Slna Pwal ma luwa Tesalunik
2
1 Zwana ma ɗa,
nda sna kaghuni kazlay:
Nza a tsa lagha lagha ŋni da kaghuni ya ka bətbət wu kəʼa.
2 Nda sna kaghuni guli ka ŋni ghuytá ɗaŋwa ma luwa Filipiya,
nda ya ká həŋ razaŋnata.
Ama ka taftá ŋni ta us ta iri nda mbrakwa Lazglafta ka mnaghunatá *Lfiɗa Gwaɗa ta sagha da Lazglafta mataba ndəghata ghuya ɗaŋwa.
3 Gwaɗa ya mnə ŋni ná,
haɗ tsakalawi mida wu,
haɗ nənɓa kaghuni mida wu,
haɗ bara kaghuni mida guli wa.
4 Katək ná,
manda va ya klaf Lazglafta ta aŋni kazlay:
Nda ra kuni ka mna Lfiɗa Gwaɗa kəʼa ka vlaŋnata ya,
manda va tsaya ta mna aŋni.
Mna a aŋni ŋa zɗanaftá ŋuɗuf ta mnduha wu,
ŋa zɗanaftá ŋuɗuf ta Lazglafta ta mna aŋni.
Nda sna tsatsi ta skwi ma ŋuɗufa mu.
5 Nda sna kaghuni kazlay:
Ta walaŋ a aŋni ta hihiŋaŋtá hihiŋaku da mndu wu kəʼa.
Haɗ gwaɗa ŋa hahatá mndu gwaɗa ŋni wa.
Nda sna Lazglafta kazlay:
Mantsa ya nzakwa ni kəʼa.
6 Ŋəvaŋ a aŋni ta rfaŋnaghata mnduha,
dər kaghuni,
dər sanlaha ma mnduha wa.
7 Dər má dzaʼa maray ŋni ta glakwa nzakwa ŋni ka ghunata mnda *Kristi mndani ná,
maraŋ a aŋni wa.
Katək ná,
leɓtekw hanaganata ŋni ta ghəŋa ŋni manda ya ta nghə marakwª ta zwana ni ya.
8 Ma tsa fatá ghəŋa ŋni ŋa ghuni ya ná,
mnaghunatá Lfiɗa Gwaɗa ta sabi da Lazglafta kweŋkweŋ yeya a mnaghuna ŋni wa.
Kumaŋ kuma ŋni ta vlaghunata nda hafa ŋni tani,
kabga lam la kuni da ŋuɗufa ŋni kahwathwata.
9 Zwana ma ɗa,
ta havak hava kuni ta datá vgha ŋni ka maga slna da kaghuni.
Si ta ksay ŋni ta slna nda rviɗik tani,
nda fitik tani,
kada kwala ŋni da ghuyanaptá ɗaŋwa ta dər wati mataba ghuni,
nda skwi ŋa zay ŋni ta mnə ŋni ta Lfiɗa Gwaɗa ta sagha da Lazglafta ŋa ghuni.
10 Nda sna kaghuni kazlay:
Nda nza kaghuni ka masləmtsəka ŋni kəʼa.
Mantsa ya nzakwa ni da Lazglafta guli.
Ka ŋərma mnduha nzata ŋni da kaghuni,
ka mnduha Lazglafta,
ka gwal tɗukwa nzakwa ŋni,
haɗ sana skwi ŋa tsaŋnavata wa.
11 Nda sna kaghuni guli kazlay:
Manda nzatá nzakwa i da nda zwana ni ya nzata ŋni nda inda kaghuni,
12 ka vla hiɗaku nda mbraku ŋa ghuni.
Vlaghuna vla ŋni ta hiɗaku,
ŋa nzay ghuni ta nzaku manda ya ta kum Lazglafta ya ta hgaftá kaghuni ŋa lama ghuni da ga Mghama ni nda glakwa ni ya.
13 Ta gɗa gɗa ŋni ta rfa Lazglafta guli,
kabga ma fitika mnaghunata ŋni ta gwaɗa Lazglafta ná,
tsuʼaf tsuʼa kuni,
ka zlghafta manda va gwaɗa gwaɗagap Lazglafta,
manda ya gwaɗagap mnduha a wa.
Manda va tsaya nzakwa ni kahwathwata,
sagha da Lazglafta tsa gwaɗa ya,
ka ksə tsi ta slna ma kaghuni ta zlghafta ya.
14 Zwana ma ɗa,
nuna kaghuni manda Igliza Lazglafta ta nzakway ma *Yesu Kristi ta haɗika Zudiyaª ya.
Ghuy ghuya kaghuni ta ɗaŋwa da gwal ta haɗika ghuni,
manda ya ghuyanap la Yahuda ta hahəŋ ya.
15 Tsa la *Yahuda ya ta pslatá la anabi,
ka dzatá həŋ ta Mgham Yesu,
ka limistá həŋ ka giriª ŋa mu guli.
Zɗəgana a tsa skwi ta mag həŋ ya ta Lazglafta wu,
nda nza həŋ ka ghuma inda mnduha.
16 Ta kumay həŋ ta pyaftá aŋni ta mna gwaɗa Lazglafta ŋa gwal kul nzakway ka la Yahuda,
yaha həŋ da mbafta.
Ndanana,
hɗanam hɗa həŋ ta dmakwa taŋ,
ka kɗavakta tsi nda ɓasafta Lazglafta ta ŋuɗuf ta ghəŋa taŋª.
17 Aŋni zwana ma,
tahula dgata mu ta vgha lab la fitik mida,
kuma mu yeya kul guyafta.
Nziya nza tsi ná,
kawadaga mu ma ŋuɗuf.
Ta ksaŋna ksa mamaya ghuni katakata.
Ta kumay ŋni ta nghaghunaghata.
18 Mantsa ya ná,
kumaf kuma ŋni ta vradaghata da kaghuni.
Nda kɗa fitika iʼi Pwal ka ghəŋa ɗa ta fatá fitika ni,
ama ka pyaftá halaway ta aŋni.
19 Ta wa fatá ghəŋa ŋni,
nda haratá ghəŋa ŋni,
nda ghərɓa zewzewa glaku dzaʼa ŋni mutsay baɗu fitik dzaʼa sagha Mgham Yesu Kristi ya katək na?
Ta kaghuni ya a katək tsa wa?
20 Manda va tsaya nzakwa ni,
kaghuni glakwa ŋni,
kaghuni haratá ghəŋa ŋni.