Vuʼa a wu, Zwaŋa Lazglafta ya
4
1 Wya skwi ta kum yu ta mnay:
Ka ta ka zwaŋ mndu dzaʼa za tsa həga ya,
haɗ skwi ta dganata nda vuʼa dər má ŋa ni inda skwi wa.
2 Ma tsa nzakwa ni ta ka zwaŋ ya ná,
ta snana sna ta ŋa gwal ta nghapta ka tsatsi,
nda ŋa gwal ta nghapta ka tsa huzlaha ni ya tani,
ha ka lagha ta tsa fitik tsaf da ni ya.
3 Manda va tsaya nzakwa ni da amu guli.
Ma fitika nzakwa amu ka zwani ta kul sagha gwaɗa ta *Kristi ná,
ta ga vuʼa skwiha ta ga mgham ma na ghəŋa haɗikª na amu.
4 Ama magatá tsa fitik ya,
ka ghunagata Lazglafta ta zwaŋa ni.
Marakw ta yagata ma sagha ni,
ka nziŋtá tsi mista zlaha Musa,
5 kada varagapta tsi ta gwal ta ga vuʼa mista tsa zlahu ya,
kada nuta ŋni ka zwana Lazglafta.
6 Ŋa maraŋta kazlay:
Zwana ni kuni kəʼa,
ka ghunagatá Lazglafta ta Sulkuma zwaŋa ni da ŋuɗufa mu.
Tsa Sulkum ya ta mnay kazlay:
Aba!
Daª!
kəʼa.
7 Tsaya tama ná,
nza a ka ka vuʼa wu,
zwaŋa ni ka.
Ka nda nza ka ka zwaŋa ni,
nda nza ka ka mnda za həga ma zɗakatahuɗa Lazglafta.
Ɗasuwa ka la Galat da nzəglaku həŋ ka vuʼa
8 Ghalya ma fitika kwala ghuni kul snaŋtá Lazglafta,
vuʼa skwa wuyay kul nzakway ka vərɗaª Lazglafta si ta gə kuni.
9 Ndanana tama,
manda snaŋta ghuni ta Lazglafta,
ta snaŋtá Lazglafta ta kaghuni ná,
waká kuni ta vrəglaghuta mista sana skwiha kul haɗ mbrakwaª taŋ,
kul haɗ rəga taŋ,
kul haɗ ghəzliwa ta na?
10 Ta fa fa kuni ta ghəŋa ghuni ka wara sana vaghuha,
nda sana tiliha,
nda sana fitikha,
nda sana vakuhaª!
11 Ta vlihatá zləŋ skwi ta mag kuni.
Manda skwi ka bətbət tsa slna ɗa magaghuna yu ya,
ka yu.
12 Zwana ma ɗa,
wyawa dzvu,
nzawa nza manda iʼi,
manda ya nza iʼi manda kaghuni ya.
Haɗ dmaku giha kuni wa.
13 Nda sna kaghuni,
ma zlrafta ɗa ta mnaghunatá *Lfiɗa Gwaɗa ná,
ma ɗaŋwa yu.
14 Aŋ mndani,
tsa ɗaŋwa ɗa ya ná,
ghwaɗaka ɗaŋwa ya.
Nduk nda tsa,
mbiɗa a kuni ta iʼi wu,
vziɗ a kuni wa.
Katək ná,
manda tsuʼa duhwala Lazglafta tsuʼafta kuni ta iʼi,
manda tsuʼa *Yesu *Kristi ka kuni tsuʼaftá iʼi.
15 Ga tsa rfu si ta rfu kuni ghalya ya?
Nu ta magay ndanana kul haɗ kuni ta rfu?
Graf gra yu kazlay:
Ma tsa fitik ya,
ka má si ta magaku tsi ná,
má tsatsakwaslap tsakwasla kuni ta ira ghuni ka vlihata kəʼa.
16 Nda nza yu ka ghuma ghuni ndana,
kabga vəl mnaghunata ɗa ta kahwathwata rki?
17 Tsa mnduha ya ná,
ta ŋava ŋa həŋ ka ŋaghunata,
ama nda tva ni a wa.
Ta kumay həŋ ta dgaghunata nda iʼi,
kabga ŋa ŋavata ghuni mista taŋ.
18 Ɗina ŋavata,
ka nda tva ni tsi.
Inda fitik katsi tama guli,
ma kzlə lu ta nzakwa ɗa mataba ghuni kada magay.
19 Zwana ɗa,
ta ɓasəgəltá vgha yu ta ghəŋa kaghuni manda marakw ta ɓasa yaku,
ha ka nghavata Kristi dar ma kaghuni.
20 Ndanana ná,
ta kumay yu ta nzavaghunata kada snaŋta yu ta skwi ŋa mnaghunata,
kabga kɓiɗif kɓa kuni katakata.
Nzakwa i Hadzara nda Sara
21 Na kaghuni ta kuma nzaku mista zlahu ná,
mnihawa mna,
sna a kuni ta skwi ta mnə tsa deftera zlahu ya rki na?
22 Ká lu vindafta ta ghəŋa Abraham na:
Mutsaf mutsa ta zwani his,
pal nda marakw ka vuʼa,
pal nda marakw kul haɗ ka vuʼa.
23 Tsa zwaŋa tsa marakw ka vuʼa ya ná,
nda ndana sluʼuvgha tsaya.
Tsa zwaŋ ya tsa marakw kul haɗ ka vuʼa ya guli ná,
manda ya tanaf Lazglaftaª ta imi ta sləməŋ tsaya.
24 Ma tsa skwi ta luta ya ná,
mamu klatá ghəŋa skwiha his mida,
kabga tsa miʼaha his ya ná,
dzratá wi his ya.
Taŋtaŋa dzratá wi ná,
ta ghwá Sinay.
Ka vuʼa ta ya tsatsi ta zwani.
Tsaya ta nzakway ka Hadzara.
25 Tsa Hadzara ya ta nzakway ka ghwá Sinay ta haɗika Arabiya.
Nda luwa Ursalimaª gitana ta gra lu,
kabga tsatsi nda zwana ni tani vuʼa həŋ.
26 Ursalima ya ta luwa ná,
nza a ka vuʼa wu,
tsaya ta nzakway ka mamu ta amu.
27 Nda vinda ma deftera Lazglafta kazlay:
Rfa ta rfu,
kagha dzəghəŋ ta kul yanaghutá zwaŋ!
Rfa ta rfu,
ka hayaya ka ta hayayə,
kagha ta kul walaŋta ɓasa yaku ya,
kabga mal ndəghata zwana marakw vziŋ zəʼalaª taŋ,
ka ŋa marakw ya ta nzaku nda zəʼala taŋ kəʼa ya.
28 Zwana ma ɗa,
kaghuni zwana tata imi ta sləməŋ manda nzakwa Izak ya.
29 Ma tsa fitik ya,
tsa zwaŋ ya lu ma ndana sluʼuvgha ya si ta giri ŋa tsa zwaŋ ya lu manda ya kumaf Sulkum ya.
Ta manda tsaya nzakwa ni kulam gita.
30 Tsaw ká lu vindafta ma deftera Lazglafta na:
Ghzliŋ ghəzla ta tsa marakw ka vuʼa ya nda zwaŋa ni tani,
kabga haɗ zwaŋa marakw ka vuʼa dzaʼa za həga nda zwaŋa marakw kul nzakway ka vuʼaª wu kəʼa.
31 Mantsa tama zwana ma,
nza a amu ka zwana marakw ka vuʼa wu,
zwana marakw kul nzakway ka vuʼa amu.