Mnay Pwal ta Lfiɗa Gwaɗa
9
1 Laviŋ a yu ta maga inda skwi wu ra?
Ghunata mnda *Yesu *Kristi a yu wu ra?
Ngha a yu ta Mgham Yesu nda ira ɗa wu ra?
Pəghatá ghəŋa slna ɗa mamgham Yesu a kaghuni ra?
2 Dər má fa a sanlaha ta iʼi ka ghunatá mnda Mgham Yesu wu ná,
ka ŋa kaghuni ná,
nda nza yu kabga iʼi ta mnaghunata *Lfiɗa Gwaɗa kəl kuni ka nzakway ka gwal zlghay nda ŋuɗuf.
3 Wya skwi ta kəl yu ka huzla gwaɗa da gwal ta mana iʼi:
4 Má ra a ka mutsay ŋni ta skwi ŋa zay,
nda ya ŋa say ŋni ma slna ta mag ŋni ra?
5 Laviŋ a aŋni guli má ta kliŋtá makuma ma zlghay nda ŋuɗuf ta nzakway ka markwa ŋni manda ŋa sanlaha ma gwal ghunay,
nda i zwana ma ni mamgham Yesu,
nda Kefas wu ra?
6 Ari aŋni nda Barnabas yeya a ŋa maga slna ka mbalay na?
7 Ta kəɗ snaŋta kaghuni ta sludzi ta maga slna,
tsatsi guli ta zuŋtá ghəŋa ni ra?
Mamu mndu ta ŋəɓata fu ná,
kul za yakwa ni ra?
Ari mamu a mndu ta ngha rini ná,
kul sa uʼa tsa rini ya na?
8 Mnda səla yeya ta ndana tsa skwiha mnə yu ya ra?
Dər zlaha Lazglafta guli ná,
ta mnay mantsa.
9 Wya ka Musa vindafta ma zlaha Lazglafta:
« Yaha ka da fanamtá budzaŋ ma wi ta sla ta ɗgə tsi ta alkamaª,
» kaʼa.
Ta ghəŋa sla yeya ta ndana Lazglafta ta tsaya ra?
10 Ari ta ghəŋa amu a ta gwaɗa Lazglafta kahwathwata katək na?
Mantsa ya nzakwa ni,
ta ghəŋa amu vindafta tsi ta tsa mnay kazlay:
Ta hvə mndu ta hva ná,
nda fata ghəŋa ni ŋa mutsa nisəla ni katsi,
ta ɗgə mndu ta hya guli ná,
nda fa ta ghəŋa ni ŋa mutsa nisəla ni katsi kəʼa ya.
11 Ka si aŋni ta sləgamtá hulfa Sulkum ma kaghuni ya ní,
ra a ka tsuʼay ŋni ta skwa wa dzvu da kaghuni guli ra?
12 Ka ta zay zay sanlaha ta kaghuni ya ní,
mal aŋni a má dzaʼa zay katək wu ra?
Ta ɗawaŋ a aŋni ta skwi da kaghuni wa.
Ta suʼay aŋni ta inda ghuya ɗaŋwa ta slaŋnaghata,
kabga yaha ŋni nzata ka gwal ta pyaftá sliʼa gwaɗa ta ghəŋa Kristi ta kəma ta kəma.
13 Sna a kuni kazlay:
Gwal ta ksa slna ma həga Lazglafta ná,
hada ta za həŋ ta skwa zaya taŋ kəʼa ra?
Gwal ta vla skwi ta gwir guli ná,
mida ta mutsa hahəŋ ta ŋa taŋ guli kəʼa ra?
14 Ta ghəŋa gwal ta mna Lfiɗa Gwaɗa guli ná,
mna mna Mgham Yesu kazlay:
Ma tsa mna Lfiɗa Gwaɗa ya dzaʼa za hahəŋ ta ŋa taŋ guliª kəʼa.
15 Iʼi ná,
ɗawaŋ a yu ta skwi da kaghuni wa.
Ka vlihata kuni a ka yu kəl yu ka vindaghunafta guli wa.
Ta dər mtakwa ɗa,
ka ya dzaʼa kləgədəɗusta lu ta skwa ghərɓakwa ɗa.
16 Tsa mna Lfiɗa Gwaɗa ta mnə yu ya guli ná,
nza a ka skwa ghərɓay ɗa ta ghərɓaku nda tsi wu,
kabga tkweʼ faɗighata lu ta mnay.
Ka mnaŋ a yu wu ná,
ɗaŋwa ŋa ɗa.
17 Ka má iʼi ta kuratá magay katsi ná,
ma dzaʼa play lu ŋa ɗa.
Tsaw iʼi a ta kurata wu,
ta magay yu kabga tkweʼ faɗighata lu ta magay.
18 Nu ta mutsə yu mida tama?
Skwi ta mutsə yu mida ná,
mnay ɗa ka mbalay ta Lfiɗa Gwaɗa kul ɗawa nisəla vəl mnay ɗa ta tsa Lfiɗa Gwaɗa yeya.
19 Iʼi ta kwara ghəŋa ɗa,
tsaw ka niŋtá yu ta ghəŋa ɗa ka vuʼa inda mnduha ŋa kataŋtá inda mnduha kada mutsanakta yu ta Mgham Yesu ta ndəghata mnduha.
20 Ka mataba la *Yahuda yu,
manda hahəŋ ka yu ta nzaku,
kada mutsakta yu ta həŋ.
Ka mataba gwal ta ksa zlaha Musa yu ya,
manda hahəŋ ka yu ta nzaku,
kada mutsakta yu ta həŋ,
dər má nghaɗigha a gwaɗa ta zlahu.
21 Ka mataba gwal kul snaŋtá zlaha Musa yu ya,
manda hahəŋ ka yu ta nzaku kada mutsanakta yu ta həŋ.
Va a tsaya ta mnay kazlay:
Sna a yu ta zlaha Lazglafta wu kəʼa wu,
ta snay yu ta zlaha Kristi.
22 Ka mataba gwal nda hta mbrakwa taŋ ma zlghay nda ŋuɗuf yu ya,
manda hahəŋ ka yu ta nzaku,
kada mbranafta yu ta həŋ.
Mantsa ya fata iʼi ta ghəŋa ɗa,
ka nzaku ta vata dər wati ma mndu tsi ka maga inda kɗavakta hiɗakwa ɗa ŋa mbaʼatá sanlaha.
23 Kada dzaʼa Lfiɗa Gwaɗa ta kəma ta kəma,
nda ya ŋa nzakwa iʼi tekw mida guli,
ka yu ta kəl yu ka maga tsa skwiha ya.
Dzəgha vgha nda hwaya
24 Sna a kuni kazlay:
pɗaʼ pghatá vgha mnduha ta hwaya ta daɓi ná,
turtuk ya dzaʼa zata kəʼa ra?
Hwayawahwaya ta vərɗa hwaya kada zata kuni.
25 Inda mndu ta tsa hwaya ya ná,
ta zlahafzlaha ta vgha ni ma taghayni,
ŋa zata ni.
Tsa skwi dzaʼa zata tsi ya ná,
dzaʼa ɓwadzu ɓwadza misimmisim.
Ŋa amu ya,
haɗ ta ɓadzaku ɗekɗek wa.
26 Hwayiŋtahwaya ka bətbət a ta hway yu wa.
Vzidiŋtá dembi ka dakwal a ta dzə yu guli wa.
27 Ta zlahay yu ta ghəŋa ɗa ka ghuya ɗaŋwa ŋa ni,
kada kwala vərɗa iʼi ta dəɗaghuta nda hul tahula mnanata iʼi ta *Lfiɗa Gwaɗa ta sanlaha.