Ksa saɗa Kristi
15
1 Na amu nda mbra ma zlghay nda ŋuɗuf na ná,
kataŋma kata ta gwal nda hta mbrakwa taŋ.
Ma laghu mu da zba skwi ta zɗəgamata.
2 Magama maga ta skwi ta zɗəganatá mnda səla ŋa kataŋtá həŋ ŋa ŋlakwa taŋ ma zlghay nda ŋuɗuf.
3 *Kristi ná,
zbaŋ a tsatsi ta skwi ya ta zɗəganata wa.
Ama manda ya nda vinda ma deftera Lazglafta na:
« Tsa razu ta razu mnduha ta kagha ya ná,
ta iʼi dəɗafta tsiª,
» kaʼa.
4 Tsaw inda skwi ya vindaf lu ma deftera Lazglafta manda ghalya ná,
vindaf vinda lu ŋa gunamatá sləməŋ,
kada nzakwa mu nda fata ghəŋ ta Lazglafta,
ma lɓa ŋuɗuf nda ksa ŋuɗuf ya ta mnamata gwaɗa Lazglafta.
5 Ka vlaghuna vla Lazglafta lɓa ŋuɗuf ŋa mndu nda ksa ŋuɗuf ŋa mndu ta nzaku nda dzratá wi mataba ghuni nda ma ksay ghuni ta saɗa *Yesu Kristi.
6 Mantsa ya,
ŋa zləzlvay ghuni nda ŋuɗuf turtuk,
nda lwi turtuk guli,
ta Lazglafta Da ni ma Mghama mu Yesu Kristi.
Ŋa inda mndu na Lfiɗa Gwaɗa
7 Kasuvuswakasa ta vgha tama sani nda sani,
ŋa vlaŋtá glaku ta Lazglafta,
manda ya kasuvə *Kristi ta vgha nda kaghuni ya.
8 Ka yu ta mnaghunata ná,
sasa *Yesu Kristi maganatá slna ta la *Yahuda ŋa maranaŋtá həŋ kazlay:
Tɗukwa Lazglafta kəʼa,
ŋa dzanaghatá ghəŋa skwi ya tanaf Lazglafta ta imi ta sləməŋ ta dzidzíha taŋ.
9 Sasa guli ŋa zləzlvay gwal kul nzakway ka la Yahuda ta Lazglafta ta ghəŋa tawa hiɗahiɗa ni manda ya nda vinda ma deftera Lazglafta kazlay:
tsaya dzaʼa kəl yu ka zləzlva hga gha mataba gwal kul nzakway ka la Yahuda,
ŋa fay ɗa ta laha vla glaku ŋa hga ghaª kəʼa ya.
10 Ka gwaɗa Lazglafta mnata guli na:
« Kaghuni gwal kul nzakway ka la Yahuda,
gwafwagwa ta rfu kawadaga nda mnduha Lazglaftaª,
» kaʼa.
11 Kaʼa mnata guli na:
« Inda kaghuni gwal kul nzakway ka la Yahuda,
zləzlvawa Mgham Lazglafta.
Ka zləzlva inda mndəra mndu ta Lazglaftaª,
» kaʼa.
12 Ka anabi Isaya nda ŋa ni guli na:
« Dzaʼa sab sa zivir ma mndəra Yesay,
ŋa gay ni ta Mgham ta ghəŋa la Grek,
ŋa nzakwa la Grek nda fatá ghəŋ tidaª,
» kaʼa.
13 Lazglafta ná,
Lazglafta ta vla faftá ghəŋ ya.
Ka vlaghuna vla tsi ta rfu nda zɗaku ma zlghay ghuni nda ŋuɗuf,
kada nzata kuni nda fata ghəŋ nda ma mbrakwa Sulkum nda ghuɓa.
Pwal ná, kwalva Kristi ya
14 Zwana ma ɗa,
graf gra iʼi ka ghəŋa ɗa kazlay:
Nda fa vgha ghuni ŋa maga skwi ɗina,
nda sna kuni ta inda skwi ya nda ra ka snaŋta,
nda sna kuni ta tva vluvtá hiɗaku kəʼa.
15 Aŋ mndani,
ma na defteri vindaghunaf yu na ná,
dvaghunagha dva yu ma sana vliha ta ghəŋa sana skwiha ŋa havakta ghuni.
Kəl yu ka mnaghunata mantsa ya ná,
kabga zɗəɗiŋ zɗa Lazglafta ta huɗi,
16 ka faftá iʼi ka kwalva *Yesu *Kristi mataba gwal kul nzakway ka la *Yahuda.
Ka faghutá tsi ta iʼi ŋa mna Lfiɗa Gwaɗa ni,
ŋa nuta gwal kul nzakway ka la Yahuda ka skwi vlaŋ lu ta zɗəganatá Lazglafta.
Sulkum nda ghuɓa ta nanaftá tsa skwi ya vla lu ya ka skwi ta raŋta Lazglafta.
17 Tsaya tama ná,
ta ghubay yu ta ghəŋa ɗa ma Yesu Kristi,
ta ghəŋa slna Lazglafta ya maga yu.
18 Haɗ yu ta walaŋtá mna sana skwi,
ka ya maga Kristi nda ma iʼi a tsi wa.
Nda ma iʼi hlakta tsi ta gwal kul nzakway ka la Yahuda ŋa nzakwa taŋ ka gwal snanatá gwaɗa ta Lazglafta.
Nda nza nda ma gwaɗa ɗa,
nda nza nda ma slnaha ɗa.
19 Nda ya nda ma mazəmzəmha nda mandərmimiha,
nda mbrakwa Sulkuma Lazglafta magata tsi.
Zlraf ma luwa Ursalima yu ta tuza tsa *Lfiɗa Gwaɗa ta Kristi ya ka laghu dikw ta haɗika Iliri.
20 Ma vli ya ta kul snaŋtá mnduha ta gwaɗa ta Kristi yeya kumta maya ɗa ta mna Lfiɗa Gwaɗa kada kwala yu ta magay ta thatá ŋa sana mndu ta magata.
21 Mantsa ya vindafta lu ma deftera Lazglafta kazlay:
« Dzaʼa nghaŋ ngha gwal ta kul walaŋta lu ta mnanaŋtá gwaɗa tida ta həŋ.
Dzaʼa snaŋ sna gwal ta kul walaŋta lu ta snanamt᪠həŋ guli kəʼa. »
Gwaɗa Pwal ta ghəŋa sliʼa ni da Ruma
22 Tsaya skwi ta pyaftá iʼi ka lab da kaghuni.
23 Ndanana tama ná,
kɗiŋ kɗa yu ta slna ɗa ma tsa luwaha ya.
Nda kɗa fitika ɗvafta ɗa ta lagha da kaghuni.
24 Ta lab yu ka dzaʼa ta haɗika Ispay ya ná,
dzaʼa lagha la yu da nzəɗavata da kaghuni,
ŋa sliʼafta ɗa hada ka dzaʼa,
ŋa katihata ghuni.
25 Ndanana karaku ná,
nda sliʼa yu da luwa Ursalima.
Ta klaŋtá katu ya kataŋ lu ta mnduha Lazglafta hada yu,
26 kabga gwal zlghay nda ŋuɗuf ta haɗika Mekaduniya nda ya ta haɗika Akaya ná,
kura kura hahəŋ ka ghəŋa taŋ ta tskaftá skwi ŋa kataŋtá gwal ka pɗu mataba mnduha Lazglafta ma luwa Ursalima.
27 Hahəŋ ka ghəŋa taŋ ta kurata kataŋtá həŋ.
Aŋ mndani,
ka dməŋ nzakwa ni má ta həŋ kabga kataŋ kata la *Yahuda ta gwal kul nzakway ka la Yahuda nda mutsaftá tfa wi ma Sulkuma Lazglafta.
Mantsa ya guli ná,
nda ra ka kataŋta gwal kul nzakway ka la Yahuda ta hahəŋ nda skwiha ma ghəŋa haɗik ta htaghuta da həŋ.
28 Dgata ɗa ta vgha nda tsa skwi ya,
graf gra yu kazlay:
Lam la tsa skwi tsghanaf lu ta həŋ ya da dzva taŋ kəʼa ya,
sliʼafta ɗa tsa ka dzaʼa ta haɗika Ispay,
ŋa lagha ɗa nda da kaghuni.
29 Nda sna yu kazlay:
Ma tsa lagha dzaʼa lagha yu da kaghuni ya ná,
dzaʼa lagha nda tfatawa *Kristi katakata yu da kaghuni kəʼa.
30 Zwana ma ɗa,
ma nzakwa ndiʼatá vgha mu ma *Yesu Kristi nda ya ma ɗvu ya ta vlamata Sulkum ná,
ta ndəɓa dzvu yu da kaghuni ŋavawa ŋa kawadaga nda iʼi ma maga duʼa da Lazglafta ŋa katihata.
31 Magawa duʼa da Lazglafta kada ndapta yu ma dzva gwal kul snaŋtá Yesu ta haɗika Zudiya,
nda ya ŋa tsuʼafta mnduha ma Ursalima nda rfu ta na katu ta klə yu ŋa taŋ na.
32 Mantsa ya tama,
kata kumay Lazglafta,
dzaʼa ɓhadagha ɓha yu nda rfu da kaghuni,
ŋa mbiʼapta ɗa ta vgha da kaghuni.
33 Ka nza Lazglafta ta vla zɗaku kawadaga nda kaghuni demdem.
Ka nza tsi mantsa ya.