Lazglafta ta zbaptá la Israʼila
9
1 Kahwathwata na gwaɗa dzaʼa yu mnay na,
ma hga *Yesu *Kristi,
tsakalawa ɗa a wa.
Manda tsaya ka nzakwa ni ka ndana ɗa guli ta mnihata Sulkum nda ghuɓa.
2 Ta kuzliha kuzla ta ŋuɗufa ɗa katakata,
nda ŋəra ŋuɗufa ɗa inda fitik,
3 ta ghəŋa zwana ma ɗa ta nzakway ka mndəra ini.
Ta dər ma Ksiʼafta Lazglafta ta iʼi,
ka dgihata nda Kristi,
ta mbanaftá tsi ta hahəŋ,
ka yu.
4 La Israʼila həŋ.
Hahəŋ nanaf Lazglafta ka zwana ni,
hahəŋ maranaŋ tsi ta sgita ni,
nda hahəŋ dzrafta tsi ta wi,
hahəŋ vlaŋ tsi ta zlahu,
hahəŋ maranaŋ tsi ta tvi ká həŋ da tsəlɓu ta kəma ni,
hahəŋ tanaf lu ta imi ta sləməŋ,
5 dzidzíha taŋ gwal kulaŋ lu,
nda tvi sluʼuvgha guli ná,
ma mndəra taŋ saba Kristi.
Tsatsi ta hemanatá inda skwi demdem.
Zləzlvama ŋa ɗekɗek ta Lazglafta.
Ka nza tsi mantsa.
6 Vraghu nda wa ni a tsa gwaɗa Lazglafta ta mnata ya wu,
kabga inda gwal ta nzakway yagap lu ma la Israʼila a ta nzakway ka vərɗa la Israʼila wa.
7 Guli ná,
inda gwal ta nzakway yagap lu ma mndəra Abraham a ta nzakway ka vərɗa zivirha Abraham wa.
Ka Lazglafta nda Abraham na:
« Nda ma Izakª dzaʼa yagapta zivira gha,
» kaʼa.
8 Ghəŋa tsa gwaɗa ya na:
Zivir ya yagap lu nda ma sluʼuvgha a gwal ta nzakway ka zwana Lazglafta wa.
Ama zwani ya yagap lu nda ta tva dzratá wa Lazglafta nda Abraham,
zwana zivir.
9 Wya tsa gwaɗa tata ta imi ta sləməŋ mnə Lazglafta ya:
« Ta vraktá yu kɗaghalam manda na luwa ná,
nda zwaŋª ta ghuva Sara,
» kaʼa.
10 Manda va tsaya luta tsi nda Rebeka markwa dzidza mu Izak,
ka yanatá tsi ta mbuhwali.
11-12 Makəɗ lu ka yatá tsa zwani ya,
ka Lazglafta nda Rebeka mantsa:
« Mali dzaʼa ndəɓa dzvu da sagəŋ,
» kaʼa.
Ta la a tsa zwani ya saha ta haɗik,
ka snaŋta taŋ ta skwi ɗina nda ya kul ɗinaku nda tsa ta luta tsa gwaɗa ya wa.
Nza nza tsa skwi ya mantsa kada nzakwa skwi ta kum Lazglafta manda ya tha tsi.
Tsa zbaf lu ya ná,
ŋa nzakwa ni manda ya ta kum Lazglafta hgafta lu,
ta vəl magata ni ta slna a wa.
13 Manda ya nda vinda ma deftera Lazglafta na:
« Zbuzba yu ta Yakubu ka zlaŋtá Ghesavª,
» kaʼa
14 Kinawu ka mu dzaʼa mnay tama?
Tɗukwa a Lazglafta nda tsa tama wu rki na?
Mantsa ya a ɗekɗek wa.
15 Ka Lazglafta nda Musa na:
« Ta magana maga yu ta skwi ɗina ta mndu ya ta kum yu ta maganatá skwi ɗina.
Ta taway yu ta hiɗahiɗa ta mndu ya ta kum yu ta tawatá hiɗahiɗa tidaª guli,
» kaʼa.
16 Tsaya tama,
ka zbaf zba Lazglafta ta mndu ná,
ta vəl kumafta maya tsa mndu ya a wu,
ta vəl magata ni ta slna a guli wa.
Lazglafta tani ta ɗvafta maganatá skwi ɗina,
kaʼa.
17 Wya ka Lazglafta mnanatá Firʼawna,
ka vindaftá lu ma defteri:
« Faf fa yu ta kagha ka mgham ŋa maravata mbrakwa ɗa ta kagha,
nda ya ŋa tiŋtá hga ɗa ta ghəŋa haɗikª demdem. »
18 Mantsa ya tama ná,
ta magay Lazglafta ta skwi ɗina ŋa mndu ya kumaŋ tsi,
ta təŋay ta ŋuɗufa mndu ya kumaŋ tsi guli.
Manda ya kumaŋ tsi ta maga Lazglafta ta slna ni
19 Kawayaka skwi dzaʼa mnay ka ŋa ɗa kazlay:
Ka si mantsa ya tsi,
kabgawu ta kəl Lazglafta ka mnay,
maga maga kuni ta dmaku kəʼa nda mnduha tama ɓa?
Tsaw wa ya dzaʼa laviŋtá kwalaghutá skwi ya kumaŋ Lazglafta na?
20 Kagha mnda səla,
wa hga gha ŋa zlərɗa ya kumaŋ Lazglafta na?
Ta mnay skwi tsaf lu nda rɓisl ŋa mndu ya ta tsafta kazlay:
Kabgawu kəl ka ka tsaftá iʼi manda na na kəʼa ra?
21 Tsa mnda tsafta huzla ya a ta laviŋta maga skwi ya kumaŋ tsi nda tsa rɓisl ya ra?
Nda va tsa rɓisla turtuk ya,
laviŋ lava ta tsatsaftá huzla ya ŋa maga slna nda tsi baɗu gwaɗa,
nda ya ŋa maga slnaha baɗu walaya fitikha.
22 Ka manda tsaya kumaŋta Lazglafta ta maraŋtá ɓasata ŋuɗufa ni,
nda maraŋta ni ta mbrakwa ni ma suʼay ni nda ksatá ŋuɗuf katakata ta ghəŋa gwal nda fa ŋa zwaɗuta ma ɓasata ŋuɗufa ni ya ní,
nu ŋa gha mida tama na?
23 Mantsa ya kumaŋta Lazglafta ta snaŋta mnduha ta glakwa sgita ni ŋa gwal tawa tsi ta hiɗahiɗa ta həŋ,
tsa gwal ya thanaf tsi ŋa lami da sgita ni ya.
24 Ama tsa gwal hagaf tsi ya,
mataba la *Yahuda yeya a wu,
kulam mataba gwal kul nzakway ka la Yahuda tani.
25 Tsaya skwi ya mna tsi ma deftera Huseya:
« Mnduha ɗa kuni,
ka yu dzaʼa hga gwal kul haɗ ka mnduha ɗa.
Gwal ɗvu yu kuni,
dzaʼa hga yu ta gwal si kul ɗvuta yu.
26 Ma vli ya mnana lu ta həŋ,
“mnduha ɗa a kuni wu” kəʼa ya,
ma tsa vli ya dzaʼa hga lu ta həŋ ka Zwana Lazglafta nda hafuª. »
27 Ka Isaya nda ŋa ni klaŋtá lwi nda zwana la Israʼila guli na:
« Dər manda wutak ta wa ghwa yatá zwana la Israʼila ná,
mtsel yeya gwal dzaʼa mbaʼata mataba taŋ.
28 Dzaʼa sasa Mgham Lazglafta tsanaghatá guma ta ghəŋa haɗik demdem,
haɗ dzaʼa laghu da gərɗaku wuª,
» kaʼa.
29 Manda ya mna Isaya ghalya guli na:
« Ka má pɗama a Lazglafta ta Mbruta ta zivir wu katsi ná,
má nda nza mu manda luwa Sədum,
má nuna mu manda luwa Ghamuraª guli,
» kaʼa.
La Israʼila nda tva mbaku ma zlghay nda ŋuɗuf
30 Kinawu tsa tama?
Gwal kul nzakway ka la *Yahuda ná,
zbaŋ a hahəŋ ta nzakway ka gwal tɗukwata wa ira Lazglafta wu,
ka mutsaftá həŋ ta nzakway ka gwal tɗukwata wa ira Lazglafta nda ma zlghay nda ŋuɗuf.
31 La Israʼila ya guli ná,
zbaŋzba hahəŋ ta magatá skwi ta kum zlahu,
ŋa nzakway ka gwal tɗukwata wa ira Lazglafta,
triɗ trap tra həŋ ta magatá tsa skwi kumaŋ zlahu ya.
32 Kabgawu kəl la Israʼila ka trapta na?
Kabga zbaŋ a həŋ nda ma zlghay nda ŋuɗuf wu,
nda ma magatá skwi kumaŋ zlahu dzaʼa mutsakwa tsi ka hahəŋ.
Ka dzuŋtá tuthun ta həŋ « ta palaka tuthun. »
33 Manda ya nda vinda ma defteri kazlay:
Wana yu ta fatá palaka tuthun ma luwa Siyuna,
pala ya dzaʼa zlambanaptá mnduha.
Mndu dzaʼa zlghafta ná,
haɗ dzaʼa pghanaghatá hula wuª kəʼa ya.