Skwi slgaf mndu, tsaya dzaʼa tsi tskay ta vwah
6
1 Zwana ma ɗa,
ka nda ngha kuni ta mndu ta maga skwi kul ɗinaku katsi,
kaghuni ta pghu Sulkum ya,
vranakwavra ta vərɗa tvi,
ama ɗasuwa ka kuni magay.
Ɗasuwa ka vərɗa kagha guli da ksutá tsi ta kagha.
2 Katuvuswa vgha ma kərta ndəgaku sani nda sani.
Ma magay ghuni mantsa ya,
dzaʼa nzakwa kuni ka gwal snatá zlaha *Kristi.
3 Ka haɗ mndu taɓta iʼi wu,
ka mndu tsaw ta slaf a ka sana skwi kay guli wu ná,
nana ghəŋa ni ta nanə tsi.
4 Kinawu nzakwa ŋa ɗa ma slna ná,
ká inda mndu ngha slna ni.
Tsaya dzaʼa kəl tsa mndu ya ka rfa ghəŋa ni,
nda sanlaha a dzaʼa laghwa tsi gray wa.
5 Ŋa ghəŋa ni ta maga mndu ta inda skwi.
6 Ka kla a kla mndu ta taghanata lu ta gwaɗa Lazglafta,
ta skwi mataba inda skwiha ni,
ka vlay ŋa mndu ta taghanata.
7 Yaha kuni nanətá ghəŋa ghuni.
Haɗ Lazglafta ta zlaŋtá mndu ta nənɓay wa.
Ka nu slgaª mndu ya ná,
tsaya dzaʼa tsi tskay guli.
8 Ka ŋa sluʼuvgha slga mndu katsi,
ŋa sluʼuvgha dzaʼa tskə tsi,
ŋa zaɗamtani mida.
Ala ka ŋa Sulkum slga mndu,
ŋa Sulkum dzaʼa tsi tskay,
ta nzakway ka hafu ŋa kɗekedzeŋ.
9 Ma zlaŋ mu ta maga skwi ɗina,
ma rwu mu ta vgha,
kabga dzaʼa tskay mu saghar fitika ni.
10 Mantsa tama,
ta tsekeʼ luwa ná,
magama maga ta skwi ɗina ɗina ŋa inda mndu.
Katkatatani ŋa zwana ma mu ma zlghay nda ŋuɗuf.
Ga zgu
11 Nghawa ndandaghulaʼatá na vindi na ɓa!
Nda dzva ɗa vindafta yu.
12 Tsa mnduha ta kuma mblaftá kaghuni ka tsa fafaɗ ya ná,
ta kumay həŋ ta ghubay mnduha ta həŋ.
Skwi kəl həŋ ka magay mantsa ya ná,
wara ghuyay taŋ ta ɗaŋwa ta gwaɗa ta udza zləŋay *Kristi ya.
13 Vərɗa tsa gwal nda ɗatsa fafaɗa taŋ ya ná,
haɗ həŋ ta maga skwi ta kum zlahu wa.
Ta kumay həŋ ta ɗatsata ghuni ta fafaɗ,
ŋa ghubay taŋ ta ghubakwa taŋ ta ghəŋa ɗatsatá fafaɗa ghuni.
14 Iʼi taɗa,
ta ghəŋa mtuta mtu Mgham *Yesu Kristi ta udza zləŋay yeya ta ghubə yu ta ghubakwa ɗa.
Ma tsa mtuta ni ta udza zləŋay ya,
mtuta skwi ta kum sluʼuvgha ma iʼi,
ta mtuguduŋta iʼi guli ta skwi ta kum sluʼuvgha.
15 Tsatá fafaɗ ná,
sana skwi a wu,
kwal kul tsatá guli ná,
sana skwi a wa.
Nzata mndu nda hafu vlama Lazglafta,
na mali ma skwi.
16 Ka nza zɗakwa Lazglafta nda tawa hiɗahiɗa ni ta ghəŋa inda gwal ta snatá na skwi ta tagh yu na.
Mantsa ya guli ta ghəŋa gwal ta nzakway ka vərɗa Israʼila Lazglafta.
17 Tahula tsa tama,
yaha mndu walglaŋta diɗiptá vgha,
kabga miviɗ ya ta vgha ɗa ta maray kazlay:
Ŋa Yesu Kristi yu kəʼa.
18 Zwana ma ɗa,
ka nza zɗakatahuɗa Mghama mu Yesu Kristi kawadaga nda kaghuni!
*Amin.