŋ.
9 Ka si ta tsuʼay mu ta gwaɗa ta mnata mnduha ta ghəŋa skwi ta nghaŋta həŋ ya ní,
malaghu mala a ŋa Lazglafta ma gwaɗa ta mnata,
ka ŋa mnduha ra?
Lazglafta ka ghəŋa ni ta mnaŋtá tsa skwiha ya ta ghəŋa zwaŋa ni.
10 Mndu ta zlghaftá Zwaŋa Lazglafta ná,
nda sna tsatsi kazlay:
Kahwathwata tsa skwiha ya kəʼa.
Mndu kul zlghaftá Lazglafta guli ná,
niŋ na ta Lazglafta ka tsakalawi,
kabga kwala ni kul zlghaftá skwi mna Lazglafta ta ghəŋa zwaŋa ni.
11 Vlama vla Lazglafta ta hafu ŋa kɗekedzeŋ.
Tsa hafu ya guli ná,
nda ma zwaŋa ni Yesu ta mutsakwa tsi.
Mantsa ya ka Lazglafta mnamata.
12 Mndu ta zlghaftá Zwaŋa Lazglafta,
nda mutsa hafa ni.
Mndu kul zlghatá Zwaŋa Lazglafta guli ná,
mutsa a hafa niª wa.
Hafu ŋa kɗekedzeŋ da Lazglafta
13 Vindaghunaf vinda yu ta tsa skwiha ya,
ŋa kaghuni gwal ta zlghaftá Zwaŋa Lazglafta,
kada grafta kuni kazlay:
Mutsaf mutsa kuni ta hafu ŋa kɗekedzeŋ kəʼa.
14 Ta lagha mu ta kəma Lazglafta da ɗawa skwi manda ya ta zɗəganata ná,
har ghəŋa mu,
kabga ta snamasna.
15 Ka nda sna mu kazlay:
Ta snamasna ta inda skwi ta ɗawu mu da tsi kəʼa,
nda sna mu guli kazlay:
Ta vlama vla kahwathwata ta inda skwi ɗawaŋ mu kəʼa.
16 Ka nda ngha mndu ta zwaŋama ni ta ga dmaku,
dzaʼa kwal kul klaghata da mtaku ŋa kɗekedzeŋ katsi,
ka maga tsi ta duʼa da Lazglafta ta ghəŋa tsa mndu ya ŋa vlaŋta Lazglafta ta hafu.
Tsa hafu ya,
ŋa gwal ta ga dmaku dzaʼa kwal kul klaghatá həŋ da mtaku ŋa kɗekedzeŋ dzaʼa vla lu.
Mamu dmaku ta kla mndu da mtaku ŋa kɗekedzeŋ.
Mna a iʼi kazlay:
Ka maga kuni ta duʼa da Lazglafta ta ghəŋa mndərga tsaya kəʼa wa.
17 Inda skwi ta mag lu kul ɗinaku ná,
dmaku ya.
Nziya nza tsi,
mamu dmaku kul haɗ ta kla mndu da mtaku ŋa kɗekedzeŋ.
18 Nda sna amu kazlay:
Dər wati ma mndu ta nuta ka Zwaŋa Lazglafta ná,
haɗ ta gəgəltá dmaku wa.
Zwaŋa Lazglafta ta nghay,
laviŋ a halaway ta ksaŋta wa.
19 Nda sna amu kazlay:
Nda na amu ka zwana Lazglafta kəʼa.
Sanlaha ma mnduha ta ghəŋa haɗik ná,
ta ma dzva halaway həŋ demdem.
20 Nda sna amu guli kazlay:
Sasa Zwaŋa Lazglafta ta ghəŋa haɗik ka vlamatá tsi ta ɗifil ŋa snaŋtá vərɗa Lazglafta kəʼa.
Ka ndiʼaftá mu ta vgha nda vərɗa Lazglafta nda ya nda zwaŋa ni *Yesu *Kristi.
Tsatsi ná,
vərɗa Lazglafta ta vlamatá hafu ŋa kɗekedzeŋ ya.
21 Zwana ɗa,
ɗasuwa ka kuni,
yaha kuni da ŋana vgha nda skwa wuyay.