Rusay Atiyen ta gwaɗa Lazglafta
7
1 Ka mali ta ghəŋa gwal dra skwi ŋa Lazglafta nda tsi mantsa:
« Tsaw mantsa na skwi ta gwaɗ lu ta kagha na rki na?
» kaʼa nda tsi.
2 Ka Atiyen mantsa:
« Zwana ma ɗa nda dadaha ɗa,
maranaŋ mara Lazglafta dagala ta ghəŋa ni ta dzidza mu Abraham ta tsa fitika nzakwa ni ta haɗika Mesuputami ya,
makəɗ tsi ka laghu da nzata ma luwa Haraŋ.
3 Kaʼa nda tsi mantsa:
“Zlaŋ zla ta haɗika gha,
nda la ghuni tani,
ka dzaʼa ka ta haɗik ya dzaʼa maraghata yuª,”
kaʼa.
4 Mantsa ya,
ka sliʼaftá tsi ka zlaŋtá haɗika Kaldiya ka laghu da nzata ma luwa Haraŋ.
Tahula mtatá da ni ka sliʼaftá tsi ka laghu da nzata ma na haɗik ta nzaku kaghuni mida gitana na.
5 Ma tsa fitik ya,
haɗ vli vlaŋ Lazglafta ka ŋa ni dər ka kwitikw wa.
Ama ka tanaftá Lazglafta ta imi ta sləməŋ kazlay:
Dzaʼa vlagha vla yu ta na haɗik na,
ŋa nzakwa ni ka ŋa gha,
nda ya ŋa zivira gha tani kəʼa.
Ma tsa fitik ya,
ta mutsaf a Abraham ta zwaŋ karaku wa.
6 Kaʼa nda tsi guli mantsa:
“Dzaʼa laghu la zivira gha da nzapta ta sana haɗik ma mayəm,
ŋa dulay lu ta həŋ,
ka ga vuʼa ŋa taŋ hada ka vaku fwaɗ dərmək.
7 Iʼi dzaʼa ganaptá iri ta tsa gwal ta dula həŋ ya guli.
Tahula tsa,
ŋa sliʼafta taŋ ka saghwi da tsəlɓu ma ghuva ɗa ma na vli naª,”
kaʼa.
8 Ka dzraftá Lazglafta ta wi nda Abraham.
Tsiŋtá fafaɗ,
na ŋizla tsa dzratá wi ya.
Tsaya kəl Abraham ka tsanatá fafaɗa zwaŋa ni Izak baɗu matghasa fitik manda yagata.
Mantsa ya Isiyaku,
ka tsanatá tsi ta ŋa Yakubu.
Yakubu guli,
ka ɗatsanatá tsi ta ŋa zwana ni ghwaŋpəɗ his,
ta nzakway ka dzidzíha mu ya.
9 « Ka drə dzidzíha mu ta Yusufu,
ka skwaptá həŋ.
Ka klaghatá lu da ga vuʼa ma luwa Masar.
Nziya nza tsi,
kawadaga Lazglafta nda tsi.
10 Ka klaptá tsi ma ɗaŋwa ni,
ka vlaŋtá ɗifil ŋa gwaɗa nda Firʼawna ta nzakway ka mghama Masar.
Ka zɗəganatá tsi ta tsa mgham ya.
Ka fatá mgham ka ŋumna haɗika Masar,
ka zwira ni kəʼa fata guli.
11 Ka slatá maya ta inda haɗika Masar nda ya ta haɗika Kanʼana.
Ghuyaŋ ghuya lu katakata.
Ka traptá dzidzíha mu ta skwi ŋa zaŋta.
12 Ka snaŋtá Yakubu kazlay,
mamu skwa zay ta haɗika Masar kəʼa.
Ka ghunadaptá tsi ta dzidzíha mu nda taŋtaŋa səla taŋ.
13 Ka ləglap həŋ nda mahisa səla,
ka mnanaŋtá Yusufu ta ghəŋa ni ta zwana ma ni.
Ka snaŋtá Firʼawna ta mndəra taŋ guli.
14 Ka tsəghafta Yusufu ta lwi,
ŋa hlagaghutá i da ni Yakubu nda la ga taŋ tani.
Ta magay mbsaka taŋ ta ndəfáŋ mbsak hutaf mida.
15 Ka laha Yakubu da luwa Masar.
Hada mtuta tsi.
Mantsa ya dzidzíha mu guli.
16 Ka hlaftá lu ta mbla taŋ ka hlakta da luwa Sekem.
Ka papaɗamtá həŋ hada,
ma vli ya skwa Abraham nda tsedi da zwana Hamur ma luwa Sekem.
17 « Manda ndusakta tsa fitik ŋa magakwa tsa skwi tanaf Lazglafta ta imi ta sləməŋ ta Abraham ya,
ka sgavaghatá yavafta mndəra amu ma luwa Masar.
18 Ka laf sana mgham ta pala ma luwa Masar,
sna a tsatsi ta Yusufu wa.
19 Ka nənɓaptá tsi ta mndəra amu.
Ka dulu tsi ta dzidzíha mu,
ŋa vlata taŋ ta zwana taŋ tkweʼ ŋa rwanatá həŋ.
20 Ma tsa fitik ya,
ka yatá lu ta Musa.
Ka ka nda ɗinakwa ni,
zɗəgana zɗa ta Lazglafta guli.
Ka zatá tsi ta tili hkən ta glaku ma həga ga da ni.
21 Manda kɗakwa dadaha ni ta klafta ka laghu ɗifanata,
ka slafta makwa Firʼawna tida ka klaftá tsi ka klaghata glanafta ka zwaŋa ni.
22 Mantsa,
ka taghanaftá lu ta Musa ta ɗifila la Masar,
ka nzaku tsi ka mndu ta laviŋtá gwaɗa,
nda mbra guli ma slna ni.
23 Ka kumaftá Musa ta dzaʼa nghanaghatá la taŋ la Israʼila magafər ima ni ta fwaɗ mbsak.
24 Ka nghaŋtá tsi ta sana mnda la Masar ta ghuya ɗaŋwa ŋa sana mnda la Israʼila.
Ka lagha tsi kataŋta.
Ka dzatá tsi ta tsa mnda la Masar ya ŋa play.
25 Ba dzaʼa nda sna zwana ma ɗa kazlay:
Iʼi fa Lazglafta ŋa mbanaftá həŋ kəʼa,
ka tsatsi si ta ndanay,
tsaw sna a hahəŋ wa.
26 Ga mahtsima ni,
ka lagha Musa guyamtá ma lmu ta lmu gwal his mataba la Israʼila.
Si ka kum tsi ta dzranaftá həŋ.
Kaʼa nda həŋ mantsa:
“Graha ɗa!
La zwana ma kuni ná,
kabgawu ta kəl kuni ka lmu na?”
kaʼa.
27 Ka tsa mndu ta zbaftá zwaŋama ni nda lmu ya sliŋwidiŋtá Musa mantsa:
“Wa ta faghamta ka mghama ŋni ŋa tsa guma ta aŋni na?
28 Ari ta kumay ka ta dzihata manda tsa dzata gha ta mnda la Masar ɗahawu ya a kay na?”
kaʼa nda tsi.
29 Na snaŋtá Musa ta tsa gwaɗa ya,
ka hwayaftá tsi ka laghwi ta haɗika Midyaŋ.
Ka yayatá tsi ta zwana zgwana his hada.
30 « Tahula zata ni ta vaku fwaɗ mbsak hada,
ka maranaŋtá duhwala Lazglafta ta ghəŋa ni ma vu ta mubuk ma mtak ta vata ghwá Sinay.
31 Ka tsutá Musa ka nghay,
nghər tsi ta tsa skwi ya.
Ka gavadaghatá tsi ŋa tsəmanavata.
Ta gavadaghatá tsi,
ka snaŋtá tsi ta lwa Mgham Lazglafta.
Kaʼa mantsa:
32 “Iʼi Lazglafta dzidzíha gha,
ta nzakway ka Lazglafta Abraham,
nda Izak,
nda Yakubu ya,
kaʼa.
Ka ghudzaku Musa ta ghudzaku da zləŋ,
Walglaŋ a ta nghay wa.
33 Ka Mgham Lazglafta nda tsi mantsa:
Hlap hla ta ɓaɓah ma səla gha,
kabga na vli slada ka na ná,
haɗik nda ghuɓa ya.
34 Nghadap ngha yu ta ghuya ɗaŋwa ŋa mnduha ɗa ta ghuy lu ma haɗika Masar.
Sniɗigha sna ŋa ɗa ghəŋa taŋ,
kəl yu ka saha da hlaptá həŋ mida.
Ndanana na,
sawi ka ghuna yu ta kagha da luwa Masar,
ª” kaʼa nda tsi.
35 « Va tsa Musa si vziŋ la Israʼila kazlay,
wa ta famtá kagha ka mgham,
ŋa tsa guma ta ghəŋa aŋni na?
kəʼa ya kay,
va tsa tsatsi ya ghunaf Lazglafta ŋa nzakay ka mgham,
ŋa mbanaftá mnduha ni.
Nda ma wa duhwala Lazglafta nghaŋ Musa ma vu ta mubuk ya,
mnanata Lazglafta ta tsa gwaɗa ya ta Musa.
36 Tsa Musa ya ta hlagaptá zwana la Israʼila,
nda maga mazəmzəm nda skwa ndərmimay ma haɗika Masar,
nda ya ma drəfa Dva,
nda ya ma mtak,
ka zatá həŋ ta vaku fwaɗ mbsak ta tvi ma mtak.
37 Tsa Musa ya ta mnay nda zwana la Israʼila guli kazlay:
Dzaʼa klagap kla Lazglafta ta anabi manda iʼi mataba la ghuniª ya kəʼa.
38 Ma fitika tskavata zwana la Israʼila ma zivak,
tsa Musa ya ta nzakway ma takataka dzidzíha mu,
nda duhwala Lazglafta ta gwaɗa nda tsi,
ta ghwá Sinay ya.
Hada tsuʼamafta tsi ta gwaɗa hafu ka klamakta.
39 Ka kwalaghutá dzidzíha mu ta snanata,
ka vziŋtá həŋ,
ka kuma vru da Masar.
40 “Magaŋnaf maga ta Lazglafta ŋa mbaɗa ta kəma ŋni,
kabga sna a ŋni ta skwi ta slanaghat᪠nana Musa ta hlagaŋnapta ma Masar na wu,”
ka həŋ nda Haruna.
41 Mantsa fitik ya,
ka tsaftá həŋ ta skwi manda zwaŋa sla ka pla ghəŋ ŋa ni,
ka skalu ŋa skwi ya tsaf hahəŋ nda dzva taŋ.
42 Ka mbəɗanatá Lazglafta ta hul ta həŋ,
ka zliŋtá həŋ ŋa tsəlɓu ŋa tekwatsaha ta luwa manda ya nda vinda ma deftera la anabi ta mnay kazlay:
Ari la Israʼila,
ŋa ɗa plihata kuni ta ghəŋ
ma zata ghuni ta vaku fwaɗ mbsak ma mtak ya ra?
43 Ŋa ɗa a wa.
Ŋa həga tumpula
Mulku,
nda fwata tekwatsa Refaŋ hlaf
kuni ka pghata ka Lazglafta ghuni a tsi kay ra.
Tsaya dzaʼa kəl yu ka hlaftá kaghuni
ka tsughwaɗaghunaptá haɗika Babilaª,
kaʼa.
44 « Ma nzakwa dzidzíha mu ma mtak ná,
mamu si həga tumpul pgham lu ta huzla dzratá wi nda Lazglafta mida,
da həŋ.
Manda va ya mnanaf Lazglafta ta Musa ŋa magafta ni ya,
ka magaftá tsi manda va ya nghaŋ tsi.
45 Tahula tsa,
ka zlghaftá dzidzíha mu guli da dadaha taŋ.
Ka pghaftá Dzesuwa ta həŋ ka hladamta da tsa haɗik ghəzlaf Lazglafta ta mnduha mida ta kəma taŋ ya,
kawadaga nda tsa həga tumpul ya.
Ka nzaku tsi ha ka sagha ta fitika Dawuda.
46 Tsatsi zɗanaŋ Lazglafta ta huɗi,
ka ɗawaŋtá da Lazglafta ŋa vlaŋtá tvi,
ŋa banaftá həga nda ghuɓa,
ta tsatsi Lazglafta Yakubu.
47 Nziya nza tsi tama,
Salumuŋ ta baftá tsa həga ya.
48 Tsaw haɗ Lazglafta Dagala ta nzaku ma həga baf mnda səla manda va ya mna *Anabi kazlay:
49 Ta luwa vla nzakwa ɗa,
vla fa səla ɗa ya guli ná,
haɗik ya.
Mndəra wati həga ya dzaʼa kuni biɗifta na?
Wati vli ya prək ka lama ɗa dida na?
50 Iʼi a ta magaftá tsa skwiha ya ra kəʼa yaª. »
51 Ka Atiyen guli mantsa:
« Kaghuni ná,
təŋ təŋa ghəŋa ghuni.
Ta hgə Lazglafta ta kaghuni ná,
duduzla ka kuni nzata,
va a kuni ta sna gwaɗa da Sulkum nda ghuɓa manda va tsa nzakwa dzidzíha ghuni ya wa.
52 Wati ma anabi ya kul ganaptá dzidzíha ghuni ta iri na?
Ta psla psla həŋ ta gwal ya ta mna gwaɗa ta ghəŋa mndu ta nzakway tɗukwa.
Ta na fitik na guli,
ka skwaptá kaghuni ta tsa mndu tɗukwa ya ka dzata.
53 Kaghuni ka ghəŋa ghuni ta tsuʼaftá zlahu nda ma dzva duhwala Lazglafta,
ka kwalaghutá kuni ta snatá tsa zlahu ya guli,
» kaʼa.
Mtakwa Atiyen
54 Na snay taŋ ta tsa gwaɗa ya,
ka sliʼavaftá həŋ manda binzauŋ ta ghəŋa Atiyen,
ka hiʼidə həŋ ta dzvu ka wuslikay.
55 Ama ka nghadaftá Atiyen,
mndu ya nda ndəgha nda Sulkum nda ghuɓa,
ta luwa.
Ka nghaŋtá tsi ta glakwa Lazglafta nda *Yesu ta sladu nda ga zeghwa Lazglafta.
56 Kaʼa nda həŋ kay guli mantsa:
« Wana nda ngha yu ta gunatá luwa.
Waʼa *Zwaŋa mndu ta sladu nda ga zeghwa Lazglafta,
» kaʼa.
57 Ka hlaftá həŋ ta wi katakata,
ka dzadzamtá dzvu ma sləməŋ,
ka vavalaftá həŋ tida.
58 Ka tsəhaftá həŋ ka klaghata tahula luwa,
ka zlərtsay nda pala ŋa dzata.
Ka pghatá la ka masləmtsəka tsa skwi ya ta lguta taŋ da sana galaɓay,
Sawul hga ni.
59 Ta zlərtsə həŋ ta Atiyen nda pala ya,
ta mag tsatsi ta duʼa da Lazglafta.
Kaʼa mantsa:
« Mgham Yesu,
tsuʼa ta hafa ɗa,
» kaʼa.
60 Ka tsəlɓatá tsi,
ka gwaɗata nda lwi dagala.
Kaʼa mantsa:
« Mghama ɗa,
ma mbəɗanaf ka ta həŋ ta na dmaku na,
» kaʼa.
Tahula mnata ni ta tsaya,
ka sab hafu sref mida.