Skwi dzaʼa magaku ta saha Yesu
2
1 Zwana ma ɗaª,
ta kumay ŋni ta mnaghunatá gwaɗa ta fitika sagha dzaʼa sagha Mghama mu Yesu Kristi,
nda gwaɗa ta fitika tskavata dzaʼa tskavata mu ta kəma ni ya.
Wya skwi ta ndəɓu ŋni ta dzvu da kaghuni:
2 Ka mamu mndu ta mnaghunata kazlay:
Sagha sa fitika sagha Mgham *Yesu kəʼa,
yaha kuni da zləŋ ka ghuya ghəŋa ghuni.
Dər má la anabi tsi,
dər má snaŋ nda sna a kuni ta gwaɗay,
dər iʼi a ta vindaghunafta ká lu má mnaghunata.
3 Yaha yaha mndu da nanaftá kaghuni dər nda wati ma tsakalawi.
Gi ɓaŋalaŋ a dzaʼa sagha tsa fitik ya wa.
Makəɗ tsaya ná,
nda ndəgha gwal dzaʼa gaftá sidi nda Lazglafta,
ŋa saba tsa ghwaɗaka mndu ya dəɗay ta daɓi.
Tsatsi mndu ta nzakway ka ghuma.
4 Dzaʼa sliʼavaf sliʼa ta ghəŋa inda skwi nda ghuɓa,
nda ya ta ghəŋa inda skwi ta tsəlɓu lu ta tsəlɓu ta kəma ni.
Ŋa nzamtani ma həga Lazglafta,
ŋa mnay ni kazlay:
Iʼi Lazglaftaª kəʼa.
5 Mnaghuna mna yu ta inda tsa skwiha ya ma fitika nzakwa ɗa da kaghuni.
Zaghunapza ra?
6 Ndanana ná,
nda sna kuni ta skwi ta ŋaghutá tsa ghwaɗak ya.
Ka sagha sa tsa fitika ni ya ná,
dzaʼa zlagap zlaga.
7 Aŋ mndani,
nda ghada ta magakumagaku slnaha ni.
Ma tsanaŋta tsa mndu ta ŋaghuta ya ta tvi dzaʼazlay ná,
kɗekkɗek a dzaʼa maga tsi ta slna ni wa.
8 Dzaʼa sab sa ta daɓi.
Ma sagha dzaʼa saghaª Mghama mu Yesu ma glakwa ni,
ŋa zaɗanata ni nda hafu dzaʼa vuslagapta tsi ma wa ni.
9 Nda mbrakwa halaway dzaʼa saba tsa ghwaɗaka mndu ya,
ŋa magay ni ta inda mazəmzəmha,
nda inda skwi ya ta ndrakawu lu nda ndrakawa,
nda inda mandərmimi ŋa nanaª mnduha.
10 Dzaʼa magay ta inda ghwaɗaka skwiha ŋa nanaghatá gwal ta zaɗa ghəŋa taŋ,
kabga kwalaghuta taŋ ta tsuʼafta,
ɗvaf a həŋ ta kahwathwata má dzaʼa mbanaftá həŋ ya wa.
11 Tsaya kəl Lazglafta ka ghunagatá mbrakwa zaɗaku ta ghəŋa taŋ ŋa zlghafta taŋ ta tsakalawi,
12 kada tsanaghata Lazglafta ta guma ta inda tsa gwal ta kwalaghuta zlghaftá kahwathwata,
zɗəgana maga ghwaɗaka skwi ta həŋ ya.
Nzaku ka mnda zlghay nda ŋuɗuf nda diha
13 Aŋni,
nda ra ka rfay ŋni ta Lazglafta ta ghəŋa kaghuni zwana ma.
Ɗvu ɗva Mgham *Yesu ta kaghuni kabga Lazglafta ta zbaptá kaghuni daga ta taŋtaŋ,
ŋa mbaghunafta nda ma slna Sulkum,
ka faghutá kaghuni nda ghuɓa,
ma zlghafta ghuni nda ŋuɗufa ghuni ta tsa kahwathwata ya.
14 Ŋa tsaya kəl tsi ka hgaftá kaghuni nda ma *Lfiɗa Gwaɗa ya mnaghuna ŋni,
ŋa mutsafta ghuni guli ta glakwa hga Mghama mu Yesu *Kristi.
15 Tsaya tama zwana ma ɗa ná,
dihavawa diha,
ka ŋanata kuni ta inda tsa skwiha taghaghunaf ŋni ya,
dər ya mnaghuna lu nda mna,
dər ya vindaghunafta lu nda vinda a tsi.
16 Ta maga duʼa yu da Mghama mu Yesu Kristi tsatsi ka ghəŋa ni,
nda ya da Da mu Lazglafta ya ta ɗvutá amu,
ya ta zɗaŋtá huɗi ka lɓamatá ŋuɗuf ŋa kɗekedzeŋ,
nda skwi faf mu ta ghəŋ tida.
17 Ka lɓaghunatá tsi ta ŋuɗuf,
ka vlaghunatá tsi ta mbrakwa gɗata ta maga skwi ɗina ɗina ma slna nda ya ma gwaɗa.