Gwal ngha Igliz
3
1 Nana gwaɗa dzaʼa yu mnay na ná,
gwaɗa ŋa faftá ghəŋ tida ya.
Ka ɗvaf ɗva mndu ta slna nzaku ka mali ta ghəŋa *Igliz katsi ná,
ŋərma skwi ya ɗvaŋ tsi.
2 Ɗina ka nzakwa mali ta ghəŋa Igliz,
ka mndu kul haɗ rutsak tida,
turtuk ka markwa ni,
zlahafzlaha katsi ta ghəŋa ni,
ta ndanay katsi ta ndanu tɗukwa,
ɗina ka nzakwa ni,
ta tsuʼay katsi ta mayəm ga taŋ,
nda sna katsi ta taghanaftá skwi ta mndu,
3 ma nza tsi ka mndu ta sa ima inabi,
ma nza tsi ka mndu ta sidi,
ama leɓtekw ka nzakwa ni.
Ma nza tsi ka mndu ta ghazeŋzeŋ,
ma nza tsi ka mndu ɗvutá ta tsedi.
4 Nda sna katsi ta ŋanatá həga ni,
nda sna katsi ta zlaha zwana ni ŋa nzakwa taŋ ka zwani ta sna gwaɗa nda hanata ghəŋ guli.
5 Ka si sna a mndu ta ŋanatá həga ni wu katsi,
wa kəʼa dzaʼa laviŋtá nghaftá Igliza Lazglafta na?
6 Ma nza tsa mndu ya ka lfiɗa mndu ma zlghay nda ŋuɗuf,
da glə tsi ta ghəŋ,
da zləmbamtá tsi ma mndərga tsa guma tsanagha lu ta halaway ya.
7 Ɗina ka nzakwa ni ka mndu ya ta ghubu dər gwal kul snaŋtá Lazglafta,
kada nzakwa tsi ka mndu kul haɗ lu ta gagay nda gaga,
da zləmbamtá tsi da dəɓəla halawayª.
Gwal ksa slna ma səla mnduha
8 Gwal ta ksa slna ma səla mnduha ya guli,
ɗina ka nzakwa taŋ.
Yaha həŋ pgha wirak his ma vu,
yaha həŋ nzakway ka gwal ta sasaku,
ka gwal ta zba tsedi nda ta ghwaɗaka tvi.
9 Ɗina ka nzakway taŋ ka gwal ta ŋanatá kahwathwata ya marigiŋ lu ma zlghay nda ŋuɗuf nda fata ndanu kul haɗ sana dga ghəŋ.
10 Ɗina ka dzəghaŋtá həŋ karaku.
Tahula tsa,
ka haɗ sana skwi ŋa mnafta ta həŋ wu katsi,
laviŋ lava həŋ ta nzakway ka gwal dzaʼa ksa slna ma səla mnduha.
11 Mantsa ya miʼaha ta ksa slna ma səla mnduha guli.
Ɗina ka nzakwa taŋ.
Haɗ wu ka həŋ ta kuslemberaku,
zlahafzlaha ka həŋ ta ghəŋa taŋ,
ka ŋərma ni ka həŋ nzakway ma inda skwi.
12 Mndu ta ksa slna ma səla mnduha ná,
turtuk ka markwa ni,
pərɗafpərɗa katsi ta zlaha zwana ni nda gwal ga taŋ tani.
13 Ka nda tva ni ta ksa gwal ta ksa slna ma səla mnduha ta slna katsi ná,
ta vlaŋ vla lu ta glaku ta həŋ ma inda vli.
Laviŋ lava həŋ ta gwaɗa taŋ kul haɗ zləŋ ma fatá ghəŋa taŋ ma zlghay nda ŋuɗuf ma *Yesu *Kristi.
Hya skwi ta vlamata zlghay nda ŋuɗuf
14 Ta vindi yu ta na ɗelewer na ŋa gha ná,
nda fa ŋuɗufa ɗa ta lab da nghaghaghata.
15 Ala,
ka gərɗugərɗa yu katsi,
dzaʼa nda sna ka ká ka dzaʼa nzaku ma həga Lazglafta ta nzakway ka *Igliz,
hahəŋ guguɗi ta dihanatá kahwathwata.
16 Manda va tsaya ná,
dagala nzakwa skwi ya nda ɗifa payaf Lazglafta,
ta nzakway ka Kristi ya zlghaf mu.
Marigiŋ mara Lazglafta ka mnda səla.
Tɗukwa nzakwa ni,
ka Sulkum nda ghuɓaª maraŋta.
Nda ngha duhwalha Lazglafta,
ka mnə lu ta gwaɗa tida,
ŋa inda gwal kul nzakway ka la Yahuda.
Ka zlghaftá mnduha ma inda vli ta ghəŋa haɗik.
Ka klaghatá Lazglafta ta luwa da vla glakwa ni.